ವಿದೇಶದಲ್ಲಿ ಕೈತುಂಬಾ ಸಂಬಳದ ನಕಲಿ ಉದ್ಯೋಗದ ಆಮಿಷಕ್ಕೆ ಬಲಿಯಾದ ಮಹಾರಾಷ್ಟ್ರದ ಕನಿಷ್ಠ 25 ಯುವಕರು ಥಾಯ್ಲೆಂಡ್-ಮ್ಯಾನ್ಮಾರ್ ಗಡಿಯಲ್ಲಿರುವ ಸೈಬರ್ ವಂಚನೆ ಜಾಲದ ಶಿಬಿರಗಳಲ್ಲಿ ಸಿಲುಕಿ, ಅಮಾನವೀಯ ಚಿತ್ರಹಿಂಸೆಗೆ ಒಳಗಾಗಿದ್ದಾರೆ. ನಾಸಿಕ್ ಜಿಲ್ಲೆಯ 8 ಮಂದಿ, ಹಾಗೂ ಬೀಡ್, ಧಾರಾಶಿವ್ ಜಿಲ್ಲೆಗಳ ಯುವಕರು ಇದರಲ್ಲಿ ಸೇರಿದ್ದು, ತಮ್ಮವರನ್ನು ರಕ್ಷಿಸುವಂತೆ ಸಂತ್ರಸ್ತರ ಕುಟುಂಬಗಳು ಸರ್ಕಾರದ ಮೊರೆ ಹೋಗಿವೆ.
ಇತ್ತೀಚೆಗೆ ತಮ್ಮ ಕುಟುಂಬವನ್ನು ವಾಟ್ಸ್ಆ್ಯಪ್ ಕರೆ ಮೂಲಕ ಸಂಪರ್ಕಿಸಿದ ನಾಸಿಕ್ ಮೂಲದ 30 ವರ್ಷದ ಯುವಕನೊಬ್ಬ, ಶಿಬಿರದಲ್ಲಿನ ಭೀಕರ ಪರಿಸ್ಥಿತಿಯನ್ನು ವಿವರಿಸಿದ್ದಾನೆ. ಏಪ್ರಿಲ್ 25ರಿಂದ ಬಂಧನದಲ್ಲಿರುವ ಈತ, ಸ್ನೇಹಿತನೊಬ್ಬನ ಮೂಲಕ ಬ್ಯಾಂಕಾಕ್‌ನ ಕಾಲ್‌ ಸೆಂಟರ್‌ನಲ್ಲಿ ತಿಂಗಳಿಗೆ ₹70,000 ಸಂಬಳದ ಆಮಿಷಕ್ಕೆ ಒಳಗಾಗಿ ಥಾಯ್ಲೆಂಡ್‌ಗೆ ತೆರಳಿದ್ದ. ಅಲ್ಲಿಂದ ಆತನನ್ನು ಅಪರಿಚಿತರು ಥಾಯ್ಲೆಂಡ್-ಮ್ಯಾನ್ಮಾರ್ ಗಡಿಯ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು ಕೂಡಿಹಾಕಿದ್ದಾರೆ. ಆತನ ಬಿಡುಗಡೆಗೆ 8 ಲಕ್ಷ ರೂಪಾಯಿ ಹಣಕ್ಕೆ ಬೇಡಿಕೆ ಇಡಲಾಗಿದೆ ಎಂದು ಆತನ ಕುಟುಂಬ ಮಾಧ್ಯಮಗಳಿಗೆ ತಿಳಿಸಿವೆ.
ಕ್ಯಾಂಪ್‌ನಲ್ಲಿರುವ ಯುವಕರನ್ನು ಪ್ರತಿದಿನ 18 ಗಂಟೆಗಳ ಕಾಲ ಬಲವಂತವಾಗಿ ದುಡಿಸಿಕೊಳ್ಳಲಾಗುತ್ತಿದೆ. “ಇಲ್ಲಿ ನೀಡುವ ಆಹಾರವನ್ನು ಇಲಿ ಮತ್ತು ಜಿರಳೆಗಳು ಸಹ ತಿನ್ನುವುದಿಲ್ಲ. ಕೆಲಸ ಮಾಡಲು ನಿರಾಕರಿಸಿದರೆ ಕೋಣೆಯೊಳಗೆ ಕಟ್ಟಿಹಾಕಿ ವಿದ್ಯುತ್ ಶಾಕ್ ನೀಡಲಾಗುತ್ತದೆ. ಇಲ್ಲಿರುವ ಮಹಿಳೆಯರ ಮೇಲೂ ದೌರ್ಜನ್ಯ ಎಸಗಲಾಗುತ್ತಿದೆ,” ಎಂದು ಸಂತ್ರಸ್ತ ಯುವಕ ತನ್ನ ಕುಟುಂಬದ ಎದುರು ಕಣ್ಣೀರು ಹಾಕಿದ್ದಾನೆ. ಫೇಸ್‌ಬುಕ್‌ನಲ್ಲಿ ನಕಲಿ ಖಾತೆಗಳನ್ನು ಸೃಷ್ಟಿಸಿ, ಆನ್‌ಲೈನ್ ಮೂಲಕ ಜನರೊಂದಿಗೆ ಸ್ನೇಹ ಬೆಳೆಸಿ, ಬಳಿಕ ಅವರನ್ನು ಕ್ರಿಪ್ಟೋಕರೆನ್ಸಿ ಹೂಡಿಕೆ ನೆಪದಲ್ಲಿ ವಂಚಿಸುವ ಕೆಲಸವನ್ನು ಇವರ ಬಳಿ ಬಲವಂತವಾಗಿ ಮಾಡಿಸಲಾಗುತ್ತಿದೆ. ಗುರಿ ತಲುಪದವರಿಗೆ ತೀವ್ರವಾಗಿ ಹಲ್ಲೆ ಮಾಡಲಾಗುತ್ತಿದ್ದು, ಒಂದು ಚಿಕ್ಕ ಕೋಣೆಯಲ್ಲಿ 20 ಜನರನ್ನು ಕೂಡಿಹಾಕಲಾಗಿದೆ.
ಮ್ಯಾನ್ಮಾರ್, ಕಾಂಬೋಡಿಯಾ, ಲಾವೋಸ್ ಸೇರಿದಂತೆ ನೆರೆಯ ದೇಶಗಳಲ್ಲಿ ಕಾರ್ಯಾಚರಿಸುತ್ತಿರುವ ಇಂತಹ ಸೈಬರ್ ಕ್ರೈಮ್ ಜಾಲಗಳು, ಡೇಟಾ ಎಂಟ್ರಿ, ಡಿಜಿಟಲ್ ಮಾರ್ಕೆಟಿಂಗ್ ಹೆಸರಿನಲ್ಲಿ ಭಾರತೀಯರನ್ನು ಆಕರ್ಷಿಸಿ ಪಾಸ್‌ಪೋರ್ಟ್ ಕಸಿದು ಗುಲಾಮರಂತೆ ನಡೆಸಿಕೊಳ್ಳುತ್ತಿವೆ. ಕಳೆದ ಜನವರಿ 2026ರಲ್ಲೂ ಇದೇ ರೀತಿಯ ಕಾರ್ಯಾಚರಣೆಯ ಮೂಲಕ ಆಂಧ್ರಪ್ರದೇಶದ 120ಕ್ಕೂ ಹೆಚ್ಚು ಜನರನ್ನು ಮ್ಯಾನ್ಮಾರ್‌ನಿಂದ ರಕ್ಷಿಸಲಾಗಿತ್ತು. ಪ್ರಸ್ತುತ ಭಾರತದ 400ಕ್ಕೂ ಹೆಚ್ಚು ಮಂದಿ ಇಂತಹ ಕ್ಯಾಂಪ್‌ಗಳಲ್ಲಿ ಸಿಲುಕಿದ್ದಾರೆ ಎನ್ನಲಾಗಿದೆ.
