ಬಿಹಾರದ ಬಾಂಕಿಪುರ ವಿಧಾನಸಭಾ ಕ್ಷೇತ್ರದ ಉಪಚುನಾವಣೆಯ ಫಲಿತಾಂಶವು ರಾಜ್ಯ ರಾಜಕೀಯದಲ್ಲಿ ಹೊಸ ಸಂಚಲನ ಮೂಡಿಸಿದೆ. ಈ ಚುನಾವಣೆ ಪ್ರಮುಖ ವಿರೋಧ ಪಕ್ಷವಾದ ರಾಷ್ಟ್ರೀಯ ಜನತಾ ದಳಕ್ಕೆ (ಆರ್‌ಜೆಡಿ) ತೀವ್ರ ಆತಂಕ ಹಾಗೂ ಆತ್ಮವಿಮರ್ಶೆಯ ವಾತಾವರಣವನ್ನು ನಿರ್ಮಿಸಿದೆ.
ಜನ ಸುರಾಜ್ ಪಾರ್ಟಿಯ ಸಂಸ್ಥಾಪಕ ಪ್ರಶಾಂತ್ ಕಿಶೋರ್ ಅವರು ಬಿಜೆಪಿ ಅಭ್ಯರ್ಥಿಯನ್ನು ಸುಮಾರು 19,000ಕ್ಕೂ ಹೆಚ್ಚು ಮತಗಳ ಅಂತರದಿಂದ ಸೋಲಿಸಿ ಬಾಂಕಿಪುರದಲ್ಲಿ ಐತಿಹಾಸಿಕ ಗೆಲುವು ಸಾಧಿಸಿದ್ದಾರೆ. ಇಲ್ಲಿ ಬಿಜೆಪಿಗೆ ಮುಖಭಂಗವಾಗಿದ್ದರೂ ಈ ಚುನಾವಣೆಯಲ್ಲಿ ಆರ್‌ಜೆಡಿ ಅನುಭವಿಸಿದ ಹಿನ್ನಡೆಯು ಪಕ್ಷದ ಸಾಂಪ್ರದಾಯಿಕ ‘ಮುಸ್ಲಿಂ-ಯಾದವ’ ಮತಬ್ಯಾಂಕ್ ಚದುರಿ ಹೋಗಿದೆಯೇ ಎಂಬ ಪ್ರಶ್ನೆಯನ್ನು ಹುಟ್ಟುಹಾಕಿದೆ.
ಇದನ್ನೂ ಓದಿ: ಈ ದಿನ ಸಂಪಾದಕೀಯ | ಬಾಂಕಿಪುರದಲ್ಲಿ ಬಿಜೆಪಿ ಸೋಲು, ಮುಂಬರುವ ದಿನಗಳ ಮುನ್ಸೂಚಿ?
ಕಳೆದ 2025ರ ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ ಬಾಂಕಿಪುರ ಕ್ಷೇತ್ರದಲ್ಲಿ ಆರ್‌ಜೆಡಿ ಅಭ್ಯರ್ಥಿ ರೇಖಾ ಕುಮಾರಿ ಅವರು 46,000ಕ್ಕೂ ಹೆಚ್ಚು ಮತಗಳನ್ನು ಪಡೆದಿದ್ದರು. ಆದರೆ ಪ್ರಸ್ತುತ ಉಪಚುನಾವಣೆಯಲ್ಲಿ ಆರ್‌ಜೆಡಿ ಕೇವಲ 14,000 ಮತಗಳನ್ನಷ್ಟೇ ಪಡೆದು ಮೂರನೇ ಸ್ಥಾನಕ್ಕೆ ಕುಸಿದಿದೆ.
ಬಿಜೆಪಿ ಸೋಲಿಸುವುದೇ ಮುಖ್ಯ ಗುರಿಯಾಗಿದ್ದ ಈ ಚುನಾವಣೆಯಲ್ಲಿ, ಸಾಂಪ್ರದಾಯಿಕವಾಗಿ ಆರ್‌ಜೆಡಿಯನ್ನು ಬೆಂಬಲಿಸುತ್ತಿದ್ದ ಮುಸ್ಲಿಂ ಹಾಗೂ ಯಾದವ ಸಮುದಾಯಗಳ ಗಮನಾರ್ಹ ಭಾಗವು ಪ್ರಶಾಂತ್ ಕಿಶೋರ್ ಅವರತ್ತ ವಾಲಿದೆ ಎಂಬುದು ಮತಗಟ್ಟೆವಾರು ವಿಶ್ಲೇಷಣೆಗಳಿಂದ ಹೊರಬಿದ್ದಿದೆ.
ಕಳೆದ ಮೂರು ದಶಕಗಳಿಂದ ಆರ್‌ಜೆಡಿಯ ಬಲವಾದ ಆಧಾರಸ್ತಂಭವಾಗಿದ್ದ ಮುಸ್ಲಿಂ ಮತ್ತು ಯಾದವ ಮತದಾರರು (ರಾಜ್ಯದ ಜನಸಂಖ್ಯೆಯಲ್ಲಿ ಅನುಕ್ರಮವಾಗಿ ಶೇ. 18 ಮತ್ತು ಶೇ. 14) ಈ ಬಾರಿ ಭಿನ್ನವಾಗಿ ಆಲೋಚಿಸಿರುವುದು ಆರ್‌ಜೆಡಿ ನಾಯಕತ್ವವನ್ನು ಚಿಂತೆಗೆ ಈಡುಮಾಡಿದೆ.
ಇದನ್ನೂ ಓದಿ: ಬಾಂಕಿಪುರ ಉಪಚುನಾವಣೆ: ಕಮಲದ ಕೋಟೆ ಛಿದ್ರವಾಗಲಿದೆಯೇ; ಪ್ರಶಾಂತ್ ಕಿಶೋರ್‌ಗೆ ಭಾರಿ ಮುನ್ನಡೆ
ವಿಶೇಷವಾಗಿ ಮುಸ್ಲಿಂ ಬಹುಸಂಖ್ಯಾತ ಮತಗಟ್ಟೆಗಳಲ್ಲಿ ಜನ ಸುರಾಜ್‌ಗೆ ಹೆಚ್ಚಿನ ಬೆಂಬಲ ವ್ಯಕ್ತವಾಗಿರುವುದು, ಬಿಜೆಪಿಯನ್ನು ಸೋಲಿಸಲು ಜನ ಸುರಾಜ್ ಪಕ್ಷವೇ ಸೂಕ್ತ ಪರ್ಯಾಯ ಎಂಬ ಭಾವನೆ ಮತದಾರರಲ್ಲಿ ಮೂಡಿರುವುದನ್ನು ಸೂಚಿಸುತ್ತದೆ ಎಂದು ರಾಜಕೀಯ ತಜ್ಞರ ಅಭಿಪ್ರಾಯ.
ಫಲಿತಾಂಶದ ನಂತರ ಆರ್‌ಜೆಡಿಯ ಹಿರಿಯ ನಾಯಕರಲ್ಲಿ ಆಂತರಿಕ ಚರ್ಚೆಗಳು ಬಿರುಸಿನಿಂದ ನಡೆದಿವೆ. ಉಪಚುನಾವಣೆಯ ಕೊನೆಯ ದಿನಗಳಲ್ಲಿ ತೇಜಸ್ವಿ ಯಾದವ್ ಪ್ರಚಾರಕ್ಕೆ ಬಂದರೂ, ಆರಂಭಿಕ ಹಂತದಲ್ಲಿ ಪಕ್ಷವು ಚುನಾವಣೆಯನ್ನು ಗಂಭೀರವಾಗಿ ಪರಿಗಣಿಸದಿರುವುದು ಮತ್ತು ಅಭ್ಯರ್ಥಿ ಆಯ್ಕೆಯ ಗೊಂದಲಗಳು ಹಿನ್ನಡೆಗೆ ಕಾರಣವಾಯಿತು ಎಂದು ಕೆಲವು ನಾಯಕರು ಒಪ್ಪಿಕೊಂಡಿದ್ದಾರೆ.
ಬಿಜೆಪಿಯ ವಿರುದ್ಧ ಕೇವಲ ಆರ್‌ಜೆಡಿ ಮಾತ್ರವೇ ಹೋರಾಟ ನೀಡಬಲ್ಲದು ಎಂಬ ನಂಬಿಕೆಯನ್ನು ಪ್ರಶಾಂತ್ ಕಿಶೋರ್ ಮುರಿದಿದ್ದು, ನಗರ ಪ್ರದೇಶದ ಶೈಕ್ಷಣಿಕ ಹಾಗೂ ಯುವ ಮತದಾರರು ಬದಲಾವಣೆ ಬಯಸುತ್ತಿರುವುದು ಪಕ್ಷಕ್ಕೆ ಎಚ್ಚರಿಕೆಯ ಗಂಟೆಯಾಗಿದೆ.
ಮುಂದಿನ ಸಾರ್ವತ್ರಿಕ ಚುನಾವಣೆಗಳ ವೇಳೆಗೆ ತಮ್ಮ ಸಾಂಪ್ರದಾಯಿಕ ಬೆಂಬಲಿತ ಸಮುದಾಯಗಳ ವಿಶ್ವಾಸವನ್ನು ಮರಳಿ ಗಳಿಸಲು ಪಕ್ಷದ ಸಂಘಟನಾತ್ಮಕ ಕಾರ್ಯತಂತ್ರದಲ್ಲಿ ಮೂಲಭೂತ ಬದಲಾವಣೆಗಳನ್ನು ತರಬೇಕಾದ ಅಗತ್ಯವಿದೆ ಎಂದು ಪಕ್ಷದ ಆಂತರಿಕ ಮೂಲಗಳು ಅಭಿಪ್ರಾಯಪಟ್ಟಿವೆ.
ಬಾಂಕಿಪುರ ನಗರ ಕೇಂದ್ರಿತ ಕ್ಷೇತ್ರವಾಗಿದ್ದರೂ, ಪ್ರಶಾಂತ್ ಕಿಶೋರ್ ಸಾಧಿಸಿದ ಈ ಗೆಲುವು ಬಿಹಾರದ ಸಾಂಪ್ರದಾಯಿಕ ಜಾತಿ ರಾಜಕಾರಣ ಮತ್ತು ಪ್ರಮುಖ ವಿರೋಧ ಪಕ್ಷದ ಸಾಂಪ್ರದಾಯಿಕ ಮತಬ್ಯಾಂಕ್ ಸಮೀಕರಣಗಳಿಗೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ.
