ಕಾಮನ್‌ವೆಲ್ತ್‌ ಕ್ರೀಡಾಕೂಟದ ಇತಿಹಾಸದಲ್ಲಿ ಯುವ ಕ್ರೀಡಾಪಟು ಅಸ್ಮಿತಾ ದೇಯ್ ಅವರು ಭಾರತಕ್ಕೆ ಹೊಸ ಅಧ್ಯಾಯ ಬರೆದಿದ್ದಾರೆ. ಸ್ಕಾಟ್ಲೆಂಡ್‌ನ ಗ್ಲಾಸ್ಗೋದಲ್ಲಿ ನಡೆದ 2026ರ ಕಾಮನ್‌ವೆಲ್ತ್‌ ಕ್ರೀಡಾಕೂಟದಲ್ಲಿ ಮಹಿಳೆಯರ 48 ಕೆ.ಜಿ. ವಿಭಾಗದ ಜೂಡೋ ಸ್ಪರ್ಧೆಯಲ್ಲಿ ಅವರು ಚಿನ್ನದ ಪದಕ ಗೆದ್ದಿದ್ದಾರೆ. ಕಾಮನ್‌ವೆಲ್ತ್‌ನಲ್ಲಿ ಜೂಡೋ ವಿಭಾಗದಲ್ಲಿ ಚಿನ್ನ ಗೆದ್ದ ಮೊದಲ ಭಾರತೀಯ ಕ್ರೀಡಾಪಟು ಎಂಬ ಅಪೂರ್ವ ದಾಖಲೆ ನಿರ್ಮಿಸಿದ್ದಾರೆ.
ತ್ರಿಪುರಾದ ದಕ್ಷಿಣ ಭಾಗದಲ್ಲಿರುವ ಬೆಲೋನಿಯಾ ಜಿಲ್ಲೆಯ ಸಾಮಾನ್ಯ ಕುಟುಂಬದಲ್ಲಿ 2003ರ ಮಾರ್ಚ್‌ 22ರಂದು ಜನಿಸಿದ ಅಸ್ಮಿತಾ ದೇಯ್ ಅವರ ಬಾಲ್ಯ ಐಷಾರಾಮಿ ಬದುಕಿನದ್ದಲ್ಲ. ಅವರ ತಂದೆ ಅರ್ಜುನ್‌ ಕುಮಾರ್ ದೇಯ್ ಅವರು ಬೈಸಿಕಲ್‌ ರಿಪೇರಿ ಅಂಗಡಿ ನಡೆಸುತ್ತ ಕುಟುಂಬವನ್ನು ಸಾಗಿಸುತ್ತಿದ್ದರು. ನಾಲ್ವರು ಮಕ್ಕಳಿರುವ ಕುಟುಂಬದಲ್ಲಿ ಬೆಳೆದ ಅಸ್ಮಿತಾ, ಕಠಿಣ ಆರ್ಥಿಕ ಪರಿಸ್ಥಿತಿಯ ನಡುವೆಯೂ ಕ್ರೀಡೆಯತ್ತ ತಮ್ಮ ಆಸಕ್ತಿ ಉಳಿಸಿಕೊಂಡಿದ್ದರು. ಅವರ ಯಶಸ್ಸಿನ ಹಿಂದೆ ಕೇವಲ ಪ್ರತಿಭೆಯಷ್ಟೇ ಅಲ್ಲ, ಕುಟುಂಬದ ತ್ಯಾಗ, ನಿರಂತರ ಪರಿಶ್ರಮ ಹಾಗೂ ಅವಕಾಶಗಳನ್ನು ಬಳಸಿಕೊಂಡ ದೃಢ ಸಂಕಲ್ಪವೂ ಇದೆ.
ಇಂದು ಜೂಡೋದಲ್ಲಿ ಇತಿಹಾಸ ನಿರ್ಮಿಸಿರುವ ಅಸ್ಮಿತಾ, ಆರಂಭದಲ್ಲಿ ಜೂಡೋ ಆಟಗಾರ್ತಿಯೇ ಅಲ್ಲ ಎಂಬುದು ವಿಶೇಷ. ಅವರ ಕ್ರೀಡಾ ಜೀವನ ಆರಂಭವಾಗಿದ್ದು 800 ಮೀಟರ್‌ ಓಟಗಾರ್ತಿಯಾಗಿ. ಮಧ್ಯಮ ದೂರದ ಓಟದಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದ್ದ ಅವರು ಜಿಲ್ಲಾ ಮಟ್ಟದ ಕ್ರೀಡೆಗಳಿಗೆ ಆಯ್ಕೆಯಾಗಿದ್ದರು. ಆದರೆ, ಇದೇ ಸಮಯದಲ್ಲಿ, ತರಬೇತುದಾರರೊಬ್ಬರು ಅವರನ್ನು ಜೂಡೋಗೆ ಪರಿಚಯಿಸಿದರು. ಆ ಒಂದು ಪರಿಚಯವೇ ಅವರ ಬದುಕಿನ ದಿಕ್ಕನ್ನು ಸಂಪೂರ್ಣವಾಗಿ ಬದಲಿಸಿತು. ಓಟದ ಟ್ರ್ಯಾಕ್‌ನಿಂದ ಜೂಡೋ ಮ್ಯಾಟ್‌ಗೆ ಬಂದ ಅಸ್ಮಿತಾ, ನಂತರ ಹಿಂದೆ ತಿರುಗಿ ನೋಡುವ ಅಗತ್ಯವೇ ಬರಲಿಲ್ಲ.
ಜೂಡೋದಲ್ಲಿ ಅವರ ಪ್ರತಿಭೆಯನ್ನು ಮೊದಲಿಗೆ ಗುರುತಿಸಿ ರೂಪಿಸಿದವರು ಬೆಲೋನಿಯಾ ವಿದ್ಯಾಪೀಠ ಕೋಚಿಂಗ್‌ ಸೆಂಟರ್‌ನ ತರಬೇತುದಾರೆ ಬೀನಾ ದೇಬನಾಥ್‌. ನಂತರ, ತ್ರಿಪುರಾ ಸ್ಪೋರ್ಟ್ಸ್‌ ಸ್ಕೂಲ್‌ನಲ್ಲಿ ಮಾಣಿಕ್‌ ಲಾಲ್‌ ದೇಬ್ ಅವರ ಮಾರ್ಗದರ್ಶನದಲ್ಲಿ ಅಸ್ಮಿತಾ ಮತ್ತಷ್ಟು ಪಳಗಿದರು. ಶಾಲಾ ಕ್ರೀಡಾಕೂಟಗಳು ಮತ್ತು ಖೇಲೋ ಇಂಡಿಯಾ ಸ್ಪರ್ಧೆಗಳಲ್ಲಿ ಅವರು ತೋರಿದ ಅತ್ಯುತ್ತಮ ಪ್ರದರ್ಶನದ ಫಲವಾಗಿ 2018ರಲ್ಲಿ ಭಾರತೀಯ ಕ್ರೀಡಾ ಪ್ರಾಧಿಕಾರದ (SAI) ಭೋಪಾಲ್‌ ಪ್ರಾದೇಶಿಕ ಕೇಂದ್ರದಲ್ಲಿ ತರಬೇತಿ ಪಡೆಯುವ ಅವಕಾಶ ಅವರಿಗೆ ದೊರೆಯಿತು. ಅಲ್ಲಿ ಹಿರಿಯ ತರಬೇತುದಾರ ಯಶ್‌ಪಾಲ್‌ ಸೋಲಂಕಿ ಅವರ ಮಾರ್ಗದರ್ಶನದಲ್ಲಿ ರಾಷ್ಟ್ರೀಯ ಮಟ್ಟದ ತರಬೇತಿ ಪಡೆದು, ನಂತರ ಟಾರ್ಗೆಟ್‌ ಒಲಿಂಪಿಕ್‌ ಪೋಡಿಯಂ ಸ್ಕೀಮ್‌ (TOPS) ಅಭಿವೃದ್ಧಿ ತಂಡಕ್ಕೂ ಸೇರ್ಪಡೆಯಾದರು.
ಅಸ್ಮಿತಾ ತಮ್ಮ ಆದರ್ಶವಾಗಿ ಭಾರತದ ಜೂಡೋ ಪಟು ಅವ್ತಾರ್‌ ಸಿಂಗ್‌ ಮತ್ತು ಜಪಾನ್‌ನ ವಿಶ್ವಪ್ರಸಿದ್ಧ ಜೂಡೋ ಚಾಂಪಿಯನ್‌ ಉಟಾ ಆಬೆ ಅವರನ್ನು ನೋಡುತ್ತಿದ್ದರು. ಅವರಂತೆಯೇ ವಿಶ್ವ ವೇದಿಕೆಯಲ್ಲಿ ಭಾರತವನ್ನು ಪ್ರತಿನಿಧಿಸುವ ಕನಸನ್ನು ಅವರು ಬಾಲ್ಯದಿಂದಲೇ ಕಂಡಿದ್ದರು.
ಅಂತರರಾಷ್ಟ್ರೀಯ ಮಟ್ಟದಲ್ಲಿ ಅಸ್ಮಿತಾ ಮೊದಲ ಬಾರಿ ಗಮನ ಸೆಳೆದದ್ದು 2022ರಲ್ಲಿ ಥೈಲ್ಯಾಂಡ್‌ನಲ್ಲಿ ನಡೆದ ಏಷ್ಯನ್‌ ಕ್ಯಾಡೆಟ್‌ ಮತ್ತು ಜೂನಿಯರ್‌ ಜೂಡೋ ಸ್ಪರ್ಧೆಯಲ್ಲಿ ಪದಕ ಗೆದ್ದಾಗ. ಈ ಸಾಧನೆಯೊಂದಿಗೆ ಅಂತರರಾಷ್ಟ್ರೀಯ ಜೂಡೋ ಸ್ಪರ್ಧೆಯಲ್ಲಿ ಪದಕ ಗೆದ್ದ ತ್ರಿಪುರಾದ ಮೊದಲ ಜೂಡೋ ಪಟು ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾದರು. ಅದರ ನಂತರ ಅವರ ಸಾಧನೆಯ ಪಯಣ ನಿರಂತರವಾಗಿ ಮುಂದುವರಿಯಿತು.
2023ರಲ್ಲಿ ಮಕಾವ್‌ನಲ್ಲಿ ನಡೆದ ಜೂನಿಯರ್‌ ಏಷ್ಯಾಕಪ್‌ನಲ್ಲಿ ಮಹಿಳೆಯರ 48 ಕೆ.ಜಿ. ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದ ಅವರು, ಕುವೈತ್‌ನಲ್ಲಿ ನಡೆದ ಏಷ್ಯನ್‌ ಓಪನ್‌ನಲ್ಲಿ ಬೆಳ್ಳಿ ಪದಕ ಜಯಿಸಿದರು. 2025ರಲ್ಲಿ ಮೊರಾಕೊದ ಕ್ಯಾಸಾಬ್ಲಾಂಕಾದಲ್ಲಿ ನಡೆದ ಆಫ್ರಿಕನ್‌ ಓಪನ್‌ನಲ್ಲಿ ಚಿನ್ನ ಗೆದ್ದು ಹಿರಿಯರ ಅಂತರರಾಷ್ಟ್ರೀಯ ಸ್ಪರ್ಧೆಯಲ್ಲಿ ಮೊದಲ ಬಾರಿಗೆ ಅಗ್ರಸ್ಥಾನಕ್ಕೇರಿದರು. 2026ರಲ್ಲಿ ನಡೆದ ಏಷ್ಯನ್‌ ಹಿರಿಯರ ಚಾಂಪಿಯನ್‌ಶಿಪ್‌ನಲ್ಲಿ ಏಷ್ಯಾದ ಅತ್ಯುತ್ತಮ ಜೂಡೋ ಪಟುಗಳ ವಿರುದ್ಧ ಸೆಣಸಿ ಐದನೇ ಸ್ಥಾನ ಗಳಿಸುವ ಮೂಲಕ ವಿಶ್ವ ಮಟ್ಟದಲ್ಲೂ ತಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸಿದರು.
ದೇಶೀಯ ಮಟ್ಟದಲ್ಲಿಯೂ ಅಸ್ಮಿತಾ ಸಾಧನೆಗಳ ಸರಮಾಲೆಯನ್ನೇ ಕಟ್ಟಿದ್ದಾರೆ. ಖೇಲೋ ಇಂಡಿಯಾ ಯೂನಿವರ್ಸಿಟಿ ಗೇಮ್ಸ್‌ನಲ್ಲಿ ಹಲವು ಚಿನ್ನದ ಪದಕಗಳನ್ನು ಗೆದ್ದಿರುವ ಅವರು, 2023-24ರಲ್ಲಿ ರಾಷ್ಟ್ರೀಯ ಜೂನಿಯರ್‌ ಜೂಡೋ ಚಾಂಪಿಯನ್‌ ಆಗಿಯೂ ಹೊರಹೊಮ್ಮಿದ್ದರು. ಈ ಎಲ್ಲ ಸಾಧನೆಗಳು ಕಾಮನ್‌ವೆಲ್ತ್‌ ಕ್ರೀಡಾಕೂಟದ ಐತಿಹಾಸಿಕ ಯಶಸ್ಸಿಗೆ ಬಲವಾದ ಅಡಿಪಾಯವಾಗಿದ್ದವು.
ಈ ಲೇಖನ ಓದಿದ್ದೀರಾ?: ಅತಿ ಹೆಚ್ಚು ‘ಭುವನ ಸುಂದರಿ’ಯರನ್ನು ಕೊಟ್ಟ ವೆನೆಜುವೆಲಾ ʼಬ್ಯೂಟಿ ಫ್ಯಾಕ್ಟರಿʼಯ ಕಹಿ ಸತ್ಯ ಬಲ್ಲಿರಾ?
ಗ್ಲಾಸ್ಗೋದಲ್ಲಿ ನಡೆದ ಕಾಮನ್‌ವೆಲ್ತ್‌ ಕ್ರೀಡಾಕೂಟದಲ್ಲಿ ಅಸ್ಮಿತಾ ಪ್ರತಿಯೊಂದು ಸುತ್ತಿನಲ್ಲೂ ಅದ್ಭುತ ಪ್ರದರ್ಶನ ನೀಡಿದರು. ಕ್ವಾರ್ಟರ್‌ ಫೈನಲ್‌ನಲ್ಲಿ ಆತಿಥೇಯ ಸ್ಕಾಟ್ಲೆಂಡ್‌ನ ಇವಾ ಇವಿಂಗ್‌ ಅವರನ್ನು ಇಪ್ಪೋನ್‌ ಮೂಲಕ ಸೋಲಿಸಿದರು. ನಂತರ ಸೆಮಿಫೈನಲ್‌ನಲ್ಲಿ ಮತ್ತೊಬ್ಬ ಆತಿಥೇಯ ಆಟಗಾರ್ತಿ ಸಮರ್‌ ಶಾ ವಿರುದ್ಧ ಕಠಿಣ ಪೈಪೋಟಿ ನಡೆಸಿ ಫೈನಲ್‌ಗೆ ಪ್ರವೇಶಿಸಿದರು.
ಚಿನ್ನದ ಪದಕದ (ಫೈನಲ್) ಪಂದ್ಯದಲ್ಲಿ ಕೆನಡಾದ ಅನುಭವಿ ಜೂಡೋ ಪಟು ಹೈಡಿ ಕ್ವಾಚ್‌ ಎದುರು ಅಸ್ಮಿತಾಗೆ ತೀವ್ರ ಸವಾಲು ಎದುರಾಯಿತು. ಆರಂಭದಲ್ಲಿ ಹಿನ್ನಡೆ ಅನುಭವಿಸಿದರೂ ಅವರು ಆತ್ಮವಿಶ್ವಾಸ ಕಳೆದುಕೊಳ್ಳಲಿಲ್ಲ. ಅಂತಿಮ ಕ್ಷಣದವರೆಗೂ ಹೋರಾಡಿದ ಅಸ್ಮಿತಾ ಪಂದ್ಯವನ್ನು ‘ಗೋಲ್ಡನ್‌ ಸ್ಕೋರ್‌’ ಹಂತಕ್ಕೆ ಕೊಂಡೊಯ್ದರು. ಜೂಡೋದಲ್ಲಿ ‘ಸಡನ್‌ ಡೆತ್‌’ ಅವಧಿಯಾಗಿರುವ ಗೋಲ್ಡನ್‌ ಸ್ಕೋರ್‌ನಲ್ಲಿ ನಿರ್ಣಾಯಕ ಎಸೆತದ ಮೂಲಕ ಎದುರಾಳಿಯನ್ನು ಮಣಿಸಿ ಭಾರತದ ಮೊದಲ ಕಾಮನ್‌ವೆಲ್ತ್‌ ಜೂಡೋ ಚಿನ್ನವನ್ನು ತಮ್ಮದಾಗಿಸಿಕೊಂಡರು. ಆ ಕ್ಷಣ ಭಾರತದ ಜೂಡೋ ಇತಿಹಾಸದ ಸುವರ್ಣ ಕ್ಷಣವಾಯಿತು.
ತ್ರಿಪುರಾದ ಒಂದು ಸಣ್ಣ ಪಟ್ಟಣದಲ್ಲಿರುವ ಬೈಸಿಕಲ್‌ ರಿಪೇರಿ ಅಂಗಡಿಯಿಂದ ಆರಂಭವಾದ ಅಸ್ಮಿತಾ ಪಯಣ ಇಂದು ಕಾಮನ್‌ವೆಲ್ತ್‌ ಕ್ರೀಡಾಕೂಟದ ಅತಿ ಎತ್ತರದ ವೇದಿಕೆಗೆ ತಲುಪಿದೆ. ಇನ್ನೂ ಇಪ್ಪತ್ತರ ಹರೆಯದಲ್ಲಿರುವ ಅಸ್ಮಿತಾ ದೇಯ್ ಅವರ ಕನಸು ಇದಕ್ಕಿಂತಲೂ ದೊಡ್ಡದು. ಒಲಿಂಪಿಕ್ಸ್‌ನಲ್ಲಿ ಭಾರತಕ್ಕೆ ಪದಕ ಗೆಲ್ಲುವುದು ಅವರ ಮುಂದಿನ ಗುರಿ. ಕಾಮನ್‌ವೆಲ್ತ್‌ನಲ್ಲಿ ನಿರ್ಮಿಸಿದ ಈ ಐತಿಹಾಸಿಕ ಸಾಧನೆ, ಆ ಮಹತ್ತರ ಕನಸಿನತ್ತ ಇಟ್ಟಿರುವ ಮತ್ತೊಂದು ಗಟ್ಟಿಯಾದ ಹೆಜ್ಜೆಯಾಗಿದೆ.
