ಆಂಧ್ರಪ್ರದೇಶದ ಗೃಹ ಸಚಿವೆ ಹಾಗೂ ತೆಲುಗು ದೇಶಂ ಪಕ್ಷದ (TDP) ನಾಯಕಿ ವಂಗಲಪುಡಿ ಅನಿತಾ ಅವರ ವಿರುದ್ಧ ವೈಎಸ್‌ಆರ್ ಕಾಂಗ್ರೆಸ್ ಪಕ್ಷದ (YSRCP) ಮುಖಂಡ ಗುಡಿವಾಡ ಅಮರನಾಥ್ ಮಾಡಿರುವ ವಿವಾದಾತ್ಮಕ ಕಾಮೆಂಟ್ ಈಗ ರಾಜ್ಯ ರಾಜಕಾರಣದಲ್ಲಿ ಭಾರಿ ಸಂಚಲನ ಮೂಡಿಸಿದೆ. ಆಡಳಿತಾರೂಢ ಬಿಜೆಪಿ ನೇತೃತ್ವದ ಕೂಟವು ವೈಎಸ್‌ಆರ್‌ಸಿಪಿ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದೆ.
ಬುಧವಾರ ನಡೆದ ಸಾರ್ವಜನಿಕ ಸಭೆಯೊಂದರಲ್ಲಿ ಮಾತನಾಡಿದ್ದ ಮಾಜಿ ಸಚಿವ ಗುಡಿವಾಡ ಅಮರನಾಥ್, ಗೃಹ ಸಚಿವೆ ಅನಿತಾ ಅವರನ್ನು ಗುರಿಯಾಗಿಸಿ, “ಅವರು ಕಿಲೋ ಗಟ್ಟಲೆ ಮೇಕಪ್ ಮಾಡಿಕೊಳ್ಳುತ್ತಾರೆ” ಎಂದು ಲೇವಡಿ ಮಾಡಿದ್ದರು. ಈ ಆಕ್ಷೇಪಾರ್ಹ ಹೇಳಿಕೆ ಹೊರಬೀಳುತ್ತಿದ್ದಂತೆ ಟಿಡಿಪಿ ನಾಯಕರು ಕೆರಳಿ ಕೆಂಡವಾಗಿದ್ದು, ಮಾಜಿ ಸಚಿವರದ್ದು ಮಹಿಳಾ ವಿರೋಧಿ ಮತ್ತು ಗೌರವ ರಹಿತ ನಡೆ ಎಂದು ಕಿಡಿಕಾರಿದ್ದಾರೆ.
ಈ ಹೇಳಿಕೆಗಳ ಬಗ್ಗೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಆಂಧ್ರ ಗೃಹ ಸಚಿವೆ ಅನಿತಾ, “ಒಬ್ಬ ವೈಎಸ್‌ಆರ್‌ಸಿಪಿ ನಾಯಕ ಸಾರ್ವಜನಿಕ ಸಭೆಯಲ್ಲಿ ಕ್ಯಾಮೆರಾ ಮುಂದೆ ನನ್ನ ಬಗ್ಗೆ ಹೇಳಿರುವುದು ಕೇವಲ ವೈಯಕ್ತಿಕ ಅವಮಾನವಲ್ಲ. ಅದೊಂದು ಸಾಂವಿಧಾನಿಕ ಹುದ್ದೆಯಲ್ಲಿರುವ ಮಹಿಳೆ ಮತ್ತು ದಲಿತ ನಾಯಕಿಯನ್ನು ಅವಮಾನಿಸುವ ಉದ್ದೇಶದಿಂದ ಮಾಡಿದ ಅತ್ಯಂತ ವಿಕೃತ ಮತ್ತು ಜಾತಿ ನಿಂದನೆಯ ದಾಳಿಯಾಗಿದೆ” ಎಂದು ಗುಡುಗಿದ್ದಾರೆ. ಇಂತಹ ಹತಾಶೆ ದಾಳಿಗಳಿಗೆ ತಾನು ಹೆದರುವುದಿಲ್ಲ ಮತ್ತು ಸಾರ್ವಜನಿಕ ಸೇವೆಯನ್ನು ಮುಂದುವರಿಸುವುದಾಗಿ ಹೇಳಿದ್ದಾರೆ.
ಹಿರಿಯ ಟಿಡಿಪಿ ನಾಯಕ ನಾರಾ ಲೋಕೇಶ್ ಈ ಘಟನೆಯನ್ನು ತೀವ್ರವಾಗಿ ಖಂಡಿಸಿದ್ದು, “ವಂಗಲಪುಡಿ ಅನಿತಾ ಗಾರು ಅವರ ವಿರುದ್ಧ ಮಾಡಲಾದ ಈ ನಾಚಿಕೆಗೇಡಿನ ಮಹಿಳಾ ವಿರೋಧಿ ಹೇಳಿಕೆಗಳು ವೈಎಸ್‌ಆರ್‌ಸಿಪಿ ಪಕ್ಷದ ಅಸಲಿ ಚಾರಿತ್ರ್ಯವನ್ನು ಬಯಲು ಮಾಡಿದೆ” ಎಂದು ಕಿಡಿಕಾರಿದ್ದಾರೆ. ಒಬ್ಬ ಮಹಿಳೆ ಹಾಗೂ ದಲಿತ ನಾಯಕಿಯನ್ನು ಈ ರೀತಿ ಗುರಿ ಮಾಡುವುದು ಒಪ್ಪಲು ಸಾಧ್ಯವಿಲ್ಲ ಎಂದಿರುವ ಅವರು, ವೈಎಸ್‌ಆರ್‌ಸಿಪಿ ತಕ್ಷಣವೇ ಕ್ಷಮೆಯಾಚಿಸಬೇಕು ಎಂದು ಆಗ್ರಹಿಸಿದ್ದಾರೆ.
ಇದನ್ನೂ ಓದಿ: ತಮಿಳುನಾಡು | AIADMKಗೆ ಮಾಜಿ ಸಚಿವ ವಿಜಯಭಾಸ್ಕರ್ ರಾಜೀನಾಮೆ; TVK ಸೇರ್ಪಡೆ ಸಾಧ್ಯತೆ!
ರಾಜಕೀಯ ಚರ್ಚೆಗಳು ಸಿದ್ಧಾಂತ ಹಾಗೂ ನೀತಿಗಳ ಮೇಲೆ ಇರಬೇಕೇ ಹೊರತು ಇಂತಹ ವೈಯಕ್ತಿಕ ದಾಳಿಗಳ ಮೇಲಲ್ಲ ಎಂದು ಉಪಮುಖ್ಯಮಂತ್ರಿ ಹಾಗೂ ಜನಸೇನಾ ಪಕ್ಷದ ಮುಖ್ಯಸ್ಥ ಪವನ್ ಕಲ್ಯಾಣ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. “ಗೃಹ ಸಚಿವೆ ಅನಿತಾ ಅವರ ವಿರುದ್ಧದ ಹೇಳಿಕೆಗಳು ಆಕ್ಷೇಪಾರ್ಹವಾಗಿವೆ. ಒಬ್ಬ ಮಹಿಳೆಯ ಉಡುಪು ಮತ್ತು ರೂಪದ ಬಗ್ಗೆ ಲೇವಡಿ ಮಾಡುವುದು ಪ್ರತಿಯೊಬ್ಬ ಸಾಮಾನ್ಯ ಮಹಿಳೆಯನ್ನು ಅವಮಾನಿಸಿದಂತೆ” ಎಂದಿರುವ ಅವರು, ರಾಜಕಾರಣಿಗಳು ಸಾರ್ವಜನಿಕ ಜೀವನದಲ್ಲಿ ಘನತೆ ಮತ್ತು ಜವಾಬ್ದಾರಿಯನ್ನು ಕಾಯ್ದುಕೊಳ್ಳಬೇಕು ಎಂದಿದ್ದಾರೆ.
ವಿವಾದದ ಬೆನ್ನಲ್ಲೇ ಟಿಡಿಪಿ ಮಹಿಳಾ ನಾಯಕಿಯರು ರಸ್ತೆಗಿಳಿದು ಭಾರಿ ಪ್ರತಿಭಟನೆ ನಡೆಸಿದ್ದಾರೆ. ಗುಡಿವಾಡ ಅಮರನಾಥ್ ಅವರ ಫ್ಲೆಕ್ಸ್ ಬ್ಯಾನರ್‌ಗೆ ಮೊಟ್ಟೆ ಹಾಗೂ ಚಪ್ಪಲಿಗಳಿಂದ ಹೊಡೆದು ಆಕ್ರೋಶ ವ್ಯಕ್ತಪಡಿಸಿದ ಪ್ರತಿಭಟನಾಕಾರರು, ಅವರು ಬೇಷರತ್ತಾಗಿ ಕ್ಷಮೆಯಾಚಿಸಬೇಕು ಎಂದು ಪಟ್ಟು ಹಿಡಿದಿದ್ದಾರೆ.
ಈ ಎಲ್ಲ ಆರೋಪಗಳನ್ನು ತಳ್ಳಿಹಾಕಿರುವ ವೈಎಸ್‌ಆರ್‌ಸಿಪಿ ನಾಯಕರು, ಸರ್ಕಾರವು ರಾಜ್ಯದ ಕಾನೂನು ಸುವ್ಯವಸ್ಥೆ ವೈಫಲ್ಯದಿಂದ ಜನರ ಗಮನವನ್ನು ಬೇರೆಡೆಗೆ ಸೆಳೆಯಲು ಈ ವಿವಾದವನ್ನು ಬಳಸಿಕೊಳ್ಳುತ್ತಿದೆ ಎಂದು ಪ್ರತ್ಯಾರೋಪ ಮಾಡಿದ್ದಾರೆ. ವೈಎಸ್‌ಆರ್‌ಸಿಪಿ ವಕ್ತಾರೆ ಶ್ಯಾಮಲಾ ಮಾತನಾಡಿ, “ರಾಜ್ಯದಲ್ಲಿ ಹೆಚ್ಚುತ್ತಿರುವ ಅಪರಾಧಗಳು ಮತ್ತು ಸಾರ್ವಜನಿಕ ಸುರಕ್ಷತೆಯ ಬಗ್ಗೆ ಗಮನ ಹರಿಸುವ ಬದಲು ಗೃಹ ಸಚಿವರು ದಾರಿತಪ್ಪಿಸುವ ರಾಜಕಾರಣ (Diversion Politics) ಮಾಡುತ್ತಿದ್ದಾರೆ” ಎಂದು ಆರೋಪಿಸಿದ್ದಾರೆ.
ಸದ್ಯ ಈ ‘ಮೇಕಪ್’ ಜಗಳವು ಆಡಳಿತ ಹಾಗೂ ವಿರೋಧ ಪಕ್ಷಗಳ ನಡುವೆ ತೀವ್ರ ವಾಕ್ಸಮರಕ್ಕೆ ಕಾರಣವಾಗಿದ್ದು, ಆಂಧ್ರಪ್ರದೇಶದ ರಾಜಕಾರಣದಲ್ಲಿ ಮತ್ತಷ್ಟು ಉದ್ವಿಗ್ನತೆ ಸೃಷ್ಟಿಸಿದೆ.
