ವಯಸ್ಸು ಕೇವಲ ಒಂದು ಸಂಖ್ಯೆ ಎಂಬುದನ್ನು ಹೈದರಾಬಾದ್‌ನ 92 ವರ್ಷದ ಹಿರಿಯ ಸ್ತ್ರೀರೋಗ ತಜ್ಞೆ ಡಾ. ಸೂರಿ ಶ್ರೀಮತಿ ಅವರು ಸಾಬೀತುಪಡಿಸಿದ್ದಾರೆ. ಆರು ದಶಕಗಳ ಸುದೀರ್ಘ ವೈದ್ಯಕೀಯ ವೃತ್ತಿಜೀವನವನ್ನು ಹೊಂದಿರುವ ಇವರು, ಇಳಿ ವಯಸ್ಸಿನಲ್ಲೂ ಪ್ರತಿದಿನ ಯೋಗ ಮಾಡುತ್ತಾರೆ, ಸ್ವತಃ ಕಾರು ಚಲಾಯಿಸುತ್ತಾರೆ ಮತ್ತು ಯಶಸ್ವಿಯಾಗಿ ಶಸ್ತ್ರಚಿಕಿತ್ಸೆಗಳನ್ನು ನಡೆಸುತ್ತಾರೆ. ನಿವೃತ್ತಿಯ ಬಗ್ಗೆ ಕಿಂಚಿತ್ತೂ ಯೋಚಿಸದ ಇವರು, ತಮ್ಮ ವೈದ್ಯಕೀಯ ಸೇವಾ ಕಾರ್ಯವನ್ನು ಅವಿರತವಾಗಿ ಮುಂದುವರಿಸಿದ್ದಾರೆ.
ಇತ್ತೀಚೆಗೆ ‘ಬಿಬಿಸಿ ಗ್ಲೋಬಲ್ ವುಮೆನ್’ ಹಂಚಿಕೊಂಡಿರುವ ವಿಡಿಯೋದಲ್ಲಿ ಡಾ. ಶ್ರೀಮತಿ ಅವರ ಈ ಸ್ಫೂರ್ತಿದಾಯಕ ಕಥೆ ಬೆಳಕಿಗೆ ಬಂದಿದೆ. ‘ದಿ ಬೆಟರ್ ಇಂಡಿಯಾ’ 2026ರ ಮಾರ್ಚ್‌ನಲ್ಲಿ ಪ್ರಕಟಿಸಿದ ವರದಿಯ ಪ್ರಕಾರ, ತಮ್ಮ 60 ವರ್ಷಗಳ ವೃತ್ತಿಜೀವನದಲ್ಲಿ ಅವರು ಅಂದಾಜು 2 ಲಕ್ಷಕ್ಕೂ ಹೆಚ್ಚು ಹೆರಿಗೆಗಳನ್ನು ಮಾಡಿಸಿದ್ದಾರೆ. ಬಾಲ್ಯದಲ್ಲಿ ತಮ್ಮ ಒಡಹುಟ್ಟಿದವರು ಸಿಡುಬು ರೋಗದಿಂದ ತೀವ್ರವಾಗಿ ಬಳಲಿದ್ದನ್ನು ನೋಡಿದ್ದೇ, ಅವರು ವೈದ್ಯಕೀಯ ಕ್ಷೇತ್ರವನ್ನು ಆಯ್ಕೆ ಮಾಡಿಕೊಳ್ಳಲು ಪ್ರಮುಖ ಕಾರಣವಾಗಿತ್ತು.
ವೈದ್ಯಕೀಯ ಶಿಕ್ಷಣ ಪಡೆಯುವ ಅವರ ಹಾದಿ ಸುಲಭವಾಗಿರಲಿಲ್ಲ. ಆ ಕಾಲದಲ್ಲಿ ಮಹಿಳೆಯರು ವೈದ್ಯಕೀಯ ಶಿಕ್ಷಣ ಪಡೆಯುವುದು ಮತ್ತು ಮೃತದೇಹಗಳ ಪರೀಕ್ಷೆ ಮಾಡುವುದನ್ನು ಸಮಾಜ ತೀವ್ರವಾಗಿ ವಿರೋಧಿಸುತ್ತಿತ್ತು. ಇದರಿಂದಾಗಿ ಅವರ ಕುಟುಂಬ ಸಾಮಾಜಿಕ ಬಹಿಷ್ಕಾರವನ್ನೂ ಎದುರಿಸಬೇಕಾಯಿತು ಹಾಗೂ ಸಂಬಂಧಿಕರು ಸಂಪರ್ಕವನ್ನೇ ಕಡಿದುಕೊಂಡಿದ್ದರು. ಆದರೂ ಛಲ ಬಿಡದ ಅವರು 1958ರಲ್ಲಿ ವೈದ್ಯಕೀಯ ಪದವಿ ಪಡೆದರು. ನಂತರ 1965ರ ಅಕ್ಟೋಬರ್‌ನಲ್ಲಿ ಉಸ್ಮಾನಿಯಾ ವಿಶ್ವವಿದ್ಯಾಲಯದಿಂದ ಪ್ರಸೂತಿ ಮತ್ತು ಸ್ತ್ರೀರೋಗ ಶಾಸ್ತ್ರದಲ್ಲಿ ಎಂಡಿ (MD) ಪದವಿ ಪಡೆದರು.
1959ರಲ್ಲಿ ಸಂಗಾರೆಡ್ಡಿಯ ಸರ್ಕಾರಿ ಆಸ್ಪತ್ರೆಯಲ್ಲಿ ಅವರು ತಮ್ಮ ಮೊದಲ ಸ್ವತಂತ್ರ ಹೆರಿಗೆಯನ್ನು (15 ವರ್ಷದ ಬಾಲಕಿಗೆ ಸಿ-ಸೆಕ್ಷನ್) ಮಾಡಿಸಿದ್ದರು. ಆಧುನಿಕ ಸೌಲಭ್ಯಗಳಿಲ್ಲದ ಆ ಕಾಲದಲ್ಲಿ ಅರಿವಳಿಕೆ ತಜ್ಞರಾಗಿ, ಸ್ತ್ರೀರೋಗ ತಜ್ಞರಾಗಿ ಹಾಗೂ ಮಕ್ಕಳ ವೈದ್ಯರಾಗಿ ತಾವೊಬ್ಬರೇ ಎಲ್ಲಾ ಜವಾಬ್ದಾರಿ ನಿಭಾಯಿಸಿದ್ದರು ಎಂದು ಅವರು ತಮ್ಮ ಆರಂಭಿಕ ದಿನಗಳನ್ನು ನೆನಪಿಸಿಕೊಳ್ಳುತ್ತಾರೆ.
ತಮ್ಮ ವೃತ್ತಿಜೀವನದಲ್ಲಿ ಒಂದೇ ಕುಟುಂಬದ ಮೂರು ತಲೆಮಾರುಗಳ ಮಹಿಳೆಯರಿಗೆ ಚಿಕಿತ್ಸೆ ನೀಡಿದ ಹೆಗ್ಗಳಿಕೆ ಡಾ. ಶ್ರೀಮತಿ ಅವರದ್ದಾಗಿದೆ. ರೋಗಿಗಳಿಗೆ ಅವರ ಮೇಲಿರುವ ನಂಬಿಕೆ ಅಪಾರ. ಅವರ ಬಳಿ 1988-91ರ ಅವಧಿಯಲ್ಲಿ ಕಲಿತ ವಿದ್ಯಾರ್ಥಿನಿ ಡಾ. ರಜನಿ ಕುಮಾರಿ ಹೇಳುವಂತೆ, “ಈ ವಯಸ್ಸಿನಲ್ಲೂ ಶಸ್ತ್ರಚಿಕಿತ್ಸೆಯ ಸಮಯದಲ್ಲಿ ಅವರ ಕೈಗಳು ನಡುಗುವುದಿಲ್ಲ. ಅವರೊಬ್ಬ ಅತ್ಯುತ್ತಮ ಹಾಗೂ ನಿಖರ ಶಸ್ತ್ರಚಿಕಿತ್ಸಕಿ”.
ಮುಂಜಾನೆ 5:30ಕ್ಕೆ ತಮ್ಮ ತಂದೆ (ಆಂಧ್ರಪ್ರದೇಶದ ಯೋಗ ಪ್ರವರ್ತಕ ಸೂರಿ ರಾಘವ ದೀಕ್ಷಿತುಲು) ಕಲಿಸಿದ ಯೋಗದೊಂದಿಗೆ ಡಾ. ಶ್ರೀಮತಿ ಅವರ ದಿನಚರಿ ಆರಂಭವಾಗುತ್ತದೆ. ಬೆಳಿಗ್ಗೆ 8:30ಕ್ಕೆ ಆ ದಿನದ ಶಸ್ತ್ರಚಿಕಿತ್ಸೆಗಳ ಸಿದ್ಧತೆ ನಡೆಸುವ ಅವರು, ಸಂಜೆ 1999ರಲ್ಲಿ ಆರಂಭಿಸಿದ ತಮ್ಮ ಹೋಮ್ ಕ್ಲಿನಿಕ್‌ನಲ್ಲಿ ರೋಗಿಗಳನ್ನು ತಪಾಸಣೆ ಮಾಡುತ್ತಾರೆ. ವೈದ್ಯಕೀಯ ಕ್ಷೇತ್ರಕ್ಕೆ ಸಂಬಂಧಿಸಿದ ಸಭೆಗಳು, ಸಮ್ಮೇಳನಗಳಲ್ಲಿ ಭಾಗವಹಿಸುತ್ತಾ, ವೈದ್ಯಕೀಯ ಜರ್ನಲ್‌ಗಳನ್ನು ಓದುತ್ತಾ ತಮ್ಮ ಜ್ಞಾನವನ್ನು ಇಂದಿಗೂ ನವೀಕರಿಸಿಕೊಳ್ಳುತ್ತಿದ್ದಾರೆ.
“ಜನರು ಸಹಾಯ ಕೇಳಿ ಬಾಗಿಲು ತಟ್ಟುವಾಗ, ಸೇವೆ ಮಾಡಲು ನಿರಾಕರಿಸಲಾಗದು” ಎನ್ನುವ ಡಾ. ಶ್ರೀಮತಿ ಅವರು ನಿವೃತ್ತಿಯಾಗುವ ಯಾವುದೇ ಆಲೋಚನೆ ಹೊಂದಿಲ್ಲ. ಸೇವೆಗೆ ವಯಸ್ಸಿನ ಹಂಗಿಲ್ಲ ಎಂಬುದಕ್ಕೆ ಇವರು ಜ್ವಲಂತ ಉದಾಹರಣೆಯಾಗಿದ್ದಾರೆ.
