ಕಳೆದ ತಿಂಗಳು ನಡೆದಿದ್ದ 3 ವರ್ಷದ ಹೆಣ್ಣು ಮಗುವಿನ ಮೇಲಿನ ಭೀಕರ ಅತ್ಯಾಚಾರ ಮತ್ತು ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪುಣೆಯ ವಿಶೇಷ ನ್ಯಾಯಾಲಯವು 65 ವರ್ಷದ ವೃದ್ಧನನ್ನು ಅಪರಾಧಿ ಎಂದು ಘೋಷಿಸಿದೆ. ಜೂನ್ 29ರಂದು ಶಿಕ್ಷೆಯ ಪ್ರಮಾಣವನ್ನು ಘೋಷಿಸುವುದಾಗಿ ಹೇಳಿದೆ.
ಮೇ 1ರಂದು, ಮಹಾರಾಷ್ಟ್ರದ ನಸ್ರಾಪುರ ಗ್ರಾಮದಲ್ಲಿ ಕಾಮುಕ ವೃದ್ಧ ಭೀಮರಾವ್ ಕಾಂಬ್ಳೆ ಎಂಬಾತ ಮಗುವಿಗೆ ತಿಂಡಿಯ ಆಮಿಷವೊಡ್ಡಿ ಕೊಟ್ಟಿಗೆಗೆ ಕರೆದೊಯ್ದು ಅಸ್ವಾಭಾವಿಕ ಅತ್ಯಾಚಾರ ಎಸಗಿದ್ದ. ನಂತರ ಮಗುವಿನ ಬಾಯಿ ಒತ್ತಿ ಹಿಡಿದು ಎದೆಗೆ ತೀವ್ರವಾಗಿ ಗಾಯಗೊಳಿಸಿ ಕೊಲೆ ಮಾಡಿದ್ದ. ಈ ಕ್ರೌರ್ಯದ ವಿರುದ್ಧ ರಾಜ್ಯಾದ್ಯಂತ ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು. ಪ್ರತಿಭಟನೆಗಳು ನಡೆದಿದ್ದವು. ಆರೋಪಿಯನ್ನು ಪೊಲೀಸರು ಬಂಧಿಸಿದ್ದರು. ಇದೀಗ, ಘಟನೆ ನಡೆದು 60 ದಿನಗಳ ಒಳಗಾಗಿ ತೀರ್ಪು ಹೊರಬಿದ್ದಿದೆ.
ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶರಾದ ಎಸ್. ಆರ್. ಸಾಳುಂಕೆ ಅವರು ಆರೋಪಿ ಭೀಮರಾವ್ ಕಾಂಬ್ಳೆಯನ್ನು ಮಗುವಿನ ಅಪಹರಣ, ಅತ್ಯಾಚಾರ ಹಾಗೂ ಕೊಲೆ ಪ್ರಕರಣದಲ್ಲಿ ದೋಷಿ ಎಂದು ಆದೇಶಿಸಿದ್ದಾರೆ. ಈತ ಯಾವುದೇ ರೀತಿಯ ಸುಧಾರಣೆಗೆ ಅರ್ಹನಲ್ಲ ಎಂದು ಪ್ರತಿಪಾದಿಸಿರುವ ಪ್ರಾಸಿಕ್ಯೂಷನ್, ಆತನಿಗೆ ಮರಣದಂಡನೆ ಶಿಕ್ಷೆಯನ್ನೇ ವಿಧಿಸಬೇಕೆಂದು ನ್ಯಾಯಾಲಯವನ್ನು ಒತ್ತಾಯಿಸಿದ್ದಾರೆ.
ವಿಶೇಷ ಸರ್ಕಾರಿ ಅಭಿಯೋಜಕರಾದ ಅಜಯ್ ಮಿಸಾರ್ ಅವರು ಮಾತನಾಡಿ, “ಅಪಹರಣ, ಲೈಂಗಿಕ ದೌರ್ಜನ್ಯ, ಅತ್ಯಾಚಾರ ಹಾಗೂ ಕೊಲೆ ಸೇರಿದಂತೆ ಪೋಕ್ಸೊ (POCSO) ಕಾಯ್ದೆಯ ವಿವಿಧ ಸೆಕ್ಷನ್ಗಳ ಅಡಿಯಲ್ಲಿ ಹೊರಿಸಲಾಗಿದ್ದ ಎಲ್ಲ ಆರೋಪಗಳನ್ನು ಸಾಕ್ಷ್ಯಾಧಾರಗಳ ಸಮೇತ ನ್ಯಾಯಾಲಯದಲ್ಲಿ ಸಾಬೀತುಪಡಿಸಲಾಗಿದೆ” ಎಂದು ಹೇಳಿದ್ದಾರೆ.
“ಕೇವಲ ಮೂರು ವರ್ಷದ ಮಗುವಿನ ಮೇಲೆ ಸತತ 39 ನಿಮಿಷಗಳ ಕಾಲ ಕ್ರೂರವಾಗಿ ಲೈಂಗಿಕ ದೌರ್ಜನ್ಯ ಎಸಗಲಾಗಿತ್ತು. ಮರಣೋತ್ತರ ಪರೀಕ್ಷೆಯ ವರದಿಯಲ್ಲಿ ಮಗುವಿನ ದೇಹದ ಮೇಲೆ ಒಟ್ಟು 18 ಗಾಯಗಳಿರುವುದು ದೃಢಪಟ್ಟಿತ್ತು. ಅಲ್ಲದೆ, ಮಗುವಿನ ಕೈ ಮತ್ತು ಕುತ್ತಿಗೆಯ ಭಾಗದಲ್ಲಿ ಆರೋಪಿಯ ವೀರ್ಯದ ಕಲೆಗಳು ಪತ್ತೆಯಾಗಿದ್ದವು. ನ್ಯಾಯಾಲಯವು ಸಿಸಿಟಿವಿ ದೃಶ್ಯಾವಳಿಗಳು, ಡಿಎನ್ಎ ವರದಿ, ವೈದ್ಯಕೀಯ ಸಾಕ್ಷ್ಯಗಳು ಹಾಗೂ ಆರೋಪಿಯ ಮಾನಸಿಕ ಸ್ವಾಸ್ಥ್ಯದ ಪರೀಕ್ಷೆಗಳನ್ನು ಕಾನೂನುಬದ್ಧ ಪುರಾವೆಗಳಾಗಿ ಸಂಪೂರ್ಣವಾಗಿ ಮಾನ್ಯ ಮಾಡಿದೆ. ಘಟನೆಯ ದಿನ ಮಗುವನ್ನು ಆರೋಪಿ ಕರೆದೊಯ್ಯುತ್ತಿರುವುದನ್ನು ನೋಡಿದ್ದ ಇತರ ಕೆಲವು ಮಕ್ಕಳು ಸಹ ಗುರುತು ಪತ್ತೆ ಪ್ರಕ್ರಿಯೆಯಲ್ಲಿ ಆರೋಪಿಯನ್ನು ಸರಿಯಾಗಿ ಗುರುತಿಸಿದ್ದರು. ಈ ಇಡೀ ವಿಚಾರಣೆಯಲ್ಲಿ ಒಟ್ಟು 82 ಸಾಕ್ಷಿಗಳು ನ್ಯಾಯಾಲಯದ ಮುಂದೆ ಸಾಕ್ಷ್ಯ ನುಡಿದಿದ್ದಾರೆ” ಎಂದು ಅವರು ತಿಳಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: ವಿದ್ಯುತ್ ಖಾಸಗೀಕರಣ: ಉಚಿತ ಯೋಜನೆಗಳ ಅಂತ್ಯಕ್ಕೆ ನಾಂದಿ
ವಿಚಾರಣೆಯ ಸಂದರ್ಭದಲ್ಲಿ ಆರೋಪಿ ಕಾಂಬ್ಳೆ ತನ್ನ ಮೇಲಿನ ಆರೋಪಗಳನ್ನು ನಿರಾಕರಿಸಿದ್ದನು. ಮಗುವಿಗೆ ತಿಂಡಿ ಕೊಟ್ಟು ಹಸುವಿನ ಕೊಟ್ಟಿಗೆಯ ಬಳಿ ಹೊಸದಾಗಿ ಹುಟ್ಟಿದ ಕರುವನ್ನು ತೋರಿಸಲು ಕರೆದೊಯ್ಯುವಾಗ ತಾನು ಆಕಸ್ಮಿಕವಾಗಿ ಜಾರಿ ಬಿದ್ದಿದ್ದರಿಂದ ಮಗುವಿನ ತಲೆಗೆ ಗಾಯವಾಯಿತು ಎಂದು ಆತ ವಾದಿಸಿದ್ದನು. ಆದರೆ ವೈದ್ಯಕೀಯ ಮತ್ತು ತಾಂತ್ರಿಕ ಸಾಕ್ಷ್ಯಗಳು ಆತನ ಈ ವಾದ ಸುಳ್ಳು ಎಂಬುದನ್ನು ನಿರೂಪಿಸಿದವು. ಅಲ್ಲದೆ, ಆತನ ವಿರುದ್ಧ ಈ ಹಿಂದೆ 62 ವರ್ಷದ ವೃದ್ಧೆ, 17 ವರ್ಷದ ಬಾಲಕಿ ಹಾಗೂ ಪ್ರಾಣಿಯೊಂದರ ಮೇಲೆ ದೌರ್ಜನ್ಯ ಎಸಗಿದ ಆರೋಪಗಳಿವೆ ಎಂಬುದನ್ನು ನ್ಯಾಯಾಲಯ ಗಮನಿಸಿದೆ.
ಸದ್ಯ ನ್ಯಾಯಾಲಯವು ಜೂನ್ 29 ರಂದು ಮರಣದಂಡನೆ ಅಥವಾ ಜೀವಾವಧಿ ಶಿಕ್ಷೆಯ ಕುರಿತು ಅಂತಿಮ ತೀರ್ಪು ನೀಡಲಿದೆ ಎಂದು ವರದಿಯಾಗಿದೆ.
