ವಾಹನಗಳ ಇಂಧನ ವ್ಯವಸ್ಥೆಗೆ ಸಂಬಂಧಿಸಿದಂತೆ ಮಹತ್ವದ ಮಾಹಿತಿಯೊಂದು ಹೊರಬಿದ್ದಿದೆ. ಹಳೆಯ ಮಾದರಿಯ, ಅಂದರೆ ‘E10’ (ಶೇ 10ರಷ್ಟು ಎಥೆನಾಲ್ ಮಿಶ್ರಿತ) ಇಂಧನ ಬಳಕೆಗೆ ವಿನ್ಯಾಸಗೊಳಿಸಲಾದ ಕಾರುಗಳಲ್ಲಿ ‘E20’ (ಶೇ 20ರಷ್ಟು ಎಥೆನಾಲ್ ಮಿಶ್ರಿತ) ಇಂಧನವನ್ನು ಬಳಸುವುದರಿಂದ ವಾಹನದ ರಬ್ಬರ್ ಬಿಡಿಭಾಗಗಳಿಗೆ ಹಾನಿಯಾಗುವ ಸಾಧ್ಯತೆಯಿದೆ ಎಂದು ‘ಆಟೋಮೋಟಿವ್ ರಿಸರ್ಚ್ ಅಸೋಸಿಯೇಷನ್ ಆಫ್ ಇಂಡಿಯಾ’ (ARAI) ಸಿದ್ಧಪಡಿಸಿರುವ ವರದಿಯೊಂದು ತಿಳಿಸಿದೆ.
ಈ ವರದಿ ಇನ್ನೂ ಅಧಿಕೃತವಾಗಿ ಪ್ರಕಟಗೊಂಡಿಲ್ಲವಾದರೂ, ವಾಹನ ತಯಾರಕರಿಗೆ ಮತ್ತು ಸರ್ಕಾರಕ್ಕೆ ಇದು ಪ್ರಮುಖ ಉಲ್ಲೇಖವಾಗಲಿದೆ. ಹೊಸ ಇಂಧನ ಬಳಕೆಯಿಂದ ಹೋಸ್‌ಗಳು, ಗ್ಯಾಸ್ಕೆಟ್‌ಗಳು, ಸೀಲ್‌ಗಳು ಮತ್ತು ಒ-ರಿಂಗ್‌ಗಳಂತಹ ರಬ್ಬರ್ ಭಾಗಗಳು ಬೇಗನೆ ಸವೆತಕ್ಕೆ ಒಳಗಾಗಲಿದ್ದು, ಇವುಗಳನ್ನು ಬದಲಾಯಿಸುವ ಅನಿವಾರ್ಯತೆ ಎದುರಾಗಬಹುದು ಎಂದು ವರದಿಯಲ್ಲಿ ಎಚ್ಚರಿಸಲಾಗಿದೆ.
ಎಂಜಿನ್ ಬಾಳಿಕೆ ಪರೀಕ್ಷೆಯಲ್ಲಿನ ಆತಂಕ:ವಾಹನಗಳ ಲೋಹದ (metallic) ಬಿಡಿಭಾಗಗಳ ಮೇಲೆ E20 ಇಂಧನ ಯಾವುದೇ ಪ್ರತಿಕೂಲ ಪರಿಣಾಮ ಬೀರಿಲ್ಲ ಹಾಗೂ ಮಾಲಿನ್ಯ ಹೊರಸೂಸುವಿಕೆ ಪ್ರಮಾಣವೂ ನಿಯಮಾವಳಿಯ ಮಿತಿಯಲ್ಲೇ ಇದೆ. ಆದರೆ, ನಾಲ್ಕು ಚಕ್ರದ ವಾಹನಗಳ ಎಂಜಿನ್ ಬಾಳಿಕೆ ಪರೀಕ್ಷೆಯ ವೇಳೆ ಕೆಲವು ಸಮಸ್ಯೆಗಳು ಗೋಚರಿಸಿವೆ. ಬಿಎಸ್-6 (BS-VI) ಟರ್ಬೊ ಚಾರ್ಜ್ಡ್ ಎಂಜಿನ್‌ವೊಂದು 265 ಗಂಟೆಗಳ ಬಳಕೆಯ ನಂತರ ಸಮಸ್ಯೆ ಎದುರಿಸಿದೆ.
ಮತ್ತೊಂದು ವಾಹನ ತಯಾರಕ ಕಂಪನಿಯ ಎಂಜಿನ್ 809 ಗಂಟೆಗಳ ಪರೀಕ್ಷೆಯ ಬಳಿಕ ‘ಎಕ್ಸಾಸ್ಟ್ ವಾಲ್ವ್’ನ ಉಷ್ಣ-ಯಾಂತ್ರಿಕ (thermomechanical) ವೈಫಲ್ಯ ಕಂಡಿದೆ. ಸಾಮಾನ್ಯವಾಗಿ ಇಂತಹ ಎಂಜಿನ್ ಪರೀಕ್ಷೆಗಳನ್ನು 2,000 ಗಂಟೆಗಳ ಕಾಲ ನಡೆಸಲಾಗುತ್ತದೆ ಎಂಬುದು ಗಮನಾರ್ಹ. ಆದರೆ, ದ್ವಿಚಕ್ರ ವಾಹನಗಳ ವಿಚಾರದಲ್ಲಿ E20 ಇಂಧನದಿಂದ ಯಾವುದೇ ಅಡ್ಡಪರಿಣಾಮ ಕಂಡುಬಂದಿಲ್ಲ ಎಂದು ಮೂರು ಪ್ರಮುಖ ತಯಾರಕ ಕಂಪನಿಗಳ ಪರೀಕ್ಷೆಯಿಂದ ದೃಢಪಟ್ಟಿದೆ.
ವಾಹನದ ಬಿಡಿಭಾಗಗಳ ಮೇಲಿನ ಪರಿಣಾಮದ ಜೊತೆಗೆ ಇಂಧನ ದಕ್ಷತೆಯ ಕುರಿತೂ ವರದಿ ಬೆಳಕು ಚೆಲ್ಲಿದೆ. E10 ಇಂಧನಕ್ಕೆ ಹೋಲಿಸಿದರೆ, E20 ಇಂಧನ ಬಳಸುವ ವಾಹನಗಳ ಇಂಧನ ಬಳಕೆಯ ಪ್ರಮಾಣ ಶೇಕಡಾ 2 ರಿಂದ 6 ರಷ್ಟು ಹೆಚ್ಚಾಗಲಿದೆ. ಅಂದರೆ, ಈ ವಾಹನಗಳ ಮೈಲೇಜ್ ಕೊಂಚ ಕಡಿಮೆಯಾಗಲಿದೆ. ಆದರೆ, ಈ ಮೈಲೇಜ್ ಇಳಿಕೆಯ ಪ್ರಮಾಣವು ಆಯಾ ವಾಹನದ ಮಾದರಿ ಮತ್ತು ಎಂಜಿನ್ ಸಾಮರ್ಥ್ಯಕ್ಕೆ ಅನುಗುಣವಾಗಿ ಭಿನ್ನವಾಗಿರಲಿದೆ ಎಂದು ವರದಿ ಉಲ್ಲೇಖಿಸಿದೆ.
