ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯ (ಇಪಿಎಫ್‌ಒ) ವೆಬ್‌ಸೈಟ್ ಕಳೆದ 7 ದಿನಗಳಿಂದ ಸ್ಥಗಿತಗೊಂಡಿದ್ದು, ಪಿಎಫ್ ಹಣ ಹಿಂಪಡೆಯಲು ಹಾಗೂ ಹೊಸ ಕ್ಲೈಮ್‌ಗಳನ್ನು ಸಲ್ಲಿಸಲು ಸಾಧ್ಯವಾಗದೆ ಸಾವಿರಾರು ನೌಕರರು ಪರದಾಡುವಂತಾಗಿದೆ. ಜುಲೈ 2ರ ಮಧ್ಯರಾತ್ರಿ 12 ಗಂಟೆ ವೇಳೆಗೆ ಸೇವೆಗಳು ಮರುಸ್ಥಾಪನೆಯಾಗಲಿವೆ ಎಂದು ಅಧಿಕೃತ ಪ್ರಕಟಣೆ ತಿಳಿಸಿದ್ದರೂ, ಪೋರ್ಟಲ್ ಇನ್ನೂ ಲಭ್ಯವಾಗಿಲ್ಲ.
ಕ್ಲೈಮ್ ಪ್ರಕ್ರಿಯೆಯ ವೇಗ, ವಿಶ್ವಾಸಾರ್ಹತೆ ಮತ್ತು ಭದ್ರತೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಡೇಟಾಬೇಸ್ ಕ್ರೋಢೀಕರಣ ಹಾಗೂ ಸಾಫ್ಟ್‌ವೇರ್ ಮೇಲ್ದರ್ಜೆಗೇರಿಸುವ ಕಾರ್ಯ ನಡೆಯುತ್ತಿದೆ. ಈ ಕಾರಣಕ್ಕಾಗಿ ಇಪಿಎಫ್‌ಒ ತನ್ನ ಆನ್‌ಲೈನ್ ಸೇವೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ. ವೆಬ್‌ಸೈಟ್‌ನಲ್ಲಿನ ಪ್ರಕಟಣೆಯ ಪ್ರಕಾರ, ಜೂನ್ 26ರ ಮಧ್ಯರಾತ್ರಿ 12 ಗಂಟೆಗೆ ಆರಂಭವಾದ ಈ ಸ್ಥಗಿತವು ಜುಲೈ 1ರ ರಾತ್ರಿ 11:59ರವರೆಗೆ ಮುಂದುವರಿಯಲಿದ್ದು, ಜುಲೈ 2ರ ಮಧ್ಯರಾತ್ರಿ 12 ಗಂಟೆಯಿಂದ ಸೇವೆಗಳು ಲಭ್ಯವಾಗಬೇಕಿತ್ತು. ಆದರೆ, ಗುರುವಾರ ಬೆಳಿಗ್ಗೆಯೂ ವೆಬ್‌ಸೈಟ್‌ನಲ್ಲಿ ‘ನಿಗದಿತ ಸಿಸ್ಟಮ್ ವಲಸೆ ಮತ್ತು ತಾತ್ಕಾಲಿಕ ಸೇವೆ ಅಲಭ್ಯತೆ’ ಎಂಬ ಸಂದೇಶವೇ ಕಾಣಿಸುತ್ತಿದೆ.
ಈ ತಾಂತ್ರಿಕ ವ್ಯತ್ಯಯದಿಂದಾಗಿ, ಸದಸ್ಯರು ಮತ್ತು ಉದ್ಯೋಗದಾತರು ತಮ್ಮ ಖಾತೆಗಳಿಗೆ ಲಾಗಿನ್ ಆಗಲು ಸಾಧ್ಯವಾಗುತ್ತಿಲ್ಲ. ಹೊಸ ಇಪಿಎಫ್ ಕ್ಲೈಮ್ ಸಲ್ಲಿಕೆ, ಕ್ಲೈಮ್ ಪ್ರಕ್ರಿಯೆ, ಇ-ಪಾಸ್‌ಬುಕ್ ವೀಕ್ಷಣೆ, ಇಸಿಆರ್ (ECR) ಫೈಲಿಂಗ್ ಮತ್ತು ಹೊಸ ಉದ್ಯೋಗಿಗಳಿಗೆ ಯುಎಎನ್ (UAN) ಲಿಂಕ್ ಮಾಡುವಂತಹ ಎಲ್ಲಾ ಡಿಜಿಟಲ್ ಸೇವೆಗಳು ಸಂಪೂರ್ಣವಾಗಿ ಸ್ಥಗಿತಗೊಂಡಿವೆ. ಸೇವೆಗಳು ಯಾವಾಗ ಪುನರಾರಂಭವಾಗಲಿವೆ ಎಂಬ ಬಗ್ಗೆ ಸ್ಪಷ್ಟನೆ ನೀಡುವಂತೆ ಹಲವಾರು ಬಳಕೆದಾರರು ಸಾಮಾಜಿಕ ಜಾಲತಾಣವಾದ ‘ಎಕ್ಸ್’ ನಲ್ಲಿ ಇಪಿಎಫ್‌ಒ ಅನ್ನು ಆಗ್ರಹಿಸುತ್ತಿದ್ದಾರೆ. ಆದಾಗ್ಯೂ, ವೆಬ್‌ಸೈಟ್ ಸ್ಥಗಿತಗೊಳ್ಳುವ ಮುನ್ನ ಸಲ್ಲಿಸಲಾದ ಕ್ಲೈಮ್‌ಗಳನ್ನು ಸೇವೆಗಳು ಪುನರಾರಂಭಗೊಂಡ ನಂತರ ವಿಲೇವಾರಿ ಮಾಡಲಾಗುವುದು ಎಂದು ಸ್ಪಷ್ಟಪಡಿಸಲಾಗಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | SIR ನೆಪದಲ್ಲಿ ‘ಮತಾಧಿಕಾರದ ರಕ್ಷಕ’ ಮಾಡುತ್ತಿರುವುದು ಇದೇನಾ?
ಇದೇ ವೇಳೆ, ಕೇಂದ್ರ ಸರ್ಕಾರವು 1952ರ ಹಳೆಯ ನಿಯಮಾವಳಿಗಳನ್ನು ಬದಲಾಯಿಸಿ, ಹೊಸ ‘ಉದ್ಯೋಗಿಗಳ ಭವಿಷ್ಯ ನಿಧಿ (ಇಪಿಎಫ್) ಯೋಜನೆ, 2026’ ಅನ್ನು ತಕ್ಷಣದಿಂದಲೇ ಜಾರಿಗೆ ಬರುವಂತೆ ಪ್ರಕಟಿಸಿದೆ. ಹೊಸ ಯೋಜನೆಯಲ್ಲೂ ಉದ್ಯೋಗಿ ಮತ್ತು ಉದ್ಯೋಗದಾತರ ಶೇ. 12ರ ಕಡ್ಡಾಯ ವಂತಿಕೆಯನ್ನು ಯಥಾವತ್ತಾಗಿ ಉಳಿಸಿಕೊಳ್ಳಲಾಗಿದೆ. ಆದರೆ, ಕಾರ್ಮಿಕ ಸಂಹಿತೆಗಳ ಅನುಷ್ಠಾನಕ್ಕೆ ಪೂರಕವಾಗಿ ಸಂಪೂರ್ಣ ಡಿಜಿಟಲ್ ಆಧಾರಿತ ಹೊಸ ವ್ಯವಸ್ಥೆಯನ್ನು ಪರಿಚಯಿಸಲಾಗಿದೆ.
ಅನಾರೋಗ್ಯ, ಶಿಕ್ಷಣ, ವಿವಾಹ ಮತ್ತು ಗೃಹ ನಿರ್ಮಾಣದಂತಹ ಕಾರಣಗಳಿಗಾಗಿ ಭಾಗಶಃ ಹಣ ಹಿಂಪಡೆಯುವ ನಿಯಮಗಳನ್ನು ಇನ್ನಷ್ಟು ಸರಳಗೊಳಿಸಲಾಗಿದೆ. ಡಿಜಿಟಲ್ ಪ್ರಕ್ರಿಯೆಗಾಗಿ ಆಧಾರ್, ಪ್ಯಾನ್ ಮತ್ತು ಆಧಾರ್ ಸಂಯೋಜಿತ ಬ್ಯಾಂಕ್ ಖಾತೆ ವಿವರಗಳನ್ನು ಕಡ್ಡಾಯಗೊಳಿಸಲಾಗಿದೆ. ಅಲ್ಲದೆ, ಹಳೆಯ ಬಾಕಿ ಉಳಿದಿರುವ ಸಮಸ್ಯೆಗಳನ್ನು ಇತ್ಯರ್ಥಪಡಿಸಲು ‘ಉದ್ಯೋಗಿಗಳ ನೋಂದಣಿ ಅಭಿಯಾನ 2026’, ‘ವಿಶ್ವಾಸ್ 2026’ ಮತ್ತು ‘ಅಮ್ನೆಸ್ಟಿ 2026’ ಎಂಬ 3 ಹೊಸ ಉಪಕ್ರಮಗಳನ್ನು ಈ ಯೋಜನೆಯಡಿ ಪರಿಚಯಿಸಲಾಗಿದೆ. ವೆಬ್‌ಸೈಟ್ ಸ್ಥಗಿತಕ್ಕೂ ಹಾಗೂ ಈ ಹೊಸ ನಿಯಮಗಳ ಜಾರಿಗೂ ಯಾವುದೇ ನೇರ ಸಂಬಂಧವಿಲ್ಲ ಎಂದು ವರದಿಯಲ್ಲಿ ಸ್ಪಷ್ಟಪಡಿಸಲಾಗಿದೆ.
