- ರಿಮೋಟ್ ಮತದಾನ ಯಂತ್ರಗಳನ್ನು ಜಾರಿಗೆ ತರುವ ಪ್ರಸ್ತಾಪ ಸದ್ಯಕ್ಕೆ ರದ್ದು
- ಡಿಸೆಂಬರ್‌ನಲ್ಲಿ ರಿಮೋಟ್ ಮತದಾನ ಯೋಜನೆ ಘೋಷಿಸಿದ್ದ ಆಯೋಗ
ಹಲವು ರಾಜಕೀಯ ಪಕ್ಷಗಳು ವಿರೋಧದ ನಂತರ ಚುನಾವಣೆಯಲ್ಲಿ ರಿಮೋಟ್ ಮತದಾನ ಯಂತ್ರಗಳನ್ನು ಜಾರಿಗೆ ತರುವ ಪ್ರಸ್ತಾಪವನ್ನು ಸದ್ಯಕ್ಕೆ ರದ್ದುಗೊಳಿಸಲು ಭಾರತದ ಚುನಾವಣಾ ಆಯೋಗ ನಿರ್ಧರಿಸಿದೆ.
ದೂರದ ಕ್ಷೇತ್ರಗಳಲ್ಲಿ ಮನೆ ಇರುವವರಿಗೆ ತಮ್ಮ ಹತ್ತಿರದ ಪ್ರದೇಶದ ಕ್ಷೇತ್ರದಿಂದಲೇ ಮತ ಚಲಾಯಿಸಲು ಸಹಾಯ ಮಾಡುವ ಈ ರಿಮೋಟ್ ಮತದಾನ ಯೋಜನೆಯನ್ನು ಬಹುತೇಕ ರಾಜಕೀಯ ಪಕ್ಷಗಳು ವಿರೋಧಿಸಿದ ನಂತರ ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ರಿಮೋಟ್ ಮತದಾನ ಯಂತ್ರಗಳನ್ನು ಜಾರಿಗೆ ತರುವ ಸಂಬಂಧ ಚುನಾವಣಾ ಆಯೋಗವು 60 ರಾಷ್ಟ್ರೀಯ ಮತ್ತು ರಾಜ್ಯ ಮಾನ್ಯತೆ ಪಡೆದ ಪಕ್ಷಗಳಿಂದ ಪ್ರತಿಕ್ರಿಯೆಗಳನ್ನು ಕೋರಿತ್ತು.
ಡಿಸೆಂಬರ್‌ನಲ್ಲಿ ಚುನಾವಣಾ ಸಮಿತಿ ರಿಮೋಟ್ ಮತದಾನ ಯೋಜನೆಯನ್ನು ಮೊದಲು ಘೋಷಿಸಿದಾಗ ಹೆಚ್ಚಿನ ಪಕ್ಷಗಳು ಕಳವಳ ವ್ಯಕ್ತಪಡಿಸಿದ್ದವು ಎಂದು ಚುನಾವಣಾ ಆಯೋಗದ ಉನ್ನತ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಸುಮಾರು 30 ಕೋಟಿ ನೋಂದಾಯಿತ ಮತದಾರರು ಹಕ್ಕು ಚಲಾಯಿಸುವ ಸಮಸ್ಯೆಯನ್ನು ಸರಿಯಾದ ನಿಟ್ಟಿನಲ್ಲಿ ಪರಿಹರಿಸಬೇಕಿರುವ ಕಾರಣ, ಈ ಪ್ರಸ್ತಾಪವನ್ನು ಶೀಘ್ರದಲ್ಲೇ ಜಾರಿಗೆ ತರುವ ಸಾಧ್ಯತೆಯಿಲ್ಲ ಎಂದು ಮಾಧ್ಯಮಗಳು ತಿಳಿಸಿವೆ.
ಈ ಸುದ್ದಿ ಓದಿದ್ದೀರಾ? 40% ಸರ್ಕಾರದಿಂದ ರಾಜ್ಯದ ಜನತೆ ಬೇಸತ್ತಿದ್ದಾರೆ: ಶಶಿ ತರೂರ್
“ಮತದಾನದಿಂದ ದೂರ ಉಳಿಯುವ ಮತದಾರರನ್ನು ಗುರುತಿಸಲು ಈ ಕ್ರಮ ಕೈಗೊಳ್ಳಲಾಗುತ್ತಿದೆ.ಇದು ದೀರ್ಘಕಾಲದ ಪ್ರಕ್ರಿಯೆ. ಅಲ್ಲದೆ ಈ ಪ್ರಕ್ರಿಯೆ ಸಮಯ ತೆಗೆದುಕೊಳ್ಳುತ್ತದೆ. ಅಲ್ಲಿಯವರೆಗೆ ಎಲ್ಲರನ್ನು ಅವರ ಕ್ಷೇತ್ರದ ಮತಗಟ್ಟೆಗೆ ಕರೆತರುವ ಪ್ರಕ್ರಿಯೆಗಳು ನಡೆಯುತ್ತಿವೆ” ಎಂದು ಕೇಂದ್ರ ಮುಖ್ಯ ಚುನಾವಣಾ ಆಯುಕ್ತ ರಾಜೀವ್‌ ಕುಮಾರ್ ತಿಳಿಸಿರುವುದಾಗಿ ಮಾಧ್ಯಮಗಳು ವರದಿ ಮಾಡಿವೆ.
ಜನವರಿ 16ರಂದು ಚುನಾವಣಾ ಆಯೋಗವು ರಿಮೋಟ್ ಮತದಾನ ಯಂತ್ರಗಳ ಬಗ್ಗೆ ಚರ್ಚೆ ಮತ್ತು ಮಾಹಿತಿ ನೀಡಲು ರಾಜಕೀಯ ಪಕ್ಷಗಳನ್ನು ಆಹ್ವಾನಿಸಿತ್ತು. ಆದರೆ ಬಹುತೇಕ ರಾಜಕೀಯ ಪಕ್ಷಗಳು ಈ ಯೋಜನೆಯನ್ನು ವಿರೋಧಿಸಿದ್ದರಿಂದ ಮಾಹಿತಿ ನೀಡಲು ಸಾಧ್ಯವಾಗಲಿಲ್ಲ.
ಚುನಾವಣಾ ಆಯೋಗದ ಪ್ರಕಾರ, ರಿಮೋಟ್ ಮತದಾನ ಯಂತ್ರವು ಏಕಕಾಲದಲ್ಲಿ 72 ಕ್ಷೇತ್ರಗಳ ಡೇಟಾವನ್ನು ನಿರ್ವಹಿಸಬಲ್ಲದು. ಇದಲ್ಲದೆ, ತಮ್ಮ ಸ್ವಂತ ಕ್ಷೇತ್ರಗಳ ವಲಸೆ ಮತದಾರರು ಸಹ ಇದರ ಲಾಭವನ್ನು ಪಡೆಯಬಹುದು.
