ಗೋಧಿ ಖರೀದಿಗೆ ಸಂಬಂಧಿಸಿದಂತೆ ರಾಜಸ್ಥಾನದ ಹನುಮಾನ್‌ಗಢ ಜಿಲ್ಲೆಯಲ್ಲಿ ರೈತರು ಹಲವು ದಿನಗಳಿಂದ ಪ್ರತಿಭಟನೆ ನಡೆಸುತ್ತಿದ್ದಾರೆ. ಅವರು ಪ್ರತಿಭಟನೆ ಮತ್ತಷ್ಟು ತೀವ್ರಗೊಂಡಿದ್ದು, ಸಾವಿರಾರು ರೈತರು ಪಿಲಿಬಂಗಾದಲ್ಲಿ ಬಿಕಾನೇರ್-ಹನುಮಾನ್‌ಗಢ ರೈಲ್ವೆ ಹಳಿಗಳನ್ನು ಕೆಲಕಾಲ ಬಂದ್ ಮಾಡಿ, ಸರ್ಕಾರದ ನಿರ್ಲಕ್ಷ್ಯ ಧೋರಣೆ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪರಿಣಾಮ, ಕೆಲ ಗಂಟೆಗಳ ಕಾಲ ರೈತ ಸಂಚಾರ ಸ್ಥಗಿತಗೊಂಡಿದೆ.
ಗೋಧಿ ಖರೀದಿ ಅವಧಿಯನ್ನು ವಿಸ್ತರಿಸಬೇಕು ಮತ್ತು ಖರೀದಿ ಗುರಿಯನ್ನು ಹೆಚ್ಚಿಸಬೇಕು ಎಂದು ಒತ್ತಾಯಿಸಿ ರೈತರು ಪ್ರತಿಭಟನೆ ನಡೆಸುತ್ತಿದ್ದಾರೆ. ಪ್ರಸ್ತುತ ಖರೀದಿ ಹಂಗಾಮು ಮುಕ್ತಾಯದ ಹಂತಕ್ಕೆ ತಲುಪಿದ್ದರೂ, ಸ್ಥಳೀಯ ಮಂಡಿಗಳಲ್ಲಿ (ಮಾರುಕಟ್ಟೆಗಳಲ್ಲಿ) ಇನ್ನೂ ಭಾರಿ ಪ್ರಮಾಣದ ಗೋಧಿ ಮಾರಾಟವಾಗದೆ ಉಳಿದಿದೆ. ಆ ಎಲ್ಲ ಗೋಧಿಯನ್ನು ಖರೀದಿಸಲು ಸರ್ಕಾರ ಅವಧಿ ಮತ್ತು ಗುರಿಯನ್ನು ವಿಸ್ತರಿಸಬೇಕು ಎಂದು ಆಘ್ರಹಿಸಿದ್ದಾರೆ. ಉಪವಿಭಾಗೀಯ ಅಧಿಕಾರಿಗಳ (SDM) ಕಚೇರಿ ಎದುರು ಧರಣಿ ಸತ್ಯಾಗ್ರಹ ಮುಂದುವರೆಸಿದ್ದಾರೆ.
ಪ್ರತಿಭಟನೆ ಮತ್ತು ಗೋಧಿ ಖರೀದಿ ಕುರಿತು ಮಾತನಾಡಿದ ಸಿಪಿಐ(ಎಂ) ಮುಖಂಡ ರಘುವೀರ್ ವರ್ಮಾ, “ಖರೀದಿ ಅವಧಿಯನ್ನು ವಿಸ್ತರಿಸುವ ಮತ್ತು ಖರೀದಿ ಗುರಿಗಳನ್ನು ಪರಿಷ್ಕರಿಸುವ ನಿರ್ಧಾರಗಳನ್ನು ಸರ್ಕಾರದ ಮಟ್ಟದಲ್ಲೇ ತೆಗೆದುಕೊಳ್ಳಬೇಕಾಗುತ್ತದೆ. ಸ್ಥಳೀಯ ಅಧಿಕಾರಿಗಳು ಕೇವಲ ಭರವಸೆಗಳನ್ನು ನೀಡುತ್ತಿದ್ದಾರೆ. ಆದರೆ, ರೈತರಿಗೆ ತಕ್ಷಣದ ನಿರ್ಧಾರಗಳ ಅಗತ್ಯವಿದೆ” ಎಂದು ಹೇಳಿದ್ದಾರೆ.
“ಜಿಲ್ಲಾಡಳಿತವು ತನ್ನ ಜವಾಬ್ದಾರಿಯನ್ನು ಸರಿಯಾಗಿ ನಿಭಾಯಿಸಿದೆ. ಉತ್ತರ ಭಾರತದ ವಲಯದಲ್ಲಿ ಪ್ರಸ್ತುತ ಗೋಧಿ ಖರೀದಿ ಪ್ರಕ್ರಿಯೆ ನಡೆಯುತ್ತಿರುವ ಏಕೈಕ ರಾಜ್ಯ ರಾಜಸ್ಥಾನವಾಗಿದೆ. ಹರಿಯಾಣ ಮತ್ತು ಪಂಜಾಬ್ ರಾಜ್ಯಗಳು ಇದುವರೆಗೆ ಯಾವುದೇ ರೀತಿಯ ಖರೀದಿ ಪ್ರಕ್ರಿಯೆಯನ್ನು ಆರಂಭಿಸಿಲ್ಲ. ರಾಜಸ್ಥಾನದಲ್ಲಿ ಖರೀದಿಸಲಾಗುವ ಒಟ್ಟು ಮೂರು ಮೂಟೆ ಗೋಧಿಯಲ್ಲಿ ಒಂದು ಮೂಟೆ ನಮ್ಮ ಜಿಲ್ಲೆಯಿಂದಲೇ ಖರೀದಿಯಾಗುತ್ತಿದೆ” ಎಂದು ಹನುಮಾನ್‌ಗಢ ಜಿಲ್ಲಾಧಿಕಾರಿ ಕುಶಾಲ್ ಯಾದವ್ ಹೇಳಿರುವುದಾಗಿ ‘ಇಂಡಿಯನ್ ಎಕ್ಸ್‌ಪ್ರೆಸ್‌’ ವರದಿ ಮಾಡಿದೆ.
ಈ ಲೇಖನ ಓದಿದ್ದೀರಾ?: ಅಕಿರಾ ಕುರೊಸಾವಾನ ‘ಡೆರ್ಸು ಉಜಾಲಾ’ ಎಂಬ ಕಾಡಿನ ಸಂತನೂ, ಕಾಡುವ ಚಿತ್ರವೂ
“ಕೇಂದ್ರ ಸರ್ಕಾರವು ಗೋಧಿ ಖರೀದಿಯ ಮಿತಿಯನ್ನು ಸಹ 6.25 ಲಕ್ಷ ಮೆಟ್ರಿಕ್ ಟನ್‌ನಿಂದ 8 ಲಕ್ಷ ಮೆಟ್ರಿಕ್ ಟನ್‌ಗೆ ಹೆಚ್ಚಿಸಿದೆ. ಆದರೆ, ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಖರೀದಿ ದರ ಕಡಿಮೆಯಾಗಿದೆ. ನಾವು ರೈತರ ಸಮಸ್ಯೆಗಳನ್ನು ದಾಖಲಿಸಿಕೊಂಡು ಸರ್ಕಾರಕ್ಕೆ ಪತ್ರ ಬರೆದಿದ್ದೇವೆ. ಸರ್ಕಾರದಿಂದ ಮುಂದಿನ ನಿರ್ದೇಶನಗಳಿಗಾಗಿ ಕಾಯುತ್ತಿದ್ದೇವೆ” ಎಂದು ಜಿಲ್ಲಾಧಿಕಾರಿ ಯಾದವ್ ವಿವರಿಸಿದ್ದಾರೆ.
ಶುಕ್ರವಾರದಂದು ರೈತ ಮುಖಂಡರು ಮತ್ತು ಜಿಲ್ಲಾ ಅಧಿಕಾರಿಗಳ ನಡುವೆ ಹಲವು ಸುತ್ತಿನ ಮಾತುಕತೆಗಳು ನಡೆದಿದ್ದರೂ, ಯಾವುದೇ ಸಕಾರಾತ್ಮಕ ತೀರ್ಮಾನಕ್ಕೆ ಬರಲು ಸಾಧ್ಯವಾಗಿಲ್ಲ. ಆದ್ದರಿಂದ, ರೈತರು ಪ್ರತಿಭಟನೆ ಮುಂದುವರೆಸಿದ್ದಾರೆ.
