1930ರಲ್ಲಿ ಆರಂಭವಾದ ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಇದುವರೆಗೆ 2,700ಕ್ಕೂ ಹೆಚ್ಚು ಗೋಲುಗಳು ದಾಖಲಾಗಿವೆ. ಆದರೆ, ಕೆಲವು ಪಂದ್ಯಗಳು ಮಾತ್ರ ಮಿತಿಮೀರಿದ ಗೋಲುಗಳ ಸುರಿಮಳೆಯಿಂದಾಗಿ ಫುಟ್‌ಬಾಲ್ ಇತಿಹಾಸದಲ್ಲಿ ಅಚ್ಚಳಿಯದೆ ಉಳಿದಿವೆ. 2026ರ ವಿಶ್ವಕಪ್‌ಗೆ ಮುನ್ನ, ಫುಟ್‌ಬಾಲ್ ಲೋಕದ ಅತಿ ದೊಡ್ಡ ವೇದಿಕೆಯಲ್ಲಿ ಅತಿ ಹೆಚ್ಚು ಗೋಲುಗಳು ದಾಖಲಾದ ರೋಚಕ ಪಂದ್ಯಗಳ ಮೆಲುಕು ಇಲ್ಲಿದೆ.
ಆಸ್ಟ್ರಿಯಾ 7-5 ಸ್ವಿಟ್ಜರ್ಲೆಂಡ್ (1954)
1954ರ ಜೂನ್ 26ರಂದು ಲೌಸೇನ್‌ನಲ್ಲಿ ನಡೆದ ವಿಶ್ವಕಪ್ ಕ್ವಾರ್ಟರ್-ಫೈನಲ್ ಪಂದ್ಯವು, ವಿಶ್ವಕಪ್ ಇತಿಹಾಸದಲ್ಲಿಯೇ ಒಂದೇ ಪಂದ್ಯದಲ್ಲಿ ಅತಿ ಹೆಚ್ಚು ಗೋಲುಗಳು ದಾಖಲಾದ ಪಂದ್ಯವಾಗಿ ಇಂದಿಗೂ ಉಳಿದಿದೆ. ಪಂದ್ಯ ಆರಂಭವಾದ ಕೇವಲ 23 ನಿಮಿಷಗಳಲ್ಲಿ ಸ್ವಿಟ್ಜರ್ಲೆಂಡ್ 3-0 ಮುನ್ನಡೆ ಸಾಧಿಸಿತ್ತು. ಆದರೆ, ಆಸ್ಟ್ರಿಯಾ ಅದ್ಭುತ ಕಮ್‌ಬ್ಯಾಕ್ ಮಾಡಿ ಮುಂದಿನ 25 ನಿಮಿಷಗಳಲ್ಲಿ ಬರೋಬ್ಬರಿ 5 ಗೋಲುಗಳನ್ನು ಸಿಡಿಸಿತು. ಮೊದಲಾರ್ಧದ ಅಂತ್ಯಕ್ಕಾಗಲೇ ಸ್ಕೋರ್ 5-4 ಆಗಿತ್ತು. ಪಂದ್ಯದ ಅಂತ್ಯಕ್ಕೆ ಎರಡೂ ತಂಡಗಳು ಸೇರಿ ಒಟ್ಟು 12 ಗೋಲುಗಳನ್ನು (ಆಸ್ಟ್ರಿಯಾ 7, ಸ್ವಿಟ್ಜರ್ಲೆಂಡ್ 5) ಗಳಿಸಿದವು. 7 ದಶಕಗಳು ಕಳೆದರೂ ಈ ದಾಖಲೆ ಅಜೇಯವಾಗಿ ಉಳಿದಿದೆ.
ಹಂಗೇರಿ 10-1 ಎಲ್ ಸಾಲ್ವಡಾರ್ (1982)
ಒಂದೇ ಪಂದ್ಯದಲ್ಲಿ ಅತಿ ದೊಡ್ಡ ಅಂತರದ ಗೆಲುವು (9 ಗೋಲುಗಳ ಅಂತರ) ಸಾಧಿಸಿದ ದಾಖಲೆ ಹಂಗೇರಿ ಹೆಸರಿನಲ್ಲಿದೆ. 1982ರ ಸ್ಪೇನ್ ವಿಶ್ವಕಪ್‌ನಲ್ಲಿ ಎಲ್ ಸಾಲ್ವಡಾರ್ ವಿರುದ್ಧ ಹಂಗೇರಿ 10-1 ಅಂತರದ ಭರ್ಜರಿ ಜಯ ಸಾಧಿಸಿತ್ತು. ಒಂದೇ ಪಂದ್ಯದಲ್ಲಿ 10 ಗೋಲು ಬಾರಿಸಿದ ವಿಶ್ವಕಪ್‌ನ ಏಕೈಕ ತಂಡ ಹಂಗೇರಿ. ಜೊತೆಗೆ, ಬದಲಿ ಆಟಗಾರನಾಗಿ ಮೈದಾನಕ್ಕಿಳಿದು ಹ್ಯಾಟ್ರಿಕ್ ಗೋಲು ಬಾರಿಸಿದ (ಲಾಸ್ಲೊ ಕಿಸ್) ವಿಶ್ವಕಪ್ ಇತಿಹಾಸದ ಏಕೈಕ ದಾಖಲೆಯೂ ಈ ಪಂದ್ಯದಲ್ಲಿ ನಿರ್ಮಾಣವಾಯಿತು. ಇಲ್ಲಿ ಒಟ್ಟು 11 ಗೋಲುಗಳು ದಾಖಲಾಗಿದ್ದವು.
ಇದನ್ನು ಓದಿದ್ದೀರಾ? ಫಿಫಾ ಜಗತ್ತಿನಲ್ಲಿ ಭಾರತದ ಹೆಜ್ಜೆಗುರುತು – ಕನ್ನಡಿಗ ಕೆಂಪಯ್ಯನವರ ಮರೆಯಲಾಗದ ಸಾಧನೆ
ಬ್ರೆಜಿಲ್ 6-5 ಪೋಲೆಂಡ್ (1938)
ರೊನಾಲ್ಡೊ ಅಥವಾ ಪೀಲೆ ಅವರಿಗಿಂತ ಮುಂಚೆಯೇ ಬ್ರೆಜಿಲ್ ತಂಡ ತನ್ನ ಆಕ್ರಮಣಕಾರಿ ಆಟಕ್ಕೆ ಹೆಸರಾಗಿತ್ತು. 1938ರಲ್ಲಿ ಪೋಲೆಂಡ್ ವಿರುದ್ಧ ನಡೆದ ಪಂದ್ಯದಲ್ಲಿ ಒಟ್ಟು 11 ಗೋಲುಗಳು ದಾಖಲಾಗಿದ್ದವು. ಇದರಲ್ಲಿ ಬ್ರೆಜಿಲ್ 6 ಗೋಲು ಬಾರಿಸಿದರೆ, ಪೋಲೆಂಡ್ 5 ಗೋಲು ಗಳಿಸಿತ್ತು (ಪೋಲೆಂಡ್‌ನ ಅರ್ನೆಸ್ಟ್ ವಿಲಿಮೋವ್ಸ್ಕಿ ಒಬ್ಬರೇ 4 ಗೋಲು ಗಳಿಸಿದ್ದರು).
ಇತರೆ ಗಮನಾರ್ಹ ಪಂದ್ಯಗಳು:
1954ರ ಟೂರ್ನಿಯ ಗ್ರೂಪ್ ಹಂತದ ಪಂದ್ಯವೊಂದರಲ್ಲಿ ಹಂಗೇರಿಯು ಪಶ್ಚಿಮ ಜರ್ಮನಿ ವಿರುದ್ಧ 8-3 (ಒಟ್ಟು 11 ಗೋಲು) ಅಂತರದ ಜಯ ಸಾಧಿಸಿತ್ತು. ವಿಶೇಷವೆಂದರೆ, ಕೆಲವೇ ವಾರಗಳ ಬಳಿಕ ನಡೆದ ಫೈನಲ್‌ನಲ್ಲಿ ಅದೇ ಪಶ್ಚಿಮ ಜರ್ಮನಿ ಹಂಗೇರಿಯನ್ನು ಮಣಿಸಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿತು. ಇನ್ನು, 1958ರಲ್ಲಿ ನಡೆದ ಗ್ರೂಪ್ ಹಂತದ ಪಂದ್ಯವೊಂದರಲ್ಲಿ ಫ್ರಾನ್ಸ್ ತಂಡವು ಪರಾಗ್ವೆ ವಿರುದ್ಧ 7-3 (ಒಟ್ಟು 10 ಗೋಲು) ಅಂತರದ ಗೆಲುವು ಸಾಧಿಸಿತ್ತು.
ಅತಿ ಹೆಚ್ಚು ಗೋಲು ದಾಖಲಾದ ಟೂರ್ನಿ (1954):
1954ರ ವಿಶ್ವಕಪ್ ಟೂರ್ನಿಯ ಕೇವಲ 26 ಪಂದ್ಯಗಳಲ್ಲಿ 140 ಗೋಲುಗಳು ದಾಖಲಾಗಿದ್ದವು! ಅಂದರೆ ಪ್ರತಿ ಪಂದ್ಯಕ್ಕೆ ಸರಾಸರಿ 5.38 ಗೋಲುಗಳು. ಈ ಪ್ರಮಾಣ ಎಷ್ಟೊಂದು ದೊಡ್ಡದೆಂದರೆ, 2018 ಮತ್ತು 2022ರ ವಿಶ್ವಕಪ್‌ಗಳಲ್ಲಿ ಪ್ರತಿ ಪಂದ್ಯಕ್ಕೆ ಸರಾಸರಿ ಕೇವಲ 2.64 ಹಾಗೂ 2.69 ಗೋಲುಗಳು ಮಾತ್ರ ದಾಖಲಾಗಿವೆ.
ಆಧುನಿಕ ಫುಟ್‌ಬಾಲ್ ಹೆಚ್ಚು ವೇಗ ಹಾಗೂ ತಂತ್ರಗಾರಿಕೆಯಿಂದ ಕೂಡಿರಬಹುದು; ಆದರೆ 1954ರಲ್ಲಿ ಕಂಡುಬಂದ ಗೋಲುಗಳ ಸುರಿಮಳೆಯನ್ನು ಸರಿಗಟ್ಟಲು ಯಾವ ಟೂರ್ನಿಗೂ ಸಾಧ್ಯವಾಗಿಲ್ಲ. 1938ರಿಂದ 1982ರ ಅವಧಿಯಲ್ಲಿ 10 ಅಥವಾ ಅದಕ್ಕೂ ಹೆಚ್ಚು ಗೋಲುಗಳು ದಾಖಲಾದ ಒಟ್ಟು 5 ಪಂದ್ಯಗಳನ್ನು ವಿಶ್ವಕಪ್ ಕಂಡಿದೆ. ಆದರೆ, ನಾಲ್ಕು ದಶಕಗಳ ನಂತರವೂ ಫುಟ್‌ಬಾಲ್ ಜಗತ್ತು ಅಂತಹ 6ನೇ ಪಂದ್ಯಕ್ಕಾಗಿ ಇನ್ನೂ ಕಾಯುತ್ತಿದೆ.
