ಮುಂದಿನ ಬಾರಿ ನಿಮ್ಮ ಮನೆಯ ಮೂಲೆಯಲ್ಲಿ ʼಜಿರಳೆʼಯೊಂದು ಪ್ರತ್ಯಕ್ಷವಾದರೆ, ಅದನ್ನು ಚಪ್ಪಲಿಯಿಂದ ಜಜ್ಜುವ ಮುನ್ನ, ನಿಮ್ಮ ಎದುರಿಗಿರುವುದು ಡೈನೋಸಾರ್‌ಗಳ ಕಾಲದಿಂದಲೂ ಅಣುಬಾಂಬ್ ವಿಕಿರಣಗಳನ್ನೂ ಸೋಲಿಸಿ ಗೆದ್ದು ಬಂದಿರುವ ಭೂಮಿಯ ಅತಿ ದೊಡ್ಡ ‘ಟೈಮ್ ಟ್ರಾವೆಲರ್’ ಎಂಬುದನ್ನು ನೆನಪಿಸಿಕೊಳ್ಳಿ.
ಜಗತ್ತಿನಲ್ಲಿ ಮನುಷ್ಯರನ್ನು ಅತ್ಯಂತ ಸುಲಭವಾಗಿ ಹೆದರಿಸುವ ಮತ್ತು ಅಸಹ್ಯ ಹುಟ್ಟಿಸುವ ಜೀವಿ ಎಂದರೆ ಅದು ಬಹುಶಃ ʼಜಿರಳೆʼ ಇರಬೇಕು. ಮನೆಯಲ್ಲಿ ಅಕಸ್ಮಾತ್ ಒಂದು ಜಿರಳೆ ನೋಡಿದರೆ ಸಾಕು, ಕೈಗೆ ಸಿಕ್ಕ ಚಪ್ಪಲಿಯನ್ನೋ, ಕಸ ಗುಡಿಸುವ ಪೊರಕೆಯನ್ನೋ ಹಿಡಿದು ಅದರ ಹಿಂದೆ ಬೀಳುತ್ತೇವೆ. ಅಡಗಿದರೂ ಬಿಡಲ್ಲ. ಆದರೆ, ಈ ಪುಟ್ಟ ಜೀವಿಯ ಹಿಂದಿರುವ ವಿಸ್ಮಯಗಳನ್ನ ಕೇಳಿದರೆ, ಅಚ್ಚರಿ ಮೂಡೋದು ಪಕ್ಕಾ. ಇದರ ಹಿಂದೆ ರೋಚಕ ಇತಿಹಾಸ ಮತ್ತು ಬಗೆದಷ್ಟೂ ಬಿಚ್ಚಿಕೊಳ್ಳುವ ನಂಬಲಾಗದ ಸೂಪರ್ ಪವರ್‌ಗಳಿವೆ!
ಅಷ್ಟಕ್ಕೂ ನಾವು ಬೇಡವೆಂದರೂ ನಮ್ಮ ನಡುವೆಯೇ ಬದುಕುತ್ತಿರುವ ಈ ರೋಚ್‌ (Cockroach)ಗಳ ಸಾಮ್ರಾಜ್ಯದ ಅಸಲಿ ಕಥೆಯೇನು ಎಂಬುದೇ ಒಂದು ಕೌತುಕ. ನಾವೆಲ್ಲರೂ ತಿಳಿದುಕೊಳ್ಳಲೇಬೇಕಾದ್ದು…
ಡೈನೋಸಾರ್‌ಗಳಿಗಿಂತಲೂ ಹಳಬರು!
ನಿಮಗೆ ಗೊತ್ತೇ? ಜಿರಳೆಗಳು ಈ ಭೂಮಿಯ ಮೇಲೆ ಬರೋಬ್ಬರಿ 35 ಕೋಟಿ ವರ್ಷಗಳಿಂದ ಬದುಕುತ್ತಿವೆ! ಅಂದರೆ, ಭೂಮಿಯ ಮೇಲೆ ದೈತ್ಯ ಡೈನೋಸಾರ್‌ಗಳು ಜನಿಸುವ ಮುನ್ನವೇ ಜಿರಳೆಗಳಿದ್ದವು. ಡೈನೋಸಾರ್‌ಗಳನ್ನು ಸರ್ವನಾಶ ಮಾಡಿದ ಪ್ರಕೃತಿಯ ವಿಕೋಪಗಳು, ಹಿಮಯುಗ, ಹಾಗೂ ಭೀಕರ ಹವಾಮಾನ ಬದಲಾವಣೆಗಳನ್ನು ತಡೆದುಕೊಂಡು ಇಂದಿಗೂ ಯಶಸ್ವಿಯಾಗಿ ಬದುಕುಳಿದಿರುವ ಜಗತ್ತಿನ ಕೆಲವೇ ಕೆಲವು ಚೇತೋಹಾರಿ ಜೀವಿಗಳಲ್ಲಿ ʼಜಿರಳೆʼ ಮೊದಲ ಸ್ಥಾನದಲ್ಲಿದೆ.
ತಲೆ ಹೋದರೂ 9 ದಿನ ಬದುಕಬಲ್ಲವು!
ಮನುಷ್ಯನಿಗೆ ಸಣ್ಣ ಗಾಯವಾದರೂ ಜೀವ ಹೋಗುವಷ್ಟು ಭಯವಾಗಿಬಿಡುತ್ತದೆ. ಆದರೆ ಜಿರಳೆಯ ತಲೆ ಕತ್ತರಿಸಿ ಹಾಕಿದರೂ ಅದು ಸಾಯುವುದಿಲ್ಲ! ಹೌದು, ತಲೆ ಇಲ್ಲದೆಯೂ ಜಿರಳೆ ಸುಮಾರು ಒಂದು ವಾರದಿಂದ 9 ದಿನಗಳ ಕಾಲ ಜೀವಂತವಾಗಿರಬಲ್ಲದು. ಇದಕ್ಕೆ ಕಾರಣ, ಅವು ನಮ್ಮಂತೆ ಮೂಗಿನಿಂದ ಉಸಿರಾಡುವುದಿಲ್ಲ. ಬದಲಿಗೆ ತಮ್ಮ ದೇಹದ ಮೇಲಿರುವ ಸಣ್ಣ ಸಣ್ಣ ರಂಧ್ರಗಳ (Spiracles) ಮೂಲಕ ಉಸಿರಾಡುತ್ತವೆ. ಕೊನೆಗೆ ಅದು ಸಾಯುವುದು ತಲೆ ಇಲ್ಲದ್ದಕ್ಕಲ್ಲ; ನೀರು ಕುಡಿಯಲು ಬಾಯಿ ಇಲ್ಲದೆ ಬಾಯಾರಿಕೆಯಿಂದ!
ಹೃದಯದಲ್ಲಿ 13 ಚೇಂಬರ್‌ಗಳು!
ಮನುಷ್ಯನ ಹೃದಯದಲ್ಲಿ 4 ಚೇಂಬರ್‌ಗಳಿದ್ದರೆ (ಕೋಣೆಗಳು), ಜಿರಳೆಯ ಪುಟ್ಟ ಹೃದಯದಲ್ಲಿ ಬರೋಬ್ಬರಿ 13 ಚೇಂಬರ್‌ಗಳಿರುತ್ತವೆ. ಇದೇ ಕಾರಣಕ್ಕೆ ಅವುಗಳ ರಕ್ತಪರಿಚಲನಾ ವ್ಯವಸ್ಥೆ ಅತ್ಯಂತ ಪ್ರಬಲವಾಗಿರುತ್ತದೆ. ವಿಶೇಷವೆಂದರೆ, ಜಿರಳೆಗಳ ರಕ್ತಕ್ಕೆ ಯಾವುದೇ ಬಣ್ಣ ಇರುವುದಿಲ್ಲ (White/Colorless blood).
ಹಸುವಿನ ಹಾಲಿನ ನಾಲ್ಕರಷ್ಟು ಶಕ್ತಿ, ಭವಿಷ್ಯದ ‘ಸೂಪರ್ ಫುಡ್’!
ವಿಜ್ಞಾನಿಗಳು ಇತ್ತೀಚೆಗೆ ಪೆಸಿಫಿಕ್ ದ್ವೀಪಗಳಲ್ಲಿ ಕಂಡುಬರುವ ‘ಪೆಸಿಫಿಕ್ ಬೀಟಲ್ ಕಾಕ್ರೋಚ್’ (Pacific Beetle Cockroach) ಎಂಬ ಪ್ರಜಾತಿಯ ಜಿರಳೆಯನ್ನು ಸಂಶೋಧಿಸಿದ್ದಾರೆ. ಇದು ಮೊಟ್ಟೆ ಇಡದೆಯೇ ಮರಿಗಳಿಗೆ ಜನ್ಮ ನೀಡುತ್ತದೆ ಮತ್ತು ತನ್ನ ಮರಿಗಳಿಗಾಗಿ ಒಂದು ವಿಶೇಷ ಹಾಲನ್ನು (Postnatal Fluid) ಉತ್ಪಾದಿಸುತ್ತದೆ. ಈ ಜಿರಳೆಯ ಒಂದು ಗ್ಲಾಸ್ ಹಾಲಿನಲ್ಲಿ ಬರೋಬ್ಬರಿ 32 ಗ್ರಾಂ ಪ್ರೊಟೀನ್ ಇರುತ್ತದೆ. ಇದು ಹಸುವಿನ ಹಾಲಿನಲ್ಲಿರುವ ಪೌಷ್ಟಿಕಾಂಶಕ್ಕಿಂತ ನಾಲ್ಕು ಪಟ್ಟು ಹೆಚ್ಚು. ವಿಜ್ಞಾನಿಗಳ ಪ್ರಕಾರ, ಮುಂದಿನ ದಿನಗಳಲ್ಲಿ ಜಗತ್ತಿನ ಆಹಾರದ ಕೊರತೆ ನೀಗಿಸಲು ಈ ಜಿರಳೆ ಹಾಲು ಭವಿಷ್ಯದ ‘ಸೂಪರ್ ಫುಡ್’ (Superfood) ಆಗಿ ಹೊರಹೊಮ್ಮಲಿದೆ!
ಕಸ ತಿಂದು ರಸ ಮಾಡುವ ಪರಿಸರ ಮಿತ್ರ
ನಮಗೆ ಜಿರಳೆಗಳು ಕೊಳಕು ಜಾಗದಲ್ಲಿ ಇರುತ್ತವೆ ಅನಿಸಬಹುದು. ಆದರೆ ಪ್ರಕೃತಿಯ ಹಿತ ದೃಷ್ಟಿಯಿಂದ ಅವು ಅತ್ಯುತ್ತಮ ‘ಕ್ಲೀನರ್ಸ್’. ಕಾಡುಗಳಲ್ಲಿ ಮತ್ತು ಪರಿಸರದಲ್ಲಿ ಬೀಳುವ ಕೊಳೆತ ಎಲೆಗಳು, ಸತ್ತ ಜೀವಿಗಳು ಹಾಗೂ ಕಸವನ್ನು ತಿಂದು, ಅವುಗಳನ್ನು ಜೀರ್ಣಿಸಿಕೊಂಡು ನೈಟ್ರೋಜನ್ ಯುಕ್ತ ಮಲವನ್ನು ವಿಸರ್ಜಿಸುತ್ತವೆ. ಈ ನೈಟ್ರೋಜನ್ ಮಣ್ಣಿನ ಫಲವತ್ತತೆಯನ್ನು ಹೆಚ್ಚಿಸಿ ಗಿಡಮರಗಳು ಬೆಳೆಯಲು ಸಹಾಯ ಮಾಡುತ್ತದೆ. ಅಂದರೆ, ಇವು ಕಸವನ್ನು ತಿಂದು ಪ್ರಕೃತಿಗೆ ರಸ ನೀಡುವ ಮಿತ್ರ ಜೀವಗಳು.
ಜಿರಳೆಯ ದೇಹದಲ್ಲಿದೆ ಆ್ಯಂಟಿಬಯೋಟಿಕ್ ಮದ್ದು!
ಸೂಪರ್ ಗ್ಲೈಡರ್ ಆಗಿರುವ ಜಿರಳೆಗಳು ಅತ್ಯಂತ ಕೊಳಕು ಪರಿಸರದಲ್ಲಿ ಬದುಕುವುದರಿಂದ, ಅವುಗಳ ಮೆದುಳಿನಲ್ಲಿ ಬ್ಯಾಕ್ಟೀರಿಯಾಗಳನ್ನು ಕೊಲ್ಲುವ ಪ್ರಬಲ ಆ್ಯಂಟಿಬ್ಯಾಕ್ಟೀರಿಯಲ್ ಅಂಶಗಳು ಫಾರ್ಮ್‌ ಆಗಿರುತ್ತವೆ. ವಿಜ್ಞಾನಿಗಳ ಪ್ರಕಾರ, ಮನುಷ್ಯರ ಯಾವುದೇ ಆ್ಯಂಟಿಬಯೋಟಿಕ್ ಔಷಧಿಗಳಿಗೆ ಸಾಯದ ಸೂಪರ್-ಬಗ್ (Superbugs) ಬ್ಯಾಕ್ಟೀರಿಯಾಗಳನ್ನು ಕೊಲ್ಲುವ ಶಕ್ತಿ ಜಿರಳೆಯ ಮೆದುಳಿನಿಂದ ತಯಾರಿಸುವ ದ್ರವಕ್ಕಿದೆ. ಭವಿಷ್ಯದ ಪ್ರಾಣರಕ್ಷಕ ಔಷಧಿಗಳಿಗೆ ಇವುಗಳೇ ಮೂಲ!
ಇಂತಹ ಪರಿಸರ ಸ್ನೇಹಿ ಕೀಟವನ್ನು ಕಂಡ ಕೂಡಲೇ ಕೆಲವರು ಎದ್ದೂ ಬಿದ್ದು ಓಡಿದರೆ, ಕೆಲವರು ಚಪ್ಪಲಿಯಿಂದ ಜೋರಾಗಿ ಹೊಡೆದು ಜಜ್ಜಿಬಿಡುತ್ತಾರೆ. ಆದರೆ ವಿಜ್ಞಾನದ ಪ್ರಕಾರ ಇದು ಅತ್ಯಂತ ಅಪಾಯಕಾರಿ! ಜಿರಳೆಯನ್ನು ಚಪ್ಪಲಿಯಿಂದ ಜಜ್ಜಿದಾಗ ಅದರ ಹೊಟ್ಟೆಯಲ್ಲಿರುವ ನೂರಾರು ಬ್ಯಾಕ್ಟೀರಿಯಾಗಳು, ಸಾಲ್ಮೊನೆಲ್ಲಾದಂತಹ ಸೂಕ್ಷ್ಮಾಣು ಜೀವಿಗಳು ಮತ್ತು ಅಲರ್ಜಿ ಉಂಟುಮಾಡುವ ಕಣಗಳು ಗಾಳಿಯಲ್ಲಿ ಹಾಗೂ ನೆಲದ ಮೇಲೆ ಹರಡಿಕೊಳ್ಳುತ್ತವೆ. ಇದು ಮನೆಯಲ್ಲಿರುವ ಮಕ್ಕಳಿಗೆ ಮತ್ತು ವೃದ್ಧರಿಗೆ ಆಸ್ತಮಾ ಅಥವಾ ಉಸಿರಾಟದ ತೊಂದರೆ ತರಬಹುದು. ಹಾಗಾಗಿ, ಅವುಗಳನ್ನು ಜಜ್ಜುವ ಬದಲು ಓಡಿಸುವುದು ಅಥವಾ ಸ್ಪ್ರೇ ಬಳಸಿ ನಿಯಂತ್ರಿಸುವುದು ಸೂಕ್ತ.
ಡಿಸ್ಕವರಿ ಚಾನೆಲ್‌ನ ‘ಮಿಥ್ ಬಸ್ಟರ್ಸ್’ (MythBusters) ಕಾರ್ಯಕ್ರಮದ ಖ್ಯಾತ ನಿರೂಪಕರಾದ ಆಡಮ್ ಸ್ಯಾವೇಜ್ ಮತ್ತು ಜೇಮೀ ಹೈನೆಮನ್, ಜಿರಳೆಗಳ ಕುರಿತಾದ ಜಗತ್ತಿನ ಅತಿ ದೊಡ್ಡ ಮಿಥ್ ಅಥವಾ ಕಲ್ಪನೆಯೊಂದನ್ನು ವಿಜ್ಞಾನದ ಮೂಲಕ ಪರೀಕ್ಷಿಸಿದ್ದರು. ಅವರು ನಡೆಸಿದ ಜರ್ಮನ್ ವೈಜ್ಞಾನಿಕ ಪ್ರಯೋಗ ಅತ್ಯಂತ ರೋಮಾಂಚನಕಾರಿಯಾಗಿತ್ತು.
ಜಗತ್ತಿನಲ್ಲಿ ಒಂದು ಸುಪ್ರಸಿದ್ಧವಾದ ನಂಬಿಕೆಯಿದೆ. “ಒಂದು ವೇಳೆ ಭೂಮಿ ಮೇಲೆ ಪರಮಾಣು ಯುದ್ಧ ನಡೆದು ಅಣುಬಾಂಬ್ ಸ್ಫೋಟಗೊಂಡರೆ, ಮನುಷ್ಯರು ಸೇರಿದಂತೆ ಇಡೀ ಜೀವರಾಶಿ ನಾಶವಾಗುತ್ತದೆ. ಆದರೆ ಜಿರಳೆಗಳು ಮಾತ್ರ ಬದುಕುಳಿಯುತ್ತವೆ.” ಈ ವಿಷಯ ನಿಜವೇ ಅಥವಾ ಸುಳ್ಳೇ ಎಂದು ಪರೀಕ್ಷಿಸಲು ಆಡಮ್ ಮತ್ತು ಜೇಮೀ ಪ್ರಯೋಗಕ್ಕಿಳಿದರು.
ಅವರು ಜಿರಳೆಗಳನ್ನು ಮೂರು ಗುಂಪುಗಳಾಗಿ ವಿಂಗಡಿಸಿ, ಜರ್ಮನ್ ತಂತ್ರಜ್ಞಾನದ ಅತ್ಯಾಧುನಿಕ ವಿಕಿರಣ ಉಪಕರಣಗಳ ಮೂಲಕ ಬೇರೆ ಬೇರೆ ಪ್ರಮಾಣದ ಕೋಬಾಲ್ಟ್-60 (Cobalt-60) ವಿಕಿರಣಗಳಿಗೆ ಒಡ್ಡಿದರು.
ಮೊದಲ ಹಂತದಲ್ಲಿ ಹಿರೋಷಿಮಾ ಅಣುಬಾಂಬ್ ಸ್ಫೋಟದ ತೀವ್ರತೆಗೆ ಸಮನಾದ 1,000 ರಾಡ್ಸ್ ವಿಕಿರಣವನ್ನು ಜಿರಳೆಗಳ ಮೇಲೆ ಹರಿಸಲಾಯಿತು. ಆಶ್ಚರ್ಯ! ಶೇಕಡಾ 50 ರಷ್ಟು ಜಿರಳೆಗಳು ಆರಾಮವಾಗಿ ಬದುಕುಳಿದಿದ್ದವು! (ಇದೇ ಪ್ರಮಾಣದ ವಿಕಿರಣಕ್ಕೆ ಮನುಷ್ಯ ಒಳಗಾದರೆ ಕೇವಲ 10 ನಿಮಿಷಗಳಲ್ಲಿ ಸಾವು ಸಂಭವಿಸುತ್ತದೆ). ಎರಡನೇ ಹಂತದಲ್ಲಿ ವಿಕಿರಣದ ಪ್ರಮಾಣವನ್ನು 10 ಪಟ್ಟು ಹೆಚ್ಚಿಸಲಾಯಿತು. ಈ ಭೀಕರ ಪರಿಸ್ಥಿತಿಯಲ್ಲೂ ಶೇಕಡಾ 10 ರಷ್ಟು ಜಿರಳೆಗಳು ಜೀವಂತವಾಗಿದ್ದವು! ಮೂರನೇ ಹಂತದಲ್ಲಿ 100,000 ರಾಡ್ಸ್ ಪ್ರಯೋಗ. ಇಷ್ಟು ಗರಿಷ್ಠ ಮಟ್ಟದ ವಿಕಿರಣಕ್ಕೆ ಒಡ್ಡಿದಾಗ ಮಾತ್ರವೇ ಜಿರಳೆಗಳು ಸಂಪೂರ್ಣವಾಗಿ ನಾಶವಾದವು.
ಈ ಪ್ರಯೋಗದ ಮೂಲಕ ಆಡಮ್ ಮತ್ತು ಜೇಮೀ ಕಂಡುಕೊಂಡ ಸತ್ಯವೆಂದರೆ, ಜಿರಳೆಗಳಿಗೆ ಅಣುಬಾಂಬ್‌ನ ನೇರ ಬಿಸಿ ಅಥವಾ ಸ್ಫೋಟವನ್ನು ತಡೆದುಕೊಳ್ಳುವ ಶಕ್ತಿಯಿಲ್ಲ. ಆದರೆ, ಅಣುಬಾಂಬ್ ಸ್ಫೋಟಗೊಂಡ ನಂತರ ವಾತಾವರಣದಲ್ಲಿ ಹರಡುವ ಭೀಕರ ವಿಕಿರಣಗಳನ್ನು ತಡೆದುಕೊಳ್ಳುವ ಶಕ್ತಿ ಮನುಷ್ಯರಿಗಿಂತ 10 ರಿಂದ 15 ಪಟ್ಟು ಹೆಚ್ಚಿದೆ! ಜಗತ್ತಿನಲ್ಲಿ ಸುಮಾರು 4,600ಕ್ಕೂ ಹೆಚ್ಚು ಪ್ರಜಾತಿಯ ಜಿರಳೆಗಳಿವೆ. ಅವುಗಳ ಗಾತ್ರ ಮತ್ತು ಪರಿಸರಕ್ಕೆ ತಕ್ಕಂತೆ 6 ತಿಂಗಳಿಂದ ಹಿಡಿದು 2 ವರ್ಷಗಳ ತನಕ ಬದುಕಬಲ್ಲವು. ಅಣುಬಾಂಬ್ ದಾಳಿಯ ವಿಕಿರಣಗಳನ್ನು (Radiation) ತಡೆದುಕೊಂಡು ಬದುಕಬಲ್ಲ ಏಕೈಕ ಜೀವಿ ಎಂದರೆ ಅದು ಜಿರಳೆ ಮಾತ್ರ ಎಂಬುದನ್ನು ‘ಮಿಥ್ ಬಸ್ಟರ್ಸ್’ ಪ್ರಾಯೋಗಿಕವಾಗಿ ಸಾಬೀತುಪಡಿಸಿದೆ.
ಜಿರಳೆಗೆ ಈ ‘ಸೂಪರ್ ಪವರ್’ ಇರಲು ಇದೇ ಕಾರಣ
ಇದನ್ನೂ ಓದಿ: ಭಾರತದಲ್ಲೂ GEN-Z ಕ್ರಾಂತಿ? ನೆರೆಹೊರೆಯ ತಲ್ಲಣಗಳೂ, ʼಕಾಕ್ರೋಚ್ʼ ನೀಡುತ್ತಿರುವ ಎಚ್ಚರಿಕೆಯೂ!
ಆಡಮ್ ಮತ್ತು ಜೇಮೀ ತಮ್ಮ ಸಂಶೋಧನೆಯಲ್ಲಿ ಜಿರಳೆಯ ಸೂಪರ್ ಪವರ್‌ಗೆ ವೈಜ್ಞಾನಿಕ ಕಾರಣವನ್ನೂ ನೀಡಿದ್ದಾರೆ. ಮನುಷ್ಯನ ದೇಹದಲ್ಲಿ ಜೀವಕೋಶಗಳು (Cells) ನಿರಂತರವಾಗಿ ವಿಭಜನೆಗೊಳ್ಳುತ್ತಿರುತ್ತವೆ. ವಿಕಿರಣಗಳು ಈ ವಿಭಜನೆಯಾಗುವ ಕೋಶಗಳ ಮೇಲೆ ದಾಳಿ ಮಾಡಿ ಕೆಲ ಹೊತ್ತಿನಲ್ಲೇ ಮನುಷ್ಯನನ್ನು ಕೊಲ್ಲುತ್ತವೆ. ಆದರೆ ಜಿರಳೆಗಳ ದೇಹದಲ್ಲಿ ಜೀವಕೋಶಗಳು ಅತ್ಯಂತ ನಿಧಾನವಾಗಿ, ಕೇವಲ ಅವುಗಳು ಮರ್ಮಕಟ್ಟು (Molting/ದೇಹದ ಚರ್ಮ ಸುಲಿಯುವ ಸಮಯ) ಬದಲಾಯಿಸುವಾಗ ಮಾತ್ರ ವಿಭಜನೆಗೊಳ್ಳುತ್ತವೆ. ಹಾಗಾಗಿ ವಿಕಿರಣಗಳು ಅವುಗಳ ಮೇಲೆ ಬೇಗನೆ ಪರಿಣಾಮ ಬೀರಲು ಸಾಧ್ಯವಿಲ್ಲ!
ಅಣುಬಾಂಬ್‌ನ ಭೀಕರ ವಿಕಿರಣಗಳನ್ನೂ ತಡೆದು ಮತ್ತೆ ಎದ್ದು ನಿಲ್ಲಬಲ್ಲ ಇವುಗಳ ಕೋಶ ವಿಭಜನೆಯ (Cell Division) ವಿಶಿಷ್ಟ ಸಾಮರ್ಥ್ಯ ವಿಜ್ಞಾನ ಲೋಕವನ್ನೇ ಬೆರಗುಗೊಳಿಸಿದೆ. ನಾವು ಅಸಹ್ಯ ಪಟ್ಟು, ಕಡೆಗಣಿಸುವ ಜಿರಳೆ, ವಾಸ್ತವದಲ್ಲಿ ಕೋಟ್ಯಂತರ ವರ್ಷಗಳ ವಿಕಾಸದ ಹಾದಿಯಲ್ಲಿ ಪ್ರಕೃತಿ ಸೃಷ್ಟಿಸಿದ ಅತ್ಯಂತ ಬಲಿಷ್ಠ ಮತ್ತು ಚೇತೋಹಾರಿ ‘ಸರ್ವೈವರ್’.
ಅವುಗಳ ದೇಹದಲ್ಲಿರುವ ಪ್ರೊಟೀನ್ ಭರಿತ ಹಾಲು ಭವಿಷ್ಯದ ಸೂಪರ್ ಫುಡ್ ಆಗಿ ಹಾಗೂ ಅವುಗಳ ಮೆದುಳಿನ ದ್ರವವು ಪ್ರಾಣರಕ್ಷಕ ಆ್ಯಂಟಿಬಯೋಟಿಕ್ ಮದ್ದಾಗಿ ಮೂಡಿಬರುತ್ತಿರುವುದು ಪ್ರಕೃತಿಯ ಚಮತ್ಕಾರವೇ ಸರಿ. ಹೀಗಾಗಿ, ಮುಂದಿನ ಬಾರಿ ನಿಮ್ಮ ಮನೆಯ ಮೂಲೆಯಲ್ಲಿ ಜಿರಳೆಯೊಂದು ಪ್ರತ್ಯಕ್ಷವಾದರೆ, ಅದನ್ನು ಚಪ್ಪಲಿಯಿಂದ ಜಜ್ಜುವ ಮುನ್ನ, ನಿಮ್ಮ ಎದುರಿಗಿರುವುದು ಡೈನೋಸಾರ್‌ಗಳ ಕಾಲದಿಂದಲೂ ಅಣುಬಾಂಬ್ ವಿಕಿರಣಗಳನ್ನೂ ಸೋಲಿಸಿ ಗೆದ್ದು ಬಂದಿರುವ ಭೂಮಿಯ ಅತಿ ದೊಡ್ಡ ‘ಟೈಮ್ ಟ್ರಾವೆಲರ್’ ಎಂಬುದನ್ನು ನೆನಪಿಸಿಕೊಳ್ಳಿ. ಇದನ್ನು ಕೊಲ್ಲುವ ಬದಲು ಸುರಕ್ಷಿತವಾಗಿ ಓಡಿಸಿ.
