ದೈತ್ಯ ಇ-ಕಾಮರ್ಸ್ ಪ್ಲಾಟ್‌ಫಾರ್ಮ್ ‘ಅಮೆಜಾನ್’ ತನ್ನಲ್ಲಿನ ಕಾರ್ಪೊರೇಟ್‌ ಉದ್ಯೋಗಗಳನ್ನು ಕಡಿತಗೊಳಿಸುತ್ತಿದೆ. ಈ ಹಿಂದೆ, 2025ರ ಅಕ್ಟೋಬರ್‌ನಲ್ಲಿ 14,000 ಉದ್ಯೋಗಿಗಳನ್ನು ಹೊರಹಾಕಿದ್ದ ಸಂಸ್ಥೆ, ಇದೀಗ 2ನೇ ಸುತ್ತಿನ ಉದ್ಯೋಗ ಕಡಿತಕ್ಕೆ ಯೋಜಿಸುತ್ತಿದೆ. ಈ ಬಾರಿ, ಸುಮಾರು 30,000 ಉದ್ಯೋಗ ಕಡಿತವಾಗುವ ನಿರೀಕ್ಷೆಯಿದ್ದು, ಈ ಪೈಕಿ, ಸುಮಾರು 1,000 ಮಂದಿ ಭಾರತೀಯ ಉದ್ಯೋಗಿಗಳು ತಮ್ಮ ಉದ್ಯೋಗ ಕಳೆದುಕೊಳ್ಳುವ ಸಾಧ್ಯತೆ ಇದೆ.
ಅಮೆಜಾನ್ ಕಂಪನಿಯು ಕಂಪನಿಯು ಸುಮಾರು 5-6 ಲಕ್ಷ ಉದ್ಯೋಗಗಳನ್ನು ರೊಬೋಟ್‌ಗಳೊಂದಿಗೆ ಮರುಹೊಂದಾಣಿಕೆ ಮಾಡುವುದಾಗಿ ಘೋಷಿಸಿದೆ. ಅದರ ಭಾಗವಾಗಿ 2025ರಲ್ಲಿ, ಅಮೆಜಾನ್ ತನ್ನ 14,000 ವೈಟ್-ಕಾಲರ್ ಉದ್ಯೋಗಗಳನ್ನೂ ಕಡಿತಗೊಳಿಸಿತ್ತು. ಆಗ, ಸುಮಾರು 1,000 ಮಂದಿ ಭಾರತೀಯರು ಉದ್ಯೋಗ ಕಳೆದುಕೊಂಡಿದ್ದರು.
ಮೂಲಗಳ ಪ್ರಕಾರ, ಈ ತಿಂಗಳ (ಜನವರಿ) 27-28ರೊಳಗೆ ಉದ್ಯೋಗ ಕಡಿತವನ್ನು ಘೋಷಿಸುವ ಸಾಧ್ಯತೆಯಿದೆ. ಕಂಪನಿಯ ಅಮೆಜಾನ್ ವೆಬ್ ಸೇವೆಗಳು, ಚಿಲ್ಲರೆ ವ್ಯಾಪಾರ, ಪ್ರೈಮ್ ವಿಡಿಯೋ, ಮಾನವ ಸಂಪನ್ಮೂಲ, ಪೀಪಲ್ ಎಕ್ಸ್‌ಪೀರಿಯೆನ್ಸ್ ಹಾಗೂ ಟೆಕ್ನಾಲಜಿ ಘಟಕಗಳಲ್ಲಿ ಉದ್ಯೋಗಗಳು ಕಡಿತವಾಗಲಿವೆ ಎಂದು ಹೇಳಲಾಗಿದೆ.
ಅಮೆಜಾನ್‌ನಲ್ಲಿ ಸುಮಾರು 15.8 ಲಕ್ಷ ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದಾರೆ. ಅವರಲ್ಲಿ, ಈಗ 30,000 ಉದ್ಯೋಗಿಗಳು ಕೆಲಸ ಕಳೆದುಕೊಳ್ಳಲಿದ್ದಾರೆ. ಅಮೆಜಾನ್‌ನ ಹೆಚ್ಚಿನ ನೌಕರರು ಪೂರೈಕೆ ಕೇಂದ್ರಗಳು ಮತ್ತು ಗೋದಾಮುಗಳಲ್ಲಿ ಕೆಲಸ ಮಾಡುತ್ತಿದ್ದಾರೆ.
