ಅಮೆರಿಕದ ಕಾಂಗ್ರೆಸ್‌ಗೆ ನ. 3ರಂದು ನಡೆಯಲಿರುವ ‘ಮಧ್ಯಂತರ ಚುನಾವಣೆ’ ಡೊನಾಲ್ಡ್ ಟ್ರಂಪ್ ಆಡಳಿತಕ್ಕೆ ಬಹುದೊಡ್ಡ ಅಗ್ನಿಪರೀಕ್ಷೆ. ಈ ಸಮರದಲ್ಲಿ ಟ್ರಂಪ್ ಅವರ ರಿಪಬ್ಲಿಕನ್ ಪಕ್ಷ ಬಹುಮತ ಕಳೆದುಕೊಂಡರೂ ಅವರ ಅಧ್ಯಕ್ಷ ಸ್ಥಾನಕ್ಕೇನೂ ಕುತ್ತಿಲ್ಲ; ಆದರೆ, ಅವರ ಸರ್ಕಾರದ ಸ್ಥಿತಿ ಅಕ್ಷರಶಃ ‘ಹಲ್ಲು ಕಿತ್ತ ಹಾವಿನಂತಾಗಲಿದೆ’!
ಅಮೆರಿಕ ಮಧ್ಯಂತರ ಚುನಾವಣೆ 2026: ಟ್ರಂಪ್ ಆಡಳಿತಕ್ಕೆ ಅಗ್ನಿಪರೀಕ್ಷೆ, ಕುರ್ಚಿಗಿಲ್ಲ ಕುತ್ತು, ಆದರೆ ‘ಹಲ್ಲು ಕಿತ್ತ ಹಾವಿನಂತಾಗಲಿದೆ’ ಸರ್ಕಾರ!
ಡೊನಾಲ್ಡ್ ಟ್ರಂಪ್ ಅವರು ಅಮೆರಿಕದ ಅಧ್ಯಕ್ಷರಾಗಿ ಎರಡನೇ ಬಾರಿಗೆ ಆಯ್ಕೆಯಾಗಿ ಅಧಿಕಾರ ಸ್ವೀಕರಿಸಿ ಇನ್ನೆರಡು ವರ್ಷಗಳೂ ತುಂಬಿಲ್ಲ. ಆದರೆ, ನವೆಂಬರ್ 3ರಂದು ನಡೆಯಲಿರುವ ಅಮೆರಿಕದ ಕಾಂಗ್ರೆಸ್‌ನ (ಸಂಸತ್ತು) ‘ಮಧ್ಯಂತರ ಚುನಾವಣೆ’ಯು ಅವರ ಪಾಲಿಗೆ ಬಹುದೊಡ್ಡ ಅಗ್ನಿಪರೀಕ್ಷೆಯಾಗಿ ಪರಿಣಮಿಸಿದೆ. ಈ ಚುನಾವಣೆಯಲ್ಲಿ ಅವರ ರಿಪಬ್ಲಿಕನ್ ಪಕ್ಷ ಸಂಸತ್ತಿನಲ್ಲಿ ಬಹುಮತ ಕಳೆದುಕೊಂಡರೂ ಟ್ರಂಪ್ ಅಧ್ಯಕ್ಷ ಸ್ಥಾನ ಕಳೆದುಕೊಳ್ಳುವುದಿಲ್ಲ. ಆದರೆ, ಅವರ ಮುಂದಿನ ಆಡಳಿತದ ಹಾದಿ ಮಾತ್ರ ಅತ್ಯಂತ ಕಠಿಣವಾಗಲಿದೆ.
ಭಾರತದ ರಾಜಕೀಯ ವ್ಯವಸ್ಥೆಗೂ, ಅಮೆರಿಕದ ವ್ಯವಸ್ಥೆಗೂ ಭಾರಿ ವ್ಯತ್ಯಾಸವಿದೆ. ಭಾರತದಲ್ಲಿ ಪ್ರಧಾನಿ ನೇತೃತ್ವದ ಸರ್ಕಾರ ಲೋಕಸಭೆಯಲ್ಲಿ ಬಹುಮತ ಕಳೆದುಕೊಂಡರೆ ತಕ್ಷಣವೇ ಅಧಿಕಾರ ಕಳೆದುಕೊಳ್ಳುತ್ತದೆ (ಸಂಸದೀಯ ಮಾದರಿ). ಆದರೆ, ಅಮೆರಿಕದ್ದು ಅಧ್ಯಕ್ಷೀಯ ಮಾದರಿಯ ಪ್ರಜಾಪ್ರಭುತ್ವ. ಅಲ್ಲಿ ಅಧ್ಯಕ್ಷರು ಮತ್ತು ಸಂಸದರು ಪ್ರತ್ಯೇಕವಾಗಿ ಜನರಿಂದ ನೇರವಾಗಿ ಆಯ್ಕೆಯಾಗುತ್ತಾರೆ. ಹೀಗಾಗಿ, ಸಂಸತ್ತಿನಲ್ಲಿ ವಿಪಕ್ಷಗಳೇ ತುಂಬಿದ್ದರೂ ಅಧ್ಯಕ್ಷರು ತಮ್ಮ ನಾಲ್ಕು ವರ್ಷಗಳ ಅವಧಿ ಮುಗಿಯುವವರೆಗೆ ಅಧಿಕಾರದಲ್ಲಿ ಮುಂದುವರಿಯಬಹುದು. ಅಧಿಕಾರದ ಈ ನಾಲ್ಕು ವರ್ಷಗಳ ಅವಧಿಯ ಸರಿಯಾಗಿ ಮಧ್ಯಭಾಗದಲ್ಲಿ ಬರುವ ಕಾರಣ ಇದನ್ನು ‘ಮಧ್ಯಂತರ ಚುನಾವಣೆ’ ಎನ್ನಲಾಗುತ್ತದೆ.
ಅಮೆರಿಕದ ಸಂಸತ್ತನ್ನು ‘ಕಾಂಗ್ರೆಸ್’ ಎಂದು ಕರೆಯಲಾಗುತ್ತದೆ. ಇದರಲ್ಲಿ ಎರಡು ಸದನಗಳಿವೆ. ಕೆಳಮನೆಯನ್ನು ‘ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್’ (ಪ್ರತಿನಿಧಿ ಸಭೆ) ಎನ್ನಲಾಗುತ್ತದೆ. ಇದರ ಒಟ್ಟು ಸದಸ್ಯ ಬಲ 435. ಜನಸಂಖ್ಯೆಯ ಆಧಾರದ ಮೇಲೆ ರಾಜ್ಯಗಳಿಗೆ ಈ ಸ್ಥಾನಗಳನ್ನು ಹಂಚಿಕೆ ಮಾಡಲಾಗಿರುತ್ತದೆ. ಈ ಸದನದ ಸದಸ್ಯರ ಅಧಿಕಾರಾವಧಿ ಕೇವಲ ಎರಡು ವರ್ಷಗಳು. ಅಂದರೆ, ಪ್ರತೀ ಎರಡು ವರ್ಷಗಳಿಗೊಮ್ಮೆ ಈ ಸದನದ ಎಲ್ಲ 435 ಸ್ಥಾನಗಳಿಗೂ ಹೊಸದಾಗಿ ಚುನಾವಣೆ ನಡೆಯುತ್ತದೆ. ಸದ್ಯ ಈ ಎಲ್ಲಾ ಸ್ಥಾನಗಳಿಗೂ ಮತದಾನ ನಡೆಯಲಿದೆ.
ಮೇಲ್ಮನೆಯಾದ ‘ಸೆನೆಟ್’ನ ಒಟ್ಟು ಸದಸ್ಯ ಬಲ ಕೇವಲ 100. ಇಲ್ಲಿ ಜನಸಂಖ್ಯೆಯ ಹಂಗಿಲ್ಲದೆ ಅಮೆರಿಕದ ಎಲ್ಲಾ 50 ರಾಜ್ಯಗಳು ತಲಾ ಇಬ್ಬರು ಪ್ರತಿನಿಧಿಗಳನ್ನು ಸಮಾನವಾಗಿ ಆರಿಸಿ ಕಳುಹಿಸುತ್ತವೆ. ಸೆನೆಟರ್‌ಗಳ ಅಧಿಕಾರಾವಧಿ ಆರು ವರ್ಷಗಳು. ಆದರೆ, ಪ್ರತೀ ಎರಡು ವರ್ಷಕ್ಕೊಮ್ಮೆ ಸೆನೆಟ್‌ನ ಮೂರನೇ ಒಂದರಷ್ಟು ಸದಸ್ಯರ ಅವಧಿ ಮುಕ್ತಾಯವಾಗುತ್ತದೆ. ಪ್ರಸ್ತುತ 33 ನಿಯಮಿತ ಸ್ಥಾನಗಳು ಹಾಗೂ ಫ್ಲೋರಿಡಾ ಮತ್ತು ಒಹಾಯೊದ 2 ವಿಶೇಷ ಚುನಾವಣೆಗಳು ಸೇರಿ ಒಟ್ಟು 35 ಸೆನೆಟ್ ಸ್ಥಾನಗಳಿಗೆ ಈಗ ಕದನ ನಡೆಯುತ್ತಿದೆ. ಅವಧಿ ಮುಗಿದವರು ಕಡ್ಡಾಯವಾಗಿ ನಿವೃತ್ತರಾಗಬೇಕಿಲ್ಲ, ಅವರು ಮರು ಆಯ್ಕೆ ಬಯಸಿ ಸ್ಪರ್ಧಿಸಲೂ ಅವಕಾಶವಿದೆ.
ಪ್ರಸ್ತುತ ಉಭಯ ಸದನಗಳಲ್ಲೂ ಟ್ರಂಪ್ ಅವರ ರಿಪಬ್ಲಿಕನ್ ಪಕ್ಷಕ್ಕೆ ಅತಿ ‘ಸಣ್ಣ ಬಹುಮತ’ (Thin Margin) ಮಾತ್ರವಿದೆ. 435 ಬಲದ ಪ್ರತಿನಿಧಿ ಸಭೆಯಲ್ಲಿ ಟ್ರಂಪ್’ನ ರಿಪಬ್ಲಿಕನ್ ಪಕ್ಷ 218 ಹಾಗೂ ವಿಪಕ್ಷ ಡೆಮಾಕ್ರಟಿಕ್ 214 ಸ್ಥಾನಗಳನ್ನು ಹೊಂದಿದೆ (ಒಬ್ಬರು ಸ್ವತಂತ್ರ, 2 ಸ್ಥಾನ ಖಾಲಿ). ಸೆನೆಟ್‌ನಲ್ಲಿ ರಿಪಬ್ಲಿಕನ್ನರು 53 ಸ್ಥಾನ ಹೊಂದಿದ್ದರೆ, ಡೆಮಾಕ್ರಟಿಕ್ ಪಕ್ಷ 45 ಸ್ಥಾನ ಹೊಂದಿದೆ. ಇಬ್ಬರು ಸ್ವತಂತ್ರರು ಡೆಮಾಕ್ರಟ್‌ಗಳ ಜೊತೆ ಗುರುತಿಸಿಕೊಂಡಿರುವುದರಿಂದ ಅಲ್ಲಿನ ವಾಸ್ತವ ಬಲಾಬಲ 53–47 ಇದೆ. ಹೀಗಾಗಿ ಡೆಮಾಕ್ರಟ್‌ಗಳಿಗೆ ಬಹುಮತ ಪಡೆಯಲು ಕೆಳಮನೆಯಲ್ಲಿ ಕೇವಲ 3 ಹಾಗೂ ಮೇಲ್ಮನೆಯಲ್ಲಿ 4 ಸ್ಥಾನಗಳಷ್ಟೇ ಹೆಚ್ಚುವರಿಯಾಗಿ ಬೇಕಿದೆ.
ಈ ಚುನಾವಣೆಯಲ್ಲಿ ಟ್ರಂಪ್ ಅವರ ರಿಪಬ್ಲಿಕನ್ ಪಕ್ಷ ಬಹುಮತ ಕಳೆದುಕೊಂಡರೆ ಆಡಳಿತ ಯಂತ್ರ ಅಕ್ಷರಶಃ ‘ಹಲ್ಲು ಕಿತ್ತ ಹಾವಿನಂತಾಗಲಿದೆ’ (Lame Duck). ಏಕೆಂದರೆ, ಯಾವುದೇ ಹೊಸ ಮಸೂದೆಗಳು, ಹಣಕಾಸು ಬಜೆಟ್ ಅನುಮೋದನೆ, ರಾಯಭಾರಿಗಳು ಹಾಗೂ ಸುಪ್ರೀಂ ಕೋರ್ಟ್ ನ್ಯಾಯಾಧೀಶರ ನೇಮಕಾತಿಯನ್ನು ಅನುಮೋದಿಸುವ ಅಧಿಕಾರ ಸಂಸತ್ತಿಗೆ ಇರುತ್ತದೆ. ವಿಪಕ್ಷ ಡೆಮಾಕ್ರಟ್‌ಗಳು ಬಹುಮತ ಸಾಧಿಸಿದರೆ ಸರ್ಕಾರದ ಅನುದಾನಗಳಿಗೆ ತಡೆ ಒಡ್ಡುವ ಮೂಲಕ ‘ಗವರ್ನಮೆಂಟ್ ಶಟ್‌ಡೌನ್’ (ಸರ್ಕಾರಿ ಸೇವೆಗಳ ಸ್ಥಗಿತ) ಸ್ಥಿತಿ ನಿರ್ಮಿಸಬಹುದು ಮತ್ತು ಟ್ರಂಪ್ ಅವರ ಆಡಳಿತದ ವಿರುದ್ಧ ತನಿಖೆಗಳನ್ನೂ ಆರಂಭಿಸಬಹುದು.
ವಿಪಕ್ಷಗಳ ಕೈಗೆ ಸಂಸತ್ತು ಸಿಕ್ಕರೆ ಅಧ್ಯಕ್ಷರ ವಿರುದ್ಧ ‘ಮಹಾಭಿಯೋಗ’ (Impeachment) ಅಸ್ತ್ರ ಪ್ರಯೋಗಿಸುವ ಸಾಧ್ಯತೆಯೂ ಇರುತ್ತದೆ. ಪ್ರತಿನಿಧಿ ಸಭೆಯಲ್ಲಿ ಕೇವಲ ಸರಳ ಬಹುಮತದಿಂದ ಮಹಾಭಿಯೋಗದ ದೋಷಾರೋಪಣೆಯನ್ನು ಅಂಗೀಕರಿಸಬಹುದು. ಆದರೆ, ಅಧ್ಯಕ್ಷರನ್ನು ಅಧಿಕಾರದಿಂದ ಕೆಳಗಿಳಿಸಲು ಸೆನೆಟ್‌ನಲ್ಲಿ ಕನಿಷ್ಠ ಮೂರನೇ ಎರಡರಷ್ಟು (ಎಲ್ಲ 100 ಸದಸ್ಯರಿದ್ದರೆ 67 ಮತಗಳು) ಬೆಂಬಲ ಬೇಕು. ಟ್ರಂಪ್ ವಿರುದ್ಧ ಈ ಹಿಂದೆ 2019 ಮತ್ತು 2021ರಲ್ಲಿ ಪ್ರತಿನಿಧಿ ಸಭೆಯಲ್ಲಿ ಮಹಾಭಿಯೋಗ ನಡೆದಿತ್ತು. ಆದರೆ, ಎರಡೂ ಬಾರಿಯೂ ಸೆನೆಟ್ ಅವರನ್ನು ದೋಷಮುಕ್ತಗೊಳಿಸಿದ್ದರಿಂದ ಪದಚ್ಯುತಿ ಆಗಿರಲಿಲ್ಲ. ಹೀಗಾಗಿ ಮಹಾಭಿಯೋಗ ನಡೆದರೂ ಟ್ರಂಪ್ ಅಧಿಕಾರ ಕಳೆದುಕೊಳ್ಳುವ ಸಾಧ್ಯತೆ ತೀರಾ ವಿರಳ.
ಐತಿಹಾಸಿಕ ಅಂಕಿ-ಅಂಶಗಳನ್ನು ಗಮನಿಸಿದರೆ, ಎರಡನೇ ಮಹಾಯುದ್ಧದ ನಂತರ ನಡೆದ ಬಹುತೇಕ ಮಧ್ಯಂತರ ಚುನಾವಣೆಗಳಲ್ಲಿ ಅಧಿಕಾರದಲ್ಲಿರುವ ಅಧ್ಯಕ್ಷರ ಪಕ್ಷವು ಸರಾಸರಿ 26 ಸ್ಥಾನಗಳನ್ನು ಕಳೆದುಕೊಂಡ ಇತಿಹಾಸವಿದೆ. ಅಮೆರಿಕದಲ್ಲಿ ಸದ್ಯ ಹಣದುಬ್ಬರ (ಶೇ 2.6), ಜೀವನ ವೆಚ್ಚದ ಹೆಚ್ಚಳ, ಗ್ಯಾಲನ್ ಪೆಟ್ರೋಲ್ ಬೆಲೆ $4.50 (ಸುಮಾರು ₹380) ಏರಿಕೆಯಾಗಿರುವುದು ಮತ್ತು ಡಿಪಾರ್ಟ್‌ಮೆಂಟ್ ಆಫ್ ಗವರ್ನಮೆಂಟ್ ಎಫಿಷಿಯೆನ್ಸಿ (DOGE) ಮೂಲಕ 2.64 ಲಕ್ಷ ಫೆಡರಲ್ ಉದ್ಯೋಗಗಳನ್ನು ಕಡಿತಗೊಳಿಸಿರುವುದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ. ಇದರ ಜೊತೆಗೆ ಇರಾನ್ ಮೇಲಿನ ಯುದ್ಧ, ಗರ್ಭಪಾತದ ಹಕ್ಕು ಹಾಗೂ ವಲಸೆ ನೀತಿಗಳು ಈ ಚುನಾವಣೆಯ ಪ್ರಮುಖ ವಿಷಯಗಳಾಗಿವೆ.
ಪ್ರಮುಖ ಕದನ ಕಣಗಳಾದ ಟೆಕ್ಸಾಸ್, ಮೈನೆ, ಒಹಾಯೊ ಮತ್ತು ಅಲಾಸ್ಕಾದಲ್ಲಿ ತೀವ್ರ ಪೈಪೋಟಿ ಏರ್ಪಟ್ಟಿದೆ. ಇದೇ ವೇಳೆ 36 ರಾಜ್ಯಗಳ ಗವರ್ನರ್ ಹುದ್ದೆಗಳಿಗೂ ಚುನಾವಣೆ ನಡೆಯುತ್ತಿರುವುದು ವಿಶೇಷ. ಸ್ಥಳೀಯ ಮಟ್ಟದಲ್ಲಿ ದೈನಂದಿನ ಆಡಳಿತ, ಮೂಲಸೌಕರ್ಯ ಹಾಗೂ ರಾಜ್ಯಗಳ ಕಾಯ್ದೆಗಳನ್ನು ರೂಪಿಸುವಲ್ಲಿ ಗವರ್ನರ್‌ಗಳ ಪಾತ್ರ ಬಹುಮುಖ್ಯ. ಈ ಎಲ್ಲ ಹಂತಗಳಲ್ಲೂ ಡೆಮಾಕ್ರಟ್‌ಗಳು ಮೇಲುಗೈ ಸಾಧಿಸಿದರೆ ರಿಪಬ್ಲಿಕನ್ ಪಕ್ಷದ ಮುಂದಿನ ದಾರಿ ದುರ್ಗಮವಾಗಲಿದೆ.
ಡೆಮಾಕ್ರಟ್‌ಗಳು ಗೆದ್ದರೆ ಟ್ರಂಪ್ ಆಡಳಿತ ಯಂತ್ರದ ‘ಪ್ಲಾನ್ ಬಿ’ ಕೂಡ ಸಿದ್ಧವಾಗಿದೆ. ಸಂಸತ್ತಿನ ನೆರವಿಲ್ಲದೆ, ತಮ್ಮ ಕಾರ್ಯಾಂಗದ ಅಧಿಕಾರ (Executive Orders) ಬಳಸಿ ವಲಸೆ ನಿಯಂತ್ರಣ, ಆಮದು ಸುಂಕ ಹೆಚ್ಚಳ ಹಾಗೂ ಬಜೆಟ್ ಅನುದಾನಗಳ ಮರುಹಂಚಿಕೆ ಮಾಡಲು ಟ್ರಂಪ್ ಸಿದ್ಧತೆ ನಡೆಸಿದ್ದಾರೆ. ಅಲ್ಲದೆ, ಡೆಮಾಕ್ರಟ್‌ಗಳು ತರುವ ಯಾವುದೇ ಮಸೂದೆಗಳನ್ನು ಸುಲಭವಾಗಿ ವೀಟೊ (ತಿರಸ್ಕರಿಸುವ ಹಕ್ಕು) ಮಾಡಲು ತಾವು ‘ಮಿಸ್ಟರ್ ವೀಟೊ’ ಆಗುವುದಾಗಿಯೂ ಟ್ರಂಪ್ ಈಗಾಗಲೇ ಘೋಷಿಸಿದ್ದಾರೆ. ವಿಪಕ್ಷಗಳ ತನಿಖೆಯಿಂದ ಪಾರಾಗಲು ‘ಕಾರ್ಯಾಂಗದ ಪರಮಾಧಿಕಾರ’ವನ್ನು (Executive Privilege) ಬಳಸುವ ಬಗ್ಗೆಯೂ ಶ್ವೇತಭವನ ಕಾನೂನು ಇಲಾಖೆಯ ಮೊರೆ ಹೋಗಿದೆ.
ಅಮೆರಿಕದ ಚುನಾವಣಾ ವ್ಯವಸ್ಥೆ ಅತ್ಯಂತ ವಿಕೇಂದ್ರೀಕೃತವಾಗಿದೆ. ಭಾರತೀಯ ಕಾಲಮಾನದ ಪ್ರಕಾರ ನವೆಂಬರ್ 4ರಂದು (ಬುಧವಾರ) ಮುಂಜಾನೆಯಿಂದಲೇ ಮತ ಎಣಿಕೆ ಆರಂಭವಾಗಿ ಟ್ರೆಂಡ್‌ಗಳು ತಿಳಿಯಲಾರಂಭಿಸುತ್ತವೆ. ಆದರೆ, ಅಮೆರಿಕದಲ್ಲಿ ಅಂಚೆ ಮತದಾನ (Mail-in ballots) ಮತ್ತು ಮುಂಚಿತವಾಗಿ ಮತದಾನ ಮಾಡುವ ಅವಕಾಶವಿರುವುದರಿಂದ ಹಾಗೂ ಒಂದೊಂದು ರಾಜ್ಯಕ್ಕೂ ಪ್ರತ್ಯೇಕ ಎಣಿಕೆ ನಿಯಮಗಳಿರುವುದರಿಂದ ಅಂತಿಮ ವಿಜೇತರಾರು ಎಂಬ ದೃಢೀಕರಣ ಹೊರಬೀಳಲು ಹಲವು ದಿನಗಳೇ ಬೇಕಾಗಬಹುದು. ಜಾರ್ಜಿಯಾದಂತಹ ಕೆಲವು ರಾಜ್ಯಗಳಲ್ಲಿ ಯಾವುದೇ ಅಭ್ಯರ್ಥಿಗೆ ಶೇ 50ರಷ್ಟು ಮತ ಬರದಿದ್ದರೆ ಡಿಸೆಂಬರ್ 1ರಂದು ಮರುಮತದಾನ (Run-off) ನಡೆಯುವ ಸಾಧ್ಯತೆಯೂ ಇದೆ.
ಈ ಚುನಾವಣೆ ಭಾರತದ ಪಾಲಿಗೆ ಅತ್ಯಂತ ನಿರ್ಣಾಯಕ. ಇತ್ತೀಚೆಗಷ್ಟೇ ಟ್ರಂಪ್ ಆಡಳಿತ ಹೊಸ ಎಚ್-1ಬಿ (H-1B) ವೀಸಾ ಅರ್ಜಿಗಳ ಮೇಲೆ $1,00,000 (ಸುಮಾರು ₹84,40,000) ಶುಲ್ಕ ವಿಧಿಸಿದೆ. ಶೇ 70ರಷ್ಟು ವೀಸಾಗಳನ್ನು ಭಾರತೀಯರೇ ಪಡೆಯುವುದರಿಂದ, ಇದು $200 ಬಿಲಿಯನ್ (ಸುಮಾರು ₹16.88 ಲಕ್ಷ ಕೋಟಿ) ಮೌಲ್ಯದ ಭಾರತೀಯ ಐಟಿ ರಫ್ತು ವಲಯಕ್ಕೆ ಭಾರಿ ಪೆಟ್ಟು ನೀಡಿದೆ. ಜೊತೆಗೆ ರಷ್ಯಾದಿಂದ ತೈಲ ಖರೀದಿಸುತ್ತಿರುವ ಕಾರಣಕ್ಕೆ ಭಾರತದ ಸರಕುಗಳ ಮೇಲೆ ವಿಧಿಸಿದ್ದ ಶೇ 50ರಷ್ಟು ಸುಂಕವನ್ನು (ನಂತರ ಶೇ 18ಕ್ಕೆ ಇಳಿಸಲಾಯಿತು) ಡೆಮಾಕ್ರಟ್‌ಗಳು ಕಾಂಗ್ರೆಸ್ ನಿಯಂತ್ರಣ ಸಾಧಿಸಿದರೆ ಪ್ರಶ್ನಿಸುವ ಸಾಧ್ಯತೆಯಿದೆ. ಟ್ರಂಪ್ ಅವರ ಕಠಿಣ ವಾಣಿಜ್ಯ ನೀತಿಗಳಿಗೆ ಸಂಸತ್ತಿನ ಮೂಲಕ ಕಡಿವಾಣ ಬಿದ್ದರೆ, ಭಾರತಕ್ಕೆ ಆರ್ಥಿಕ ಹಾಗೂ ರಾಜತಾಂತ್ರಿಕ ರಿಲೀಫ್ ಸಿಗಬಹುದು ಎಂಬುದು ಉದ್ಯಮ ವಲಯದ ನಿರೀಕ್ಷೆಯಾಗಿದೆ.
