ಸಾಮಾಜಿಕ ಜಾಲತಾಣದಲ್ಲಿ ಚಿತ್ರವೊಂದು ಭಾರೀ ವೈರಲ್ ಆಗುತ್ತಿದೆ. ಅದರಲ್ಲಿ, ಕೆನಡಾದ ಟೊರೊಂಟೊ ನಗರದ ಬೀದಿಯೊಂದರಲ್ಲಿ 68 ವರ್ಷದ ವೃದ್ಧರೊಬ್ಬರು ಅಲ್ಲಿನ ರಾಷ್ಟ್ರಧ್ವಜದೊಂದಿಗೆ ಅತ್ಯಂತ ಸಡಗರದಿಂದ ಫೋಟೋಗೆ ಫೋಸ್ ನೀಡಿದ್ದಾರೆ. ಕಳೆದ ಒಂದೂವರೆ ದಿನದಿಂದ ಕಣ್ಣಿಗೆ ನಿದ್ದೆಯಿಲ್ಲದಿದ್ದರೂ ಅವರ ಮುಖದಲ್ಲಿ ಸುಸ್ತಿನ ಬದಲು, ದಶಕಗಳ ಸುದೀರ್ಘ ಹೋರಾಟ ಮತ್ತು ಜೈಲು ವಾಸದ ನಂತರ ಸಿಕ್ಕ ಸ್ವಾತಂತ್ರ್ಯದ ನಿರಾಳತೆ ಎದ್ದು ಕಾಣುತ್ತಿದೆ. ಆ ವೃದ್ಧನ ಹೆಸರು ‘ಡಾಂಗ್ ಗುವಾಂಗ್ಪಿಂಗ್’.
‘ಡಾಂಗ್ ಗುವಾಂಗ್ಪಿಂಗ್’ ಅವರು ಚೀನಾದಲ್ಲಿ ಪೊಲೀಸ್ ಅಧಿಕಾರಿಯಾಗಿದ್ದರು. ಆದರೆ, ಚೀನಾ ಸರ್ಕಾರದ ಹಲವು ನೀತಿ-ಧೋರಣೆಗಳ ವಿರುದ್ಧ ಧ್ವನಿ ಎತ್ತಿ, ಹೋರಾಟ ನಡೆಸಿದ್ದರು. ಅದಕ್ಕಾಗಿ ಜೈಲು ಶಿಕ್ಷೆಯನ್ನು ಅನುಭವಿಸಿದ್ದರು. ಚೀನಾದಲ್ಲಿ ತಮಗೆ ಉಳಿಗಾಲವಿಲ್ಲವೆಂದು ಅರಿತ ಅವರು, ಜೀವ ಉಳಿಸಿಕೊಳ್ಳಲು ಕೇವಲ ಒಂದು ಸಣ್ಣ ರಬ್ಬರ್ ಬೋಟ್ನಲ್ಲಿ ಸಮುದ್ರ ದಾಟಿ ಬಂದಿದ್ದಾರೆ. “ನನಗೆ ತುಂಬಾ ಸಂತೋಷವಾಗುತ್ತಿದೆ. ಇಲ್ಲಿ ಕುಳಿತಿರುವಾಗ ನನಗೆ ನನ್ನ ಸ್ವಂತ ಮನೆಗೆ ಬಂದಂತೆ ಭಾಸವಾಗುತ್ತಿದೆ” ಎನ್ನುವ ಡಾಂಗ್ ಅವರ ಮಾತುಗಳಲ್ಲಿ ದಶಕಗಳ ಅಲೆದಾಟಕ್ಕೆ ಸಿಕ್ಕ ಶಾಂತಿಯ ಭಾವ ಎದ್ದು ಕಾಣುತ್ತಿತ್ತು.
ಕಳೆದ ತಿಂಗಳು ಚೀನಾದ ವೀಹೈ ನಗರದಿಂದ ಕೇವಲ 3.3 ಮೀಟರ್ ಉದ್ದದ ಸಣ್ಣ ರಬ್ಬರ್ ಬೋಟ್ ಒಂದನ್ನು ಏರಿ ಡಾಂಗ್ ಅವರು ಹಳದಿ ಸಮುದ್ರಕ್ಕೆ ಧುಮುಕಿದಾಗ ಅವರ ಮುಂದಿದ್ದದ್ದು ಕೇವಲ 9.9 ಹಾರ್ಸ್ಪವರ್ನ ಒಂದು ಸಣ್ಣ ಇಂಜಿನ್ ಮತ್ತು ಸಾಹಸದ ಹಠ ಮಾತ್ರ.
ನಿಜ ಹೇಳಬೇಕೆಂದರೆ, ಅವರು ಮೊದಲು ಹೊರಟಿದ್ದು ಜಪಾನ್ ದೇಶದತ್ತ. ಆದರೆ, ಸಮುದ್ರದ ಮಧ್ಯೆ ತಲುಪಿದಾಗ ಅಲೆಗಳ ಅಬ್ಬರಕ್ಕೆ ಅವರು ದಾರಿ ತಪ್ಪಿದರು. ಕಣ್ಣು ಹಾಯಿಸಿದಷ್ಟೂ ಕೇವಲ ಬಿಳಿ ಬಣ್ಣದ ಆಕಾಶ ಮತ್ತು ಅಷ್ಟೇ ಭೀಕರವಾದ ನೀರು ಮಾತ್ರ ಕಾಣಿಸುತ್ತಿತ್ತು. ಯಾವುದು ಪೂರ್ವ, ಯಾವುದು ಪಶ್ಚಿಮ ಎಂದು ತಿಳಿಯದ ಆ ಘೋರ ಪರಿಸ್ಥಿತಿಯಲ್ಲಿ ಅವರ ಮೊಬೈಲ್ ಫೋನ್ ಕೂಡ ಸ್ವಿಚ್ ಆಫ್ ಆಗಿತ್ತು. ಇತ್ತ ಇಂಜಿನ್ ಕೂಡ ಕೈಕೊಡಲು ಆರಂಭಿಸಿತು. ಆದರೂ ಧೃತಿಗೆಡದ ಅವರು ತಮ್ಮ ಬೋಟ್ನ ದಿಕ್ಕನ್ನು ದಕ್ಷಿಣ ಕೊರಿಯಾದತ್ತ ತಿರುಗಿಸಿದರು. ಕೊನೆಗೆ ಸಾವಿನ ದವಡೆಯಲ್ಲಿದ್ದ ಇವರನ್ನು ದಕ್ಷಿಣ ಕೊರಿಯಾದ ಮೀನುಗಾರರೊಬ್ಬರು ರಕ್ಷಿಸಿದರು. ಅಲ್ಲಿನ ಅಧಿಕಾರಿಗಳು ಇವರನ್ನು ಕೆಲಕಾಲ ವಶದಲ್ಲಿಟ್ಟುಕೊಂಡಿದ್ದರೂ, ಕೊನೆಗೆ ಅಂತರರಾಷ್ಟ್ರೀಯ ನೆರವು ಮತ್ತು ರಾಜತಾಂತ್ರಿಕ ಪ್ರಯತ್ನಗಳಿಂದಾಗಿ ಕೆನಡಾಕ್ಕೆ ತೆರಳಲು ಅನುಮತಿ ನೀಡಿದರು.
ಒಂದು ಕಾಲದಲ್ಲಿ ಚೀನಾದಲ್ಲೇ ಪೊಲೀಸ್ ಅಧಿಕಾರಿಯಾಗಿ ಸೇವೆ ಸಲ್ಲಿಸುತ್ತಿದ್ದ ಡಾಂಗ್ ಗುವಾಂಗ್ಪಿಂಗ್ ಅವರು ಬಯಸಿದ್ದರೆ ವ್ಯವಸ್ಥೆಯ ಭಾಗವಾಗಿಯೇ ಆರಾಮದಾಯಕವಾಗಿ ಬದುಕಬಹುದಿತ್ತು. ಆದರೆ, 1989ರಲ್ಲಿ ಟಿಯಾನನ್ಮೆನ್ ನಡೆದಿದ್ದ ಕರಾಳ ಹತ್ಯಾಕಾಂಡ ನಡೆದು ಹತ್ತು ವರ್ಷಗಳ ನಂತರ, ಚೀನಾದಲ್ಲಿ ರಾಜಕೀಯ ಸುಧಾರಣೆ ಮತ್ತು ಮಾನವ ಹಕ್ಕುಗಳ ರಕ್ಷಣೆಗಾಗಿ ನಡೆದ ಸಹಿ ಸಂಗ್ರಹ ಅಭಿಯಾನಕ್ಕೆ ಸಹಿ ಹಾಕುವ ಮೂಲಕ ಅವರು ಸರ್ಕಾರದ ಕಂಗಣ್ಣಿಗೆ ಗುರಿಯಾದರು. ಪರಿಣಾಮವಾಗಿ ಅವರನ್ನು ತಕ್ಷಣವೇ ಪೊಲೀಸ್ ಸೇವೆಯಿಂದ ವಜಾಗೊಳಿಸಲಾಯಿತು.
ಸರ್ಕಾರದ ವಿರುದ್ಧ ಧ್ವನಿ ಎತ್ತಿದ್ದಕ್ಕಾಗಿ 2001ರಿಂದ 2003ರವರೆಗೆ ಮೂರು ವರ್ಷಗಳ ಕಾಲ ಕಠಿಣ ಜೈಲು ಶಿಕ್ಷೆಯನ್ನೂ ಅನುಭವಿಸಿದರು. ನಂತರ 2014ರಲ್ಲಿ ಟಿಯಾನನ್ಮೆನ್ ಹತ್ಯಾಕಾಂಡದ ವಿರುದ್ಧದ ಮತ್ತೊಂದು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಕ್ಕಾಗಿ ಅವರನ್ನು ಮತ್ತೆ ಬಂಧಿಸಲಾಯಿತು. ಆದರೂ ಅವರೊಳಗಿದ್ದ ಜೀವಪರ ಮತ್ತು ಪ್ರಜಾಪ್ರಭುತ್ವದ ಆಶಯಗಳು ಎಂದಿಗೂ ಕುಗ್ಗಲಿಲ್ಲ.
2015ರಲ್ಲಿ ಅವರು ಚೀನಾದಿಂದ ತಮ್ಮ ಕುಟುಂಬದೊಂದಿಗೆ ಥೈಲ್ಯಾಂಡ್ಗೆ ಪಲಾಯನ ಮಾಡಿದ್ದರು. ಅಲ್ಲಿ ವಿಶ್ವಸಂಸ್ಥೆಯಿಂದ ನಿರಾಶ್ರಿತರ ಪಟ್ಟಿಗೆ ಸೇರಿದರೂ ಸಹ, ಥಾಯ್ ಅಧಿಕಾರಿಗಳು ಅವರನ್ನು ಮರಳಿ ಚೀನಾ ಪೊಲೀಸರಿಗೆ ಹಸ್ತಾಂತರಿಸುವ ಮೂಲಕ ವಿಶ್ವಾಸದ್ರೋಹ ಬಗೆದಿದ್ದರು. ಇದರಿಂದಾಗಿ ಅವರು ಮತ್ತೆ ಚೀನಾದ ಕರಾಳ ಜೈಲು ಸೇರಬೇಕಾಯಿತು.
ಈ ಲೇಖನ ಓದಿದ್ದೀರಾ?: ಇಂದಿರಾ ತಿವಿದರೆ ನೋವೇ? ಮೋದಿ ತಿವಿದರದು ಹೂವೆ?
ಆದರೆ, ಅವರ ಸ್ವಾತಂತ್ರ್ಯದ ಹಂಬಲ ಮಾತ್ರ ಕಡಿಮೆಯಾಗಲಿಲ್ಲ. 2019ರಲ್ಲಿ ಅವರು ತೈವಾನ್ನ ಕಿನ್ಮೆನ್ ದ್ವಿಪಕ್ಕೆ ಈಜಿಯೇ ತಲುಪುವ ಸಾಹಸ ಮಾಡಿ ವಿಫಲರಾಗಿದ್ದರು. 2020ರಲ್ಲಿ ವಿಯೆಟ್ನಾಂ ಮೂಲಕ ತಪ್ಪಿಸಿಕೊಳ್ಳಲು ಯತ್ನಿಸಿದಾಗ ಅಲ್ಲಿನ ಸ್ಥಳೀಯ ಪೊಲೀಸರು ಅವರನ್ನು ಬಂಧಿಸಿದ್ದರು. ಇಷ್ಟೆಲ್ಲ ಪ್ರಯತ್ನಗಳು ಮತ್ತು ಸೋಲುಗಳು, ಬಂಧನಗಳು ಹಾಗೂ ಪ್ರಾಣಾಪಾಯಗಳನ್ನು ಎದುರಿಸಿದರೂ ಅವರು ಚೀನಾ ಸರ್ಕಾರದ ವಿರುದ್ಧದ ತಮ್ಮ ನಿಲುವಿಗೆ ಎಂದಿಗೂ ವಿಷಾದಿಸಲಿಲ್ಲ ಅಥವಾ ಧೃತಿಗೆಡಲಿಲ್ಲ.
ನಿರಂತರ ಪ್ರಯತ್ನಗಳು, ಮಾನವ ಹಕ್ಕುಗಳ ಕಾರ್ಯಕರ್ತರ ನೆರವಿನ ಫಲವಾಗಿ ಇಂದು ಡಾಂಗ್ ಗುವಾಂಗ್ಪಿಂಗ್ ಅವರು ಕೆನಡಾದಲ್ಲಿ ಸುರಕ್ಷಿತವಾಗಿದ್ದಾರೆ. ಅವರ ಕುಟುಂಬವು ಈಗಾಗಲೇ ನಿರಾಶ್ರಿತರಾಗಿ ಕೆನಡಾದಲ್ಲಿ ನೆಲೆಸಿದ್ದು, ಈಗ ಡಾಂಗ್ ಅವರೂ ತಮ್ಮ ಕುಟುಂಬವನ್ನು ಸೇರಿಕೊಂಡಿದ್ದಾರೆ.
ಇಡೀ ವೃತ್ತಿಜೀವನವನ್ನು ಕ್ರೌರ್ಯದ ವಿರುದ್ಧದ ಹೋರಾಟದಲ್ಲೇ ಸವೆಸಿದ ಡಾಂಗ್ ಅವರು 68ನೇ ವಯಸ್ಸಿನಲ್ಲಿ ಚೀನಾ ಸರ್ಕಾರದ ಕಪಿಮುಷ್ಠಿಯಿಂದ ಸ್ವತಂತ್ರರಾಗಿದ್ದಾರೆ. ಸದ್ಯ ಟೊರೊಂಟೊ ನಗರದ ಬೀದಿಗಳಲ್ಲಿ ಕೆನಡಾ ಧ್ವಜದೊಂದಿಗೆ ಹೆಮ್ಮೆ ಮತ್ತು ಸಂತಸದಿಂದ ಓಡಾಡುತ್ತಿರುವ ಡಾಂಗ್ ಅವರ ಚಿತ್ರವು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
