ಪಂಜಾಬ್ ರಾಜಕಾರಣದಲ್ಲಿ ದಶಕಗಳ ಕಾಲ ಒಂದಾಗಿದ್ದು, ನಂತರ ಸಿದ್ಧಾಂತ ಮತ್ತು ರೈತರ ಹೋರಾಟದ ಹಿನ್ನೆಲೆಯಲ್ಲಿ ಹಾದಿ ಬದಲಿಸಿಕೊಂಡಿದ್ದ ಶಿರೋಮಣಿ ಅಕಾಲಿದಳ (SAD) ಮತ್ತು ಬಿಜೆಪಿ ಮತ್ತೆ ಮುಂಬರುವ ಚುನಾವಣೆಯ ಹೊಸ್ತಿಲಿನಲ್ಲಿ ಒಂದಾಗುವ ಸುಳಿವು ಸಿಕ್ಕಿದೆ. ಶಿರೋಮಣಿ ಅಕಾಲಿದಳದ ಅಧ್ಯಕ್ಷ ಸುಖ್‌ಬೀರ್ ಸಿಂಗ್ ಬಾದಲ್ ನೀಡಿದ “ಇನ್ನೊಂದೆರಡು ದಿನಗಳಲ್ಲಿ ನಿಮಗೇ ಎಲ್ಲವೂ ತಿಳಿಯಲಿದೆ” ಎಂಬ ಹೇಳಿಕೆ ನೀಡಿದ್ದು, ಸದ್ಯ ರಾಜ್ಯ ರಾಜಕಾರಣದಲ್ಲಿ ಕಾವು ಹೆಚ್ಚಾಗಿದೆ.
1996ರ ಮೋಗಾ ಸಮಾವೇಶದ ನಂತರ, ಮಾಜಿ ಮುಖ್ಯಮಂತ್ರಿ ಪ್ರಕಾಶ್ ಸಿಂಗ್ ಬಾದಲ್ ಮತ್ತು ಬಿಜೆಪಿಯ ಹಿರಿಯ ನಾಯಕರಾಗಿದ್ದ ಅಟಲ್ ಬಿಹಾರಿ ವಾಜಪೇಯಿ ಅವರ ನೇತೃತ್ವದಲ್ಲಿ ಈ ಮೈತ್ರಿ ಗಟ್ಟಿಯಾಯಿತು. ಪಂಜಾಬ್‌ನಲ್ಲಿ ಅಕಾಲಿದಳವು ಗ್ರಾಮೀಣ ಸಿಖ್ ಮತದಾರರನ್ನು ಪ್ರತಿನಿಧಿಸಿದರೆ, ಬಿಜೆಪಿ ನಗರ ಪ್ರದೇಶದ ಹಿಂದೂ ಮತದಾರರನ್ನು ಪ್ರತಿನಿಧಿಸುತ್ತಿತ್ತು.
ಇದನ್ನೂ ಓದಿ: ಪಂಜಾಬ್ ಚುನಾವಣೆಗೆ ಬಿಜೆಪಿ ‘3 ಸಿ’ ಗೇಮ್‌ ಪ್ಲಾನ್‌
1980ರ ದಶಕದ ನಂತರ, ರಾಜ್ಯದಲ್ಲಿ ಸಿಖ್ ಮತ್ತು ಹಿಂದೂ ಸಹೋದರತ್ವವನ್ನು (ಭಾಯಿಚಾರ್) ಕಾಪಾಡಲು ಈ ಮೈತ್ರಿಯನ್ನು “ಶಾಂತಿಯ ಸೇತುವೆ” ಎಂದೇ ಬಣ್ಣಿಸಲಾಗುತ್ತಿತ್ತು. 1997, 2007 ಮತ್ತು 2012ರಲ್ಲಿ ಈ ಮೈತ್ರಿಕೂಟ ಪಂಜಾಬ್‌ನಲ್ಲಿ ಸರ್ಕಾರ ರಚಿಸಿತು.
23 ವರ್ಷಗಳ ಮೈತ್ರಿ ಮುರಿಯಲು ಕಾರಣವೇನು?
ಸುಮಾರು 23 ವರ್ಷಗಳ ಕಾಲ ಎನ್‌ಡಿಎ ಮೈತ್ರಿಕೂಟದ ಅತ್ಯಂತ ಹಳೆಯ ಮತ್ತು ನಿಕಟ ಪಾಲುದಾರ ಪಕ್ಷವಾಗಿದ್ದ ಅಕಾಲಿದಳವು 2020ರ ಸೆಪ್ಟೆಂಬರ್‌ನಲ್ಲಿ ಅಧಿಕೃತವಾಗಿ ಮೈತ್ರಿಯಿಂದ ಹೊರಬಂದಿದೆ. ಕೇಂದ್ರ ಬಿಜೆಪಿ ಸರ್ಕಾರ ಜಾರಿಗೆ ತಂದ ಮೂರು ವಿವಾದಾತ್ಮಕ ಕೃಷಿ ಕಾಯ್ದೆಗಳ ವಿರುದ್ಧ ಪಂಜಾಬ್‌ನಲ್ಲಿ ರೈತರು ತೀವ್ರ ಪ್ರತಿಭಟನೆ ಆರಂಭಿಸಿದರು. ರೈತರ ಹಿತಾಸಕ್ತಿಗೆ ಧಕ್ಕೆಯಾಗುತ್ತಿದೆ ಎಂದು ಅಕಾಲಿದಳ ಈ ಕಾಯ್ದೆಗಳನ್ನು ತೀವ್ರವಾಗಿ ವಿರೋಧಿಸಿತು.
ಕೃಷಿ ಮಸೂದೆ ಪ್ರತಿಭಟನೆಯ ಭಾಗವಾಗಿ ಕೇಂದ್ರ ಸಂಪುಟದಲ್ಲಿದ್ದ ಸುಖ್‌ಬೀರ್ ಸಿಂಗ್ ಬಾದಲ್ ಅವರ ಪತ್ನಿ ಮತ್ತು ಹಿರಿಯ ನಾಯಕಿ ಹರ್‌ಸಿಮ್ರತ್ ಕೌರ್ ಬಾದಲ್ ತಮ್ಮ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿದರು. ಕಾಯ್ದೆ ಹಿಂಪಡೆಯುವಂತೆ ಬಿಜೆಪಿ ಹೈಕಮಾಂಡ್‌ಗೆ ಮನವರಿಕೆ ಮಾಡಲು ಅಕಾಲಿದಳ ಪ್ರಯತ್ನಿಸಿತಾದರೂ, ಕೇಂದ್ರ ಸಮ್ಮತಿಸದ ಕಾರಣ ರೈತರ ಪರವಾಗಿ ನಿಲ್ಲಲು ಅಕಾಲಿದಳ ಎನ್‌ಡಿಎಯಿಂದ ಹೊರಬರಬೇಕಾಯಿತು. 2021ರಲ್ಲಿ ತೀವ್ರ ಹೋರಾಟಕ್ಕೆ ಮಣಿದು ಕೇಂದ್ರ ಸರ್ಕಾರ ಕೃಷಿ ಕಾಯ್ದೆಗಳನ್ನು ಹಿಂಪಡೆಯಿತಾದರೂ, ಅಷ್ಟರಲ್ಲಾಗಲೇ ಮೈತ್ರಿಯಲ್ಲಿ ದೊಡ್ಡ ಬಿರುಕು ಉಂಟಾಗಿತ್ತು.
ಇದನ್ನೂ ಓದಿ: ದೆಹಲಿಯಲ್ಲಿ ಬಾದಲ್-ಮೋದಿ ಮಾತುಕತೆ: ಪಂಜಾಬ್‌ನಲ್ಲಿ ಮತ್ತೆ ಒಂದಾಗುತ್ತವಾ ಬಿಜೆಪಿ-ಅಕಾಲಿದಳ?
ಇದೀಗ ಮತ್ತೆ ಮೈತ್ರಿಯ ಸುಳಿವು
2022ರ ಪಂಜಾಬ್ ಚುನಾವಣೆಯಲ್ಲಿ ಆಮ್ ಆದ್ಮಿ ಪಾರ್ಟಿ (ಎಎಪಿ) ಅಭೂತಪೂರ್ವ ಗೆಲುವು ಸಾಧಿಸಿದ ನಂತರ, ಪ್ರತ್ಯೇಕವಾಗಿ ಸ್ಪರ್ಧಿಸಿದ್ದ ಬಿಜೆಪಿ ಮತ್ತು ಅಕಾಲಿದಳ ಎರಡೂ ಪಕ್ಷಗಳೂ ತೀವ್ರ ಹಿನ್ನಡೆ ಅನುಭವಿಸಿದವು. ಇದೀಗ ಮುಂದಿನ ಚುನಾವಣೆ ವೇಳೆ ಮತ್ತೆ ಮೈತ್ರಿಯ ಬಗ್ಗೆ ಚರ್ಚೆ ನಡೆಯುತ್ತಿದೆ. ಈ ನಡುವೆ ಚಂಡೀಗಢದಲ್ಲಿ ಮಾಧ್ಯಮಗಳ ಪ್ರಶ್ನೆಗೆ ಉತ್ತರಿಸಿದ ಸುಖ್‌ಬೀರ್ ಸಿಂಗ್ ಬಾದಲ್, “ನಾನೇನು ಜ್ಯೋತಿಷಿಯಲ್ಲ, ಇನ್ನೆರಡು ದಿನಗಳಲ್ಲಿ ಎಲ್ಲವೂ ನಿಮಗೇ ತಿಳಿಯಲಿದೆ” ಎಂದು ಮಾರ್ಮಿಕವಾಗಿ ಉತ್ತರಿಸಿ ಮೈತ್ರಿ ಮರುಸ್ಥಾಪನೆಯ ಮುನ್ಸೂಚನೆ ನೀಡಿದ್ದಾರೆ.
ಎಎಪಿ ಮತ್ತು ಕಾಂಗ್ರೆಸ್ ಪಂಜಾಬ್‌ನ ಅಭಿವೃದ್ಧಿಗೆ ಮಾರಕ ಎಂದು ಬಣ್ಣಿಸಿರುವ ಅಕಾಲಿದಳ, ಈ ಎರಡು ಪಕ್ಷಗಳನ್ನು ಸೋಲಿಸಲು ಬಿಜೆಪಿ ಸೇರಿದಂತೆ ಸಮಾನ ಮನಸ್ಕ ಪಕ್ಷಗಳ ಮೈತ್ರಿಗೆ ಒಲವು ತೋರುತ್ತಿದೆ. ದೆಹಲಿ ಮಟ್ಟದಲ್ಲಿ ಬಿಜೆಪಿ ವರಿಷ್ಠರು ಮತ್ತು ಅಕಾಲಿದಳ ನಾಯಕರ ನಡುವೆ ಸತತ ಮಾತುಕತೆಗಳು ನಡೆಯುತ್ತಿವೆ ಎಂದು ವರದಿಯಾಗಿದೆ.
ಪಂಜಾಬ್‌ನಲ್ಲಿ ಕಳೆದುಹೋದ ರಾಜಕೀಯ ನೆಲೆ ಕಂಡುಕೊಳ್ಳಲು ಅಕಾಲಿದಳಕ್ಕೆ ಮತ್ತು ರಾಜ್ಯದಲ್ಲಿ ಬಲವರ್ಧನೆಗೆ ಬಿಜೆಪಿಗೆ ಒಂದೇ ವೇದಿಕೆಯ ಅಗತ್ಯವಿದೆ. ರೈತರ ಕೆಲವು ಬಾಕಿ ಬೇಡಿಕೆಗಳಿಗೆ ಪರಿಹಾರ ಕಂಡುಕೊಳ್ಳುವ ಷರತ್ತಿನ ಮೇಲೆ ಬಿಜೆಪಿ-ಅಕಾಲಿದಳ ಮೈತ್ರಿ ಮಾಡಿಕೊಳ್ಳುವುದು ಬಹುತೇಕ ಖಚಿತವೆನ್ನಲಾಗುತ್ತಿದ್ದು, ಮುಂಬರುವ ದಿನಗಳಲ್ಲಿ ಅಧಿಕೃತ ಘೋಷಣೆ ಹೊರಬೀಳುವ ಸಾಧ್ಯತೆಯಿದೆ.
