ಲಂಡನ್‌ನ ಓವಲ್‌ನಲ್ಲಿ ನಡೆಯುತ್ತಿರುವ ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಐದನೇ ಟೆಸ್ಟ್ ಪಂದ್ಯದ ಎರಡನೇ ದಿನದ ಮೊದಲ ಸೆಷನ್‌ನಲ್ಲಿ ಭಾರತದ ಮೊದಲ ಇನಿಂಗ್ಸ್‌ನಲ್ಲಿ 224 ರನ್‌ಗಳಿಗೆ ಆಲೌಟ್ ಆಗಿದೆ.
ಇಂಗ್ಲೆಂಡ್‌ನ ಬಿಗುವಿನ ಬೌಲಿಂಗ್ ಮತ್ತು ಚುರುಕಿನ ಫೀಲ್ಡಿಂಗ್‌ನಿಂದಾಗಿ 69.4 ಓವರ್‌ಗಳಲ್ಲಿ ತಂಡ ಬ್ಯಾಟಿಂಗ್ ವೈಫಲ್ಯವನ್ನು ಅನುಭವಿಸಿತು. ಗುಸ್ ಆಟ್ಕಿನ್ಸನ್‌ರ ಭರ್ಜರಿ ಬೌಲಿಂಗ್ 33/5 ವಿಕೆಟ್) ಭಾರತದ ಬ್ಯಾಟರ್‌ಗಳನ್ನು ಕಟ್ಟಿ ಹಾಕಿದರು. ಜೋಶ್ ಟಂಗ್‌ ಅವರ ಮೂರು ವಿಕೆಟ್‌ಗಳು ಕೂಡ (57ಕ್ಕೆ 3) ನಿರ್ಣಾಯಕವಾದವು.
ಎರಡನೇ ದಿನದ ಆರಂಭದಲ್ಲಿ ಕರುಣ್ ನಾಯರ್ (57 ರನ್‌) ಮತ್ತು ವಾಷಿಂಗ್ಟನ್ ಸುಂದರ್ (26 ರನ್‌) ಭರವಸೆಯ ಆಟವಾಡಿದರೂ, ಇಂಗ್ಲೆಂಡ್ ಬೌಲರ್‌ಗಳ ಒತ್ತಡವನ್ನು ತಡೆಯಲು ಸಾಧ್ಯವಾಗಲಿಲ್ಲ. ನಾಯರ್ ಅವರ ಜವಾಬ್ದಾರಿಯುತ ಆಟವು ತಂಡಕ್ಕೆ ಸ್ಥಿರತೆ ತಂದಿತಾದರೂ, ಟಂಗ್‌ ಬೌಲಿಂಗ್‌ನಲ್ಲಿ ಎಲ್‌ಬಿಡಬ್ಲ್ಯೂ ಆಗಿ ವಿಕೆಟ್ ಕಳೆದುಕೊಂಡರು.
ಇದನ್ನು ಓದಿದ್ದೀರಾ? ಮೂರು ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ ಫೈನಲ್‌ಗಳಿಗೆ ಇಂಗ್ಲೆಂಡ್ ಆತಿಥ್ಯ
ಸುಂದರ್ ಕೂಡ ಆಟ್ಕಿನ್ಸನ್‌ರ ಕಿಲ್ಲರ್ ಶಾರ್ಟ್ ಎಸೆತಕ್ಕೆ ಡೀಪ್ ಸ್ಕ್ವೇರ್‌ನಲ್ಲಿ ಕ್ಯಾಚ್ ಕೊಟ್ಟು ಔಟಾದರು. ಕೊನೆಯ ಕ್ಷಣಗಳಲ್ಲಿ ಆಟ್ಕಿನ್ಸನ್‌ ಅವರು ಎರಡು ವಿಕೆಟ್‌ಗಳು ಭಾರತದ ಇನಿಂಗ್ಸ್‌ಗೆ ತೆರೆ ಎಳೆದವು, ಮೊಹಮ್ಮದ್ ಸಿರಾಜ್ ಮತ್ತು ಪ್ರಸಿದ್ಧ ಕೃಷ್ಣ ಶೂನ್ಯಕ್ಕೆ ಔಟಾದರು.
ಮೊದಲ ದಿನದಲ್ಲಿ ಭಾರತದ ಆರಂಭಿಕರಾದ ಯಶಸ್ವಿ ಜೈಸ್ವಾಲ್ (2 ರನ್‌) ಮತ್ತು ಕೆಎಲ್ ರಾಹುಲ್ (14 ರನ್‌) ಆರಂಭದಲ್ಲೇ ವಿಕೆಟ್ ಕಳೆದುಕೊಂಡಿದ್ದು ತಂಡಕ್ಕೆ ಆಘಾತವಾಯಿತು. ಸಾಯಿ ಸುದರ್ಶನ್ (38 ರನ್‌) ಮತ್ತು ಶುಭಮನ್ ಗಿಲ್ (21 ರನ್‌) ಕೆಲವು ಆಕರ್ಷಕ ಬೌಂಡರಿಗಳನ್ನು ಬಾರಿಸಿದರೂ, ಇಂಗ್ಲೆಂಡ್‌ನ ಫೀಲ್ಡರ್‌ಗಳು ರನ್‌ಔಟ್ ಮತ್ತು ಕ್ಯಾಚ್‌ಗಳ ಮೂಲಕ ಮೇಲುಗೈ ಸಾಧಿಸಿದರು.
ರವೀಂದ್ರ ಜಡೇಜ (9 ರನ್‌) ಮತ್ತು ಧ್ರುವ್ ಜುರೆಲ್ (19 ರನ್‌) ಕೂಡ ತಮ್ಮ ಆಟವನ್ನು ದೀರ್ಘಕಾಲ ಮುಂದುವರಿಸಲಿಲ್ಲ. ಇಂಗ್ಲೆಂಡ್‌ನ ಶಿಸ್ತುಬದ್ಧ ಬೌಲಿಂಗ್ ಮತ್ತು ಭಾರತದ ಬ್ಯಾಟಿಂಗ್‌ನ ಅಸ್ಥಿರತೆಯಿಂದಾಗಿ ತಂಡವು ಎರಡನೇ ದಿನದ ಮೊದಲ ಸೆಷನ್‌ನಲ್ಲೇ ಆಲೌಟ್ ಆಯಿತು.
