ಅಲ್ಲಮ ತನ್ನ ವಚನಗಳಲ್ಲಿ ಬಳಸಿರುವ ವಿಶಿಷ್ಟವಾದ 101 ಪದಗಳನ್ನು ಗುರುತಿಸಿ, ಪ್ರತಿ ಪದದ ಬಗ್ಗೆ ಈ ಕೆಳಗಿನ ಮಾದರಿಯಲ್ಲಿ ವಿವರಿಸಲಾಗುವುದು. ಈದಿನ ಓದುಗರಿಗಾಗಿ ಅಲ್ಲಮನ ಅರಿವು…
ಬೇಡೆಂದೆನೆ?
ಹುಟ್ಟುವರೆಲ್ಲರ ಹುಟ್ಟಬೇಡೆಂದೆನೆ?
ಹೊಂದುವರೆಲ್ಲರ ಹೊಂದಬೇಡೆಂದೆನೆ?
ಪ್ರಳಯದಲ್ಲಿ ಅಳಿವವರ ಅಳಿಯಬೇಡೆಂದೆನೆ?
ಗುಹೇಶ್ವರಾ, ನಿಮ್ಮನರಿದು ನೆರೆದ ಬಳಿಕ
ಧರೆಯ ಮೇಲುಳ್ಳವರನಿರಬೇಡೆಂದೆನೆ?
ವಚನಾರ್ಥ:
ಈ ಬ್ರಹ್ಮಾಂಡದ ಸೃಷ್ಟಿಗೆ ಕಾರಣವಾದ ವಿಶ್ವದ ಬೀಜ ಅಥವಾ ಸೃಷ್ಟಿಕರ್ತನನ್ನು ಹಿರಣ್ಯಗರ್ಭ ಎನ್ನುತ್ತಾರೆ. ಹಿರಣ್ಯಗರ್ಭನು ಈ ಜಗತ್ತಿನ ಎಲ್ಲಾ ಜೀವಿಗಳ ಹುಟ್ಟಿಗೆ ಕಾರಣನು. ಹುಟ್ಟುವ ಕ್ರಿಯೆ ನಿರಂತರವಾಗಿ ನಡೆಯುತ್ತಲೇ ಇರುತ್ತದೆ. ಬೇಡ ಎನ್ನಲಾಗದು. ಬೇಡ ಅಂದರೂ ಅದು ನಿಲ್ಲದು. ಹೀಗೆ ಹುಟ್ಟಿ ಬರುವ ಜೀವಿಗಳು ತಮ್ಮ ಅಸ್ತಿತ್ವಕ್ಕಾಗಿ ಹೊಂದುವುದನ್ನು ಹೊಂದುತ್ತಲೇ ಇರುತ್ತವೆ. ಅನ್ನ, ನೀರು, ವಸ್ತ್ರ, ವಸತಿ, ಭೋಗ, ಭಾಗ್ಯ ಇತ್ಯಾದಿಗಳನ್ನು. ಬೇಡ ಎನ್ನಲಾಗದು. ಕಡೆಯಲ್ಲಿ ಪ್ರತೀ ಜೀವಿಯು ಲಯವಾಗಲೇ ಬೇಕು. ಅಳಿಯಲೇ ಬೇಕು. ಅದು ಸೃಷ್ಟಿ ನಿಯಮ. ಬೇಡ ಎನ್ನಲಾಗದು. “ಸೃಷ್ಟಿಕತೆ ಕಟ್ಟು ಕಥೆ ವಿಲಯ ಕಥೆ ಬರಿಯ ಕಥೆ ಹುಟ್ಟು ಸಾವುಗಳೊಂದೆ ಪುರುಳಿನೆರಡು ದಶೆ” ಎಂದು ಜೀವನದ ಹುರುಳನ್ನು ಕಗ್ಗ ಹೇಳುತ್ತದೆ. ಹುಟ್ಟುವುದಕ್ಕೆ, ಹೊಂದುವುದಕ್ಕೆ, ಹೋಗುವುದಕ್ಕೆ ಯಾರೂ ಬೇಡ ಅನ್ನಲಾಗದು. ಆದರೆ ಆ ಸೃಷ್ಟಿಕರ್ತನನ್ನು ಅರಿದು ಅವನನ್ನು ನೆನೆದು ಈ ಭೂಮಿಯ ಮೇಲೆ ಆನಂದದಿಂದ ಬದುಕುತ್ತೇವೆ ಅನ್ನುವವರನ್ನು ಇಲ್ಲಿ ಇರಬೇಡ ಎನ್ನಲಿಕ್ಕಾಗುತ್ತದೆಯೇ? ಆನಂದಮಯ ಈ ಜಗ ಹೃದಯ, ದೇವರ ದಯ ಕಾಣೋ!
ಪದಪ್ರಯೋಗಾರ್ಥ:
ಬೇಡೆಂದೆನೆ? ಬೇಡ ಎಂದೆನೆ ಎಂದು ಆಡುಮಾತಿನಲ್ಲಿ ಕೇಳುವಂತಹ ಪದ. ನೀವು ಮಾಡುತ್ತಿರುವ ಕೆಲಸಕ್ಕೆ ನಾನು ಬೇಡ ಅನ್ನಲಿಲ್ಲವಲ್ಲಾ ಅಂತ ಮಾತಿನ ಮಧ್ಯದಲ್ಲಿ ಸಹಜವಾಗಿ ಬಳಸುವಂತಹ ನುಡಿಗಟ್ಟು. ಹುಟ್ಟುವರೆಲ್ಲರನು ಹುಟ್ಟಬೇಡಿ ಎನ್ನಲಾಗುತ್ತದೆಯೇ? ಸಾಯುವವರೆಲ್ಲರನು ಸಾಯಬೇಡಿ ಎನ್ನಲಾಗುತ್ತದೆಯೇ? ತೊಟ್ಟಿಲುಗಳೆಷ್ಟೋ ಮಸಣಗಳಷ್ಟು ಧರೆಯೊಳಗೆ ಎಂಬ ಕವಿನುಡಿಯಿದೆ. ಐದು ಸಾಲಿನ ವಚನದಲ್ಲಿ ನಾಲ್ಕು ಬಾರಿ ಬೇಡೆಂದೆನೆ ಎಂಬ ಪದಪ್ರಯೋಗ ಮಾಡಿ ವಿಷಯ ನಿರೂಪಣೆ ಮಾಡಿರುವುದು ಈ ವಚನದ ಅನನ್ಯತೆ. ಒಂದು ಸಾಮಾನ್ಯ ಪದವನ್ನು ಬಳಸಿ ವಚನವನ್ನು ಹೇಗೆ ಪರಿಣಾಮಕಾರಿಯಾಗಿ ಬಿಂಬಿಸಬಹುದು ಎಂದು ರೂಪಿಸುವಲ್ಲಿ “ಬೇಡೆಂದೆನೆ” ಎಂಬ ಪದಪ್ರಯೋಗ ಗಮನ ಸೆಳೆಯುತ್ತದೆ.
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಒಡಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾಯದ ಮಂಜು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ದಳದುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಯಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಷ್ಟಸಂತಾನ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅಗ್ನಿಸ್ತಂಭದ ರಕ್ಷೆ
ಹರಿಹರ ಶಿವಕುಮಾರ್
ಲೇಖಕ, ವೃತ್ತಿಯಿಂದ ಚಾರ್ಟರ್ಡ್ ಅಕೌಂಟೆಂಟ್. ಲೆಕ್ಕಪರಿಶೋಧನೆ ಮತ್ತು ತೆರಿಗೆ ವಿಚಾರಗಳಲ್ಲಿ ಪರಿಣತಿ. ಕನ್ನಡದಲ್ಲಿ ಕಂಪ್ಯೂಟರ್ ಬಳಕೆ ಇವರ ಹವ್ಯಾಸ. ಕನ್ನಡ ಭಾಷೆ ಮತ್ತು ಸಾಹಿತ್ಯದಲ್ಲಿ ಆಸಕ್ತರು. ಶಿವಮೊಗ್ಗ ಜಿಲ್ಲೆಯವರು, ಸದ್ಯ ಬೆಂಗಳೂರಿನಲ್ಲಿ ನೆಲೆ.
