ದೇಶದಲ್ಲಿ ಮೂತ್ರಪಿಂಡ ಕಸಿಗಾಗಿ ಕಾಯುತ್ತಲ್ಲೇ 2025ರಲ್ಲಿ 200 ಕ್ಕೂ ಹೆಚ್ಚು ರೋಗಿಗಳು ಸಾವನ್ನಪ್ಪಿದ್ದಾರೆ ಎಂದು ಕೇಂದ್ರವು ಶುಕ್ರವಾರ ಲೋಕಸಭೆಗೆ ತಿಳಿಸಿದೆ. ಜುಲೈ 27ರ ವೇಳೆಗೆ ದೇಶದಲ್ಲಿ ಪ್ರಸ್ತುತ 73,646 ರೋಗಿಗಳು ಮೂತ್ರಪಿಂಡ ಕಸಿಗಾಗಿ ಕಾಯುತ್ತಿದ್ದಾರೆ ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ರಾಜ್ಯ ಸಚಿವ ಪ್ರತಾಪ್‌ರಾವ್ ಜಾಧವ್ ಲಿಖಿತ ಉತ್ತರದಲ್ಲಿ ತಿಳಿಸಿದ್ದಾರೆ.
2025ರಲ್ಲಿ ದೇಶದಲ್ಲಿ ಮೂತ್ರಪಿಂಡ ಸಮಸ್ಯೆಯಿಂದ ದೆಹಲಿಯಲ್ಲಿ ಅಧಿಕ ಮಂದಿ ಸಾವನ್ನಪ್ಪಿದ್ದಾರೆ. ಮೂತ್ರಪಿಂಡ ಕಸಿಯಾಗದೆಯೇ ಸಾವನ್ನಪ್ಪಿದ 200 ಮಂದಿಯಲ್ಲಿ 132 ಮಂದಿ ದೆಹಲಿಯವರಾಗಿದ್ದಾರೆ. ರಾಷ್ಟ್ರೀಯ ನೋಂದಾವಣೆ ಪೋರ್ಟಲ್ ಪ್ರಕಾರ, 2021ರಿಂದ ಮೂತ್ರಪಿಂಡ ಕಸಿಗಾಗಿ ಕಾಯುವ ಪಟ್ಟಿಯಲ್ಲಿರುವ ಮಂದಿಯಲ್ಲಿ ರಾಷ್ಟ್ರ ರಾಜಧಾನಿಯಲ್ಲಿ ಅತಿ ಹೆಚ್ಚು ಸಾವುಗಳು ಸಂಭವಿಸಿವೆ. 2021 ರಲ್ಲಿ ದೆಹಲಿಯಲ್ಲಿ ಮೂತ್ರಪಿಂಡ ಕಸಿಗಾಗಿ ಕಾಯುತ್ತಿದ್ದ 176 ಮಂದಿ ಮೃತಪಟ್ಟಿದ್ದಾರೆ. 2022ರಲ್ಲಿ 118 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. 2023ರಲ್ಲಿ 159 ಮಂದಿ ಮೂತ್ರಪಿಂಡ ಕಸಿಯಾಗದೆ ಸಾವನ್ನಪ್ಪಿದ್ದಾರೆ. 2024ರಲ್ಲಿ 148 ಮಂದಿ ಮೃತಪಟ್ಟಿದ್ದಾರೆ.
ಇದನ್ನೂ ಓದಿ: ‘ಕಿಡ್ನಿ ಕೊಡಿ, ಇಲ್ಲವೇ ಸಾಯಲು ಬಿಡಿ’: ರಾಷ್ಟ್ರಪತಿಗೆ ಪತ್ರ ಬರೆದಿದ್ದ 5 ಬಾಣಂತಿಯರ ಬೆನ್ನಿಗೆ ನಿಂತ ಸರ್ಕಾರ
ದೆಹಲಿಯ ನಂತರದ ಸ್ಥಾನದಲ್ಲಿ (19) ರಾಜಸ್ಥಾನವಿದೆ. ಗೋವಾ (17), ಮಹಾರಾಷ್ಟ್ರ (15), ಮಧ್ಯಪ್ರದೇಶ (11) ಮತ್ತು ಹರಿಯಾಣ (10) ನಂತರದ ಸ್ಥಾನದಲ್ಲಿದೆ. ಗುಜರಾತ್ ಮತ್ತು ಉತ್ತರ ಪ್ರದೇಶ ತಲಾ ಏಳು ಸಾವುಗಳಾಗಿವೆ ಎಂದು ಕೇಂದ್ರ ಸರ್ಕಾರದ ವರದಿ ಹೇಳಿದೆ. ಬಿಹಾರದಲ್ಲಿ ಐವರು, ಪಂಜಾಬ್‌ನಲ್ಲಿ ನಾಲ್ವರು, ತಮಿಳುನಾಡು ಮತ್ತು ಛತ್ತೀಸ್‌ಗಢದಲ್ಲಿ ತಲಾ ಇಬ್ಬರು ಸಾವನ್ನಪ್ಪಿದ್ದರೆ, ಹಿಮಾಚಲ ಪ್ರದೇಶ, ಪುದುಚೇರಿ ಮತ್ತು ಪಶ್ಚಿಮ ಬಂಗಾಳ ತಲಾ ಒಬ್ಬರು 2025ರಲ್ಲಿ ಕಿಡ್ನಿ ಕಸಿಗಾಗಿ ಕಾಯುತ್ತಲೇ ಮೃತಪಟ್ಟಿದ್ದಾರೆ.
ದೆಹಲಿಯಲ್ಲೇ ಅಧಿಕ ಸಾವು ಯಾಕೆ?
ದೇಶದಲ್ಲಿ ಪ್ರತಿ ವರ್ಷ ಸುಮಾರು 1.8 ಲಕ್ಷದಿಂದ 2 ಲಕ್ಷ ಜನರಿಗೆ ಕಿಡ್ನಿ ಕಸಿಯ (Kidney Transplant) ಅಗತ್ಯವಿರುತ್ತದೆ. ಆದರೆ, ದೇಶಾದ್ಯಂತ ವರ್ಷಕ್ಕೆ ಕೇವಲ 10,000 ದಿಂದ 12,000 ಕಿಡ್ನಿ ಕಸಿಗಳು ಮಾತ್ರ ನಡೆಯುತ್ತಿವೆ. ದೆಹಲಿಯು ಉತ್ತರ ಭಾರತದ ಅತಿ ದೊಡ್ಡ ವೈದ್ಯಕೀಯ ಕೇಂದ್ರವಾಗಿರುವುದರಿಂದ ಇಲ್ಲಿ ನೋಂದಾಯಿಸಿಕೊಳ್ಳುವ ರೋಗಿಗಳ ಸಂಖ್ಯೆ ಹೆಚ್ಚಿದ್ದು, ಕಾಯುವಿಕೆಯ ಪಟ್ಟಿ ಸುದೀರ್ಘವಾಗಿದೆ.
ಇನ್ನು ದೆಹಲಿಯಲ್ಲಿ AIIMS, Safdarjung, ಮತ್ತು ಪ್ರಮುಖ ಖಾಸಗಿ ಆಸ್ಪತ್ರೆಗಳಂತಹ ಉನ್ನತ ಮಟ್ಟದ ವೈದ್ಯಕೀಯ ಸೌಲಭ್ಯಗಳಿರುವುದರಿಂದ ದೆಹಲಿಯಷ್ಟೇ ಅಲ್ಲದೆ ಉತ್ತರ ಪ್ರದೇಶ, ಬಿಹಾರ, ಹರಿಯಾಣ, ರಾಜಸ್ಥಾನ ಮತ್ತು ಪಂಜಾಬ್‌ಗಳಿಂದಲೂ ಸಾವಿರಾರು ರೋಗಿಗಳು ಚಿಕಿತ್ಸೆಗೆ ದೆಹಲಿಗೆ ಬರುತ್ತಾರೆ. ಇದರಿಂದಾಗಿ ದೆಹಲಿಯ ನೋಂದಣಿ ಪಟ್ಟಿಯ ಮೇಲೆ ವಿಪರೀತ ಒತ್ತಡ ಉಂಟಾಗುತ್ತದೆ.
ಅಂಗಾಂಗ ಮತ್ತು ಅಂಗಾಂಶ ದಾನವನ್ನು ಉತ್ತೇಜಿಸುವ ಉದ್ದೇಶದಿಂದ ಸರ್ಕಾರವು ಆಗಸ್ಟ್ 3ರಂದು “ಜುಗ್ ಜುಗ್ ಜೀಯೋ ಅಭಿಯಾನ” ಎಂಬ ದೇಶವ್ಯಾಪಿ ಒಂದು ವರ್ಷದ ಸಾರ್ವಜನಿಕ ಜಾಗೃತಿ ಅಭಿಯಾನವನ್ನು ಪ್ರಾರಂಭಿಸಿದೆ ಎಂದು ಸಚಿವರು ತಿಳಿಸಿದ್ದಾರೆ.
ಇದನ್ನೂ ಓದಿ: ಚದುರಿದ ಚಿತ್ರ | ಅಳತೆಗೋಲುಗಳ ನಡುವೆ ಹೆಣ್ಣು
ಇದಲ್ಲದೆ, ಅಂಗಾಂಗ ದಾನ ಮತ್ತು ಕಸಿ ಪ್ರಕ್ರಿಯೆಗಳನ್ನು ಡಿಜಿಟಲೀಕರಣಗೊಳಿಸಲು, ಪಾರದರ್ಶಕತೆಯನ್ನು ಹೆಚ್ಚಿಸಲು ಮತ್ತು ಅಗತ್ಯವಿರುವ ರೋಗಿಗಳಿಗೆ ಸುಗಮ ಸೇವೆಗಳನ್ನು ಖಚಿತಪಡಿಸಿಕೊಳ್ಳಲು ರಾಷ್ಟ್ರೀಯ ನೋಂದಣಿ ಪೋರ್ಟಲ್ ಅನ್ನು ಮೇಲ್ದರ್ಜೆಗೇರಿಸಿ ‘ಇ-ಪ್ರತ್ಯಾರೋಪಣ’ (e-Pratyaaropan) ಎಂಬ ಡಿಜಿಟಲ್ ವೇದಿಕೆಯಾಗಿ ಚಾಲನೆ ನೀಡಲಾಗಿದೆ.
ಮಾನವ ಅಂಗಾಂಗ ಮತ್ತು ಅಂಗಾಂಶಗಳ ಕಸಿ ಕಾಯ್ದೆ (THOTA), 1994 ಮತ್ತು ಅದರ ಅಡಿಯಲ್ಲಿ ಮಾಡಲಾದ ನಿಯಮಗಳ ನಿಬಂಧನೆಗಳ ಪ್ರಕಾರ, ರಾಷ್ಟ್ರೀಯ ಅಂಗಾಂಗ ಮತ್ತು ಅಂಗಾಂಶ ಕಸಿ ಸಂಸ್ಥೆ (NOTTO) ನಿರ್ವಹಿಸುವ ರಾಷ್ಟ್ರೀಯ ಅಂಗಾಂಗ ಮತ್ತು ಅಂಗಾಂಶ ಕಸಿ ನೋಂದಣಿ (NOTTR) ಪೋರ್ಟಲ್‌ನಲ್ಲಿ ಕಸಿ ಆಸ್ಪತ್ರೆಗಳು ನೀಡುವ ದತ್ತಾಂಶದ ವರದಿಗೆ ಸಂಬಂಧಿಸಿದಂತೆ ಅನುಸರಣೆಯನ್ನು ಖಚಿತಪಡಿಸಿಕೊಳ್ಳುವುದು ಆಯಾ ರಾಜ್ಯ ಸರ್ಕಾರಗಳ ಜವಾಬ್ದಾರಿಯಾಗಿದೆ ಎಂದು ಅವರು ಹೇಳಿದರು.
ಮಾಹಿತಿಯನ್ನು ಹರಡಲು ಮತ್ತು ವಿವಿಧ ಭಾಗಿದಾರರೊಂದಿಗೆ ತೊಡಗಿಸಿಕೊಳ್ಳುವ ಮೂಲಕ ಅಂಗಾಂಗ ಮತ್ತು ಅಂಗಾಂಶ ದಾನವನ್ನು ಉತ್ತೇಜಿಸಲು NOTTO, ಪ್ರಾದೇಶಿಕ ಅಂಗಾಂಗ ಮತ್ತು ಅಂಗಾಂಶ ಕಸಿ ಸಂಸ್ಥೆಗಳು (ROTTOs) ಹಾಗೂ ರಾಜ್ಯ ಅಂಗಾಂಗ ಮತ್ತು ಅಂಗಾಂಶ ಕಸಿ ಸಂಸ್ಥೆಗಳ (SOTTOs) ಜೊತೆಗೂಡಿ ದೇಶಾದ್ಯಂತ ಜಾಗೃತಿ ಕಾರ್ಯಕ್ರಮಗಳನ್ನು ನಡೆಸುತ್ತದೆ ಎಂದೂ ಹೇಳಿದ್ದಾರೆ.
ಪೋಸ್ಟರ್ ತಯಾರಿಕೆ, ಘೋಷಾವಾಕ್ಯ ಬರಹ ಮತ್ತು ವಿಶೇಷ ಪ್ರತಿಜ್ಞಾ ಅಭಿಯಾನಗಳಂತಹ ವಿವಿಧ ಜಾಗೃತಿ ಚಟುವಟಿಕೆಗಳನ್ನು ನಿಯಮಿತವಾಗಿ ಆಯೋಜಿಸಲಾಗುತ್ತದೆ.
ಸಹ, ಮಾಹಿತಿ, ಟೆಲಿ-ಕೌನ್ಸೆಲಿಂಗ್ ಮತ್ತು ಅಂಗಾಂಗ ದಾನಕ್ಕಾಗಿ ಸಮನ್ವಯವನ್ನು ಒದಗಿಸಲು ಉಚಿತ ಸಹಾಯವಾಣಿ ಸಂಖ್ಯೆ (1800114770) ಹೊಂದಿರುವ 24×7 ಕಾಲ್ ಸೆಂಟರ್ ಕಾರ್ಯನಿರ್ವಹಿಸುತ್ತಿದೆ. ಸಾಮಾಜಿಕ ಜಾಲತಾಣಗಳ ಮೂಲಕವೂ ದಿನನಿತ್ಯ ಸಂದೇಶಗಳನ್ನು ಪ್ರಸಾರ ಮಾಡಲಾಗುತ್ತದೆ.
ನಾಗರಿಕರು https://notto.abdm.gov.in ವೆಬ್ ಪೋರ್ಟಲ್ ಮೂಲಕ ಅಂಗಾಂಗ ಮತ್ತು ಅಂಗಾಂಶ ದಾನಕ್ಕಾಗಿ ಪ್ರತಿಜ್ಞೆ ಮಾಡಬಹುದು. ಪ್ರಸ್ತುತ, ಐದು ಲಕ್ಷಕ್ಕೂ ಹೆಚ್ಚು ಆಧಾರ್-ಪರಿಶೀಲಿತ ಪ್ರತಿಜ್ಞೆಗಳು ನೋಂದಾಯಿಸಲ್ಪಟ್ಟಿವೆ.
