ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್ಎಸ್ಎಸ್) ಮುಖ್ಯಸ್ಥ ಮೋಹನ್ ಭಾಗವತ್ ಅವರ ಮುಂಬರುವ ಕೆನಡಾ ಭೇಟಿಗೆ ಅಲ್ಲಿನ ಅನೇಕ ಸಂಘಟನೆಗಳು ಮತ್ತು ರಾಜಕೀಯ ನಾಯಕರು ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ. 40ಕ್ಕೂ ಹೆಚ್ಚು ಕೆನಡಿಯನ್ ನಾಗರಿಕ ಸಮಾಜದ ಸಂಘಟನೆಗಳು ಜಂಟಿ ಪತ್ರ ಬರೆದು, ಮೋಹನ್ ಭಾಗವತ್ ಅವರಿಗೆ ಕೆನಡಾ ಪ್ರವೇಶಿಸದಂತೆ ತಡೆ ನೀಡಬೇಕು ಎಂದು ಕೆನಡಾ ಫೆಡರಲ್ ಸರ್ಕಾರವನ್ನು ಒತ್ತಾಯಿಸಿವೆ.
ಸಂಘಟನೆಗಳ ಜತೆಗೆ ಕೆನಡಾದ ಪ್ರತಿಪಕ್ಷವಾದ ನ್ಯೂ ಡೆಮಾಕ್ರಟಿಕ್ ಪಾರ್ಟಿ (NDP) ಸಂಸದರಾದ ಹೆದರ್ ಮೆಕ್ಫರ್ಸನ್ (ವಿದೇಶಾಂಗ ವ್ಯವಹಾರಗಳ ವಿಮರ್ಶಕಿ) ಮತ್ತು ಜೆನ್ನಿ ಕ್ವಾನ್ (ಸಾರ್ವಜನಿಕ ಭದ್ರತೆ ಹಾಗೂ ವಲಸೆ ವ್ಯವಹಾರಗಳ ವಿಮರ್ಶಕಿ) ಅವರು ಕೆನಡಾ ಸರ್ಕಾರದ ವಿದೇಶಾಂಗ, ಸಾರ್ವಜನಿಕ ಭದ್ರತೆ ಮತ್ತು ವಲಸೆ ಸಚಿವರಿಗೆ ಜಂಟಿ ಬಹಿರಂಗ ಪತ್ರ ಬರೆದಿದ್ದಾರೆ. ‘
ಇದನ್ನೂ ಓದಿ: ಅಂಗಗಳ ಸಹಿತ ಸಂಘದ ಜಾಡು ಹಿಡಿಯುವ ಕೆಲಸ ತಲೆ ಸುತ್ತು ತರುವುದು ಖಚಿತ; RSSಗೆ ಬೇಕಿರುವುದೂ ಇದೇ’
ಈ ಪತ್ರದಲ್ಲಿ ಆರ್ಎಸ್ಎಸ್ ಅನ್ನು ನಿಷೇಧಿತ ಸಂಘಟನೆಗಳ ಪಟ್ಟಿಗೆ ಸೇರಿಸಬೇಕು. ಆಗಸ್ಟ್ ಕೊನೆಯಲ್ಲಿ ಯೋಜಿಸಲಾಗಿರುವ ಮೋಹನ್ ಭಾಗವತ್ ಅವರ ಕೆನಡಾ ಭೇಟಿಗೆ ವೀಸಾ ನೀಡಬಾರದು ಮತ್ತು ದೇಶ ಪ್ರವೇಶಿಸದಂತೆ ತಡೆಯಬೇಕು ಎಂದು ಮನವಿ ಮಾಡಿದ್ದಾರೆ.
ಕೆನಡಾದ ಸಂಸದರು ಮತ್ತು ವಿವಿಧ ಸಂಘಟನೆಗಳು ಕೆನಡಾದ ವಲಸೆ ಮತ್ತು ನಿರಾಶ್ರಿತರ ರಕ್ಷಣಾ ಕಾಯ್ದೆಯಡಿ (Immigration and Refugee Protection Act) ಭಾಗವತ್ ಅವರಿಗೆ ಪ್ರವೇಶ ನಿರಾಕರಿಸಬೇಕು ಎಂದು ವಾದಿಸಿದ್ದಾರೆ. ಧರ್ಮಗಳ ನಡುವೆ ದ್ವೇಷ ಬಿತ್ತುವ ಆರ್ಎಸ್ಎಸ್ ನಾಯಕರ ಭೇಟಿಯಿಂದ ಕೆನಡಾದಲ್ಲಿರುವ ವಿವಿಧ ಧಾರ್ಮಿಕ ಮತ್ತು ಅಲ್ಪಸಂಖ್ಯಾತ ಸಮುದಾಯಗಳ ಸುರಕ್ಷತೆಗೆ ಧಕ್ಕೆಯಾಗಬಹುದು ಮತ್ತು ದ್ವೇಷಪೂರಿತ ವಾತಾವರಣ ನಿರ್ಮಾಣವಾಗಬಹುದು ಎಂದು ಆತಂಕ ವ್ಯಕ್ತಪಡಿಸಿದೆ.
ಕೆನಡಾದಲ್ಲಿ ಆರ್ಎಸ್ಎಸ್ ಮತ್ತು ತೀವ್ರಗಾಮಿ ಗುಂಪುಗಳು ಕೆನಡಿಯನ್ ನಾಗರಿಕರ ಮೇಲೆ ಪ್ರಭಾವ ಬೀರಲು ಮತ್ತು ಬೆದರಿಕೆಯೊಡ್ಡಲು ಯತ್ನಿಸುತ್ತಿವೆ ಎಂಬ ಆರೋಪಗಳನ್ನು ಪತ್ರದಲ್ಲಿ ಉಲ್ಲೇಖಿಸಲಾಗಿದೆ. ಪ್ರಸ್ತುತ ಕೆನಡಾ ಸರ್ಕಾರವು ಈ ಕುರಿತು ಯಾವುದೇ ಅಧಿಕೃತ ನಿರ್ಧಾರ ಅಥವಾ ಹೇಳಿಕೆಯನ್ನು ಪ್ರಕಟಿಸಿಲ್ಲ. ಇನ್ನಷ್ಟೇ ನಿರ್ಧಾರವನ್ನು ಕೈಗೊಳ್ಳಬೇಕಿದೆ.
