ಉತ್ತರ ಪ್ರದೇಶ ಸರ್ಕಾರವು 1970ರ ಉತ್ತರ ಪ್ರದೇಶ ಗೂಂಡಾಗಳ ನಿಯಂತ್ರಣ ಕಾಯ್ದೆಯನ್ನು (UP Control of Goondas Act) ದುರ್ಬಳಕೆ ಮಾಡದಂತೆ ನ್ಯಾಯಾಲಯಗಳು ಪದೇಪದೇ ಎಚ್ಚರಿಸುತ್ತಿದ್ದರೂ, ಅದನ್ನು ದಮನದ ಅಸ್ತ್ರವಾಗಿ ನಿರಂತರವಾಗಿ ಬಳಸುತ್ತಿದೆ ಎಂದು ಅಲಹಾಬಾದ್ ಹೈಕೋರ್ಟ್‌ ಅಸಮಾಧಾನ ವ್ಯಕ್ತಪಡಿಸಿದೆ.
ಜಾಹಿದ್‌ ಅಲಿ vs ಉತ್ತರ ಪ್ರದೇಶ ಸರ್ಕಾರ ಮತ್ತು ಇತರರು ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸುಭಾಷ್‌ ವಿದ್ಯಾರ್ಥಿ, ಗೊಂಡಾ ಜಿಲ್ಲಾಧಿಕಾರಿ ಜಾಹಿದ್‌ ಅಲಿಯನ್ನು ‘ಗೂಂಡಾ’ ಎಂದು ಘೋಷಿಸಿ, 6 ತಿಂಗಳ ಕಾಲ ಜಿಲ್ಲೆಯಿಂದ ಹೊರಹಾಕಲು (externment) ನೀಡಿದ್ದ ಆದೇಶವನ್ನು ರದ್ದುಗೊಳಿಸಿದರು.
ಗೂಂಡಾ ಕಾಯ್ದೆಯು ‘ಗೂಂಡಾಗಳ’ ನಿಯಂತ್ರಣ ಮತ್ತು ದಮನಕ್ಕೆ ಬಳಸುವ ಪ್ರಬಲ ಅಸ್ತ್ರವಾಗಿದ್ದು, ಸಾರ್ವಜನಿಕ ಅಶಾಂತಿ ಅಥವಾ ಸಾರ್ವಜನಿಕ ಸುವ್ಯವಸ್ಥೆ ಕಾಪಾಡುವ ಅಗತ್ಯವಿರುವ ಸ್ಪಷ್ಟ ಪ್ರಕರಣಗಳಲ್ಲಿ ಮಾತ್ರ ಅತ್ಯಂತ ಮಿತವಾಗಿ ಬಳಸಬೇಕು ಎಂದು ನ್ಯಾಯಾಲಯ ಹೇಳಿತು.
ಮುಗ್ಧ ವ್ಯಕ್ತಿಗಳ ವಿರುದ್ಧ ದಮನಕಾರಿ ಸಾಧನವಾಗಿ ಕಾಯ್ದೆಯನ್ನು ದುರ್ಬಳಕೆ ಮಾಡಬಾರದು ಎಂದು ನ್ಯಾಯಾಲಯಗಳು ನಿರಂತರವಾಗಿ ರಾಜ್ಯ ಸರ್ಕಾರಕ್ಕೆ ನೆನಪಿಸುತ್ತಿವೆ. ಗಂಭೀರ ಅಪರಾಧದಲ್ಲಿ ವ್ಯಕ್ತಿ ದೋಷಿ ಎಂದು ತೀರ್ಪು ಬರುವ ಮುನ್ನವೇ ಆತನಿಗೆ ಶಿಕ್ಷೆ ವಿಧಿಸುವ ಉದ್ದೇಶ ಕಾಯ್ದೆಯದ್ದಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿತು.
“ಈ ನ್ಯಾಯಾಲಯದ ಮುಂದೆ ಹಲವಾರು ಪ್ರಕರಣಗಳು ಬರುತ್ತಿದ್ದು, ಗೂಂಡಾ ಕಾಯ್ದೆಯನ್ನು ದಮನದ ಅಸ್ತ್ರವಾಗಿ ಬಳಸುವ ತನ್ನ ಧೋರಣೆಯಲ್ಲಿ ರಾಜ್ಯ ಸರ್ಕಾರ ನಿರಂತರವಾಗಿರುವುದು ಕಂಡುಬರುತ್ತಿದೆ. ಪ್ರಸ್ತುತ ಪ್ರಕರಣವು ಈ ಕಾಯ್ದೆಯ ದುರ್ಬಳಕೆಗೆ ಸ್ಪಷ್ಟ ಉದಾಹರಣೆಯಾಗಿದೆ” ಎಂದು ನ್ಯಾಯಾಲಯ ಹೇಳಿದೆ.
ಜಾಹಿದ್‌ ಅಲಿಯನ್ನು ‘ಗೂಂಡಾ’ ಎಂದು ಘೋಷಿಸಲು ಪೊಲೀಸರು ಉಲ್ಲೇಖಿಸಿದ್ದ ಎರಡು ಪ್ರಕರಣಗಳ ಪೈಕಿ, ಒಂದು ಪ್ರಕರಣದಲ್ಲಿ ಅವರು ಈಗಾಗಲೇ ಖುಲಾಸೆಯಾಗಿದ್ದರು ಎಂದು ನ್ಯಾಯಾಲಯ ಗಮನಿಸಿತು.
ವ್ಯಕ್ತಿಯ ವಿರುದ್ಧ ದಾಖಲಾದ ಪ್ರಕರಣದಲ್ಲಿ ಆತ ಖುಲಾಸೆಯಾದ ಬಳಿಕ, ಆ ಪ್ರಕರಣದಲ್ಲಿ ಆತನ ಭಾಗಿಯಾಗಿದ್ದುದನ್ನು ‘ಗೂಂಡಾ’ ಎಂದು ಘೋಷಿಸಲು ಆಧಾರವನ್ನಾಗಿ ಮಾಡಲು ಸಾಧ್ಯವಿಲ್ಲ ಎಂದು ನ್ಯಾಯಪೀಠ ಹೇಳಿತು.
ಅಲ್ಲದೆ, ಅಲಿ ಕಾನೂನು ಸುವ್ಯವಸ್ಥೆಗೆ ಬೆದರಿಕೆಯಾಗಿದ್ದಾರೆ ಎಂಬ ಆರೋಪವೂ ಇರಲಿಲ್ಲ. ಜಿಲ್ಲಾಧಿಕಾರಿಯ ಮುಂದೆ ಅಲಿ ಆಕ್ಷೇಪಣೆ ಸಲ್ಲಿಸಿ, ತಾನು ಒಂದು ಪ್ರಕರಣದಲ್ಲಿ ಖುಲಾಸೆಯಾಗಿರುವುದನ್ನು ತಿಳಿಸಿರಲಿಲ್ಲ. ಹೀಗಾಗಿ, ಆ ವಿಷಯವನ್ನು ಪರಿಗಣಿಸದಿದ್ದಕ್ಕಾಗಿ ಜಿಲ್ಲಾಧಿಕಾರಿ ತಪ್ಪಿತಸ್ಥರೆಂದು ಹೇಳಲಾಗದು ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿತು.
ಆದರೆ, ಖುಲಾಸೆಯಾದ ವಿಚಾರ ಪೊಲೀಸರಿಗೆ ತಿಳಿದಿರಬೇಕಿತ್ತು. ಹೀಗಾಗಿ, ಜಿಲ್ಲಾಧಿಕಾರಿಯ ಮುಂದೆ ಅಲಿಯ ಕುರಿತು ತಪ್ಪು ಚಿತ್ರಣ ಮೂಡಿಸುವ ಉದ್ದೇಶದಿಂದಲೇ ಆ ಪ್ರಕರಣದಲ್ಲಿ ಅವರ ಭಾಗಿಯಾಗಿದ್ದುದನ್ನು ಉಲ್ಲೇಖಿಸಿರುವ ಸಾಧ್ಯತೆಯಿದೆ ಎಂದು ನ್ಯಾಯಾಲಯ ಹೇಳಿತು.
ಇದನ್ನೂ ಓದಿ: ನೋಯ್ಡಾ ಪ್ರತಿಭಟನೆ | ಆಕೃತಿ NSA ಬಂಧನ ರದ್ದು; ಯೋಗಿ ಸರ್ಕಾರಕ್ಕೆ ಅಲಹಾಬಾದ್ ಹೈಕೋರ್ಟ್‌ ಕಪಾಳಮೋಕ್ಷ!
ಅಲಿ ಬಳಿಕ ದೇವಿ ಪಾಟನ್‌ ಮಂಡಲದ ಆಯುಕ್ತರ ಮುಂದೆ ಮೇಲ್ಮನವಿ ಸಲ್ಲಿಸುವಾಗ ಖುಲಾಸೆಯಾದ ವಿಚಾರವನ್ನು ತಿಳಿಸಿದ್ದರು. ಆದರೆ, ಆಯುಕ್ತರು ಅವರು ಮುಂದಿಟ್ಟಿದ್ದ ಆಧಾರಗಳನ್ನು ಸೂಕ್ತವಾಗಿ ಪರಿಶೀಲಿಸದೆ ಜಿಲ್ಲಾಧಿಕಾರಿಯ ಆದೇಶವನ್ನು ಎತ್ತಿಹಿಡಿದಿದ್ದಾರೆ ಎಂದು ನ್ಯಾಯಾಲಯ ತಿಳಿಸಿತು.
2020ರಲ್ಲಿ ದಾಖಲಾಗಿದ್ದ ಒಂದೇ ಒಂದು ಕ್ರಿಮಿನಲ್‌ ಪ್ರಕರಣದಲ್ಲಿ ಭಾಗಿಯಾಗಿರುವುದರಿಂದ, ಅಲಿ ಪದೇಪದೇ ಅಪರಾಧ ಎಸಗುತ್ತಾರೆ, ಎಸಗಲು ಯತ್ನಿಸುತ್ತಾರೆ ಅಥವಾ ಅಪರಾಧಕ್ಕೆ ಕುಮ್ಮಕ್ಕು ನೀಡುತ್ತಾರೆ ಎಂಬುದನ್ನು ಸಾಬೀತುಪಡಿಸಲಾಗದು. ಹೀಗಾಗಿ, ಅವರನ್ನು ‘ಗೂಂಡಾ’ ಎಂದು ಘೋಷಿಸಲು ಅದು ಸಮರ್ಥನೀಯ ಆಧಾರವಲ್ಲ ಎಂದು ನ್ಯಾಯಾಲಯ ಹೇಳಿತು.
“ಅರ್ಜಿದಾರರು 2020ರಲ್ಲಿ ಎಸಗಿದ್ದಾರೆ ಎನ್ನಲಾದ ಕೃತ್ಯಗಳಿಗೆ ಸಂಬಂಧಿಸಿದಂತೆ ಪ್ರಕರಣ ದಾಖಲಾಗಿರುವುದು ಮತ್ತು 2026ರಲ್ಲಿ ಅವರನ್ನು ಗೂಂಡಾ ಎಂದು ಘೋಷಿಸಿ ಜಿಲ್ಲೆಯಿಂದ ಹೊರಹಾಕಿರುವುದರ ನಡುವೆ ದೀರ್ಘ ಕಾಲದ ಅಂತರವಿದೆ. 2020ರಲ್ಲಿ ಪ್ರಕರಣ ದಾಖಲಾದದ್ದು ಮತ್ತು 2026ರಲ್ಲಿ ಅವರನ್ನು ಗೂಂಡಾ ಎಂದು ಘೋಷಿಸಿರುವುದರ ನಡುವೆ ಸಮಂಜಸವಾದ ಸಂಬಂಧವೂ ಇಲ್ಲ” ಎಂದು ನ್ಯಾಯಾಲಯ ತಿಳಿಸಿತು.
ಹೀಗಾಗಿ, ಗೊಂಡಾ ಜಿಲ್ಲಾಧಿಕಾರಿ ಮತ್ತು ದೇವಿ ಪಾಟನ್‌ ಮಂಡಲದ ಆಯುಕ್ತರು ಜಾಹಿದ್‌ ಅಲಿ ವಿರುದ್ಧ ಹೊರಡಿಸಿದ್ದ ಆದೇಶಗಳನ್ನು ಅಲಹಾಬಾದ್ ಹೈಕೋರ್ಟ್‌ ರದ್ದುಗೊಳಿಸಿತು.
