ಗುಜರಾತ್‌ನ ಸೂರತ್ ನಗರದ ಜವಳಿ (ಸೀರೆ) ಉದ್ಯಮಿಯೊಬ್ಬರು ತಮ್ಮ ಸಂಸ್ಥೆಯಲ್ಲಿ ಕಾರ್ಯನಿರ್ವಹಿಸುವ ಪ್ರತಿಯೊಬ್ಬ ನೌಕರನಿಗೂ ದೀಪಾವಳಿ ಹಬ್ಬದ ಸವಿನೆನಪಾಗಿ ತಲಾ 1 ಲಕ್ಷ ರೂಪಾಯಿಗಿಂತಲೂ ಹೆಚ್ಚು ನಗದು ಬೋನಸ್ ನೀಡಿ ಗೌರವಿಸಿದ್ದು, ಈ ಕ್ಷಣದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗಿದೆ.
ಉದ್ಯಮಿ ಮುಂಡೆ ಅವರು ತಮ್ಮ ಸಂಸ್ಥೆಯ ನೌಕರರಿಗೆ 10, 20, 100 ಹಾಗೂ 500 ರೂಪಾಯಿ ಮುಖಬೆಲೆಯ ನೋಟುಗಳ ಕಟ್ಟುಗಳನ್ನು ನಗದಾಗಿ ವಿತರಿಸಿದ್ದಾರೆ. ವಿಡಿಯೋದಲ್ಲಿ ನೌಕರರು ಬೋನಸ್ ಪಡೆದು ಭಾವುಕರಾಗಿ ಉದ್ಯಮಿಯ ಪಾದ ಮುಟ್ಟಿ ನಮಸ್ಕರಿಸುವುದು ಮತ್ತು ಆನಂದಭಾಷ್ಪ ಸುರಿಸುವುದು ಕಂಡುಬಂದಿದೆ.
ಇದನ್ನೂ ಓದಿ: ಅಚ್ಛೇ ದಿನಗಳು ಮುಗಿದವು! ಗುಜರಾತ್ ವಜ್ರಗಳ ಉದ್ಯಮ ಭಾರೀ ಹಿಂಜರಿತದಲ್ಲಿ ತತ್ತರ!
ತಮ್ಮ ನೌಕರರನ್ನು ಕೇವಲ ಕೆಲಸಗಾರರೆಂದು ಭಾವಿಸದೆ “ನನ್ನ ಸ್ವಂತ ಕುಟುಂಬದ ಸದಸ್ಯರು” ಎಂದು ಕರೆದಿರುವ ಉದ್ಯಮಿ, ಅವರ ಶ್ರಮವೇ ಈ ಸಂಸ್ಥೆಯ ಬೆಳವಣಿಗೆಗೆ ಕಾರಣ. ಹೀಗಾಗಿ ಈ ಬೋನಸ್ ಹಣವನ್ನು ಮಾಸಿಕ ವೇತನದಂತೆ ನೀಡದೆ, ಪ್ರೀತಿಯ ಆಶೀರ್ವಾದದ ರೂಪದಲ್ಲಿ ಹಸ್ತಾಂತರಿಸಿದ್ದೇನೆ ಎಂದು ಹೇಳಿದ್ದಾರೆ.
ಉದ್ಯಮಿಯ ಈ ಔದಾರ್ಯಕ್ಕೆ ಸಾಕ್ಷಿಯಾದ ನೌಕರರಲ್ಲಿ ಒಬ್ಬರಾದ ರೇಖಾಬೆನ್ ಭಲಾಡಾ ಎನ್ನುವವರು ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿ, “ಈ ಬೋನಸ್ ಹಣದಿಂದ ನಾನು ನನಗೊಂದು ಸ್ವಂತ ಮನೆ ಖರೀದಿಸುವ ಕನಸನ್ನು ನನಸು ಮಾಡಿಕೊಳ್ಳಲಿದ್ದೇನೆ” ಎಂದು ಭಾವುಕರಾಗಿ ತಿಳಿಸಿದ್ದಾರೆ.
ಸೂರತ್‌ನ ಉದ್ಯಮಿಗಳು ತಮ್ಮ ನೌಕರರಿಗೆ ದೀಪಾವಳಿ ಸಂದರ್ಭದಲ್ಲಿ ಇಂತಹ ಉದಾರ ಕೊಡುಗೆಗಳನ್ನು ನೀಡುವುದು ಇದೇ ಮೊದಲೇನಲ್ಲ. ಸೂರತ್ ನಗರವು ನೌಕರರಿಗೆ ದುಬಾರಿ ದೀಪಾವಳಿ ಉಡುಗೊರೆಗಳನ್ನು ನೀಡುವ ಮೂಲಕ ದೇಶಾದ್ಯಂತ ಸದಾ ಸುದ್ದಿಯಲ್ಲಿರುತ್ತದೆ.
ಸೂರತ್‌ನ ಪ್ರಸಿದ್ಧ ವಜ್ರದ ಉದ್ಯಮಿ ಸಾವ್‌ಜಿ ಧೋಲಾಕಿಯಾ ಅವರು 2014 ರಿಂದ 2016ರ ಅವಧಿಯಲ್ಲಿ ತಮ್ಮ ನೌಕರರ ಕಾರ್ಯಕ್ಷಮತೆಯನ್ನು ಮೆಚ್ಚಿ ಸಾವಿರಾರು ಕಾರುಗಳು (1,260ಕ್ಕೂ ಹೆಚ್ಚು ಕಾರುಗಳು), 400ಕ್ಕೂ ಹೆಚ್ಚು ಉಚಿತ ಫ್ಲಾಟ್‌ಗಳು (ಮನೆಗಳು) ಮತ್ತು ವಜ್ರದ ಆಭರಣಗಳನ್ನು ಬೋನಸ್ ರೂಪದಲ್ಲಿ ನೀಡಿ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದ್ದರು.
ನೆಟ್ಟಿಗರು ಸೂರತ್ ಉದ್ಯಮಿಯ ಈ ವೈರಲ್ ವಿಡಿಯೋಗೆ ಶ್ಲಾಘನೆ ವ್ಯಕ್ತಪಡಿಸಿದ್ದು, “ನಿಜವಾದ ನಾಯಕತ್ವ ಮತ್ತು ನೌಕರರ ಶ್ರಮಕ್ಕೆ ಸಿಕ್ಕ ಗೌರವ” ಎಂದು ಕಾಮೆಂಟ್ ಮಾಡುತ್ತಿದ್ದಾರೆ.
