ಪ್ರಧಾನಿ ನರೇಂದ್ರ ಮೋದಿ ಅವರು ದೇಶದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ನಿಂದನೆ ಮಾಡಲು ಆಗಾಗ ಅವಕಾಶ ಹುಡುಕುವವರು. ಸಣ್ಣ ಅವಕಾಶ ಸಿಕ್ಕರೂ ಅದನ್ನು ಬಿಡದೆ ನೆಹರೂ ನಿಂದನೆಗೆ ಇಳಿಯುವವರು. ತೆಗಳುವ ಭರದಲ್ಲಿ ಸುಳ್ಳುಗಳ ಸರಮಾಲೆ ಪೋಣಿಸಿ ಭಾಷಣ ಮಾಡುವವರು ನಮ್ಮ ಪ್ರಧಾನಿ ನರೇಂದ್ರ ಮೋದಿ. ಹಾಗಿರುವಾಗ ಪ್ರಧಾನಿ ಮೋದಿ ಮುಂದೆಯೇ ವಿಯೆಟ್ನಾಂ ಅಧ್ಯಕ್ಷ ಟೊ ಲ್ಯಾಮ್ ಅವರು ನೆಹರೂ ಗುಣಗಾನ ಮಾಡಿದ್ದಾರೆ.
ಟೊ ಲ್ಯಾಮ್ ಜವಾಹರಲಾಲ್ ನೆಹರೂ ಅವರನ್ನು ಸ್ಮರಿಸಿದ್ದು ಸದ್ಯ ರಾಜತಾಂತ್ರಿಕ ವಲಯದಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ. ದೇಶದಲ್ಲಿ ಮೋದಿ ಸರ್ಕಾರ ನೆಹರೂ ವಿರುದ್ಧ ವಾಗ್ದಾಳಿ ನಡೆಯುತ್ತಿರುವಾಗಲೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ನೆಹರೂ ಅವರ ಪ್ರಭಾವ ಇಂದಿಗೂ ಮಸುಕಾಗಿಲ್ಲ ಎಂಬುದಕ್ಕೆ ಇದು ಸಾಕ್ಷಿಯಾಗಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಜನಪ್ರತಿನಿಧಿಗಳ ಘನತೆ ಇಲ್ಲದ ಮಾತಿಗೆ ಲಗಾಮು ಬೀಳಬೇಕು
ನವದೆಹಲಿಯಲ್ಲಿ ನಡೆದ ಮಾತುಕತೆಯ ವೇಳೆ ಲ್ಯಾಮ್, “ಹನೋಯಿ ವಿಮೋಚನೆಯಾದ ಒಂದು ವಾರದ ನಂತರ (1954ರಲ್ಲಿ) ವಿಯೆಟ್ನಾಂಗೆ ಭೇಟಿ ನೀಡಿದ ಮೊದಲ ವಿದೇಶಿ ನಾಯಕ ಜವಾಹರಲಾಲ್ ನೆಹರೂ ಎಂಬುದು ನಮಗೆ ಎಂದಿಗೂ ಮರೆಯಲಾಗದ ಸಂಗತಿ” ಎಂದು ಹೇಳಿದ್ದಾರೆ. ಹಾಗೆಯೇ ವಿಯೆಟ್ನಾಂ ಮತ್ತು ಭಾರತದ ನಡುವಿನ ಐತಿಹಾಸಿಕ ಸ್ನೇಹ, ವಿಶೇಷವಾಗಿ ಹೋ ಚಿ ಮಿನ್ಹ್ ಮತ್ತು ಜವಾಹರಲಾಲ್ ನೆಹರೂ ನಡುವಿನ ನಿಕಟ ಸಂಬಂಧವನ್ನೂ ಉಲ್ಲೇಖಿಸಿದ್ದಾರೆ.
ವಿಯೆಟ್ನಾಂ ಅಧ್ಯಕ್ಷರು ನೆಹರೂ ಅವರನ್ನು ಕೇವಲ ಭಾರತದ ಮೊದಲ ಪ್ರಧಾನಿಯಾಗಿ ಮಾತ್ರವಲ್ಲದೆ, ವಿಯೆಟ್ನಾಂನ ಹೋರಾಟದ ದಿನಗಳಲ್ಲಿ ಬೆಂಬಲ ನೀಡಿದ ನಾಯಕರಾಗಿ ಗೌರವಿಸಿದ್ದಾರೆ. ಅಲಿಪ್ತ ಚಳವಳಿಯ (Non-Aligned Movement) ಮೂಲಕ ವಿಯೆಟ್ನಾಂನಂತಹ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ನೆಹರೂ ನೀಡಿದ ಧ್ವನಿಯನ್ನು ಟೊ ಲ್ಯಾಮ್ ಸ್ಮರಿಸಿದ್ದಾರೆ.
ಇಂದು ಭಾರತಕ್ಕೆ ವಿವಿಧ ದೇಶಗಳ ನಾಯಕರು ಆಗಮಿಸಲು, ನಮಗೆ ಬೆಂಬಲ ನೀಡಲು ಮೋದಿ ಸರ್ಕಾರದ ಸಾಧನೆಯೇ ಕಾರಣ ಎಂಬಂತೆ ಕೇಂದ್ರ ಬಿಂಬಿಸುತ್ತಿದೆ. ನೆಹರೂ ನಿಂದನೆ ಮಾಡುತ್ತಲೇ ಬಂದಿದೆ. ಆದರೆ ವಿದೇಶಿ ನಾಯಕರು ಭಾರತಕ್ಕೆ ಬಂದಾಗ ನೆಹರೂ ಗುಣಗಾನ ಮಾಡಿರುವುದು ಭಾರತದೊಂದಿಗಿನ ವಿಯೆಟ್ನಾಂನ ಸಂಬಂಧವು ದಶಕಗಳಷ್ಟು ಹಳೆಯದು ಮತ್ತು ಸ್ಥಿರವಾದುದು ಎಂಬ ಸಂದೇಶ ನೀಡಿದ್ದಂತಾಗಿದೆ. ಹಾಗೆಯೇ ಭಾರತವು ‘ದಕ್ಷಿಣದ ರಾಷ್ಟ್ರಗಳ ಧ್ವನಿ’ (Voice of Global South) ಆಗಬೇಕೆಂಬ ಇಂದಿನ ಆಶಯಕ್ಕೆ ಅಂದೇ ನೆಹರೂ ಅಡಿಪಾಯ ಹಾಕಿದ್ದರು ಎಂಬುದನ್ನು ವಿಯೆಟ್ನಾಂ ಅಧ್ಯಕ್ಷ ಪರೋಕ್ಷವಾಗಿ ನೆನಪಿಸಿದ್ದಾರೆ.
