ಕರ್ನಾಟಕದ ರಾಜಕೀಯ ಇತಿಹಾಸದಲ್ಲಿ ಬಿ.ಎಸ್. ಯಡಿಯೂರಪ್ಪ ಎಂಬ ಹೆಸರು ಎಷ್ಟು ಪ್ರಭಾವಶಾಲಿಯೋ, ಅಷ್ಟೇ ವಿವಾದಾತ್ಮಕವೂ ಹೌದು. ಮೇ 9ರಂದು ಚಿತ್ರದುರ್ಗದಲ್ಲಿ ಅವರ 50 ವರ್ಷಗಳ ರಾಜಕೀಯ ಜೀವನದ ಸ್ಮರಣಾರ್ಥ ‘ಅಭಿಮಾನೋತ್ಸವ’ ನಡೆಯುತ್ತಿದೆ. ಆದರೆ, ಈ ಸಂಭ್ರಮಾಚರಣೆಯ ಹೊಳೆಯ ಕೆಳಗೆ ಹರಿಯುತ್ತಿರುವ ಹಗರಣಗಳ ಕೆಸರು ಮತ್ತು ನೈತಿಕ ಪ್ರಶ್ನೆಗಳು ಇಂದು ಸಾರ್ವಜನಿಕ ಚರ್ಚೆಯ ಕೇಂದ್ರಬಿಂದುವಾಗಿವೆ. ಒಬ್ಬ ನಾಯಕನ ಸಾಧನೆಯನ್ನು ಅಳೆಯುವುದು ಅವರು ಪಡೆದ ಅಧಿಕಾರದಿಂದಲ್ಲ, ಬದಲಿಗೆ ಆ ಅಧಿಕಾರವನ್ನು ಪಡೆಯಲು ಅವರು ತುಳಿದ ಹಾದಿಯಿಂದ. ಯಡಿಯೂರಪ್ಪ ಅವರ ವಿಷಯದಲ್ಲಿ ಈ ಹಾದಿ ಸದಾ ಮುಳ್ಳಿನಿಂದ ಮತ್ತು ವಿವಾದಗಳಿಂದಲೇ ಕೂಡಿದೆ.
ಆಪರೇಷನ್ ಕಮಲ: ಪ್ರಜಾಪ್ರಭುತ್ವದ ಮೌಲ್ಯಗಳ ಹನನ:-
ಕರ್ನಾಟಕ ರಾಜಕಾರಣಕ್ಕೆ ‘ಆಪರೇಷನ್ ಕಮಲ’ ಎಂಬ ಅನೈತಿಕ ಪದವನ್ನು ಪರಿಚಯಿಸಿದ ಕೀರ್ತಿ ಅಥವಾ ಕುಖ್ಯಾತಿ ಯಡಿಯೂರಪ್ಪ ಅವರಿಗೆ ಸಲ್ಲುತ್ತದೆ. 2008ರಲ್ಲಿ ಮೊದಲ ಬಾರಿಗೆ ದಕ್ಷಿಣ ಭಾರತದಲ್ಲಿ ಬಿಜೆಪಿ ಸರ್ಕಾರ ರಚಿಸಲು ಅವರು ಅಡ್ಡಹಾದಿಯನ್ನು ಹಿಡಿದರು. ಜನಾದೇಶವಿಲ್ಲದಿದ್ದರೂ ಅಧಿಕಾರ ಹಿಡಿಯಲೇಬೇಕೆಂಬ ಹಠದಿಂದ ವಿರೋಧ ಪಕ್ಷದ ಶಾಸಕರನ್ನು ಆಮಿಷಗಳ ಮೂಲಕ ಸೆಳೆದು ಪ್ರಜಾಪ್ರಭುತ್ವದ ಆಶಯಗಳನ್ನೇ ಗಾಳಿಗೆ ತೂರಿದರು. ಈ ಹಾದಿ ಇಲ್ಲಿಗೆ ನಿಲ್ಲಲಿಲ್ಲ; 2018ರಲ್ಲಿಯೂ ಮತ್ತೆ ಅದೇ ವಾಮಮಾರ್ಗದ ಮೂಲಕ ಅಧಿಕಾರ ಹಿಡಿದು, “ಆಪರೇಷನ್ ಕಮಲ ಮಾಡಿದ್ದರಲ್ಲಿ ತಪ್ಪೇನಿಲ್ಲ” ಎಂದು ಬಹಿರಂಗವಾಗಿ ಸಮರ್ಥಿಸಿಕೊಳ್ಳುವ ಮೂಲಕ ನೈತಿಕತೆಗೆ ಎಳ್ಳುನೀರು ಬಿಟ್ಟರು.
ಜಾತಿ ರಾಜಕೀಯ ಮತ್ತು ಅಧಿಕಾರದ ಹಪಾಹಪಿ:-
ಬಿಜೆಪಿ ತತ್ವ ಸಿದ್ಧಾಂತಗಳ ಮೇಲೆ ನಿಂತ ಪಕ್ಷ ಎಂದು ಹೇಳಿಕೊಂಡು, ಯಡಿಯೂರಪ್ಪ ಅವರು ಕರ್ನಾಟಕದಲ್ಲಿ ಬೆಳೆದು ನಿಂತಿದ್ದು ಕೇವಲ ‘ಲಿಂಗಾಯತ’ ಎಂಬ ಜಾತಿ ಕಾರ್ಡ್ ಬಳಸಿಕೊಂಡು ಎನ್ನುವ ಟೀಕೆ ಬಲವಾಗಿದೆ. ಲಿಂಗಾಯತರು ರಾಜ್ಯದಲ್ಲಿ ಅಧಿಕಾಂಶ ಬಿಜೆಪಿಯ ಬೆನ್ನೆಲುಬು. ಬಿಜೆಪಿ- ಜೆಡಿಎಸ್ ಧರಂಸಿಂಗ್ ನೇತೃತ್ವದ ಕಾಂಗ್ರೆಸ್ ಸರ್ಕಾರವನ್ನು ಕೆಡವಿ, 20-20 ಮೈತ್ರಿ ಸರ್ಕಾರ ರಚಿಸಿದ್ದವು. 20 ತಿಂಗಳ ನಂತರ ಜೆಡಿಎಸ್ ನ ಕುಮಾರಸ್ವಾಮಿ ಅಧಿಕಾರ ಬಿಟ್ಟುಕೊಡದೆ ವಚನ ಭಂಗ ಮಾಡಿದರೆಂಬ ರಾಜ್ಯವ್ಯಾಪಿ ಪ್ರಚಾರ ಯಡಿಯೂರಪ್ಪ ಅವರಿಗೆ ಲಿಂಗಾಯತ ನಾಯಕ ಎಂಬ ಪಟ್ಟ ಗಳಿಸಿಕೊಟ್ಟಿತು.ಲಿಂಗಾಯತ ಸಹಾನುಭೂತಿ ಹೊಳೆಯಾಗಿ ಹರಿದು ಬಂದಿತ್ತು. ಆಗಿನಿಂದ ಅವರು ರಾಜ್ಯ ಲಿಂಗಾಯತ ನಾಯಕ ಎನಿಸಿದರು. ಲಿಂಗಾಯತರ ಬೆಂಬಲ ಉಳಿಸಿ ಬೆಳೆಸಿಕೊಳ್ಳಲು ಬಿಜೆಪಿ ಈ ಸಮಾವೇಶ ಮಾಡುತ್ತಿದೆ.
ಒಂದು ಸಮುದಾಯದ ನಾಯಕನಾಗಿ ಗುರುತಿಸಿಕೊಳ್ಳುವ ಭರದಲ್ಲಿ ಅವರು ಇಡೀ ರಾಜ್ಯದ ರಾಜಕಾರಣವನ್ನು ಜಾತಿ ಆಧಾರಿತವಾಗಿ ವಿಭಜಿಸಿದರು. ಅಷ್ಟೇ ಅಲ್ಲದೆ, 2013ರಲ್ಲಿ ತಮಗೆ ಅಧಿಕಾರ ನೀಡಿದ ಬಿಜೆಪಿಯನ್ನೇ ತೊರೆದು ‘ಕರ್ನಾಟಕ ಜನತಾ ಪಾರ್ಟಿ’ (ಕೆಜೆಪಿ) ಕಟ್ಟಿ, ಪಕ್ಷಕ್ಕೆ ದ್ರೋಹ ಬಗೆದ ಇತಿಹಾಸವೂ ಇವರದ್ದೇ. ಅಧಿಕಾರಕ್ಕಾಗಿ ಹೋದ ಹಾದಿಯಲ್ಲೆಲ್ಲ ತತ್ವಗಳನ್ನು ಬಲಿಕೊಟ್ಟ ಇವರು, ಮತ್ತೆ ಅದೇ ಬಿಜೆಪಿಗೆ ಮರಳಿದ್ದು ಕೇವಲ ರಾಜಕೀಯ ಅನಿವಾರ್ಯತೆಗಾಗಿ ಮಾತ್ರ.
ಹಗರಣಗಳ ಸರಮಾಲೆ ಮತ್ತು ಜೈಲುವಾಸ:-
ಮುಖ್ಯಮಂತ್ರಿಯಾಗಿದ್ದ ಅವಧಿಯಲ್ಲಿ ಯಡಿಯೂರಪ್ಪ ಅವರ ವಿರುದ್ಧ ಕೇಳಿಬಂದ ಭ್ರಷ್ಟಾಚಾರದ ಆರೋಪಗಳು ಒಂದೆರಡಲ್ಲ. ಸರ್ಕಾರಿ ಭೂಮಿಯನ್ನು ಅಕ್ರಮವಾಗಿ ಡಿನೋಟಿಫೈ ಮಾಡಿ ತಮ್ಮ ಕುಟುಂಬದ ಸದಸ್ಯರಿಗೆ ಲಾಭ ಮಾಡಿಕೊಟ್ಟ ಆರೋಪಗಳು ಇಂದಿಗೂ ನ್ಯಾಯಾಲಯದಲ್ಲಿ ಜೀವಂತವಾಗಿವೆ. ಅಕ್ರಮ ಗಣಿಗಾರಿಕೆ ಹಗರಣಕ್ಕೆ ಸಂಬಂಧಿಸಿದಂತೆ ಲೋಕಾಯುಕ್ತ ವರದಿಯಲ್ಲಿ ಹೆಸರು ಕೇಳಿಬಂದಾಗ, ಅನಿವಾರ್ಯವಾಗಿ ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕಾಯಿತು. ಅಷ್ಟೇ ಅಲ್ಲದೆ, ಕರ್ನಾಟಕದ ಇತಿಹಾಸದಲ್ಲೇ ಭ್ರಷ್ಟಾಚಾರದ ಕೇಸಿನಲ್ಲಿ ಜೈಲುವಾಸ ಅನುಭವಿಸಿದ ಮೊದಲ ಮುಖ್ಯಮಂತ್ರಿ ಎಂಬ ಕಪ್ಪುಚುಕ್ಕೆ ಇವರ ಹೆಸರಿಗಿದೆ. ಇಂತಹ ಕಳಂಕಿತ ಇತಿಹಾಸವಿರುವ ನಾಯಕನಿಗೆ ‘ಅಭಿಮಾನೋತ್ಸವ’ದ ಹೆಸರಿನಲ್ಲಿ ಗೌರವ ಸಲ್ಲಿಸುವುದು ಎಷ್ಟು ಸಮಂಜಸ?
ಪೋಕ್ಸೋ ಪ್ರಕರಣ: ಮನುಕುಲವೇ ತಲೆತಗ್ಗಿಸುವಂತಹ ಕೃತ್ಯ:-
ಯಡಿಯೂರಪ್ಪ ಅವರ ಮೇಲಿರುವ ಎಲ್ಲಾ ರಾಜಕೀಯ ಮತ್ತು ಭ್ರಷ್ಟಾಚಾರದ ಆರೋಪಗಳಿಗಿಂತಲೂ ಅತ್ಯಂತ ಭೀಕರ ಮತ್ತು ಅಸಹ್ಯಕರವಾದುದು ಪೋಕ್ಸೋ (POCSO) ಪ್ರಕರಣ. ಒಬ್ಬ 80 ವರ್ಷ ದಾಟಿದ ಹಿರಿಯ ನಾಯಕ, ಮಾಜಿ ಮುಖ್ಯಮಂತ್ರಿ, ಸಹಾಯ ಕೋರಿ ಬಂದ ಅಪ್ರಾಪ್ತ ಬಾಲಕಿಯ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪ ಎದುರಿಸುತ್ತಿರುವುದು ಇಡೀ ರಾಜ್ಯಕ್ಕೆ ನಾಚಿಕೆಗೇಡಿನ ಸಂಗತಿ.
ಫೆಬ್ರವರಿ 2024ರಲ್ಲಿ ಸಂಭವಿಸಿದ ಈ ಘಟನೆ ಮನುಷ್ಯತ್ವವನ್ನೇ ಪ್ರಶ್ನಿಸುವಂತಿದೆ. ಸಹಾಯಕ್ಕಾಗಿ ಹೋದ ಬಾಲಕಿಯನ್ನು ಕೋಣೆಯೊಳಗೆ ಕರೆದು ಅಸಭ್ಯವಾಗಿ ವರ್ತಿಸಿದ ಆರೋಪ ಯಡಿಯೂರಪ್ಪ ಅವರ ಮೇಲಿದೆ. ವೈದ್ಯಕೀಯ ತಪಾಸಣೆ ಮತ್ತು ಸಿಐಡಿ ವಿಚಾರಣೆಯ ಸಂದರ್ಭದಲ್ಲಿ ಬಾಲಕಿ ನೀಡಿದ ಹೇಳಿಕೆಗಳು ಈ ಪ್ರಕರಣದ ಗಾಂಭೀರ್ಯತೆಯನ್ನು ತಿಳಿಸುತ್ತವೆ. ಇಷ್ಟೆಲ್ಲಾ ಆದರೂ ಪ್ರಕರಣವನ್ನು ಮುಚ್ಚಿಹಾಕಲು ಹಣದ ಆಮಿಷ ಒಡ್ಡಿದ್ದು ವಿಡಿಯೋ ದಾಖಲೆಗಳಲ್ಲಿ ಸೆರೆಯಾಗಿದೆ.
ನಿಗೂಢ ಸಾವು ಮತ್ತು ನ್ಯಾಯಾಂಗದ ಹೋರಾಟ:-
ಈ ಪ್ರಕರಣದ ಬೆನ್ನಲ್ಲೇ ದೂರು ನೀಡಿದ್ದ ಸಂತ್ರಸ್ತೆಯ ತಾಯಿ ನಿಗೂಢವಾಗಿ ಸಾವನ್ನಪ್ಪಿರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ. ಅಧಿಕಾರದ ಪ್ರಭಾವ ಬಳಸಿ ತನಿಖೆಯನ್ನು ಹಳ್ಳ ಹಿಡಿಸಲು ಪ್ರಯತ್ನಿಸಲಾಗುತ್ತಿದೆ ಎಂಬ ಆರೋಪಗಳ ನಡುವೆಯೇ, ಹಿರಿಯ ವಕೀಲರಾದ ಬಾಲನ್ ಅವರು ನ್ಯಾಯಾಲಯದಲ್ಲಿ ನಡೆಸುತ್ತಿರುವ ಹೋರಾಟ ಮಹತ್ವದ್ದಾಗಿದೆ. ಹೈಕೋರ್ಟ್ ಮತ್ತು ಸುಪ್ರೀಂ ಕೋರ್ಟ್ ಹಂತದಲ್ಲಿ ಈ ಪ್ರಕರಣದ ವಿಚಾರಣೆ ನಡೆಯುತ್ತಿದ್ದು, ಮೇ 20ರಂದು ಬರಲಿರುವ ನ್ಯಾಯಾಲಯದ ತೀರ್ಮಾನವು ಯಡಿಯೂರಪ್ಪ ಅವರ ರಾಜಕೀಯ ಭವಿಷ್ಯಕ್ಕೆ ಅಂತಿಮ ಮೊಳೆ ಹೊಡೆಯುವ ಸಾಧ್ಯತೆಯಿದೆ.
ಕುಟುಂಬ ರಾಜಕಾರಣದ ಪರಾಕಾಷ್ಠೆ:-
ಒಂದೆಡೆ ಭ್ರಷ್ಟಾಚಾರ ಮತ್ತು ಪೋಕ್ಸೋ ಪ್ರಕರಣಗಳ ಕಾಟವಾದರೆ, ಮತ್ತೊಂದೆಡೆ ಇಡೀ ಕುಟುಂಬವನ್ನೇ ರಾಜಕೀಯದಲ್ಲಿ ನೆಲೆಗೊಳಿಸುವ ಹಪಹಪಿ. ತಮ್ಮ ಇಡೀ ಕುಟುಂಬವನ್ನು ರಾಜಕೀಯದಲ್ಲಿ ಭದ್ರವಾಗಿ ನೆಲೆಯೂರಿಸಲು ಯಡಿಯೂರಪ್ಪ ಅವರು ನಡೆಸಿದ ಕಸರತ್ತುಗಳು ಯಾರಿಗೂ ತಿಳಿಯದ ವಿಷಯವಲ್ಲ. ಒಂದು ಕಡೆ ಪಕ್ಷವು ಕುಟುಂಬ ರಾಜಕಾರಣದ ವಿರುದ್ಧ ಮಾತನಾಡುತ್ತಿದ್ದರೆ, ಮತ್ತೊಂದೆಡೆ ಬಿಎಸ್ವೈ ತಮ್ಮ ಮಕ್ಕಳಿಗೆ ಅಧಿಕಾರ ಕೊಡಿಸಲು ಹೈಕಮಾಂಡ್ ಮೇಲೆ ಒತ್ತಡ ಹೇರುತ್ತಲೇ ಬಂದಿದ್ದಾರೆ. ನಿಷ್ಠಾವಂತ ಕಾರ್ಯಕರ್ತರನ್ನು ಕಡೆಗಣಿಸಿ, ಕೇವಲ ಸ್ವಂತ ಕುಟುಂಬದ ಹಿತಾಸಕ್ತಿಯನ್ನು ಕಾಪಾಡಿಕೊಳ್ಳುತ್ತಿರುವುದು ಯಾವ ರೀತಿಯ ‘ಜನಸೇವೆ’? ಈ ಅಭಿಮಾನೋತ್ಸವವು ವಾಸ್ತವದಲ್ಲಿ ಅವರ ಕುಟುಂಬದ ರಾಜಕೀಯ ಭವಿಷ್ಯವನ್ನು ಭದ್ರಪಡಿಸುವ ಒಂದು ಶಕ್ತಿ ಪ್ರದರ್ಶನದ ವೇದಿಕೆಯಾಗಿ ಮಾತ್ರ ಕಾಣಿಸುತ್ತಿದೆ.
ಮೇ 9ರ ಸಂಭ್ರಮವು ಕೇವಲ ಆಡಂಬರದ ಪ್ರದರ್ಶನವಾಗಿರಬಹುದು. ಆದರೆ, ಮೇ 20ರಂದು ನ್ಯಾಯಾಲಯದಲ್ಲಿ ನಡೆಯಲಿರುವ ವಿಚಾರಣೆಯು ಯಡಿಯೂರಪ್ಪ ಅವರ ನೈಜ ಮುಖವಾಡವನ್ನು ಕಳಚುವ ಸಾಧ್ಯತೆಯಿದೆ. ಪೋಕ್ಸೋ ಪ್ರಕರಣದಂತಹ ಹೀನಾಯ ಆರೋಪ ಹೊತ್ತಿರುವ ವ್ಯಕ್ತಿಗೆ ಕೇಂದ್ರದ ಗೃಹ ಸಚಿವರೇ ಬಂದು ಬೆಂಬಲ ಸೂಚಿಸುವುದು ನಮ್ಮ ದೇಶದ ಕಾನೂನು ಸುವ್ಯವಸ್ಥೆಗೆ ಹಿಡಿದ ಕನ್ನಡಿಯಾಗಿದೆ. ಆಪರೇಷನ್ ಕಮಲದ ಮೂಲಕ ಪ್ರಜಾಪ್ರಭುತ್ವವನ್ನು ಕೊಂದಿದ್ದಕ್ಕಾಗಿ, ಭ್ರಷ್ಟಾಚಾರಕ್ಕಾಗಿ ಅಥವಾ ಪೋಕ್ಸೋ ಆರೋಪಿಯಾಗಿರುವುದಕ್ಕಾಗಿ ಈ ಅಭಿಮಾನೋತ್ಸವ ನಡೆಯುತ್ತಿದೆಯೇ ಎಂದು ಸಾರ್ವಜನಿಕರು ಕೇಳುತ್ತಿದ್ದಾರೆ.
ಅಷ್ಟೇ ಅಲ್ಲ, ಈ ಅಭಿಮಾನೋತ್ಸವದ ಬಗ್ಗೆ ಸ್ವಪಕ್ಷದವರೇ ಆಕ್ಷೇಪ ವ್ಯಕ್ತಪಡಿಸುತ್ತಾರೆ. ಬಿಜೆಪಿ ಪರಿಷತ್ ಸದಸ್ಯ ಎಚ್. ವಿಶ್ವನಾಥ್ ಅವರು “ಪೋಕ್ಸೋ ಪ್ರಕರಣದ ಆರೋಪಿಗೆ ಇಂತಹ ಸನ್ಮಾನವೇ? ಯಡಿಯೂರಪ್ಪ ಅಭಿಮಾನೋತ್ಸವ ಸರಿಯಲ್ಲ” ಎಂಬ ಅವರ ಪ್ರಶ್ನೆಗೆ ಉತ್ತರ ನೀಡುವವರು ಯಾರು? ಅಮಿತ್ ಶಾ ಅವರಂತಹ ಕೇಂದ್ರ ಸಚಿವರು ಇಂತಹ ವಿವಾದಿತ ವೇದಿಕೆಗೆ ಬರುವ ಮೂಲಕ ಕಾನೂನಿನ ಪ್ರಕ್ರಿಯೆಯ ಮೇಲೆ ಪ್ರಭಾವ ಬೀರಲು ಯತ್ನಿಸುತ್ತಿದ್ದಾರೆಯೇ ಎಂಬ ಅನುಮಾನ ಕಾಡುತ್ತದೆ. ಇನ್ನು ಮುಖ್ಯಮಂತ್ರಿ ಸಿದ್ದರಾಮಯ್ಯನವರ ಮೌನದ ಬಗ್ಗೆಯೂ ವಿಶ್ವನಾಥ್ ವ್ಯಂಗ್ಯವಾಡಿದ್ದಾರೆ. ಕಾನೂನು ಪಂಡಿತರಾದ ಸಿದ್ದರಾಮಯ್ಯನವರು ಇಂತಹ ಅನೈತಿಕ ಆಚರಣೆಗಳ ಬಗ್ಗೆ ಮೌನ ತಾಳಿರುವುದು ರಾಜಕೀಯ ಹೊಂದಾಣಿಕೆಯಂತಿದೆ.
50 ವರ್ಷಗಳ ಕಾಲ ರಾಜಕೀಯದಲ್ಲಿರುವುದು ಸಾಧನೆಯಲ್ಲ. ಆ 50 ವರ್ಷಗಳಲ್ಲಿ ಎಷ್ಟು ಜನರ ಬದುಕನ್ನು ಹಸನು ಮಾಡಿದ್ದೇವೆ ಮತ್ತು ಎಷ್ಟು ಶುದ್ಧವಾದ ಹಾದಿಯಲ್ಲಿ ಸಾಗಿದ್ದೇವೆ ಎನ್ನುವುದು ಮುಖ್ಯ. ಯಡಿಯೂರಪ್ಪ ಅವರ ಹಾದಿಯಲ್ಲಿ ಮೌಲ್ಯಗಳಿಗಿಂತ ಹೆಚ್ಚಾಗಿ ವಿವಾದಗಳೇ ರಾರಾಜಿಸುತ್ತಿವೆ. ಈ ‘ಅಭಿಮಾನೋತ್ಸವ’ ಕೇವಲ ಅಪರಾಧಗಳನ್ನು ಮರೆಮಾಚುವ ಒಂದು ವಿಫಲ ಪ್ರಯತ್ನವಷ್ಟೇ.
