ಮುಂಬೈ ಇಂಡಿಯನ್ಸ್ ತಂಡದ ಕ್ಯಾಮರಾನ್ ಗ್ರೀನ್, ಬೆಂಗಳೂರು ಚಾಲೆಂಜರ್ಸ್ ನ ವಿರಾಟ್ ಕೊಹ್ಲಿ ಮತ್ತು ಗುಜರಾತ್ ಟೈಟನ್ಸ್ ನ ಶುಭಮನ್ ಗಿಲ್- ಒಂದೇ ದಿನ ಅತಿವೇಗವಾಗಿ ಶತಕ ಗಳಿಸಿ, ಔಟಾಗದೆ ಉಳಿದರು
ಐಪಿಎಲ್ ಕ್ರಿಕೆಟ್ ನಲ್ಲಿ ಒಂದೇ ದಿನ ಮೂವರು ಬ್ಯಾಟ್ಸ್ಮನ್ಗಳಿಂದ ಮೂರು ಶತಕ ಸಿಡಿಸಿದ ಅಪರೂಪದ ಗಳಿಗೆಗೆ ಭಾನುವಾರ ಸಾಕ್ಷಿಯಾಗಿದೆ.
ಮುಂಬೈನಲ್ಲಿ ನಡೆದ ಮಧ್ಯಾಹ್ನದ ಮುಂಬೈ ಮತ್ತು ಸನ್ ರೈಸರ್ಸ್ ನಡುವಿನ ಪಂದ್ಯದಲ್ಲಿ ಮುಂಬೈ ತಂಡದ ಕ್ಯಾಮರಾನ್ ಗ್ರೀನ್, 47 ಬಾಲ್ಗಳಲ್ಲಿ(ಎಂಟು ಸಿಕ್ಸ್, ಎಂಟು ಫೋರ್) ಶತಕ ಗಳಿಸಿ, ದಾಖಲೆ ಬರೆದರು. ಜೊತೆಗೆ ನಾಟ್ ಔಟ್ ಆಗಿ ಉಳಿದರು.
ಸಂಜೆ ಬೆಂಗಳೂರಿನಲ್ಲಿ ನಡೆದ ರಾಯಲ್ ಚಾಲೆಂಜರ್ಸ್ ಮತ್ತು ಗುಜರಾತ್ ಟೈಟನ್ಸ್ ನಡುವಿನ ಪಂದ್ಯದಲ್ಲಿ, ಮೊದಲು ಬ್ಯಾಟ್ ಮಾಡಿದ ರಾಯಲ್ ಚಾಲೆಂಜರ್ಸ್ ತಂಡದ ಆರಂಭಿಕ ಆಟಗಾರ ವಿರಾಟ್ ಕೊಹ್ಲಿ 61 ಬಾಲ್ಗಳಲ್ಲಿ(ಹದಿಮೂರು ಫೋರ್, ಒಂದು ಸಿಕ್ಸ್) 101 ರನ್ಗಳನ್ನು ಗಳಿಸಿ, ನಾಟ್ ಔಟ್ ಆಗಿ ಉಳಿದರು.
ಬೆಂಗಳೂರಿನಲ್ಲಿ ನಡೆದ ಪಂದ್ಯವಾದ್ದರಿಂದ, ಕೊಹ್ಲಿ ಸೆಂಚುರಿ ಬಾರಿಸಿದ್ದರಿಂದ ಕ್ರಿಕೆಟ್ ಅಭಿಮಾನಿಗಳು ಬಹಳ ಖುಷಿಯಲ್ಲಿದ್ದರು. ರಾಯಲ್ ಚಾಲೆಂಜರ್ಸ್ ಗೆದ್ದು, ಪ್ಲೇ ಆಫ್ಗೆ ಎಂಟ್ರಿ ಪಡೆಯುತ್ತದೆಂದು ಭಾವಿಸಿದ್ದರು. ಭಾರೀ ಸಂಭ್ರಮದಲ್ಲಿದ್ದರು.
ಆದರೆ ಬೆಂಗಳೂರು ರಾಯಲ್ ಚಾಲೆಂಜರ್ಸ್ಗೆ ಉತ್ತರವಾಗಿ ಬ್ಯಾಟ್ ಮಾಡಲು ಮೈದಾನಕ್ಕಿಳಿದ ಗುಜರಾತ್ ಟೈಟನ್ಸ್ ತಂಡದ ಆಟಗಾರರಲ್ಲಿ, ಆರಂಭಿಕ ಆಟಗಾರ ಶುಭಮನ್ ಗಿಲ್, ಬೆಂಗಳೂರಿಗರ ಸಂಭ್ರಮಕ್ಕೆ ತಣ್ಣೀರು ಎರಚಿಬಿಟ್ಟರು. ಕೊಹ್ಲಿ ಗಳಿಸಿದ್ದ ಶತಕಕ್ಕೆ ಉತ್ತರವಾಗಿ, ಕೇವಲ 52 ಬಾಲ್ಗಳಲ್ಲಿ(ಐದು ಫೋರ್, ಎಂಟು ಸಿಕ್ಸ್) 104 ರನ್ ಗಳಿಸಿ, ಔಟಾಗದೆ ಉಳಿದರು. ಆ ಮೂಲಕ ರಾಯಲ್ ಚಾಲೆಂಜರ್ಸ್ ಪ್ಲೇ ಆಫ್ ಕನಸನ್ನು ನುಚ್ಚುನೂರು ಮಾಡಿಬಿಟ್ಟರು.
ಒಂದೇ ದಿನ ಎರಡು ಪಂದ್ಯಗಳಲ್ಲಿ, ಮೂವರು ಆಟಗಾರರು ಶತಕ ಗಳಿಸಿದ್ದು, ಔಟಾಗದೆ ಉಳಿದದ್ದು- ಸದ್ಯದ ಐಪಿಎಲ್ನಲ್ಲಿ ದಾಖಲೆಯಾಗಿದೆ.
ಈ ಚುಟುಕು ಕ್ರಿಕೆಟ್ನ ವಿಶೇಷತೆ ಇರುವುದೇ ಇಂತಹ ಆಟದಲ್ಲಿ. ಗಿಲ್-ಗ್ರೀನ್ಗೆ ಹೋಲಿಸಿದರೆ, ವಿರಾಟ್ ಕೊಹ್ಲಿ ಕೊಂಚ ಕಳೆಗುಂದಿದ ವಯಸ್ಸಾದ ಆಟಗಾರ. ತನ್ನ ಆಟದ ಮೊನಚನ್ನು ಕಳೆದುಕೊಂಡು ಮಂಕಾಗುವ ಕಡೆ ಹೆಜ್ಜೆ ಹಾಕುತ್ತಿರುವ ಆಟಗಾರ. ಆದರೆ ಐಪಿಎಲ್ ನಲ್ಲಿ ಹರೆಯದ ಹುಡುಗರ ನಡುವೆ ಈಗಲೂ ಪುಟಿದೇಳುವ, ಅವರಂತೆಯೇ ಆಡುವ, ಶತಕ ಬಾರಿಸುವ ಕೊಹ್ಲಿ- ಸಮರೋಪಾದಿಯಲ್ಲಿ ಕ್ರಿಕೆಟ್ನತ್ತ ಕಾಲಿಡುತ್ತಿರುವ ಹೊಸ ಹುಡುಗರಿಗೆ ಮಾದರಿ.