ಡಬಲ್ ಎಂಜಿನ್ ಸರ್ಕಾರವಿದ್ದರೆ ಅಭಿವೃದ್ಧಿ ವೇಗವಾಗಿ ಸಾಗುತ್ತದೆ ಎಂಬುದು ಬಿಜೆಪಿ ನಾಯಕರು ಆಗಾಗೇ ನೀಡುವ ಹೇಳಿಕೆ. ಅದೇ ಡಬಲ್ ಇಂಜಿನ್ ಸರ್ಕಾರ ಮಧ್ಯಪ್ರದೇಶದಲ್ಲಿದೆ. ಆದರೆ ಇಲ್ಲಿ ಡಬಲ್ ಇಂಜಿನ್ ಸರ್ಕಾರದ ಎಡವಟ್ಟು ಒಂದಾದ ನಂತರ ಒಂದು ಬಹಿರಂಗವಾಗುತ್ತಿದೆ. ರಸ್ತೆಯೇ ಇಲ್ಲದೆ ಸೇತುವೆ ಮಾತ್ರ ಕಟ್ಟಿದ ಸೋಜಿಗದ ಪ್ರಕರಣವೊಂದು ಇದೇ ಡಬಲ್ ಇಂಜಿನ್ ಸರ್ಕಾರದ ಅವಧಿಯಲ್ಲಿ ವರದಿಯಾಗಿದೆ.
ಮಧ್ಯಪ್ರದೇಶದ ನರ್ಮದಾಪುರಂ ಜಿಲ್ಲೆಯ ಬಂಖೇಡಿ ಪ್ರದೇಶದ ಉಮರ್ಧಾ ಗ್ರಾಮದ ಬಳಿ ಶೇಕಡ 100ರಷ್ಟು ಕಾಮಗಾರಿ ಮುಗಿದು ನಿಂತಿರುವ ಒಂದು ಬೃಹತ್ ಸೇತುವೆ ಇದೆ. ಆದರೆ, ಆಶ್ಚರ್ಯ ಎಂದರೆ ಈ ಸೇತುವೆಯನ್ನು ತಲುಪಲು ಎರಡೂ ಕಡೆಯೂ ಸಂಪರ್ಕ ರಸ್ತೆಗಳೇ ಇಲ್ಲ! ₹8.86 ಕೋಟಿ ಸಾರ್ವಜನಿಕ ತೆರಿಗೆ ಹಣವನ್ನು ವೆಚ್ಚ ಮಾಡಿ ಕಟ್ಟಲಾದ 308 ಮೀಟರ್ ಉದ್ದದ ಈ ಸೇತುವೆ, ಇಂದು ಯಾರಿಗೂ ಉಪಯೋಗವಿಲ್ಲದೆ ನಿಂತಿದೆ.
ಮಧ್ಯಪ್ರದೇಶದ ನರ್ಮದಾಪುರಂ ಮತ್ತು ನರಸಿಂಗ್‌ಪುರ ಜಿಲ್ಲೆಗಳ ಗಡಿಯಲ್ಲಿ ಹರಿಯುವ ದೂಧಿ ನದಿಗೆ ಅಡ್ಡಲಾಗಿ ಈ ಸೇತುವೆಯನ್ನು ನಿರ್ಮಿಸಲಾಗಿದೆ. 2023ರ ಡಿಸೆಂಬರ್ ವೇಳೆಗೆ ಸೇತುವೆ ನಿರ್ಮಾಣ ಕಾರ್ಯ ಸಂಪೂರ್ಣಗೊಂಡಿತ್ತು. ಅಂದಾಜು ₹8.86 ಕೋಟಿ ವೆಚ್ಚವಾಗಿದೆ. ಈ ಸೇತುವೆ ಸಿದ್ಧಗೊಂಡಿದ್ದರೆ ನರ್ಮದಾಪುರಂ ಮತ್ತು ನರಸಿಂಗ್‌ಪುರ ಜಿಲ್ಲೆಗಳ ಅಂದಾಜು 40 ರಿಂದ 50 ಹಳ್ಳಿಗಳ ಸಾವಿರಾರು ಜನರಿಗೆ ಸಾರಿಗೆ ಸಂಪರ್ಕ ಸುಲಭವಾಗುತ್ತಿತ್ತು.
ಇದನ್ನೂ ಓದಿ: ಡಬಲ್ ಇಂಜಿನ್ ಸರ್ಕಾರದಿಂದ ‘ಡಬಲ್ ಅನ್ಯಾಯ’ – ರಾಹುಲ್ ಗಾಂಧಿ
ಸೇತುವೆ ನಿರ್ಮಾಣವಾಗಿ ವರ್ಷಗಳೇ ಕಳೆದರೂ, ಇದರ ಎರಡೂ ಬದಿಗಳಿಗೆ ಸಂಪರ್ಕ ಕಲ್ಪಿಸುವ ಲಿಂಕ್ ರಸ್ತೆಗಳು ಇಂದಿಗೂ ನಿರ್ಮಾಣವಾಗಿಲ್ಲ. ನರಸಿಂಗ್‌ಪುರ ಭಾಗದಲ್ಲಿ ಸುಮಾರು 1.2 ಕಿಲೋಮೀಟರ್ ಉದ್ದದ ರಸ್ತೆ ನಿರ್ಮಾಣ ಅಪೂರ್ಣವಾಗಿದ್ದರೆ, ಇನ್ನೊಂದು ಬದಿಯಲ್ಲಿಯೂ ರಸ್ತೆಯ ಸುಳಿವೇ ಇಲ್ಲ.
ಹೊಣೆಗಾರಿಕೆಯಿಂದ ನುಣುಚಿಕೊಳ್ಳುತ್ತಿರುವ ಸರ್ಕಾರ
ಸಾರ್ವಜನಿಕರ ಹಣ ಹೀಗೆ ಪೋಲಾಗುತ್ತಿರುವುದರ ಕುರಿತು ಅಧಿಕಾರಶಾಹಿಯನ್ನು ಪ್ರಶ್ನಿಸಿದರೆ, ಇಲಾಖೆಗಳು ಪರಸ್ಪರ ಹೊಣೆಗಾರಿಕೆಯಿಂದ ನುಣುಚಿಕೊಳ್ಳುತ್ತಿವೆ. “ನಮ್ಮ ವಿಭಾಗಕ್ಕೆ ನೀಡಲಾಗಿದ್ದ ಸೇತುವೆ ಕಾಮಗಾರಿ ಮತ್ತು ಸೇತುವೆಯ ಎರಡೂ ಕಡೆ ತಲಾ 50ರಿಂದ 100 ಮೀಟರ್‌ಗಳಷ್ಟು ರಸ್ತೆಯನ್ನು ನಾವು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದೇವೆ. ನದಿಯ ಎರಡೂ ದಂಡೆಗಳಿಂದ ಮುಂದೆ ಉಳಿದಿರುವ ಸುದೀರ್ಘ ಲಿಂಕ್ ರಸ್ತೆಗಳನ್ನು ನಿರ್ಮಿಸುವುದು ಬೇರೆ ಇಲಾಖೆಯ ಕೆಲಸ. ಯಾವ ಇಲಾಖೆಗೆ ಈ ಕಾಮಗಾರಿ ವಹಿಸಬೇಕು ಎಂಬುದನ್ನು ಸರ್ಕಾರ ನಿರ್ಧರಿಸಬೇಕಿದೆ. ನಾವು ಈಗಾಗಲೇ ವಿವರವಾದ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಿದ್ದೇವೆ” ಎಂದು ಸ್ಪಷ್ಟಪಡಿಸಿದ್ದಾರೆ.
ಸೇತುವೆ ಕಟ್ಟಿದ ಇಲಾಖೆಗೆ ಲಿಂಕ್ ರಸ್ತೆ ನಿರ್ಮಿಸುವ ಹೊಣೆ ಇಲ್ಲದಿರುವುದು ಮತ್ತು ಯಾವ ಇಲಾಖೆಗೆ ರಸ್ತೆ ನಿರ್ಮಾಣ ಬಾಕಿ ಇದೆ ಎಂದು ನಿರ್ಧರಿಸಲು ಸರ್ಕಾರಕ್ಕೆ ಮೂರು ವರ್ಷಗಳ ಸಮಯವೂ ಸಾಲದಿರುವುದು ಯೋಜನಾ ಯೋಜನೆಯಲ್ಲಿನ ಕಳಪೆ ವ್ಯವಸ್ಥೆಯನ್ನು ಬಹಿರಂಗಪಡಿಸಿದೆ.
ಡಬಲ್ ಎಂಜಿನ್ ಸರ್ಕಾರದ ಮೇಲಿನ ಪ್ರಶ್ನೆ
ಕೇಂದ್ರ ಮತ್ತು ರಾಜ್ಯ ಎರಡರಲ್ಲೂ ಒಂದೇ ಪಕ್ಷದ ಸರ್ಕಾರವಿದ್ದಾಗ (ಡಬಲ್ ಎಂಜಿನ್ ಸರ್ಕಾರ) ಯೋಜನಾ ಅನುಮೋದನೆ, ಹಣಕಾಸು ಬಿಡುಗಡೆ ಹಾಗೂ ಇಲಾಖೆಗಳ ನಡುವಿನ ಸಮನ್ವಯ ಅತ್ಯಂತ ವೇಗವಾಗಿ ನಡೆಯುತ್ತದೆ ಎಂದು ಹೇಳಲಾಗುತ್ತದೆ. ಆದರೆ ಈ ಪ್ರಕರಣವು ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ಸೇತುವೆಗೆ ಅನುಮೋದನೆ ನೀಡುವಾಗ ಅದಕ್ಕೆ ಬೇಕಾದ ಲಿಂಕ್ ರಸ್ತೆಗಳ ಯೋಜನೆ ಮತ್ತು ಬಜೆಟ್ ಅನ್ನು ಏಕೆ ಒಟ್ಟಿಗೆ ಸೇರಿಸಲಿಲ್ಲ? ಸೇತುವೆ ನಿರ್ಮಾಣ ವಿಭಾಗ, ಲೋಕೋಪಯೋಗಿ ಇಲಾಖೆ (PWD) ಮತ್ತು ಗ್ರಾಮೀಣ ಅಭಿವೃದ್ಧಿ ಇಲಾಖೆಗಳ ನಡುವೆ ಸಮನ್ವಯ ಸಾಧಿಸಲು ಸರ್ಕಾರ ಏಕೆ ವಿಫಲವಾಯಿತು? ಜನರಿಗೆ ತಕ್ಷಣಕ್ಕೆ ತಲುಪದ ಯೋಜನೆಯಲ್ಲಿ ಕೋಟ್ಯಂತರ ರೂಪಾಯಿ ಹೂಡಿಕೆ ಮಾಡಿ, ಮೂರು ವರ್ಷಗಳ ಕಾಲ ಅದನ್ನು ವ್ಯರ್ಥವಾಗಿ ಬಿಟ್ಟಿರುವುದು ಆಡಳಿತಾತ್ಮಕ ಉಸ್ತುವಾರಿಯ ವೈಫಲ್ಯವಲ್ಲವೇ ಎಂಬ ಪ್ರಶ್ನೆಯನ್ನು ನೆಟ್ಟಿಗರು ಎತ್ತಿದ್ದಾರೆ.
