ದೆಹಲಿ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (ಎಸ್‌ಐಆರ್) ಪ್ರಕ್ರಿಯೆಯಲ್ಲಿ ತಮ್ಮ ಹೆಸರು ಸೇರ್ಪಡೆಯಾಗಿರುವ ಕುರಿತು ಆಮ್ ಆದ್ಮಿ ಪಾರ್ಟಿ (ಎಎಪಿ) ಎತ್ತಿರುವ ಪ್ರಶ್ನೆಗಳಿಗೆ ಬಿಜೆಪಿ ರಾಜ್ಯಸಭಾ ಸಂಸದ ರಾಘವ್ ಚಡ್ಡಾ ಅವರು ತೀವ್ರವಾಗಿ ತಿರುಗೇಟು ನೀಡಿದ್ದಾರೆ. ಆಮ್ ಆದ್ಮಿ ಪಾರ್ಟಿಯ ವರ್ತನೆಯನ್ನು ತಮ್ಮ ‘ಎಕ್ಸ್-ಗರ್ಲ್‌ಫ್ರೆಂಡ್’ಗೆ (ಹಳೆಯ ಗೆಳತಿ) ಹೋಲಿಸಿರುವ ಅವರು, “ಬಾಯ್‌ಫ್ರೆಂಡ್ ಮುನ್ನಡೆದಿದ್ದರೂ ಎಎಪಿ ಇನ್ನೂ ನನ್ನನ್ನೇ ನೆನಪಿಸಿಕೊಳ್ಳುತ್ತಿದೆ” ಎಂದು ವ್ಯಂಗ್ಯವಾಡಿದ್ದಾರೆ.
ಚಂಡೀಗಢದಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ರಾಘವ್ ಚಡ್ಡಾ, “ಎಎಪಿಯವರು ಹಗಲು-ರಾತ್ರಿ ನನ್ನ ಬಗ್ಗೆಯೇ ಕನಸು ಕಾಣುತ್ತಿದ್ದಾರೆ ಮತ್ತು ನನ್ನ ಹೆಸರನ್ನೇ ಜಪಿಸುತ್ತಿದ್ದಾರೆ. ಎಎಪಿ ಬಿಟ್ಟು ಹೋದ ಎಕ್ಸ್-ಗರ್ಲ್‌ಫ್ರೆಂಡ್‌ನಂತೆ ವರ್ತಿಸುತ್ತಿದೆ, ಆದರೆ ಬಾಯ್‌ಫ್ರೆಂಡ್ ಆಗಲೇ ಮುಂದೆ ಸಾಗಿದ್ದಾನೆ. ನನ್ನ ನೆನಪಿನಲ್ಲೇ ಅವರು ಎಲ್ಲಾದರೂ ತಮ್ಮ ನರವನ್ನು ಕತ್ತರಿಸಿಕೊಳ್ಳುತ್ತಾರೋ ಎಂಬ ಭಯವಿದೆ” ಎಂದು ಕಟುವಾಗಿ ಟೀಕಿಸಿದರು.
ಇದನ್ನೂ ಓದಿ: ‘ಇದು ಪಕ್ಷದ ತಪ್ಪು’: ರಾಘವ್ ಚಡ್ಡಾ ಬಿಜೆಪಿ ಸೇರಿದ್ದಕ್ಕೆ ಎಎಪಿ ಹೊಣೆ ಮಾಡಿದ ಅಣ್ಣಾ ಹಜಾರೆ
ರಾಘವ್ ಚಡ್ಡಾ ಅವರ ಹೆಸರು ದೆಹಲಿಯ ರಾಜೇಂದ್ರ ನಗರ ವಿಧಾನಸಭಾ ಕ್ಷೇತ್ರದ ಮತದಾರರ ಪಟ್ಟಿಗೆ ಸೇರ್ಪಡೆಗೊಂಡಿರುವುದನ್ನು ಎಎಪಿ ಪ್ರಶ್ನಿಸಿತ್ತು. ಆಗಸ್ಟ್ 31ರಂದು ಪ್ರಕಟವಾದ ಕರಡು ಮತದಾರರ ಪಟ್ಟಿಯಲ್ಲಿ 746 ಮತದಾರರಿದ್ದರು, ಆದರೆ ಚಡ್ಡಾ ಅವರ ಹೆಸರು 747ನೇ ಸರಣಿ ಸಂಖ್ಯೆಯಲ್ಲಿ ಸೇರಿಕೊಂಡಿದೆ. ಚುನಾವಣಾ ಆಯೋಗವು ಫಾರ್ಮ್-6 ಅರ್ಜಿಯ ವಿವರಗಳನ್ನು ಸಾರ್ವಜನಿಕಗೊಳಿಸಬೇಕು ಮತ್ತು ಆಕ್ಷೇಪಣೆ ಸಲ್ಲಿಸಲು ಅವಕಾಶ ನೀಡಬೇಕು ಎಂದು ಎಎಪಿ ಆಗ್ರಹಿಸಿತ್ತು.
ಇದೇ ವೇಳೆ ಪಂಜಾಬ್‌ನ ಎಎಪಿ ಸರ್ಕಾರದ ವಿರುದ್ಧವೂ ಕಿಡಿಕಾರಿದ ಚಡ್ಡಾ, ರಾಜ್ಯದಲ್ಲಿ ಮಾದಕದ್ರವ್ಯ (ಡ್ರಗ್ಸ್) ಸಮಸ್ಯೆ ಗಂಭೀರವಾಗಿದೆ ಎಂದು ಆರೋಪಿಸಿದರು. “ರೇಷನ್ ತರಲು ಜನ ಸಾಲಿನಲ್ಲಿ ನಿಲ್ಲುವಂತೆ, ಪಂಜಾಬ್‌ನಲ್ಲಿ ಡ್ರಗ್ಸ್‌ಗಾಗಿ ಸಾಲಿನಲ್ಲಿ ನಿಲ್ಲುವ ಪರಿಸ್ಥಿತಿ ನಿರ್ಮಾಣವಾಗಿದೆ” ಎಂದು ದೂರಿದ ಅವರು, ಬಿಜೆಪಿಯು ಸೆಪ್ಟೆಂಬರ್ 18 ರಿಂದ 30 ರವರೆಗೆ ‘ನಶಾ ಮುಕ್ತಸರ್ ಯಾತ್ರೆ’ ನಡೆಸಲಿದೆ ಎಂದು ತಿಳಿಸಿದರು.
ರಾಘವ್ ಚಡ್ಡಾ ಹೇಳಿಕೆಗೆ ಪ್ರತಿಯಾಗಿ ಎಎಪಿ ನಾಯಕ ಅನುರಾಗ್ ಧಾಂಡಾ, “ಆಗಸ್ಟ್ 26 ರಂದೇ ದೆಹಲಿಯಲ್ಲಿ ಮತದಾರರಾಗಲು ಚಡ್ಡಾ ಅರ್ಜಿ ಸಲ್ಲಿಸಿದ್ದರು. ಸೆಪ್ಟೆಂಬರ್ 2ರಂದು ಅವರ ಅರ್ಜಿ ಅಂಗೀಕಾರವಾಗಿತ್ತು. ಆದರೆ ಸೆಪ್ಟೆಂಬರ್ 3ರಂದು ಪಂಜಾಬ್ ಸರ್ಕಾರ ತಮ್ಮ ಹೆಸರನ್ನು ಮತದಾರರ ಪಟ್ಟಿಯಿಂದ ತೆಗೆದುಹಾಕಿದೆ ಎಂದು ಸುಳ್ಳು ಆರೋಪ ಮಾಡುವ ಮೂಲಕ ಪಂಜಾಬ್ ಅನ್ನು ದ್ವೇಷದಿಂದ ಬಿಂಬಿಸಲು ಯತ್ನಿಸಿದ್ದಾರೆ” ಎಂದು ತಿರುಗೇಟು ನೀಡಿದ್ದಾರೆ.
