ವಿದೇಶ ಪ್ರವಾಸ ಮಾಡುವುದರಲ್ಲೇ ಮಗ್ನರಾಗಿರುವ ನಮ್ಮ ಪ್ರಧಾನಿ ನರೇಂದ್ರ ಮೋದಿ ಅವರ ಪ್ರವಾಸಕ್ಕಾಗಿ ಐದು ವರ್ಷಗಳಲ್ಲಿ ಬರೋಬ್ಬರಿ 362 ಕೋಟಿ ರೂ. ಖರ್ಚಾಗಿದೆ. 2021ರಿಂದ 2025ರವರೆಗಿನ ಪ್ರಧಾನಿ ಮೋದಿ ವಿದೇಶ ಪ್ರವಾಸಕ್ಕೆ ಕೇಂದ್ರ ಸರ್ಕಾರಕ್ಕೆ ಸುಮಾರು 362 ಕೋಟಿ ರೂ. ವೆಚ್ಚವಾಗಿದ್ದು, 2025ರಲ್ಲಿಯೇ ಅಮೆರಿಕ ಮತ್ತು ಫ್ರಾನ್ಸ್‌ ಸೇರಿ ಐದು ದೇಶಗಳ ಭೇಟಿಗಾಗಿ 67 ಕೋಟಿ ರೂ.ಗಳಿಗೂ ಹೆಚ್ಚು ವೆಚ್ಚವಾಗಿದೆ.
ಸಂಸತ್ತಿನಲ್ಲಿ ತೃಣಮೂಲ ಕಾಂಗ್ರೆಸ್ ಡೆರೆಕ್ ಒಬ್ರಿಯಾನ್ ಕೇಳಿದ ಪ್ರಶ್ನೆಗೆ ವಿದೇಶಾಂಗ ವ್ಯವಹಾರಗಳ ರಾಜ್ಯ ಸಚಿವ ಕೀರ್ತಿ ವರ್ಧನ್ ಸಿಂಗ್ ಉತ್ತಿರಿಸುತ್ತಾ ಈ ವಿವರಗಳನ್ನು ನೀಡಿದ್ದಾರೆ. 2025ರಲ್ಲಿ ಪ್ರಧಾನಿ ಮೋದಿ ಫ್ರಾನ್ಸ್‌ ಪ್ರವಾಸ ಅತಿ ದುಬಾರಿಯಾಗಿದೆ. 25 ಕೋಟಿ ರೂ.ಗಳಿಗಿಂತ ಹೆಚ್ಚು ವೆಚ್ಚವಾಗಿದೆ, ಅದಾದ ಬಳಿಕ ಅಮೆರಿಕೆ ಭೇಟಿಗೆ 16 ಕೋಟಿ ರೂ.ಗಳಿಗೂ ಹೆಚ್ಚು ವೆಚ್ಚವಾಗಿದೆ.
ಇದನ್ನು ಓದಿದ್ದೀರಾ? ಮುಂಗಾರು ಅಧಿವೇಶನದ ವೇಳೆಯೇ ಮೋದಿ ವಿದೇಶ ಪ್ರವಾಸ: ವಿಪಕ್ಷಗಳ ಎದುರಿಸಲಾಗದೆ ಪಲಾಯನವೇ?
ಮಾರಿಷಸ್, ಸೈಪ್ರಸ್ ಮತ್ತು ಕೆನಡಾದಂತಹ ದೇಶಗಳಿಗೆ ನೀಡಿರುವ ಭೇಟಿ ವಿವರ ಈ ಪಟ್ಟಿಯಲ್ಲಿ ಸೇರಿಲ್ಲ. ಈ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ 2024ರಲ್ಲಿ ರಷ್ಯಾ ಮತ್ತು ಉಕ್ರೇನ್ ಸೇರಿದಂತೆ 16 ದೇಶಗಳಲ್ಲಿ ಪ್ರಧಾನಿ ಮೋದಿ ಭೇಟಿಗಾಗಿ 109 ಕೋಟಿ ರೂಪಾಯಿ ಖರ್ಚಾಗಿದೆ ಎಂದು ದತ್ತಾಂಶ ಹೇಳಿದೆ. 2023ರಲ್ಲಿ ಸುಮಾರು 93 ಕೋಟಿ ರೂ.ಗಳಷ್ಟು ಖರ್ಚಾಗಿದೆ, ಆದರೆ 2022 ಮತ್ತು 2021ರಲ್ಲಿ ಕ್ರಮವಾಗಿ 55.82 ಕೋಟಿ ರೂ.ಗಳು ಮತ್ತು 36 ಕೋಟಿ ರೂ. ವೆಚ್ಚಾಗಿತ್ತು. 2023ರಲ್ಲಿ ಪ್ರಧಾನಿಯವರು ಆಗಿನ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಭೇಟಿಯಾದಾಗ ಅವರು 22 ಕೋಟಿ ರೂ.ಗಳಿಗೂ ಹೆಚ್ಚು ವೆಚ್ಚವಾಗಿದೆ. ಅಂದರೆ ವರ್ಷ ಕಳೆದಂತೆ ವಿದೇಶ ಪ್ರವಾಸ ಹೆಚ್ಚಾಗುತ್ತಿರುವುದು, ಅದರ ಖರ್ಚೂ ಅಧಿಕವಾಗುತ್ತಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ.
ಇನ್ನು 2021ರಲ್ಲಿ ಬಾಂಗ್ಲಾದೇಶ, ಇಟಲಿ ಮತ್ತು ಯುಕೆ ಭೇಟಿಗೆ ಅಧಿಕ ಖರ್ಚಾಗಿದೆ. ಯುಎಸ್ ಪ್ರವಾಸಕ್ಕೆ ಮಾತ್ರ 19 ಕೋಟಿ ರೂ.ಗಳಿಗಿಂತ ಹೆಚ್ಚು ವೆಚ್ಚವಾಗಿದೆ. 2022ರಲ್ಲಿ, ಜರ್ಮನಿ ಮತ್ತು ಜಪಾನ್ ಭೇಟಿಗೆ ಕ್ರಮವಾಗಿ 9 ಕೋಟಿ ರೂ. ಮತ್ತು 8 ಕೋಟಿ ರೂ.ಗಳಿಗಿಂತ ಅಧಿಕ ವೆಚ್ಚವಾಗಿದೆ. ಸಾರ್ವಜನಿಕ ಕಾರ್ಯಕ್ರಮಗಳು, ಜಾಹೀರಾತು ಮತ್ತು ಈ ಭೇಟಿಗಳಿಗೆ ಸಂಬಂಧಿಸಿದ ಪ್ರಸಾರ ವೆಚ್ಚಗಳ ವಿವರಗಳನ್ನೂ ಸಹ ಇವು ಒಳಗೊಂಡಿದೆ.
ಈಗಾಗಲೇ ಮುಂಗಾರು ಅಧಿವೇಶನದ ಸಂದರ್ಭದಲ್ಲೇ ವಿದೇಶ ಪ್ರವಾಸ ಹೊರಟು ಪ್ರಧಾನಿ ಮೋದಿ ವಿಪಕ್ಷಗಳ ವಾಗ್ದಾಳಿಗೆ ಗುರಿಯಾಗಿದ್ದಾರೆ. ಈ ನಡುವೆ ವಿದೇಶ ಪ್ರವಾಸಕ್ಕೆ ಭಾರೀ ಪ್ರಮಾಣದ ವೆಚ್ಚವಾಗುತ್ತಿರುವ ದತ್ತಾಂಶವನ್ನು ಕೇಂದ್ರ ಸರ್ಕಾರವೇ ಬಹಿರಂಗಪಡಿಸಿರುವುದು ಸಾರ್ವಜನಿಕ ಆಕ್ರೋಶಕ್ಕೆ ಕಾರಣವಾಗಿದೆ. ಇವೆಲ್ಲವೂ ಜನರ ಹಣವಲ್ಲವೇ? ಪ್ರಧಾನಿ ಮೋದಿ ವ್ಯಾಪಾರ ನೆಪದಲ್ಲಿ ಜನರ ಹಣವನ್ನು ದುಂದುವೆಚ್ಚ ಮಾಡುವುದು ಎಷ್ಟು ಸರಿ ಎಂದು ಪ್ರಶ್ನೆಗಳು ಹುಟ್ಟಿಕೊಂಡಿವೆ.
