ಐಪಿಎಲ್ ಟೂರ್ನಿಯಲ್ಲಿ ತಮ್ಮ ಸ್ಫೋಟಕ ಬ್ಯಾಟಿಂಗ್‌ ಮೂಲಕ ಕ್ರಿಕೆಟ್ ಜಗತ್ತಿನ ಮೂಲಕ ಕ್ರಿಕೆಟ್ ಜಗತ್ತಿನ ಗಮನ ಸೆಳೆಯುತ್ತಿರುವ ಅಂಡರ್ 19 ತಂಡದ ಆಟಗಾರ ವೈಭವ್ ಸೂರ್ಯವಂಶಿ ಅವರ ಬ್ಯಾಟ್‌ನಲ್ಲಿ ‘ಎಐ ಚಿಪ್’ ಅಳವಡಿಸಲಾಗಿದೆ ಎಂದು ಪಾಕ್‌ನ ಕ್ರಿಕೆಟ್ ವಿಶ್ಲೇಷಕ ಡಾ. ನೌಮಾನ್ ನಿಯಾಜ್ ತಿಳಿಸಿದ್ದಾರೆ. ಈ ಬಗ್ಗೆ ಹಿಂದೂಸ್ತಾನ್‌ ಟೈಮ್ಸ್ ವರದಿ ಮಾಡಿದೆ.
ಆರ್‌ಆರ್‌(ರಾಜಸ್ಥಾನ್‌ ರಾಯಲ್ಸ್) ಪರ ಆಡುತ್ತಿರುವ ಕೇವಲ 15 ವರ್ಷದ ವೈಭವ್, ಶನಿವಾರ (ಏ.25) ಜೈಪುರದ ಸವಾಯ್ ಮಾನ್‌ಸಿಂಗ್‌ ಕ್ರೀಡಾಂಗಣದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ಕೇವಲ 37 ಎಸೆತಗಳಲ್ಲಿ ಶತಕ ಸಿಡಿಸಿ ಮಿಂಚಿದ್ದರು. ಇದು ಐಪಿಎಲ್‌ನಲ್ಲಿ ಅವರ ಎರಡನೇ ಶತಕವಾಗಿದೆ. ಆದರೆ ಈತನ ಆಟದ ಬಗ್ಗೆ ಪಾಕ್‌ನ ವಿಶ್ಲೇಷಕ ನಿಯಾಜ್. ಇದು ‘ನಂಬಲು ಅಸಾಧ್ಯವಾದ ಆಟ’ ಎಂದು ಹೇಳಿದ್ದು, ಅವರ ಬ್ಯಾಟ್‌ಅನ್ನು ಪ್ರಯೋಗಾಲಯದಲ್ಲಿ ಪರೀಕ್ಷಿಸುವಂತೆ ಹೇಳಿದ್ದಾರೆ.
ಪಾಕಿಸ್ತಾನದ ‘ಸ್ಮ್ಯಾಶ್ ಹಿಟ್’ (SmashHit) ಎಂಬ ಕಾರ್ಯಕ್ರಮದಲ್ಲಿ ಮಾತನಾಡಿದ ನೌಮಾನ್ ನಿಯಾಜ್, “ಒಮ್ಮೆ ಯೋಚಿಸಿ, ಈ ಹುಡುಗ ಯಾರು? ಆತನ ಬ್ಯಾಟ್ ಅನ್ನು ಪರೀಕ್ಷಿಸಿ. ವಾಡಾ (WADA) ಕ್ರೀಡಾಪಟುಗಳಿಗೆ ಡೋಪಿಂಗ್ ಪರೀಕ್ಷೆಗಳನ್ನು ನಡೆಸುವಂತೆ, ಈತನನ್ನು ಪ್ರಯೋಗಾಲಯಕ್ಕೆ (ಲ್ಯಾಬ್‌ಗೆ) ಕಳುಹಿಸಿ. ಆತ ಬಹುಶಃ ತನ್ನ ಬ್ಯಾಟ್‌ನಲ್ಲಿ ಎಐ ಚಿಪ್ ಬಳಸಿರಬಹುದು. ಇದು ಅಸಾಮಾನ್ಯವಾದದ್ದು. 18 ವರ್ಷ ವಯಸ್ಸಾದಾಗ ದೇಹದ ಸ್ನಾಯುಗಳು ಬೆಳೆಯುತ್ತವೆ, ಶಕ್ತಿ ಬರುತ್ತದೆ. ಆದರೆ ಈತನಿಗೆ ಕೇವಲ 16 ವರ್ಷ. ವಿರಾಟ್ ಕೊಹ್ಲಿ ವಿಶ್ವ ಚಾಂಪಿಯನ್ ಆಗಿದ್ದಾಗ ಈತ ಹುಟ್ಟಿದ್ದಾನೆ. ಆತನಲ್ಲಿ ತೋಳ್ಬಲಕ್ಕಿಂತ ಹೆಚ್ಚಾಗಿ ತಂತ್ರಗಾರಿಕೆ ಇದೆ. ಆತ ಮಣಿಕಟ್ಟಿನ ಆಟಗಾರನಾಗಿದ್ದು, ಮೈದಾನದ ಎಲ್ಲಾ 360 ಡಿಗ್ರಿಯಲ್ಲೂ ಚೆಂಡನ್ನು ಬಾರಿಸುತ್ತಾನೆ” ಎಂದು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ವೈಭವ್ ಸೂರ್ಯವಂಶಿ ಪ್ರಸ್ತುತ ಟೂರ್ನಿಯಲ್ಲಿ ಅತ್ಯುತ್ತಮ ಫಾರ್ಮ್‌ನಲ್ಲಿದ್ದಾರೆ. ಸನ್‌ರೈಸರ್ಸ್ ವಿರುದ್ಧದ ಪಂದ್ಯಕ್ಕೂ ಮುನ್ನ ಅವರು 0 ಮತ್ತು 8 ರನ್‌ಗಳಿಗೆ ಔಟಾಗಿ ಹಿನ್ನಡೆ ಅನುಭವಿಸಿದ್ದರು, ಹಾಗೂ ಆ ನಡುವೆ ಒಂದು ಪಂದ್ಯದಲ್ಲಿ 46 ರನ್ ಗಳಿಸಿದ್ದರು. ಆದರೆ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ತಮ್ಮ ಕಳಪೆ ಫಾರ್ಮ್ ಅನ್ನು ಮೆಟ್ಟಿಲಾಗಿ ಬಳಸಿ, 37 ಎಸೆತಗಳಲ್ಲಿ ಸ್ಫೋಟಕ ಶತಕ ಸಿಡಿಸುವ ಮೂಲಕ ವಿಮರ್ಶಕರಿಗೆ ಬ್ಯಾಟ್ ಮೂಲಕವೇ ದಿಟ್ಟ ಉತ್ತರ ನೀಡಿದ್ದಾರೆ.
ಈ ವರ್ಷದ ಜನವರಿಯಲ್ಲಿ ಅಂಡರ್-19 ವಿಶ್ವಕಪ್ ಗೆದ್ದ ಭಾರತ ತಂಡದ ಭಾಗವಾಗಿದ್ದ ವೈಭವ್, ಈಗಾಗಲೇ ಇಂಗ್ಲೆಂಡ್, ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾದಲ್ಲೂ ಶತಕಗಳನ್ನು ಸಿಡಿಸಿ ದೇಶದ ಹೆಮ್ಮೆಯಾಗಿದ್ದಾರೆ. ಆಟಗಾರನ ಯಶಸ್ಸನ್ನು ಕಂಡು ಟೀಕಿಸುವ ಬದಲು, ಅವರ ತಂತ್ರಗಾರಿಕೆಯನ್ನು ಮೆಚ್ಚಬೇಕು ಎಂದು ಭಾರತೀಯ ಕ್ರಿಕೆಟ್ ಅಭಿಮಾನಿಗಳು ಪಾಕ್ ವಿಶ್ಲೇಷಕನ ಹೇಳಿಕೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ತಿರುಗೇಟು ನೀಡುತ್ತಿದ್ದಾರೆ.
