ನಗರದ ಮೆಜೆಸ್ಟಿಕ್‌ನ ಬಿಎಂಟಿಸಿ ಬಸ್ ನಿಲ್ದಾಣ ಬಳಿ ಶನಿವಾರ ಮುಂಜಾನೆ (ಆಗಸ್ಟ್ 22) ನಡೆದ ದರೋಡೆ ಯತ್ನದಲ್ಲಿ 31 ವರ್ಷದ ಟ್ರಾನ್ಸ್‌ಜೆಂಡರ್ ವ್ಯಕ್ತಿಯನ್ನು ಇರಿದು ಕೊಂದ ಘಟನೆ ನಡೆದಿದೆ. ಪ್ರಕರಣದ ಆರೋಪಿಯನ್ನು ಉಪ್ಪಾರಪೇಟೆ ಪೊಲೀಸರು ಬಂಧಿಸಿದ್ದಾರೆ.
ಮೃತರನ್ನು ದೇವಿ ಎಂದು ಗುರುತಿಸಲಾಗಿದ್ದು, ಸುಂಕದಕಟ್ಟೆ ನಿವಾಸಿಯಾದ ದೇವಿ, ಬಸ್ ನಿಲ್ದಾಣದ ಹೊರಭಾಗದಲ್ಲಿ ನಿಂತಿದ್ದಾಗ ಘಟನೆ ಸಂಭವಿಸಿದೆ. ಉಪ್ಪಾರಪೇಟೆ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಮುಂಜಾನೆ 2.30 ರಿಂದ 3 ಗಂಟೆಯ ನಡುವೆ ಈ ಘಟನೆ ನಡೆದಿದೆ.
ರಾಮಮೂರ್ತಿ ನಗರದ ನಿವಾಸಿ ಗೌತಮ್ (29) ಎಂಬಾತ ಮದ್ಯದ ನಶೆಯಲ್ಲಿ ಸ್ಕೂಟರ್‌ನಲ್ಲಿ ರಾತ್ರಿ ದರೋಡೆ ಮಾಡುವ ಉದ್ದೇಶದಿಂದ ಬಂದಿದ್ದ, ದೇವಿಯ ಬಳಿ 200 ರೂಪಾಯಿ ಕೇಳಿದಾಗ ದೇವಿ ನಿರಾಕರಿಸಿದ್ದಾರೆ. ಕುಪಿತಗೊಂಡ ಗೌತಮ್ ಚಾಕುವಿನಿಂದ ತಲೆಗೆ ಇರಿದು ಬ್ಯಾಗ್ ಮತ್ತು ಮೊಬೈಲ್ ಕಿತ್ತುಕೊಂಡು, ಎದೆ ಸೇರಿದಂತೆ ದೇಹದ ಇತರೆಡೆ ಚಾಕುವಿನಿಂದ ಹಲವು ಬಾರಿ ಇರಿದಿದ್ದಾನೆ. ಹಲ್ಲೆಯಿಂದ ತೀವ್ರ ಗಾಯಗೀಡಾಗಿದ್ದ ದೇವಿ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ಬಳಿಕ ಆರೋಪಿ ಗೌತಮ್ ಬ್ಯಾಗ್‌ನಲ್ಲಿದ್ದ 200 ರೂಪಾಯಿ ಮತ್ತು ಮೊಬೈಲ್ ತೆಗೆದುಕೊಂಡು ಪಲಾಯನ ಮಾಡಿದ್ದಾನೆ.
ರಸ್ತೆಯಲ್ಲಿ ಹಾದುಹೋಗುತ್ತಿದ್ದವರು ಪೊಲೀಸರಿಗೆ ಈ ಕುರಿತು ಮಾಹಿತಿ ನೀಡಿದ್ದು, ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸಿ ಉಪ್ಪಾರಪೇಟೆ ಪೊಲೀಸರು ಗೌತಮ್‌ನನ್ನು ಪತ್ತೆಹಚ್ಚಿ ಬಂಧಿಸಿದ್ದಾರೆ. ಆರೋಪಿ ಹಿಂದಿನಿಂದಲೂ ರಾತ್ರಿ ವೇಳೆ ದರೋಡೆಗಳಲ್ಲಿ ತೊಡಗುತ್ತಿದ್ದ ದರೋಡೆಯೆ ಆತನ ನಿತ್ಯ ಕಾಯಕವಾಗಿತ್ತು ಎಂದು ಪೊಲೀಸರು ಹೇಳಿದ್ದಾರೆ. ಪಲೀಸ್‌ ವಿಚಾರಣೆಯಲ್ಲಿ ಮದ್ಯಪಾನ ಮಾಡಿ ದರೋಡೆಗೆ ಹೋಗಿದ್ದನ್ನು ಆರೋಪಿ ಒಪ್ಪಿಕೊಂಡಿದ್ದು, ಪ್ರಕರಣದ ತನಿಖೆ ಮುಂದುವರಿದಿದೆ.
