ಫ್ಯಾಸಿಸಂ ಯಾವಾಗಲೂ ತನ್ನ ಸ್ಥಾನವನ್ನು ಕಾಯ್ದುಕೊಳ್ಳಲು ರಾಜಕೀಯ ತತ್ತ್ವಶಾಸ್ತ್ರ ಆಧಾರಿತವಾದ ತರ್ಕಬದ್ಧ ವಿಶ್ಲೇಷಣೆಗಳನ್ನು ತಿರಸ್ಕರಿಸುತ್ತದೆ. ಕಾರಣಕ್ಕಿಂತ ನಂಬಿಕೆ, ಅನುಮಾನಕ್ಕಿಂತ ಅನುಸರಣೆ ಮತ್ತು ಚರ್ಚೆಗಿಂತ ಆಕ್ರಮಣಶೀಲತೆ ಉತ್ತಮವೆಂದು ಭಾವಿಸುವ ಪ್ರಭುತ್ವವು ಪ್ರಜಾಪ್ರಭುತ್ವವನ್ನು ನಾಶ ಮಾಡುತ್ತದೆ. ತನ್ನದೇ ಜನರನ್ನು ಕತ್ತಲಲ್ಲಿ ಇರಿಸುತ್ತದೆ.ಸನ್ಮಾನ್ಯ ಪ್ರಧಾನಿಗಳು ನಿನ್ನೆ ತಮ್ಮ ಭಾಷಣದಲ್ಲಿ ʼ ದಿಮಾಗಿ ನಕ್ಸಲರುʼ ಎಂಬ ಪದವನ್ನು ನಿರ್ದಯವಾಗಿ ಬಳಸಿ ನೇರವಾಗಿ ಮೆದುಳಿಗೇ ಕೈ ಹಾಕಿದ್ದಾರೆ. ಮತ್ತು ಆ ಪದವನ್ನು ಬಳಸುತ್ತಾ ʼ ನಾವು ಸಶಸ್ತ್ರ ನಕ್ಸಲರನ್ನು ನಿರ್ಮೂಲಗೊಳಿಸಿದ್ದೇವೆ, ಈಗ ಇವರ ಬಗ್ಗೆ ಜಾಗೃತರಾಗಿರಬೇಕಾಗಿದೆʼ ಎಂಬ ಎಚ್ಚರಿಕೆಯನ್ನೂ ನೀಡಿದ್ದಾರೆ. ಅದೂ ಸ್ವಾತಂತ್ರ್ಯೋತ್ಸವದ ದಿನದ ಭಾಷಣದಲ್ಲಿ ಈ ಎಚ್ಚರಿಕೆಯ ಪರಿಣಾಮ ಮುಂದಿನ ದಿನಗಳಲ್ಲಿ ಭೀಕರವಾದ ಪರಿಣಾಮ ಬೀರಲಿದೆ.
ಚಿಂತಕರನ್ನು, ಲೇಖಕರನ್ನು, ಕಲಾವಿದರನ್ನು ಪೂರ್ತಿಯಾಗಿ ಮಟ್ಟಹಾಕಬಯಸುವ ಮಾತುಗಳಿವು. ಪ್ರಶ್ನಿಸುವುದನ್ನು ಕಲಿಸುವ, ರಾಜಕೀಯ ವಿನ್ಯಾಸಗಳನ್ನು ವಿಶ್ಲೇಷಿಸುವ, ಮಾನವೀಯ ಸಂಬಂಧಗಳನ್ನು ಪರಿಶೋಧಿಸುವ ಪ್ರಕ್ರಿಯೆಗಳು ಅಗತ್ಯವಿಲ್ಲ ಎಂಬ ಧೋರಣೆ ಇಲ್ಲಿ ಎದ್ದು ಕಾಣುತ್ತದೆ. ಜನಗಳ ಕುರಿತಾದ ನಮ್ಮ ತಿಳಿವಳಿಕೆಗಳನ್ನು ಹೆಚ್ಚಿಸಿ, ಮುಕ್ತಚಿಂತನೆಗೆ ಮತ್ತು ವಿಮರ್ಶೆಗೆ ಪೂರ್ಣ ಅವಕಾಶ ಮಾಡಿಕೊಡುವುದು ಪ್ರಜಾಪ್ರಭುತ್ವವಾದಿ ಸರಕಾರಗಳ ಅತಿ ದೊಡ್ಡ ಜವಾಬ್ದಾರಿ ಎಂದು ನಾವೆಲ್ಲ ನಂಬಿದ್ದರೆ, ಅದರ ಅಗತ್ಯ ನಮಗಿಲ್ಲ ಎಂದು ಪ್ರಭುತ್ವ ಗಟ್ಟಿಯಾಗಿ ಹೇಳುತ್ತಿದೆ. ಪ್ರಧಾನ ಮಂತ್ರಿಗಳ ಮಾತು ಆರ್‌ಎಸ್‌ಎಸ್‌ನ ಎರಡನೇ ಸರಸಂಚಾಲಕರಾದ ಎಂ ಎಸ್ ಗೋಲ್ವಾಲ್ಕರ್ ಅವರ ಹೇಳಿಕೆಗೆ ಸಂವಾದಿಯಾಗಿದೆ. ʼ ನಾನು ಕಬಡ್ಡಿ ಆಡಬೇಕೆಂದು ಹೇಳಿದರೆ ನೀವು ಕಬಡ್ಡಿ ಆಡಲೇಬೇಕುʼ ಎಂಬುದು ಗೋಲ್ವಾಲ್ಕರ್ ಅವರ ಪ್ರಸಿದ್ಧ ಮಾತು. ಯೋಚಿಸುವ ಹಕ್ಕನ್ನು ಕಸಿದುಕೊಳ್ಳುವ ಇಂಥ ಮಾತುಗಳು ಜನರಿಂದ ಸಂಪೂರ್ಣ ವಿಧೇಯತೆಯನ್ನು ಬಯಸುತ್ತದೆ. ಜನರು ಯಾವುದೇ ಪ್ರಶ್ನೆಗಳಿಲ್ಲದೆ ಪ್ರಭುತ್ವದ ಆದೇಶಗಳನ್ನು ಪಾಲಿಸಬೇಕು.
ಇದನ್ನೂ ಓದಿ: ‘ದಿಮಾಗಿ ನಕ್ಸಲ್’ ಆಗಿರುವುದಕ್ಕೆ ಹೆಮ್ಮೆ ಇದೆ; ಮೋದಿ ವಿರುದ್ಧ ಪಿ. ಚಿದಂಬರಂ ಕಿಡಿ
ಫ್ಯಾಸಿಸಂ ಯಾವಾಗಲೂ ತನ್ನ ಸ್ಥಾನವನ್ನು ಕಾಯ್ದುಕೊಳ್ಳಲು ರಾಜಕೀಯ ತತ್ತ್ವಶಾಸ್ತ್ರ ಆಧಾರಿತವಾದ ತರ್ಕಬದ್ಧ ವಿಶ್ಲೇಷಣೆಗಳನ್ನು ತಿರಸ್ಕರಿಸುತ್ತದೆ. ಕಾರಣಕ್ಕಿಂತ ನಂಬಿಕೆ, ಅನುಮಾನಕ್ಕಿಂತ ಅನುಸರಣೆ ಮತ್ತು ಚರ್ಚೆಗಿಂತ ಆಕ್ರಮಣಶೀಲತೆ ಉತ್ತಮವೆಂದು ಭಾವಿಸುವ ಪ್ರಭುತ್ವವು ಪ್ರಜಾಪ್ರಭುತ್ವವನ್ನು ನಾಶ ಮಾಡುತ್ತದೆ. ತನ್ನದೇ ಜನರನ್ನು ಕತ್ತಲಲ್ಲಿ ಇರಿಸುತ್ತದೆ.
ಫ್ಯಾಸಿಸಂ ಬೌದ್ಧಿಕತೆಯನ್ನು ಸಂಪೂರ್ಣವಾಗಿ ತಿರಸ್ಕರಿಸುತ್ತದೆ. ಏಕೆಂದರೆ ಅದಕ್ಕೆ ವಿಮರ್ಶಾತ್ಮಕ ವಿಶ್ಲೇಷಣೆ, ಪುರಾವೆಗಳು ಮತ್ತು ಮುಕ್ತ ಚರ್ಚೆಗಿಂತ ಭಾವನಾತ್ಮಕ ಸಜ್ಜುಗೊಳಿಸುವಿಕೆ, ಸಂಪೂರ್ಣ ವಿಧೇಯತೆ ಮತ್ತು ಪುರಾಣಗಳ ಅವಲಂಬನೆ ಹೆಚ್ಚು ಸುಲಭ ಮತ್ತು ಇಷ್ಟ. ಅದಕ್ಕಾಗಿ ಅದು ಧರ್ಮವನ್ನು ಅಗತ್ಯಕ್ಕಿಂತ ಹೆಚ್ಚು ಅವಲಂಬಿಸುತ್ತದೆ. ಸ್ವತಂತ್ರ ಚಿಂತನೆಗಳು ಸರ್ವಾಧಿಕಾರಿ ನಿಯಂತ್ರಣಕ್ಕೆ ಬೆದರಿಕೆ ಹಾಕುತ್ತವೆ ಎಂದು ಅವರು ಭಾವಿಸುತ್ತಾರೆ.
ಸನ್ಮಾನ್ಯ ಪ್ರಧಾನಿಗಳು ತಮ್ಮ ಹೇಳಿಕೆಯನ್ನು ಪುನರ್ ವಿಮರ್ಶೆಗೆ ಒಳಪಡಿಸಬೇಕೆಂದು ನಾನು ಬಯಸುತ್ತೇನೆ.
ಡಾ. ಪುರುಷೋತ್ತಮ ಬಿಳಿಮಲೆ
ಜಾನಪದ ವಿದ್ವಾಂಸರು, ಲೇಖಕರು, ಜವಹರಲಾಲ್ ನೆಹರೂ ವಿಶ್ವವಿದ್ಯಾಲಯದ ನಿವೃತ್ತ ಕನ್ನಡ ಪ್ರಾಧ್ಯಾಪಕರು
