ಕಳೆದ ಬಾರಿ ಕೆ ಎಲ್ ರಾಹುಲ್ ಅವರನ್ನು ಎಸ್‌ಎಸ್‌ಜಿ ನಾಯಕತ್ವ ಸ್ಥಾನದಿಂದ ತೆಗೆದುಹಾಕಿದ ನಂತರ ಈಗ ರಿಷಭ್ ಪಂತ್ ನಾಯಕ ಸ್ಥಾನಕ್ಕೆ ಕುತ್ತು ಎದುರಾಗಿದೆಯೇ? ಅಂತಹದೊಂದು ಪ್ರಶಗನೆ ಎಲ್ಲಡೆ ಕೇಳಿ ಬರುತ್ತಿದೆ. ಐಪಿಎಲ್ 2026ರ ಆವೃತ್ತಿಯಲ್ಲಿ ಲಖನೌ ಸೂಪರ್ ಜೈಂಟ್ಸ್ (ಎಲ್‌ಎಸ್‌ಜಿ) ತಂಡದ ಕಳಪೆ ಪ್ರದರ್ಶನ ಮುಂದುವರಿದಿದ್ದು, ಸತತ ಸೋಲುಗಳ ಸುಳಿಯಲ್ಲಿ ಸಿಲುಕಿರುವ ತಂಡದ ನಾಯಕ ರಿಷಭ್ ಪಂತ್ ಅವರ ನಾಯಕತ್ವದ ಬಗ್ಗೆ ಇದೀಗ ತೀವ್ರ ಟೀಕೆಗಳು ವ್ಯಕ್ತವಾಗುತ್ತಿವೆ. ಪಂತ್ ನಾಯಕತ್ವದಿಂದ ಕೆಳಗಿಳಿದು ಕೇವಲ ಬ್ಯಾಟರ್ ಆಗಿ ಮುಂದುವರಿಯುವುದು ಒಳಿತು ಎಂದು ಭಾರತದ ಮಾಜಿ ಕ್ರಿಕೆಟಿಗ ವಾಸಿಂ ಜಾಫರ್ ಅಭಿಪ್ರಾಯಪಟ್ಟಿದ್ದು, ಅವರ ಸ್ಥಾನಕ್ಕೆ ಸೂಕ್ತ ಬದಲಿ ನಾಯಕನ ಹೆಸರನ್ನೂ ಸೂಚಿಸಿದ್ದಾರೆ.
ಇತ್ತೀಚೆಗಷ್ಟೇ ಕೋಲ್ಕತ್ತ ನೈಟ್ ರೈಡರ್ಸ್ (ಕೆಕೆಆರ್) ವಿರುದ್ಧ ನಡೆದ ಪಂದ್ಯದಲ್ಲಿ ಲಖನೌ ತಂಡ ಸೂಪರ್ ಓವರ್‌ನಲ್ಲಿ ಮುಗ್ಗರಿಸಿತ್ತು. 156 ರನ್‌ಗಳ ಸಾಧಾರಣ ಗುರಿಯನ್ನು ಬೆನ್ನಟ್ಟುವಲ್ಲಿ ವಿಫಲವಾದ ಎಲ್‌ಎಸ್‌ಜಿ, ಈ ಆವೃತ್ತಿಯಲ್ಲಿ ಸತತ ಐದನೇ ಸೋಲು ಕಂಡಿದೆ. ಅಷ್ಟೇ ಅಲ್ಲದೆ, ಕಳೆದ ವರ್ಷದಿಂದ ಪಂತ್ ನಾಯಕತ್ವದಲ್ಲಿ ಆಡಿದ 22 ಪಂದ್ಯಗಳಲ್ಲಿ ಲಖನೌ ಬರೋಬ್ಬರಿ 14ರಲ್ಲಿ ಸೋಲನುಭವಿಸಿದೆ. ತವರಿನ ಅಂಗಳದಲ್ಲಂತೂ ಸತತ ಎಂಟು ಪಂದ್ಯಗಳಲ್ಲಿ ಪರಾಭವಗೊಂಡಿರುವುದು ತಂಡದ ಕಳಪೆ ಫಾರ್ಮ್‌ಗೆ ಕನ್ನಡಿ ಹಿಡಿದಿದೆ.
ನಾಯಕತ್ವದ ಹೊರೆಯಿಂದ ಪಂತ್ ಮುಕ್ತರಾಗಲಿ: ವಾಸಿಂ ಜಾಫರ್
ಈ ಕುರಿತು ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ವಿಶ್ಲೇಷಣೆ ಮಾಡಿರುವ ಟೀಮ್ ಇಂಡಿಯಾದ ಮಾಜಿ ಆರಂಭಿಕ ಬ್ಯಾಟರ್ ವಾಸಿಂ ಜಾಫರ್, ತಂಡದಲ್ಲಿ ನಾಯಕತ್ವ ಬದಲಾವಣೆಯ ತುರ್ತು ಅಗತ್ಯವಿದೆ ಎಂದಿದ್ದಾರೆ. “ರಿಷಭ್ ಪಂತ್ ಓರ್ವ ಸಾಮಾನ್ಯ ಆಟಗಾರನಾಗಿ (ಬ್ಯಾಟರ್) ಮಾತ್ರ ಕಣಕ್ಕಿಳಿಯಬೇಕು ಎಂದು ನಾನು ಭಾವಿಸುತ್ತೇನೆ. ನಾಯಕತ್ವದ ಹೊರೆಯಿಲ್ಲದೆ, ಯಾವುದೇ ಅಂಜಿಕೆಯಿಲ್ಲದೆ ಆಡಲು ಬಿಟ್ಟಾಗ ಮಾತ್ರ ಅವರಿಂದ ಅತ್ಯುತ್ತಮ ಆಟ ಹೊರಹೊಮ್ಮಲು ಸಾಧ್ಯ. ಅವರು ಏಕಾಂಗಿಯಾಗಿ ಪಂದ್ಯವನ್ನು ಗೆಲ್ಲಿಸಿಕೊಡಬಲ್ಲ ಸಾಮರ್ಥ್ಯ ಹೊಂದಿದ್ದಾರೆ. ಹೀಗಾಗಿ, ನಾಯಕತ್ವದ ಜವಾಬ್ದಾರಿಯನ್ನು ಅವರ ಮೇಲೆ ಹೊರಿಸುವುದು ಬೇಡ” ಎಂದು ಜಾಫರ್ ಕಿವಿಮಾತು ಹೇಳಿದ್ದಾರೆ.
ಇದನ್ನು ಓದಿದ್ದೀರಾ? ‘ನನ್ನ ದೇಶಕ್ಕಾಗಿ ಆಡುವೆ, ಬೇರಾರಿಗಲ್ಲ’: ಭಾರತ-ಆಸ್ಟ್ರೇಲಿಯಾ ಪೌರತ್ವದ ಅವಕಾಶ ತಿರಸ್ಕರಿಸಿದ್ದ ರಶೀದ್
ನಾಯಕತ್ವದ ಒತ್ತಡ ಪಂತ್ ಅವರ ಬ್ಯಾಟಿಂಗ್ ಮೇಲೂ ಸ್ಪಷ್ಟವಾಗಿ ಪರಿಣಾಮ ಬೀರಿದೆ ಎನ್ನುವುದು ಅಂಕಿ-ಅಂಶಗಳಿಂದ ಸಾಬೀತಾಗಿದೆ. ಕಳೆದ ಆವೃತ್ತಿಯಿಂದ ಈಚೆಗೆ 21 ಇನಿಂಗ್ಸ್‌ಗಳಲ್ಲಿ ಬ್ಯಾಟ್ ಬೀಸಿರುವ ಅವರು ಕೇವಲ 3 ಅರ್ಧಶತಕಗಳೊಂದಿಗೆ 458 ರನ್ ಮಾತ್ರ ಕಲೆಹಾಕಿದ್ದಾರೆ. ಕೆಕೆಆರ್ ವಿರುದ್ಧದ ಇತ್ತೀಚಿನ ಪಂದ್ಯದಲ್ಲಿ ಅವರು 42 ರನ್ ಗಳಿಸಿದರಾದರೂ, ಅದು ತಂಡವನ್ನು ಗೆಲುವಿನ ದಡ ಸೇರಿಸಲು ಸಾಕಾಗಲಿಲ್ಲ. ಅವರ ನೈಜ ಆಕ್ರಮಣಕಾರಿ ಆಟಕ್ಕೆ ಈ ಜವಾಬ್ದಾರಿ ಅಡ್ಡಿಯಾಗುತ್ತಿದೆ ಎಂದು ಜಾಫರ್ ವಿಶ್ಲೇಷಿಸಿದ್ದಾರೆ.
ಮಾರ್ಕ್ರಮ್‌ಗೆ ನಾಯಕತ್ವ ನೀಡಲು ಸಲಹೆ
ಪಂತ್ ಬದಲಿಗೆ ದಕ್ಷಿಣ ಆಫ್ರಿಕಾದ ಏಡೆನ್ ಮಾರ್ಕ್ರಮ್ ಅವರನ್ನು ಲಖನೌ ತಂಡದ ನೂತನ ನಾಯಕನನ್ನಾಗಿ ನೇಮಿಸುವುದು ಸೂಕ್ತ ಎಂದು ಜಾಫರ್ ಸಲಹೆ ನೀಡಿದ್ದಾರೆ. “ಏಡೆನ್ ಮಾರ್ಕ್ರಮ್ ಒಬ್ಬ ಅತ್ಯುತ್ತಮ ನಾಯಕ. ಅವರು ದಕ್ಷಿಣ ಆಫ್ರಿಕಾ ತಂಡವನ್ನು ಅತ್ಯಂತ ಯಶಸ್ವಿಯಾಗಿ ಮುನ್ನಡೆಸಿದ್ದಾರೆ. ಮಾನಸಿಕವಾಗಿ ಬಲಿಷ್ಠವಾಗಿರುವ ಮತ್ತು ಸದಾ ಸಂಯಮದಿಂದ ವರ್ತಿಸುವ ಅವರು, ಉಳಿದ ಆಟಗಾರರಿಂದ ಉತ್ತಮ ಪ್ರದರ್ಶನವನ್ನು ಹೊರತೆಗೆಯಬಲ್ಲರು. ಒಂದು ವೇಳೆ ನಾನು ಲಖನೌ ತಂಡದ ಡಗೌಟ್‌ನಲ್ಲಿರುತ್ತಿದ್ದರೆ, ಮೊದಲ ಕೆಲಸವಾಗಿ ಮಾರ್ಕ್ರಮ್‌ಗೆ ನಾಯಕತ್ವ ನೀಡುತ್ತಿದ್ದೆ” ಎಂದು ಅವರು ವಿವರಿಸಿದ್ದಾರೆ.
“ಸದ್ಯ ಲಖನೌ ತಂಡ ಸಂಪೂರ್ಣವಾಗಿ ದಾರಿ ತಪ್ಪಿದಂತೆ ಕಾಣುತ್ತಿದೆ. ಅವರಿಂದ ಏನನ್ನು ನಿರೀಕ್ಷಿಸಬೇಕು ಎಂಬುದೇ ತಿಳಿಯುತ್ತಿಲ್ಲ” ಎಂದಿರುವ ಜಾಫರ್, ತಂಡದ ಬ್ಯಾಟಿಂಗ್ ಕ್ರಮಾಂಕದಲ್ಲೂ ಮಹತ್ವದ ಬದಲಾವಣೆಗಳನ್ನು ಸೂಚಿಸಿದ್ದಾರೆ. ಮಾರ್ಕ್ರಮ್ ಮತ್ತು ಮಿಚೆಲ್ ಮಾರ್ಷ್ ಇನಿಂಗ್ಸ್ ಆರಂಭಿಸಬೇಕು, ಮೂರನೇ ಕ್ರಮಾಂಕದಲ್ಲಿ ನಿಕೋಲಸ್ ಪೂರನ್, ನಾಲ್ಕನೇ ಕ್ರಮಾಂಕದಲ್ಲಿ ರಿಷಭ್ ಪಂತ್ ಮತ್ತು ಐದನೇ ಕ್ರಮಾಂಕದಲ್ಲಿ ಆಯುಷ್ ಬದೋನಿ ಆಡಬೇಕು. ಬಳಿಕ ಆರನೇ ಕ್ರಮಾಂಕದಲ್ಲಿ ಅಬ್ದುಲ್ ಸಮದ್ ಮತ್ತು ಏಳನೇ ಕ್ರಮಾಂಕದಲ್ಲಿ ಮುಕುಲ್ ಚೌಧರಿ ಕಣಕ್ಕಿಳಿಯಬೇಕು ಎಂಬುದು ಅವರ ಖಚಿತ ಸಲಹೆಯಾಗಿದೆ. ತಂಡವು ಗೆಲುವಿನ ಲಯಕ್ಕೆ ಮರಳಲು ಇಂತಹ ಕಠಿಣ ನಿರ್ಧಾರಗಳ ಅಗತ್ಯವಿದೆ ಎಂದು ಅವರು ಪ್ರತಿಪಾದಿಸಿದ್ದಾರೆ.
