ತಮ್ಮ ತಂದೆ ಯೋಗರಾಜ್ ಸಿಂಗ್ ಅವರು ವರ್ಷಗಳಿಂದ ನೀಡುತ್ತಿರುವ ವಿವಾದಾತ್ಮಕ ಹೇಳಿಕೆಗಳಿಗಾಗಿ ಭಾರತದ ಸ್ಟಾರ್ ಆಟಗಾರ, ಎರಡು ಬಾರಿಯ ವಿಶ್ವಕಪ್ ವಿಜೇತ ಯುವರಾಜ್ ಸಿಂಗ್ ಅವರು ಭಾರತಕ್ಕೆ ಏಕದಿನ ವಿಶ್ವಕಪ್ ತಂದುಕೊಟ್ಟಿರುವ ಏಕೈಕ ನಾಯಕರಾದ ಕಪಿಲ್ ದೇವ್ ಮತ್ತು ಎಂ.ಎಸ್. ಧೋನಿ ಅವರಲ್ಲಿ ಕ್ಷಮೆಯಾಚಿಸಿದ್ದಾರೆ ಎಂದು ಇಂಡಿಯಾ ಟುಡೆ ವರದಿ ಮಾಡಿದೆ.
‘ಸ್ಪೋರ್ಟ್ಸ್ ತಕ್’ ಬಿಡುಗಡೆ ಮಾಡಿರುವ ವಿಡಿಯೊ ಟೀಸರ್‌ನಲ್ಲಿ ಈ ಬಗ್ಗೆ ಮಾತನಾಡಿರುವ ಯುವರಾಜ್, “ನಾನು ಕಪಿಲ್ ದೇವ್ ಮತ್ತು ಎಂ.ಎಸ್. ಧೋನಿ ಅವರಲ್ಲಿ ಕ್ಷಮೆಯಾಚಿಸಲು ಬಯಸುತ್ತೇನೆ,” ಎಂದು ಹೇಳಿದ್ದಾರೆ.
ತಮ್ಮ ಪುತ್ರನನ್ನು ಭಾರತ ತಂಡದಿಂದ ಕೈಬಿಡಲು ಧೋನಿ ಅವರೇ ಕಾರಣ ಎಂದು ಆರೋಪಿಸುತ್ತಿದ್ದ ಯೋಗರಾಜ್ ಸಿಂಗ್, ಹಲವು ವರ್ಷಗಳಿಂದ ಧೋನಿ ಅವರನ್ನು ಗುರಿಯಾಗಿಸಿಕೊಂಡು ಟೀಕಿಸುತ್ತಿದ್ದರು. ಅವರ ಈ ಟೀಕೆಗಳು ಬೇರೆ ಬೇರೆ ರೂಪದಲ್ಲಿ ಪದೇ ಪದೇ ಮುನ್ನೆಲೆಗೆ ಬರುತ್ತಿದ್ದವು. ಆದರೆ, ಈ ವಿವಾದಗಳಿಂದ ಬಹುಪಾಲು ಅಂತರ ಕಾಯ್ದುಕೊಂಡಿದ್ದ ಯುವರಾಜ್, ತಮ್ಮ ತಂದೆಯ ಹೇಳಿಕೆಗಳಿಗೆ ಸಾರ್ವಜನಿಕವಾಗಿ ಯಾವುದೇ ಪ್ರತಿಕ್ರಿಯೆ ನೀಡಿರಲಿಲ್ಲ. ಇದೀಗ ಅದೇ ಟೀಸರ್‌ನಲ್ಲಿ ಈ ಬಗ್ಗೆ ಪ್ರತಿಕ್ರಿಯಿಸಿರುವ ಅವರು, “ಹೀಗೆ ಮಾಡುವುದು ಸರಿಯಲ್ಲ ಎಂದು ನಾನು ಅಪ್ಪನಿಗೆ ಹೇಳಿದ್ದೇನೆ,” ಎಂದು ತಿಳಿಸುವ ಮೂಲಕ ತಂದೆಯ ಹೇಳಿಕೆಗಳ ಬಗ್ಗೆ ತಮ್ಮ ಅಸಮಾಧಾನವನ್ನು ಹೊರಹಾಕಿದ್ದಾರೆ.
ಬಹುಕಾಲದ ನಂತರ ಯುವರಾಜ್ ಸಿಂಗ್ ಭಾಗವಹಿಸಿರುವ ವಿವರವಾದ ಪಾಡ್‌ಕಾಸ್ಟ್ ಸಂಚಿಕೆ ಇದಾಗಿದ್ದು, ಶೀಘ್ರದಲ್ಲೇ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಎರಡು ನಿಮಿಷಗಳ ಟೀಸರ್‌ನಲ್ಲಿ ಅವರು ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಸಂಜು ಸ್ಯಾಮ್ಸನ್, ಅಭಿಷೇಕ್ ಶರ್ಮಾ, ರಿಷಭ್ ಪಂತ್ ಮತ್ತು ಹದಿಹರೆಯದ ಪ್ರತಿಭೆ ವೈಭವ್ ಸೂರ್ಯವಂಶಿ ಸೇರಿದಂತೆ ಕ್ರಿಕೆಟ್‌ನ ಹಲವು ವಿಷಯಗಳ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಕಪಿಲ್ ಕೊಲ್ಲಲು ಹೋಗಿದ್ದೆ ಎಂದಿದ್ದ ಯೋಗರಾಜ್
ಧೋನಿ ವಿರುದ್ಧದ ಯೋಗರಾಜ್ ಅವರ ಟೀಕೆಗಳು ಜಗಜ್ಜಾಹೀರಾಗಿದ್ದರೂ, ಕಳೆದ ವರ್ಷ ಅವರು ಮಾಜಿ ನಾಯಕ ಕಪಿಲ್ ದೇವ್ ವಿರುದ್ಧವೂ ಗಂಭೀರ ಆರೋಪಗಳನ್ನು ಮಾಡುವ ಮೂಲಕ ವಿವಾದ ಸೃಷ್ಟಿಸಿದ್ದರು. 1980ರ ದಶಕದಲ್ಲಿ ಕಪಿಲ್ ತಮ್ಮ ವೃತ್ತಿಜೀವನವನ್ನು ಹಾಳುಮಾಡಿದ್ದರು ಮತ್ತು ತಮಗೆ ಬೆದರಿಕೆ ಹಾಕಿದ್ದರು ಎಂದು ಯೋಗರಾಜ್ ಆರೋಪಿಸಿದ್ದರು. ಅಲ್ಲದೆ, ಕಪಿಲ್ ಅವರನ್ನು ಎದುರಿಸಲು ಒಮ್ಮೆ ಪಿಸ್ತೂಲ್ ಹಿಡಿದು ಅವರ ಮನೆಗೆ ಹೋಗಿದ್ದಾಗಿಯೂ ಹೇಳಿಕೊಂಡಿದ್ದರು. ಈ ಆರೋಪಗಳು ವ್ಯಾಪಕ ಚರ್ಚೆಗೆ ಗ್ರಾಸವಾಗಿದ್ದರೂ, ಕಪಿಲ್ ದೇವ್ ಮಾತ್ರ ನೇರವಾಗಿ ಯಾವುದೇ ಪ್ರತಿಕ್ರಿಯೆ ನೀಡದೆ ಮೌನ ವಹಿಸಿದ್ದರು.
ಇದನ್ನು ಓದಿದ್ದೀರಾ? ‘ಮೈಬಣ್ಣದ ಕಾರಣಕ್ಕೆ ನನ್ನನ್ನು ಕಡೆಗಣಿಸಿದರು’- ಕಹಿ ನೆನಪುಗಳನ್ನು ಬಿಚ್ಚಿಟ್ಟ ಮಾಜಿ ಲೆಗ್ ಸ್ಪಿನ್ನರ್ ಶಿವರಾಮಕೃಷ್ಣನ್
ಕಪಿಲ್ ಯುಗದಲ್ಲಿ ಭಾರತೀಯ ತಂಡದಿಂದ ತಮ್ಮನ್ನು ಕೈಬಿಟ್ಟಿದ್ದರ ಬಗ್ಗೆ ಯೋಗರಾಜ್ ಸಿಂಗ್ ದೀರ್ಘಕಾಲದ ಅಸಮಾಧಾನ ಹೊಂದಿದ್ದಾರೆ. ನಾಲ್ಕು ದಶಕಗಳ ಹಿಂದಿನ ಘಟನೆಯನ್ನು ಮತ್ತೆ ಕೆದಕಿದ್ದು ಮಾಜಿ ಸಹ-ಆಟಗಾರರೊಂದಿಗೆ ಅವರ ಹಳಸಿದ ಸಂಬಂಧವನ್ನು ಮತ್ತೊಮ್ಮೆ ಬೆಳಕಿಗೆ ತಂದಿತ್ತು.
ಧೋನಿ ಬಗೆಗಿನ ನಿಲುವಿನಲ್ಲಿ ಬದಲಾವಣೆ
ಆದರೆ, ಇತ್ತೀಚಿನ ದಿನಗಳಲ್ಲಿ ಧೋನಿ ಕುರಿತಾದ ಯೋಗರಾಜ್ ನಿಲುವಿನಲ್ಲಿ ಕೊಂಚ ಬದಲಾವಣೆಯಾಗಿದೆ. “ನಾನು ಧೋನಿಯನ್ನು ಆರಾಧಿಸುತ್ತೇನೆ ಮತ್ತು ಅವರು ಸಾಧ್ಯವಾದಷ್ಟು ಕಾಲ ಆಡುವುದನ್ನು ಮುಂದುವರಿಸಬೇಕು,” ಎಂದು ಯೋಗರಾಜ್ ಇತ್ತೀಚೆಗೆ ಹೇಳಿಕೆ ನೀಡಿದ್ದರು. ಯುವರಾಜ್ ಅವರನ್ನು ಕೈಬಿಟ್ಟಿದ್ದು ಧೋನಿಯವರ ಒತ್ತಾಯದ ಮೇರೆಗಲ್ಲ; ಬದಲಾಗಿ ತಂಡಕ್ಕೆ ಅವರ ಅಗತ್ಯವಿಲ್ಲದ ಕಾರಣ ಆಯ್ಕೆಗಾರರೇ ಆ ನಿರ್ಧಾರ ತೆಗೆದುಕೊಂಡಿದ್ದರು ಎಂದು ಮಾಜಿ ಮುಖ್ಯ ಆಯ್ಕೆಗಾರ ಸಂದೀಪ್ ಪಾಟೀಲ್ ಸ್ಪಷ್ಟಪಡಿಸಿದ ನಂತರ ಯೋಗರಾಜ್ ಅವರ ಈ ಬದಲಾವಣೆ ಕಂಡುಬಂದಿದೆ.
2017ರಲ್ಲಿ ತಂಡಕ್ಕೆ ಮರಳಿದಾಗ ತಮ್ಮ ಪಾತ್ರದ ಬಗ್ಗೆ ಸ್ಪಷ್ಟನೆ ನೀಡಿದ್ದು ಧೋನಿ ಎಂದು ಸ್ವತಃ ಯುವರಾಜ್ ಈ ಹಿಂದೆ ಬಹಿರಂಗಪಡಿಸಿದ್ದರು. ಟೀಮ್ ಮ್ಯಾನೇಜ್‌ಮೆಂಟ್ ಭವಿಷ್ಯದ ಯೋಜನೆಗಳಲ್ಲಿ ತಮ್ಮನ್ನು ಪರಿಗಣಿಸುತ್ತಿಲ್ಲ ಎಂದು ಮಾಜಿ ನಾಯಕ ಧೋನಿ ತಮಗೆ ಸ್ಪಷ್ಟವಾಗಿ ತಿಳಿಸಿದ್ದರು. ಈ ಮಾತುಕತೆಯೇ ಯುವರಾಜ್ ತಮ್ಮ ವಾಸ್ತವ ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳಲು ನೆರವಾದರಲ್ಲದೆ, 2019ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳಲು ಪ್ರಮುಖ ಕಾರಣವಾಗಿತ್ತು.
