ಆರ್‌ಜೆಡಿ ಮುಖ್ಯಸ್ಥ ಲಾಲು ಪ್ರಸಾದ್ ಅವರ 79ನೇ ಹುಟ್ಟುಹಬ್ಬದ ಆಚರಣೆ ಸಂದರ್ಭದಲ್ಲಿ ಮಾಜಿ ಮುಖ್ಯಮಂತ್ರಿ ರಾಬ್ರಿ ದೇವಿ ಭೋಜ್‌ಪುರಿ ಜಾನಪದ ಗಾಯಕನಿಗೆ ವಜ್ರವಿರುವ ಚಿನ್ನದ ಬಳೆಯನ್ನು ಉಡುಗೊರೆಯಾಗಿ ನೀಡಿರುವುದು ಬಿಹಾರದಲ್ಲಿ ತೀವ್ರ ವಿವಾದಕ್ಕೆ ಕಾರಣವಾಗಿದೆ. ಈ ಸಂಬಂಧ ಬಿಹಾರ ಪೊಲೀಸರ ಆರ್ಥಿಕ ಅಪರಾಧಗಳ ಘಟಕ (ಇಒಯು)ಗೆ ತನಿಖೆ ನಡೆಸಬೇಕು ಎಂದು ಜೆಡಿಯು ಆಗ್ರಹಿಸಿದೆ.
ಈ ಸಂಬಂಧ ಜೆಡಿಯು ಪ್ರಧಾನ ವಕ್ತಾರ ನೀರಜ್ ಕುಮಾರ್ ಪತ್ರ ಬರೆದಿದ್ದು, “ಬಳೆಯ ಬೆಲೆ ಮತ್ತು ಅದನ್ನು ಹೇಗೆ ಪಾವತಿಸಲಾಗಿದೆ ಎಂದು ನಾವು ತಿಳಿಯಬೇಕು. ಲಾಲು ಪ್ರಸಾದ್ ಅವರ ಜನ್ಮದಿನದಂದು, ಭೋಜ್‌ಪುರಿ ಗಾಯಕ ಛೋಟು ಛಾಲಿಯಾ ಅವರಿಗೆ ರಾಬ್ರಿ ದೇವಿ ಬಳೆ ನೀಡಿದ್ದರು. ಛಾಲಿಯಾ ಅದು ವಜ್ರದ ಬಳೆ ಎಂದು ಹೇಳಿದ್ದಾರೆ. ಈ ವಜ್ರದ ಬಳೆ ಎಲ್ಲಿಂದ ಬಂತು? ಅದರ ಮೂಲ ಏನು? ಅದರ ರಶೀದಿ ಎಲ್ಲಿದೆ? ಅದರ ಮಾರುಕಟ್ಟೆ ಮೌಲ್ಯ ಏನು” ಎಂದು ಪ್ರಶ್ನಿಸಿದ್ದಾರೆ.
ಇದನ್ನು ಓದಿದ್ದೀರಾ? ಟ್ರಂಪ್‌ ಸುಂಕ ಪರಿಣಾಮ: ಸೌರಾಷ್ಟ್ರದಲ್ಲಿ ಉದ್ಯೋಗ ಕಳೆದುಕೊಂಡ ಲಕ್ಷಕ್ಕೂ ಹೆಚ್ಚು ವಜ್ರ ಕಾರ್ಮಿಕರು
ಲಾಲು ಪ್ರಸಾದ್ ಯಾದವ್ ಮತ್ತು ರಾಬ್ರಿ ದೇವಿ ಅವರ ಕುಟುಂಬ ಈಗಾಗಲೇ ಹಲವು ಭ್ರಷ್ಟಾಚಾರದ ಆರೋಪಗಳನ್ನು (ಉದಾಹರಣೆಗೆ ಮೇವು ಹಗರಣ, ಉದ್ಯೋಗಕ್ಕಾಗಿ ಭೂಮಿ ಹಗರಣ) ಎದುರಿಸುತ್ತಿದೆ. ಇಂತಹ ಸಂದರ್ಭದಲ್ಲಿ, ಜಾನಪದ ಗಾಯಕನಿಗೆ ಅತ್ಯಂತ ದುಬಾರಿಯಾದ ವಜ್ರದ ಬಳೆಯನ್ನು ಉಡುಗೊರೆಯಾಗಿ ನೀಡಿರುವುದು ವಿರೋಧ ಪಕ್ಷಗಳಿಗೆ ದೊಡ್ಡ ಅಸ್ತ್ರವಾಗಿದೆ.
ಆದಾಯ ತೆರಿಗೆ ಕಾಯ್ದೆ 1961, ಬೇನಾಮಿ ವಹಿವಾಟು ಕಾಯ್ದೆ 1988, ಹಣ ಅಕ್ರಮ ವರ್ಗಾವಣೆ ತಡೆ ಕಾಯ್ದೆ 2002 ಮತ್ತು ಲಭ್ಯವಿರುವ ಪುರಾವೆಗಳ ಆಧಾರದ ಮೇಲೆ ಇಒಯು ಈ ವಿಷಯವನ್ನು ತನಿಖೆ ಮಾಡಬೇಕು ಎಂದು ಆಗ್ರಹಿಸಿದ್ದಾರೆ. ಪತ್ರದ ಪ್ರತಿಗಳನ್ನು ಪ್ರಧಾನ ಮುಖ್ಯ ಚುನಾವಣಾ ಆಯುಕ್ತರು (ಬಿಹಾರ ಜಾರ್ಖಂಡ್), ಇಡಿ ನಿರ್ದೇಶಕರು (ಪಟನಾ) ಮತ್ತು ಲೋಕಯುಕ್ತ ಅವರಿಗೆ ನೀಡಲಾಗಿದೆ.
ಆದರೆ ಆರ್‌ಜೆಡಿ ಎಂಎಲ್‌ಸಿ ಸುನಿಲ್ ಸಿಂಗ್, “ರಾಬ್ರಿ ಎಂದಿಗೂ ವಜ್ರದ ಆಭರಣಗಳನ್ನು ಧರಿಸುವುದಿಲ್ಲ” ಎಂದು ಹೇಳಿದ್ದಾರೆ. ತೇಜಸ್ವಿ ಯಾದವ್ ಅವರ ಮಗ ರಾಬ್ರಿಗೆ ಅರ್ಪಿಸಿದ ಜಾನಪದ ಹಾಡನ್ನು ಛಾಲಿಯಾ ಹಾಡಲು ಪ್ರಾರಂಭಿಸಿದಾಗ ಸಂತಸಗೊಂಡ ರಾಬ್ರಿ ಗಾಯಕನಿಗೆ ತಮ್ಮ ಬಳೆಗಳನ್ನು ಉಡುಗೊರೆಯಾಗಿ ನೀಡಿದ್ದರು.
