ಬೀಚ್‌ನಲ್ಲಿ ಮುಳುಗಿ ಭಾರತೀಯ ಪ್ರಜೆಯೊಬ್ಬರು ಸಾವನ್ನಪ್ಪಿರುವ ಘಟನೆ ಅಮೆರಿಕದ ದಕ್ಷಿಣ ಕೆರೋಲಿನಾದಲ್ಲಿ ನಡೆದಿದೆ. ಜಾರ್ಜಿಯಾದ 49 ವರ್ಷದ ವ್ಯಕ್ತಿ ತನ್ನ ಪುತ್ರನೊಂದಿಗೆ ಹಿಲ್ಟನ್ ಹೆಡ್ ಐಲ್ಯಾಂಡ್‌ನ ಬ್ಯೂಫೋರ್ಟ್ ಕೌಂಟಿಯ ಬೀಚ್‌ಗೆ ತೆರಳಿದ್ದರು, ನೀರಿನ ಸುಳಿಯಲ್ಲಿ ಸಿಲುಕಿ ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದೆ.
ಮೃತ ಭಾರತೀಯ ವ್ಯಕ್ತಿಯನ್ನು ಸೌಮೆನ್ ಕುಂಡು ಎಂದು ಗುರುತಿಸಲಾಗಿದ್ದು, ಅವರು ಜಾರ್ಜಿಯಾದಲ್ಲಿ ವಾಸವಿದ್ದರು. ಅಟ್ಲಾಂಟಾದಲ್ಲಿರುವ ಭಾರತೀಯ ಕಾನ್ಸುಲೇಟ್ ಸೌಮೆನ್ ಕುಂಡು ಭಾರತೀಯ ಪ್ರಜೆ ಎಂದು ದೃಢಪಡಿಸಿದೆ.
ಇದನ್ನು ಓದಿದ್ದೀರಾ? ಸುಡಾನ್‌ | ಸೇನೆ-ಅರೆಸೇನಾ ಪಡೆ ಸಂಘರ್ಷದಲ್ಲಿ ಭಾರತೀಯ ಮೂಲದ ವ್ಯಕ್ತಿ ಸಾವು
ಈ ಬಗ್ಗೆ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿರುವ ಕಾನ್ಸುಲೇಟ್, “ಹಿಲ್ಟನ್ ಹೆಡ್ ಐಲ್ಯಾಂಡ್ ಬಳಿ ಭಾರತೀಯ ಪ್ರಜೆಯೊಬ್ಬರು ಸಾವನ್ನಪ್ಪಿದ ದುರಂತ ಘಟನೆ ನಡೆದಿದ್ದು ನಾವು ತುಂಬಾ ದುಃಖಿತರಾಗಿದ್ದೇವೆ. ಕಾನ್ಸುಲೇಟ್ ಸ್ಥಳೀಯ ಅಧಿಕಾರಿಗಳು ಮತ್ತು ಇತರೆ ಗುಂಪುಗಳೊಂದಿಗೆ ಸಂಪರ್ಕ ಹೊಂದಿದೆ. ಈ ಕಷ್ಟದ ಸಮಯದಲ್ಲಿ ಕುಟುಂಬಕ್ಕೆ ಸಂಪೂರ್ಣ ಬೆಂಬಲವನ್ನು ನೀಡುತ್ತಿದೆ” ಎಂದು ಹೇಳಿದ್ದಾರೆ.
ತುರ್ತು ಕರೆ ಬಂದ ಬಳಿಕ ನಾವು ಸ್ಥಳಕ್ಕೆ ಧಾವಿಸಿದ್ದು, ಕುಂಡು ಮತ್ತು ಅವರ ಮಗ ನೀರಿನಲ್ಲಿ ಮುಳುಗಿದ್ದರು, ಸುಳಿಯಲ್ಲಿ ಸಿಲುಕಿದ್ದರು ಎಂದು ಅಧಿಕಾರಿಗಳು ಹೇಳಿದ್ದಾರೆ. “ಜುಲೈ 24ರಂದು ಸಂಜೆ ಸುಮಾರು 7:51ಕ್ಕೆ ಸೀ ಪೈನ್ಸ್‌ನ ಸಮುದ್ರದಲ್ಲಿ ಮುಳುಗಿ ಕುಂಡು ಸ್ಥಳದಲ್ಲೇ ನಿಧನರಾದರು” ಎಂದು ಕರೋನರ್ ಕಚೇರಿ ಹೇಳಿಕೆಯಲ್ಲಿ ತಿಳಿಸಿದೆ.
“ಆರಂಭದಲ್ಲಿ ಸ್ಥಳೀಯರೂ ರಕ್ಷಿಸುವ ಯತ್ನ ಮಾಡಿದ್ದಾರೆ. ಬಳಿಕ ಹಿಲ್ಟನ್ ಹೆಡ್ ಐಲ್ಯಾಂಡ್ ಅಗ್ನಿಶಾಮಕ ಮತ್ತು ರಕ್ಷಣಾ ತಂಡ ಸ್ಥಳಕ್ಕೆ ಆಗಮಿಸಿ ತಂದೆ, ಮಗ ಇಬ್ಬರನ್ನು ದಡಕ್ಕೆ ಕರೆತಂದಿದೆ. ಪ್ರಥಮ ಚಿಕಿತ್ಸೆ ನೀಡಲಾಗಿದ್ದು ಆದರೆ ಸೌಮೆನ್ ಕುಂಡು ಮೃತಪಟ್ಟಿದ್ದಾರೆ” ಎಂದು ವರದಿಯಾಗಿದೆ.
