ಗಡ್ಡ ಬಿಡುವುದು, ರಂಜಾನ್ ತಿಂಗಳಲ್ಲಿ ‘ಇತಿಕಾಫ್’ (ಮಸೀದಿಯಲ್ಲಿ ಪ್ರಾರ್ಥನೆಗಾಗಿ ಕಾಲಕಳೆಯುವುದು) ಆಚರಿಸುವುದು ಹಾಗೂ ಅರೇಬಿಕ್ ಭಾಷೆಯಲ್ಲಿ ಶುಭಾಶಯ ಕೋರುವುದನ್ನು ‘ತೀವ್ರವಾದದ ಲಕ್ಷಣಗಳು’ ಎಂದು ಗುಜರಾತ್ ಪೊಲೀಸರ ರಹಸ್ಯ ದಾಖಲೆಯೊಂದು ಉಲ್ಲೇಖಿಸಿದೆ ಎನ್ನಲಾಗಿದ್ದು, ಇದು ಮಾನವ ಹಕ್ಕುಗಳ ಕಾರ್ಯಕರ್ತರು ಹಾಗೂ ಮುಸ್ಲಿಂ ಸಮುದಾಯದ ತೀವ್ರ ಕಳವಳಕ್ಕೆ ಕಾರಣವಾಗಿದೆ. ಈ ಬಗ್ಗೆ ‘ದಿ ಅಬ್ಸರ್ವರ್ ಪೋಸ್ಟ್‘ ವರದಿ ಮಾಡಿದೆ.
ಗುಜರಾತ್ ರಾಜ್ಯ ಗುಪ್ತಚರ ಇಲಾಖೆ (SIB) ಹೊರಡಿಸಿದೆ ಎನ್ನಲಾದ ಮತ್ತು ‘ರಹಸ್ಯ’ ಎಂದು ನಮೂದಿಸಲಾಗಿರುವ ಈ ದಾಖಲೆಯು ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿದೆ. ಆದರೆ, ಈ ದಾಖಲೆಯ ನೈಜತೆಯನ್ನು ಸರ್ಕಾರವಾಗಲಿ ಅಥವಾ ಪೊಲೀಸ್ ಇಲಾಖೆಯಾಗಲಿ ಅಧಿಕೃತವಾಗಿ ಖಚಿತಪಡಿಸಿಲ್ಲ ಅಥವಾ ನಿರಾಕರಿಸಿಲ್ಲ.
ವರದಿಗಳ ಪ್ರಕಾರ, ಗುಜರಾತ್ ಗೃಹ ಇಲಾಖೆಯು ಪ್ರತಿ ಜಿಲ್ಲೆ ಮತ್ತು ಪೊಲೀಸ್ ಕಮಿಷನರೇಟ್‌ ವ್ಯಾಪ್ತಿಯಲ್ಲಿ ‘ತೀವ್ರವಾದ ನಿಗ್ರಹ ಘಟಕ’ಗಳನ್ನು (Anti-Radicalisation Cells – ARC) ಸ್ಥಾಪಿಸಲು ಅನುಮೋದನೆ ನೀಡಿದೆ. ಮೇ 18ರ ಈ ಸುತ್ತೋಲೆಯ ಪ್ರಕಾರ, ಪೊಲೀಸ್ ಘಟಕಗಳು ಪ್ರಮಾಣಿತ ಕಾರ್ಯಾಚರಣಾ ವಿಧಾನವನ್ನು (SOP) ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು ಮತ್ತು ಪ್ರತಿ ತಿಂಗಳು ವರದಿ ಸಲ್ಲಿಸಬೇಕು ಎಂದು ಸೂಚಿಸಲಾಗಿದೆ.
ತೀವ್ರವಾದವನ್ನು ‘ವ್ಯಕ್ತಿಗಳು ಉಗ್ರ ವಿಚಾರಗಳನ್ನು ಅಳವಡಿಸಿಕೊಳ್ಳುವ ಮತ್ತು ಇತರರ ಮೇಲೆ ಪ್ರಭಾವ ಬೀರಲು ಪ್ರಯತ್ನಿಸುವ ಪ್ರಕ್ರಿಯೆ’ ಎಂದು ಈ ಎಸ್‌ಒಪಿ ವ್ಯಾಖ್ಯಾನಿಸಿದೆ. ಇದಕ್ಕಾಗಿ ಜನರ ವರ್ತನೆ, ಡಿಜಿಟಲ್ ಚಟುವಟಿಕೆಗಳು ಹಾಗೂ ಸಮುದಾಯದೊಂದಿಗಿನ ಒಡನಾಟದ ಮೇಲೆ ನಿಗಾ ಇಡುವಂತೆ ಪೊಲೀಸರಿಗೆ ಸೂಚಿಸಲಾಗಿದೆ.
ಪದೇ ಪದೇ ಮಸೀದಿಗೆ ಭೇಟಿ ನೀಡುವುದು, ಧಾರ್ಮಿಕ ಗುಂಪುಗಳೊಂದಿಗೆ ನಿಕಟ ಸಂಪರ್ಕ ಹೊಂದುವುದು, ಗಡ್ಡ ಬಿಡುವುದು, ಬುರ್ಖಾ (ನಿಖಾಬ್) ಧರಿಸುವುದು, ಅರೇಬಿಕ್ ಶುಭಾಶಯಗಳನ್ನು ಬಳಸುವುದು, ಧಾರ್ಮಿಕ ಚಟುವಟಿಕೆಗಳಿಗಾಗಿ ಶಿಕ್ಷಣ ಅಥವಾ ಉದ್ಯೋಗವನ್ನು ತೊರೆಯುವುದು, ಜಾಗತಿಕವಾಗಿ ಮುಸ್ಲಿಮರ ಮೇಲಾಗುವ ಘಟನೆಗಳ ಬಗ್ಗೆ ಕಳವಳ ವ್ಯಕ್ತಪಡಿಸುವುದು ಮತ್ತು ಅಫ್ಘಾನಿಸ್ತಾನ ಅಥವಾ ಮಧ್ಯಪ್ರಾಚ್ಯದ ಸಂಘರ್ಷಗಳ ಬಗ್ಗೆ ಚರ್ಚಿಸುವುದನ್ನು ‘ಅನುಮಾನಾಸ್ಪದ ಲಕ್ಷಣಗಳು’ ಎಂದು ಪಟ್ಟಿಯಲ್ಲಿ ಸೇರಿಸಲಾಗಿದೆ. ಇದರ ಜೊತೆಗೆ ಸಿಗ್ನಲ್ ಅಥವಾ ವಿಪಿಎನ್ ನಂತಹ ಆ್ಯಪ್‌ಗಳ ಬಳಕೆ, ಅಫ್ಘಾನಿಸ್ತಾನದ ವ್ಯಕ್ತಿಗಳೊಂದಿಗೆ ಆನ್‌ಲೈನ್ ಸಂಪರ್ಕ, ಐಸಿಸ್ ಉಗ್ರ ಸಂಘಟನೆಯ ಪ್ರಚಾರ ಸಾಮಗ್ರಿಗಳಾದ ‘ದಾಬಿಕ್’ ಮತ್ತು ‘ರುಮಿಯಾ’ ಇಟ್ಟುಕೊಳ್ಳುವುದು ಅಥವಾ ಹಂಚಿಕೊಳ್ಳುವುದನ್ನೂ ಉಲ್ಲೇಖಿಸಲಾಗಿದೆ.
ಈ ಎಸ್‌ಒಪಿಯನ್ನು ‘ರಾಜ್ಯ ಪ್ರಾಯೋಜಿತ ಕೋಮು ಆಧಾರಿತ ಪ್ರೊಫೈಲಿಂಗ್’ ಎಂದು ಮಾನವ ಹಕ್ಕುಗಳ ಕಾರ್ಯಕರ್ತೆ ಶಬನಮ್ ಹಶ್ಮಿ ತೀವ್ರವಾಗಿ ಖಂಡಿಸಿದ್ದಾರೆ. “ರಾಷ್ಟ್ರೀಯ ಭದ್ರತೆಯೆಂಬ ಸುಳ್ಳು ನೆಪದಲ್ಲಿ ಗುಜರಾತ್ ಸರ್ಕಾರವು ಸಾಮಾನ್ಯ ಧಾರ್ಮಿಕ ಮತ್ತು ಸಾಂಸ್ಕೃತಿಕ ಗುರುತುಗಳನ್ನು ಅಪರಾಧೀಕರಿಸಲು ಸರ್ಕಾರಿ ಯಂತ್ರವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದೆ. ಇದು ಸಂವಿಧಾನದ ಮೇಲಿನ ನೇರ ಮತ್ತು ಭೀಕರ ದಾಳಿ” ಎಂದು ಅವರು ಕಿಡಿಕಾರಿದ್ದಾರೆ. ಯುಎಪಿಎ ಮತ್ತು ಭಾರತೀಯ ನ್ಯಾಯ ಸಂಹಿತೆಯ (BNS) ಕಠಿಣ ನಿಬಂಧನೆಗಳಡಿ ಪ್ರಕರಣಗಳನ್ನು ದಾಖಲಿಸಲು ಪೊಲೀಸರು, ಕಾರಾಗೃಹ ಅಧಿಕಾರಿಗಳು ಮತ್ತು ವಿಶೇಷ ಕಾರ್ಯಾಚರಣೆ ಪಡೆ ಜಂಟಿಯಾಗಿ ಕೆಲಸ ಮಾಡಲಿವೆ ಎಂಬ ಅಂಶವನ್ನು ಅವರು ವಿರೋಧಿಸಿದ್ದಾರೆ.
ಕಚ್ ಪ್ರದೇಶದಲ್ಲಿ ಮಸೀದಿ ಮತ್ತು ಮದರಸಾಗಳ ತೆರವು ಕಾರ್ಯಾಚರಣೆ ವೇಳೆ ಪೊಲೀಸರು ಯಾವುದೇ ಲಿಖಿತ ಆದೇಶವಿಲ್ಲದೆ ಭೇಟಿ ನೀಡುತ್ತಿದ್ದ ವರದಿಗಳ ಹಿನ್ನೆಲೆಯಲ್ಲಿ ತಾನು ಈ ದಾಖಲೆಗಳನ್ನು ಸಾರ್ವಜನಿಕ ಡೊಮೈನ್‌ಗೆ ತಂದಿರುವುದಾಗಿ ಅಲ್ಪಸಂಖ್ಯಾತ ಸಮನ್ವಯ ಸಮಿತಿಯ ಸಂಚಾಲಕ ಮುಜಾಹಿದ್ ನಫೀಸ್ ತಿಳಿಸಿದ್ದಾರೆ.
“ಪೊಲೀಸರು ತೀವ್ರವಾದವನ್ನು ತಡೆಯುವ ಹೆಸರಿನಲ್ಲಿ ಕೇವಲ ಗಡ್ಡ, ಬುರ್ಖಾದಂತಹ ಮುಸ್ಲಿಂ ಗುರುತುಗಳನ್ನು ಗುರಿಯಾಗಿಸಿಕೊಂಡಿದ್ದಾರೆ. ಇದು ಇಡೀ ಸಮುದಾಯವನ್ನು ಅನುಮಾನದಿಂದ ನೋಡುವಂತೆ ಮಾಡುವ ಸಂಪೂರ್ಣ ಪಕ್ಷಪಾತದ ಸುತ್ತೋಲೆಯಾಗಿದೆ” ಎಂದು ಅವರು ಆರೋಪಿಸಿದ್ದಾರೆ.
