ಐಪಿಎಲ್ 2026ರ ಆವೃತ್ತಿಯಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ (SRH) ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ (CSK) ನಡುವಿನ ಪಂದ್ಯದಲ್ಲಿ ಅಭಿಮಾನಿಯೊಬ್ಬ ‘ನಿಂಬೆಹಣ್ಣಿನ’ ಜಪದ ವಿಧಿಯನ್ನು ಮಾಡುತ್ತಿರುವ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ.
ಈ ವಿವಾದದ ಬೆನ್ನಲ್ಲೇ ಪ್ರತಿಕ್ರಿಯಿಸಿರುವ ಮಾಜಿ ಐಪಿಎಲ್ ಕಮಿಷನರ್ ಲಲಿತ್ ಮೋದಿ, 2011ರ ಐಪಿಎಲ್ ಆವೃತ್ತಿಯಲ್ಲೂ ಒಂದು ತಂಡದ ಮಾಲೀಕರು ತಮ್ಮ ವಿರೋಧಿ ತಂಡದ ವಿರುದ್ಧ ಇಂತಹ ‘ಮಾಟ-ಮಂತ್ರ’ ಕೃತ್ಯಗಳಲ್ಲಿ ತೊಡಗಿದ್ದರು ಎಂಬ ಸ್ಫೋಟಕ ಮಾಹಿತಿಯನ್ನು ಬಯಲು ಮಾಡಿದ್ದಾರೆ.
ಪಂದ್ಯದ 17ನೇ ಓವರ್‌ನಲ್ಲಿ ಸಿಎಸ್‌ಕೆ ತಂಡವು 194 ರನ್‌ಗಳ ಗುರಿ ಬೆನ್ನತ್ತುವಾಗ 7 ವಿಕೆಟ್ ಕಳೆದುಕೊಂಡು 154 ರನ್‌ಗಳನ್ನು ಗಳಿಸಿತ್ತು. ಈ ವೇಳೆಯಲ್ಲಿ ಸಿಎಸ್‌ಕೆ ತಂಡದ ಪ್ರಮುಖ ಆಟಗಾರ ಶಿವಂ ದುಬೆ ಕ್ರೀಸ್‌ನಲ್ಲಿದ್ದರು. ದುಬೆ ಅವರು ಪಂದ್ಯದ ಗತಿಯನ್ನು ಬದಲಾಯಿಸುವ ಸಾಮರ್ಥ್ಯ ಹೊಂದಿದ್ದರಿಂದ ಎಸ್‌ಆರ್‌ಹೆಚ್‌ ತಂಡಕ್ಕೆ ಅವರ ವಿಕೆಟ್ ಅತ್ಯಗತ್ಯವಾಗಿತ್ತು. ಸ್ಟ್ಯಾಂಡ್‌ನಲ್ಲಿದ್ದ ಎಸ್‌ಆರ್‌ಹೆಚ್‌ ಅಭಿಮಾನಿಯೊಬ್ಬ ನಿಂಬೆಹಣ್ಣನ್ನು ಹಿಡಿದು ಏನನ್ನೋ ಜಪಿಸಿ ದುಬೆ ಕಡೆಗೆ ತೋರಿಸುತ್ತಿರುವ ದೃಶ್ಯ ಕ್ಯಾಮೆರಾದಲ್ಲಿ ಸೆರೆಯಾಗಿತ್ತು.
ಇದನ್ನು ಓದಿದ್ದೀರಾ? ಅಮೆರಿಕದ ವಿನಾಶಕ್ಕೆ ಸಿದ್ಧವಾಗಿರುವ ಡೊನಾಲ್ಡ್ ಟ್ರಂಪ್ ಎಂಬ ‘ವಿಧ್ವಂಸಕ’
ಆಶ್ಚರ್ಯವೆಂಬಂತೆ, ಅದು ನಡೆದ ಕೆಲವೇ ಕ್ಷಣಗಳಲ್ಲಿ ಸಾಕಿಬ್ ಹುಸೇನ್ ಅವರ ಎಸೆತದಲ್ಲಿ ದುಬೆ ಬೌಲ್ಡ್ ಆದರು. ಈ ಘಟನೆಯ ನಂತರ ಸಿಎಸ್‌ಕೆ ತಂಡವು ಐಪಿಎಲ್ ಆಡಳಿತ ಮಂಡಳಿಗೆ ದೂರು ನೀಡಿದೆ ಎಂಬ ಪತ್ರವೊಂದು ಇಂಟರ್ನೆಟ್‌ನಲ್ಲಿ ವೈರಲ್ ಆಗಿತ್ತು.
ಲಲಿತ್ ಮೋದಿ ಸ್ಫೋಟಕ ಹೇಳಿಕೆ
ಈ ವೈರಲ್ ಪತ್ರ ಮತ್ತು ಘಟನೆಯ ಕುರಿತಾಗಿ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿರುವ ಲಲಿತ್ ಮೋದಿ, ಸಿಎಸ್‌ಕೆ ದೂರಿನ ಪತ್ರ ನಕಲಿ ಇರಬಹುದು ಎಂದಿದ್ದಾರೆ. ಆದರೆ, “2011ರ ಆವೃತ್ತಿಯಲ್ಲಿ ಒಂದು ತಂಡದ ಮಾಲೀಕರು ವಿರೋಧಿ ತಂಡದ ಡ್ರೆಸ್ಸಿಂಗ್ ರೂಮ್‌ನಲ್ಲಿ ಇಂಥದ್ದೇ ಕೃತ್ಯ ಮಾಡಿಸಿದ್ದರು. ನನಗೆ ಖಚಿತ ಪುರಾವೆಯೊಂದಿಗೆ ಮಾಹಿತಿ ಸಿಕ್ಕಾಗ, ನಾನು ವಿರೋಧಿ ತಂಡದ ಮಾಲೀಕರಿಗೆ ಈ ಬಗ್ಗೆ ಎಚ್ಚರಿಕೆ ನೀಡಿದ್ದೆ. ಯಾರು ಈ ರೀತಿಯ ಕೃತ್ಯಗಳನ್ನು ನಡೆಸುತ್ತಿದ್ದರು ಎಂಬುದನ್ನು ನನ್ನ ಮುಂದಿನ ಚಲನಚಿತ್ರ ಅಥವಾ ಟಿವಿ ಸಿರೀಸ್‌ನಲ್ಲಿ ಸಂಪೂರ್ಣವಾಗಿ ಬಹಿರಂಗಪಡಿಸುತ್ತೇನೆ,” ಎಂದು ಹೇಳಿದ್ದಾರೆ.
