ವಾರಕ್ಕೊಂದು ಅನುವಾದಿತ ಕವಿತೆ ಮಾಲಿಕೆಯಲ್ಲಿ ಇಂದು ಸುಬೋಧ್ ಸರ್ಕಾರ್ ಅವರ ಬಾಂಗ್ಲಾ ಮೂಲದ ʼಸೀರೆʼ ಕವಿತೆಯನ್ನು ಕನ್ನಡಕ್ಕೆ ಅನುವಾದಿಸಿದ್ದಾರೆ ಹಿರಿಯ ಅನುವಾದಕಿ ಸಿ ಹೆಚ್‌ ಭಾಗ್ಯ.
ಹುಡುಗಿಗೆ ಮದುವೆಯಲಿ ಐವತ್ತೊಂದು ಸೀರೆಗಳು ದೊರೆತವು.
ಮೊದಲ ಸಲ ತವರಿಗೆ ಹೋದಾಗ ಮತ್ತೆ ಆರು ಸೀರೆಗಳು.
ಅವಳೆಂದೂ ಇಷ್ಟೊಂದು ಸೀರೆ ಕಂಡಿರಲೇ ಇಲ್ಲ.
ಕಪಾಟಿನ ಮೊದಲ ಗೂಡಿನಲಿ ನೀಲಿ ಸೀರೆಗಳ ಜೋಡಿಸಿದಳು.
ತಿಳಿನೀಲಿ ಬಣ್ಣದ ಸೀರೆಯನು ತಬ್ಬಿಕೊಂಡು’ ನೀನು ನನ್ನ ಆಕಾಶ’ ಎಂದಳು.
ಎರಡನೇ ಗೂಡಿನಲಿ ಗುಲಾಬಿ ಬಣ್ಣದ ಸೀರೆಗಳ ಜೋಡಿಸಿದಳು.
ಒಂದು ಗುಲಾಬಿ ಸೀರೆಯನು ತಬ್ಬಿಕೊಂಡು ‘ ವಾವ್,ನೀನು ನನ್ನ ಹೆಮ್ಮೆ ‘ ಎಂದಳು.
ಮೂರನೇ ಗೂಡಿನಲಿ ಮೂರು ನವಿಲುಗಳು
ಮೂರು ದಿಕ್ಕಿನಿಂದ ನುಗ್ಗುತ್ತಿವೆಯೋ ಎನ್ನುವಂತೆ.
ಬಿರಿಯಾನಿ ಎಲೆ ಬಣ್ಣದ ಸೀರೆಯನ್ನು ಅವಳು ದುಃಖ ಎಂದಳು.
ವರ್ಷವಿಡೀ ಅವಳಿಗೆ ಸೀರೆಗಳೋ ಸೀರೆಗಳು ಸಿಕ್ಕವು.
ಇರುವ ಒಂದು ಜನ್ಮದಲಿ ಎಲ್ಲವನ್ನೂ ಉಡುವುದಾದರೂ ಹೇಗೆ?
ಆದರೆ,ಒಂದು ವರ್ಷದ ನಂತರವೋ ಏನೋ ಹೀಗಾಯಿತು.
ಅವಳು ಗಂಡನ ಜೊತೆ ಚೈನೀಸ್ ತಿನಿಸು ತಿನ್ನಲು ಹೋದಳು.
ಮುಖ ಮುಚ್ಚಿಕೊಂಡಿದ್ದ ಮೂವರು ಪುಂಡರು ಧುತ್ತನೆರಗಿ ಗಂಡನ ಹೊಟ್ಟೆಯನ್ನು ಸೀಳಿದರು
ತಿಂದ ಆಹಾರ ಇನ್ನೂ ಹಾಗೇ ಇತ್ತು.
ಚಿಲ್ಲಿ ಚಿಕನ್ ಇನ್ನೂ ಹೊಗೆಯಾಡುತಿತ್ತು.
ಅಕ್ಕ ಪಕ್ಕದವರು ,ಇದು ರಾಜಕೀಯ ಎಂದರು.
ಹುಡುಗಿಗೆ ಮದುವೆಯಲಿ ಐವತ್ತೊಂದು ಸೀರೆಗಳು ದೊರೆತಿದ್ದವು.
ತವರಿಗೆ ಮೊದಲು ಬಂದಾಗ ಮತ್ತೆ ಆರು.
ಒಂದು ಮಧ್ಯಾಹ್ನ ಅವಳ ಅತ್ತೆ ಮಲಗಿರುವಾಗ
ಅವಳು ತನ್ನೆಲ್ಲಾ ಸೀರೆಗಳನ್ನು ಆರನೇ ಮಹಡಿಯಿಂದ ಕೆಳಗೆಸೆದಳು.
ಅವಳ ಅತ್ತೆಯು ಅವಳಿಗೆ ಬಿಳಿ ಸೀರೆ ಉಡಲು ನೆರವಾದಳು.
ಹತ್ತೊಂಬತ್ತರ ಹುಡುಗಿ ಒಬ್ಬಂಟಿ.
ಆ ಸೀರೆಯನ್ನೂ ಬೀದಿಯಲಿ ಬರುವಾಗ ಪುಂಡರು ಸೆಳೆದರು.
ಒಬ್ಬಳು ಬೆತ್ತಲೆ ವಿಧವೆ ಹುಡುಗಿ ನೆರವಿಗಾಗಿ ಆರ್ತನಾದ ಮಾಡುತ್ತಾ ಓಡುತ್ತಿದ್ದಳು.
ಆ ಮೂವರು ಅದೊಂದು ತಮಾಷೆ ಎನ್ನುವಂತೆ ಅವಳ ಬೆಂಬತ್ತಿದರು
ನೆರೆಹೊರೆಯವರು ಮೂಕರಂತಿದ್ದರು.
ಹುಡುಗಿಗೆ ಮದುವೆಯಲಿ ಐವತ್ತೊಂದು ಸೀರೆಗಳು ದೊರೆತಿದ್ದವು.
