ಸದ್ಯ ಚಿತ್ರರಂಗದಲ್ಲಿ ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾ ಭಾರೀ ಚರ್ಚೆಯನ್ನು ಹುಟ್ಟುಹಾಕಿದೆ. ಪರ-ವಿರೋಧ ಚರ್ಚೆಗಳು ಜೋರಾಗಿವೆ. ಇದೇ ಹೊತ್ತಿನಲ್ಲಿ, ಕರ್ನಾಟಕದ ರಾಜಕೀಯವೂ ಕೂಡ ತನ್ನದೇ ಆದ ಟಾಕ್ಸಿಕ್ ಸಿನಿಮಾವನ್ನು ಕಂಡುಕೊಂಡಿದೆ. ನೈಸ್ ರಸ್ತೆಯಲ್ಲಿ ರಾಜಕಾರಣಿಗಳೇ ಮಹಾನಟರು ಮತ್ತು ಜನರೇ ಮುಗ್ಧ ಪ್ರೇಕ್ಷಕರು. ಒಂದೇ ವ್ಯತ್ಯಾಸವೆಂದರೆ ಈ ಚಲನಚಿತ್ರವು ಮೂರು ದಶಕಗಳಿಂದ ನಡೆಯುತ್ತಿದೆ. ಮತ್ತು ಅದು ಯಾವಾಗ ಕೊನೆಗೊಳ್ಳುತ್ತದೆ ಎಂದು ಯಾರಿಗೂ ತಿಳಿದಿಲ್ಲ.
ಟಾಕ್ಸಿಕ್ ಚಿತ್ರವು ಹಿಂಸಾಚರ ಮತ್ತು ಅಶ್ಲೀಲ ದೃಶ್ಯಗಳಿಂದ ಕೂಡಿದೆ. ನೈಸ್ ರಸ್ತೆಯ ವಿಚಾರದಲ್ಲಿ ನಮ್ಮ ರಾಜಕಾರಣಿಗಳ ಹಿಂಸೆ ಮಾತಿನ ರೂಪದಲ್ಲಿದೆ. ಎಚ್. ಡಿ. ದೇವೇಗೌಡರು ನೈಸ್ ರೋಡನ್ನು “ಲೂಟಿ ಪ್ರಾಜೆಕ್ಟ್” ಮತ್ತು ಅದರ ಮಾಲೀಕ ಅಶೋಕ್ ಖೇಣಿಯನ್ನು “ಲ್ಯಾಂಡ್ ಮಾಫಿಯಾ” ಎಂದು ಕರೆದರು. ಮತ್ತು ಕೋಪದಲ್ಲಿ ಅಂದಿನ ಮುಖ್ಯಮಂತ್ರಿ ಆಗಿದ್ದ ಬಿ.ಎಸ್.ಯಡಿಯೂರಪ್ಪ ರವರನ್ನು “bloody bastard” ಎಂದರು. ಮತ್ತೆ ಅದಕ್ಕೆ ಪ್ರತಿಕ್ರಿಸಿದ ಬಿ.ಎಸ್. ಯಡಿಯೂರಪ್ಪ ಅವರು “ಕಾನೂನು ಹೇಳಿದಂತೆ ನಾವು ನಡೆಯುತ್ತೇವೆ” ಎಂದು ಹೇಳಿದರು. ವರ್ಷಗಳ ನಂತರ ಎಚ್. ಡಿ. ಕುಮಾರಸ್ವಾಮಿ ಯವರು ಟೋಲ್ ಮೂಲಕ ಜನರನ್ನು ಲೂಟಿ ಮಾಡುತ್ತಿದ್ದಾರೆ ಮತ್ತು ಜನರು ಇಷ್ಟೊತ್ತಿಗೆ ಟೋಲ್ ಕೊಡದೆ ನುಗ್ಗಬೇಕಿತ್ತು ಎಂದು ಪ್ರಚೋದಿಸುತ್ತಿದ್ದಾರೆ.
ಡಿ.ಕೆ. ಶಿವಕುಮಾರ್ ಪ್ರತಿಯಾಗಿ, “ನೈಸ್ ಯೋಜನೆಯನ್ನು ರೂಪಿಸಿದ್ದು ಯಾರು? ಅವರೇ. ಆ ರಸ್ತೆ ನಿರ್ಮಾಣವಾದ ಕಾರಣವೇ ಇಂದು ಬೆಂಗಳೂರು ಉಳಿದುಕೊಂಡಿದೆ” ಎಂದು ಹೇಳಿದರು. ಟಾಕ್ಸಿಕ್ನಲ್ಲಿ ಬಂದೂಕುಗಳು ಸಂಭಾಷಣೆಯನ್ನು ಮುಚ್ಚಿಹಾಕುತ್ತವೆ. ನೈಸ್ ರಸ್ತೆಯ ರಾಜಕೀಯದಲ್ಲಿ ಸಂಭಾಷಣೆಯೇ ಗುಂಡಿನ ಸದ್ದಾಗಿದೆ.
ಟಾಕ್ಸಿಕ್ ಸಿನಿಮಾ ಮೂರು ಗಂಟೆಗೂ ಹೆಚ್ಚು ಅವಧಿಯದ್ದಾಗಿದ್ದು, ಸರಳ ಕಥೆಯನ್ನು ಅಗತ್ಯಕ್ಕಿಂತ ಹೆಚ್ಚು ಎಳೆದಿದ್ದಾರೆ. ನೈಸ್ ರಸ್ತೆಯು ಸುಮಾರು ಮೂರು ದಶಕಗಳಿಂದ ನಡೆಯುತ್ತಿದೆ. ಸರ್ಕಾರಗಳು ಬದಲಾಗಿವೆ, ರಾಜಕೀಯ ಮೈತ್ರಿಗಳು ಬದಲಾಗಿವೆ, ನ್ಯಾಯಾಲಯದ ವಿಚಾರಣೆಗಳು ಮುಂದುವರಿದಿವೆ,ಆದರೆ ವಿವಾದ ಮತ್ತು ಮೋಸ ಜನಸಾಮಾನ್ಯರಿಗೆ ಎಡೆಬಿಡದೆ ನಡೆಯುತ್ತಿದೆ. ಟಾಕ್ಸಿಕ್ ಸಿನಿಮಾವು ತುಂಬಾ ಉದ್ದವಾಗಿದೆ . ನೈಸ್ ರಸ್ತೆಗೆ ಅದರ ಬಗ್ಗೆ ಚಿಂತೆಯೇ ಇಲ್ಲ: ಅದು ಮೂರು ಗಂಟೆಯ ಗಡಿಯನ್ನು ಮೂರು ದಶಕಗಳ ಹಿಂದೆಯೇ ದಾಟಿದೆ.
ಟಾಕ್ಸಿಕ್ ನಲ್ಲಿ ಪಾತ್ರಗಳು ಹೆಚ್ಚು, ಮಾಹಿತಿ ಚದುರಿದ್ದು, ಕಥೆಯನ್ನು ಅನುಸರಿಸುವುದು ಕಷ್ಟ. ನೈಸ್ ರಸ್ತೆಗೂ ತನ್ನದೇ ಆದ ದೊಡ್ಡ ಪಾತ್ರವರ್ಗವಿದೆ.
ದೇವೇಗೌಡರು, ಬಿ. ಎಸ್. ಯಡಿಯೂರಪ್ಪ, ಕುಮಾರಸ್ವಾಮಿ, ಡಿ. ಕೆ. ಶಿವಕುಮಾರ್, ಟಿ. ಬಿ. ಜಯಚಂದ್ರ ಸಮಿತಿ ವರದಿ, ಅಶೋಕ್ ಖೇಣಿ,ವಿವಿಧ ಸರ್ಕಾರಗಳು, ರೈತರು, ಟೋಲ್, ನ್ಯಾಯಾಲಯಗಳು, ಭೂಸ್ವಾಧೀನ, ರಿಯಲ್ ಎಸ್ಟೇಟ್ ಮತ್ತು ಪರಸ್ಪರ ವಿರುದ್ಧದ ರಾಜಕೀಯ ಹೇಳಿಕೆಗಳು ನೈಸ್ ರಸ್ತೆಯ ಈ ಚಿತ್ರಕಥೆಯಲ್ಲಿ ಇಷ್ಟೊಂದು ಪಾತ್ರಗಳಿವೆ ಎಂದರೆ, ಯಾರು ನಾಯಕನ ಪಾತ್ರದಲ್ಲಿದ್ದಾರೆ ? ಎಂಬುದನ್ನು ನೆನಪಿಸಿಕೊಳ್ಳಲು ರಸ್ತೆಯೇ ಒಂದು ಸೂಚನಾ ಫಲಕವನ್ನು ಕೇಳಬೇಕಾದ ಪರಿಸ್ಥಿತಿ ಇದೆ.
ಟಾಕ್ಸಿಕ್ ನಲ್ಲಿ ಕಥೆಗಿಂತ ಯಶ್ ಅವರ ಸ್ಟೈಲ್‌ಗೆ ಹೆಚ್ಚು ಒತ್ತು ನೀಡಿದೆ. ನೈಸ್ ರಸ್ತೆಯ ಚರ್ಚೆಯಲ್ಲೂ ಅದೇ ಸಮಸ್ಯೆ ಕಾಣುತ್ತದೆ. ತಮ್ಮ ಸ್ವಾರ್ಥ ರಾಜಕೀಯಕ್ಕೆ ಅಗತ್ಯವಾದ ಮೈಲೇಜ್ ಪಡೆಯಲು ಅದ್ದೂರಿ ಆರೋಪಗಳು, ಪತ್ರಿಕಾಗೋಷ್ಠಿಗಳು ಮತ್ತು ರಾಜಕೀಯ ಹೇಳಿಕೆಗಳು ನಡೆಯುತ್ತಿವೆ.
ಈ ಲೇಖನ ಓದಿದ್ದೀರಾ?: ನಾಗೇಂದ್ರ ಪ್ರಕರಣ | ಬಿಜೆಪಿ-ಕಾಂಗ್ರೆಸ್‌ ರಾಜಕೀಯ ಲೆಕ್ಕಾಚಾರವೇನು? ಒಂದೇ ಏಟಿಗೆ ಎರಡು ಹಕ್ಕಿ ಹೊಡೆವುದೇ
ಆದರೆ ನ್ಯಾಯಾಲಯಕ್ಕೆ ಬೇಕಾದದ್ದು ಒಪ್ಪಂದದ ವಿವರಗಳು, ಭೂಸ್ವಾಧೀನ ಮತ್ತು ಅದರ ಬಳಕೆಯ ಬಗ್ಗೆ ಸ್ಪಷ್ಟ ವಿವರಣೆ, ಟೋಲ್ ಲೆಕ್ಕಾಚಾರ ಹಾಗೂ ಇತರೆ ಪ್ರಶ್ನೆಗಳಿಗೆ ಸಂಪೂರ್ಣ ಮಾಹಿತಿ.
ಜೊತೆಗೆ ನೈಸ್ ಸಂಸ್ಥೆಯ ಪ್ರಮುಖ ಲೋಪಗಳಾದ ಹೆಚ್ಚುವರಿ ಭೂಸ್ವಾಧೀನ, ಅಕ್ರಮ ಗಣಿಗಾರಿಕೆ, ರಿಯಲ್ ಎಸ್ಟೇಟ್ ಮತ್ತು ಒಪ್ಪಂದ ಉಲ್ಲಂಘನೆಗಳ ಮೇಲಿನ ಸರ್ಕಾರದ ಕ್ರಮಕ್ಕಾಗಿ ಜನ ಕಾಯುತ್ತಿದ್ದಾರೆ.
ಮೂರು ದಶಕಗಳ ನಂತರ, ನೈಸ್ ರಸ್ತೆ ಕಥೆಯ ಅತ್ಯಂತ ಭಾವನಾತ್ಮಕ ಪಾತ್ರ ರಾಜಕಾರಣಿಯಲ್ಲ,ಅದು ನಾಗರೀಕ. ಹೆಚ್ಚುತ್ತಿರುವ ಟೋಲ್ ದರವನ್ನು ಕೊಟ್ಟು ಸಂಚರಿಸುತ್ತಾ, ಟಾಕ್ಸಿಕ್ ಸಿನಿಮಾವನ್ನು ದುಬಾರಿ ಶುಲ್ಕ ಕೊಟ್ಟು ನೋಡಿ ಈ ಸಿನಿಮಾ ಕೊನೆಗೂ ಯಾವಾಗ ಮುಗಿಯುತ್ತದೆ ಎಂದು ತಲೆಕೆರೆದುಕೊಳ್ಳುವಂತಾಗಿದೆ ಮೂಕ ನಾಗರಿಕನ ಪರಿಸ್ಥಿತಿ……..
