ಚಂದ್ರ ಎಂದಿಗೂ ಮುಗಿಯದ ಸೋಜಿಗದ ಸಂಗತಿ. ಸಾಮಾನ್ಯ ಮನುಷ್ಯನ ಅಂಬೆಗಾಲ ಮಗುವಿಂದ ಹಿಡಿದು ವಿಜ್ಞಾನಿಗಳ ಕನಸ ಕೂಸುಗಳಾದ ಬಾಹ್ಯಾಕಾಶ ನೌಕೆಗಳಿಗೂ ಚಂದ್ರ ಕೌತುಕದ ವಿಷಯ.
ಇನ್ನೇನು ಕೆಲ ದಿನಗಳಲ್ಲಿ ನಾಸ ಚಂದಿರನ ಅಂಗಳಕ್ಕೆ ಅರ್ಟೆಮಿಸ್‌ 2 ಎಂಬ ಲೂನಾರ್‌ ಮಿಶನ್‌ ಕಳುಹಿಸಲಿದೆ. ಜೊತೆಗೆ ಗಗನಯಾತ್ರಿಗಳು ಚಂದಿರನ ಸುತ್ತ ಸುತ್ತಲಿದ್ದಾರೆ.
ನಾಸಾದ ಅರ್ಟೆಮಿಸ್‌ ಯೋಜನೆಗೆ ಹಲವು ವರ್ಷದ ಪರಿಶ್ರಮವಿದೆ. ನೂರಾರು ವಿಜ್ಞಾನಿಗಳ ಶ್ರಮವಿದ್ದು, ಯೋಜನೆ ಪೂರ್ಣವಾಗುವ ವೇಳೆಗೆ 93 ಬಿಲಿಯನ್‌ ಡಾಲರ್‌ ವೆಚ್ಚ ತಗುಲಿದೆ.
ಇದನ್ನು ಓದಿ>>2027ಕ್ಕೆ ಚಂದ್ರ ಮೇಲೆ ರಾಕೆಟ್‌ ಇಳಿಸುವ ಯೋಜನೆಗೆ ಎಲೋನ್‌ ಮಸ್ಕ್‌ನ ಸ್ಪೇಸ್‌ಎಕ್ಸ್‌ ಸಿದ್ದತೆ
50 ವರ್ಷಗಳ ಹಿಂದೆ ಅಮೆರಿಕಾ ಅಪೊಲೊ ಮಿಷನ್‌ ಮೂಲಕ ಚಂದ್ರನ ಮೇಲೆ ಮಾನವ ಕಾಲಿರಿಸಿದ್ದು ದಾಖಲೆ ಸೃಷ್ಟಿಸಿತು. ಅದರಿಂದ ಈಚೆಗೆ ಚಂದ್ರನ ಕಕ್ಷೆಯ ಮೇಲೆ ಹಲವು ಬಾರಿ ಹೋಗಿ ಬಂದ ಮನುಷ್ಯನಿಗೆ ಚಂದಿರ ಬೇರೆಲ್ಲಾ ಆಕಾಶ ಕಾಯಗಳಿಗಿಂತಲೂ ಬಹಳ ಹತ್ತಿರವೂ ಮತ್ತು ಆತನ ಸಂಶೋಧನೆಗೆ ಹೆಚ್ಚು ಪ್ರಯಾಸವಿರದೆ ನಿಲುಕುವವನು ಆಗಿದ್ದಾನೆ.
ಮೇಲಿನಿಂದ ತೇವವಿರದ ಒಣ ಧೂಳು ಆವರಿಸಿದ ಮೇಲ್ಮೈ ಹೊಂದಿರುವಂತೆ ಕಾಣುವ ಚಂದ್ರ ತನ್ನೊಳಗೆ ಬಹಳಷ್ಟು ವಿಸ್ಮಯಗಳನ್ನು ಅಡಗಿರಿಸಿದ್ದಾನೆ. ಭೂಮಿಯ ಮೇಲ್ಮೈ ಮೇಲೆ ಕಾಣ ಸಿಗುವ ಹಲವು ಅಂಶಗಳು ಚಂದ್ರನ ಮೇಲೂ ಕಾನಸಿಗುತ್ತದೆ ಎನ್ನುತ್ತಾರೆ ಖಗೋಳ ತಜ್ಞರಾದ ಸಾರಾ ರಸೆಲ್‌.
ಚಂದ್ರನ ಮೇಲೆ ಖನಿಜಗಳಿವೆ, ಐರನ್‌ ಮತ್ತು ಟೈಟಾನಿಯಂ, ಹೀಲಿಯಂ ಮುಂತಾದ ಖನಿಜಾಂಶಗಳು ಅಧಿವಾಹಕಗಳು ಹಾಗೂ ವೈದ್ಯಕೀಯ ಉಪಕರಣಗಳಲ್ಲಿ ಬಳಕೆಯಾಗುತ್ತದೆ.
ಇದೆಲ್ಲದಕ್ಕಿಂತಲೂ ನಮ್ಮನ್ನು ಬೆರಗುಗೊಳಿಸುವ ಅಂಶವೆಂದರೆ ಚಂದ್ರನ ಮೇಲೆ ನೀರಿನ ಅಂಶ ಇದೆಯೆಂಬ ಸಂಶೋಧನೆ. ಕೆಲವು ಖನಿಜಗಳಲ್ಲಿ ನೀರಿನ ಅಂಶವಿರುವುದು ತಿಳಿದು ಬಂದಿದೆ ಹಾಗೂ ಚಂದ್ರನ ಕೆಲ ಧ್ರುವಗಳಲ್ಲಿ ನೀರು ಇರಬಹುದು ಎಂಬ ಊಹೆಯೂ ಇದೆ.
ಸದಾ ಕತ್ತಲಿಂದ ಕೂಡಿರುವ ಕುಳಿಗಳು ಇರುವುದರಿಂದ ಆ ಕುಳಿಗಳಲ್ಲಿ ಹಿಮಗಡ್ಡೆಗಳು ರೂಪುಗೊಳ್ಳಬಹುದಾದ ಸಾಧ್ಯತೆಗಳಲಿವೆ ಎನ್ನುತ್ತಾರೆ ಖಗೋಳ ವಿಜ್ಞಾನಿ ರಸೆಲ್‌.
ಚಂದಿರನ ಮೇಲೆ ವಾಸ್ತವ್ಯ ಸಾಧ್ಯವಾಗಿಸುವ ಮೊದಲ ಅಂಶ ನೀರು. ಕುಡಿಯಲು ಯೋಗ್ಯವಾದ ನೀರು ಅಷ್ಟೇ ಅಲ್ಲ. ಚಂದ್ರನ ವಾತಾವರಣದಲ್ಲಿರುವ ನೀರಿನ ಮೂಲ ಧಾತುಗಳಾದ ಜಲಜನಕ ಹಾಗೂ ಆಮ್ಲಜನಕಗಳು ಚಂದ್ರನ ಮೇಲೆ ಕಾಲಿರಿಸುವ ಗಗನಯಾತ್ರಿಗಳ ಸರಾಗ ಉಸಿರಾಟಕ್ಕೆ ನೆರವಾಗುತ್ತದೆ.
ಚಂದಿರನ ಅಂಗಳದಲ್ಲೂ ಸ್ಪರ್ಧೆ!
ಜಗತ್ತಿನ ಕೆಲವು ಬಲಿಷ್ಟ ರಾಷ್ಟ್ರಗಳು ಚಂದ್ರನ ಅಂಗಳಕ್ಕೆ ನಾ ಮೊದಲು ತಾ ಮೊದಲು ಎಂಬ ಸ್ಪರ್ಧೆಗೆ ಬಿದ್ದಿವೆ. ಭಾರತ, ಚೀನಾ, ರಷ್ಯಾ ಮತ್ತು ಅಮೆರಿಕ ಈಗಾಗಲೇ ತಮ್ಮ ದೇಶದ ಧ್ವಜವನ್ನು ಚಂದ್ರನ ಅಂಗಳದತ್ತ ಕೊಂಡೊಯ್ದಿವೆ.
2030ರಲ್ಲಿ ಇನ್ನೊಮ್ಮೆ ಚಂದ್ರನ ಮೇಲೆ ಕಾಲಿಡಲು ಚೀನಾ ತಯಾರಿ ನಡೆಸುತ್ತಿದೆ. ಚೀನಾ ಹಾಗೂ ಅಮೆರಿಕ ಎರಡೂ ದೇಶಗಳು ಚಂದಿರನ ಒಂದೇ ಮೇಲ್ಮೈಯನ್ನು ತಮ್ಮ ಗುರುಯಾಗಿಸಿವೆ.
1967ರಲ್ಲಿ ವಿಶ್ವಸಂಸ್ಥೆಯ ಬಾಹ್ಯಕಾಶ ಒಪ್ಪಂದವೂ ಚಂದ್ರನ ಮೇಲೆ ಯಾವ ದೇಶವೂ ಅಸ್ತಿತ್ವ ಹೊಂದಿಲ್ಲ ಎಂದು ಹೇಳಿದೆ. ಆದರೆ ಚಂದ್ರನ ಅಂಗಳದಲ್ಲಿ ಯಾರು ಯಾವ ಅಂಶ ಪತ್ತೆ ಮಾಡಿದರು, ಯಾವ ದೇಶ ಏನು ಪಡೆಯಿತು ಎನ್ನುವುದಂತೂ ಸದ್ಯಕ್ಕಂತೂ ಪೂರ್ತಿ ಬಹಿರಂಗಗೊಂಡಿಲ್ಲ.
