ಪತ್ರಕರ್ತೆ ಅಂಜನಾ ಓಂ ಕಶ್ಯಪ್ ಮತ್ತು ಜನಪ್ರಿಯ ಶಿಕ್ಷಕ ಖಾನ್ ಸರ್ ನಡುವಿನ ಮಾನನಷ್ಟ ಪ್ರಕರಣಕ್ಕೆ ಸಂಬಂಧಿಸಿದಂತೆ, ವಿವಾದವನ್ನು ಸೌಹಾರ್ದಯುತವಾಗಿ ಬಗೆಹರಿಸಿಕೊಳ್ಳಲು ದೆಹಲಿ ಹೈಕೋರ್ಟ್ ಗುರುವಾರ ಉಭಯ ಕಕ್ಷಿದಾರರಿಗೆ ಸೂಚನೆ ನೀಡಿದೆ.
ನ್ಯಾಯಮೂರ್ತಿ ತುಷಾರ್ ರಾವ್ ಗೆಡೆಲಾ ಅವರಿದ್ದ ನ್ಯಾಯಪೀಠವು, ಈ ಪ್ರಕರಣವನ್ನು ಸಂಧಾನಕ್ಕೆ ವಹಿಸಿದೆ. ಕಕ್ಷಿದಾರರ ಪರ ವಕೀಲರು ಗುರುವಾರ ಸಂಜೆ 4:30ಕ್ಕೆ ಮಧ್ಯವರ್ತಿಯ ಮುಂದೆ ಹಾಜರಾಗುವಂತೆ ನ್ಯಾಯಾಲಯ ನಿರ್ದೇಶನ ನೀಡಿದೆ.
ಉಭಯ ಕಕ್ಷಿದಾರರ ನಡುವಿನ ವಿವಾದವನ್ನು ಮಾತುಕತೆ ಮೂಲಕ ಬಗೆಹರಿಸಿಕೊಳ್ಳುವ ಸಾಧ್ಯತೆಗಳಿವೆ. ಕಕ್ಷಿದಾರರು ಹಿರಿಯ ಮಧ್ಯವರ್ತಿಯೊಬ್ಬರ ನೇತೃತ್ವದಲ್ಲಿ ಸಂಧಾನ ನಡೆಸಲು ಒಪ್ಪಿದ್ದಾರೆ ಎಂದು ಕೋರ್ಟ್‌ ತಿಳಿಸಿದೆ.
ಸಂಧಾನದ ಭಾಗವಾಗಿ, ಅಂಜನಾ ಓಂ ಕಶ್ಯಪ್ ಅವರ ಮಕ್ಕಳ ವೈಯಕ್ತಿಕ ವಿವರಗಳನ್ನು ಬಹಿರಂಗಪಡಿಸಿದ್ದ ಸಾಮಾಜಿಕ ಮಾಧ್ಯಮ ಪೋಸ್ಟ್‌ಗಳನ್ನು ತಕ್ಷಣವೇ ತೆಗೆದುಹಾಕುವಂತೆ ಖಾನ್ ಸರ್ ಮತ್ತು ಇತರ ಶಿಕ್ಷಕರಿಗೆ ನ್ಯಾಯಾಲಯ ಕಟ್ಟುನಿಟ್ಟಿನ ಸೂಚನೆ ನೀಡಿದೆ. ಅಂಜನಾ ಓಂ ಕಶ್ಯಪ್ ಅವರಿಗೂ ಸಹ, ಇನ್ನು ಮುಂದೆ ಶಿಕ್ಷಕರನ್ನು ಗುರಿಯಾಗಿಸದಂತೆ ನ್ಯಾಯಾಲಯ ತಾಕೀತು ಮಾಡಿದೆ.
“ನೀವು ಶಿಕ್ಷಣ ತಜ್ಞರು, ಯುವಕರಿಗೆ ಬೋಧಿಸುತ್ತೀರಿ. ಈ ಜವಾಬ್ದಾರಿಯನ್ನು ಮರೆಯಬೇಡಿ” ಎಂದು ನ್ಯಾಯಪೀಠವು ಈ ಸಂದರ್ಭದಲ್ಲಿ ಕಿವಿಮಾತು ಹೇಳಿದೆ.
ಇದನ್ನೂ ಓದಿ: ಖಾನ್ ಸರ್ ಸೇರಿ ಹಲವರ ವಿರುದ್ಧ ₹2 ಕೋಟಿ ಮಾನನಷ್ಟ ಮೊಕದ್ದಮೆ ಹೂಡಿದ ಅಂಜನಾ ಓಂ ಕಶ್ಯಪ್!
ಕಳೆದ ಮೇ 29ರಂದು ‘ಆಜ್ ತಕ್’ ವಾಹಿನಿಯಲ್ಲಿ ಅಂಜನಾ ಓಂ ಕಶ್ಯಪ್ ಅವರು ಆನ್‌ಲೈನ್ ಟೀಚರ್‌ಗಳ ಕುರಿತು ಚರ್ಚೆ ನಡೆಸಿದ್ದರು. ಈ ಸಂದರ್ಭದಲ್ಲಿ ಮಾಡಿದ್ದ ಟೀಕೆಗಳ ವಿರುದ್ಧ, ಖಾನ್ ಸರ್ ಸೇರಿದಂತೆ ಅಭಿನಯ್ ಶರ್ಮಾ, ಬಬಿತಾ ತ್ಯಾಗಿ, ಅರವಿಂದ್ ಭದೌರಿಯಾ ಮತ್ತು ಇತರರು ಸಾಮಾಜಿಕ ಜಾಲತಾಣಗಳಲ್ಲಿ ಕಶ್ಯಪ್ ಮತ್ತು ವಾಹಿನಿಯ ವಿರುದ್ಧ ತೀವ್ರ ಅಭಿಯಾನ ನಡೆಸಿದ್ದರು.
ಪತ್ರಕರ್ತೆಯ ವಿರುದ್ಧ ಅವಹೇಳನಕಾರಿ ಪದಗಳನ್ನು ಬಳಸಲಾಗಿದೆ ಮತ್ತು ಅಂಜನಾ ಓಂ ಕಶ್ಯಪ್ ಅವರ ಮಗು ಓದುತ್ತಿರುವ ಶಾಲೆಯ ವಿವರಗಳನ್ನು ಖಾನ್ ಸರ್ ಬಹಿರಂಗಪಡಿಸಿರುವುದು ಕುಟುಂಬದ ಭದ್ರತೆಗೆ ಆತಂಕ ಉಂಟುಮಾಡಿದೆ ಎಂದು ಅಂಜನಾ ಓಂ ಕಶ್ಯಪ್ ಮತ್ತು ಟಿವಿ ಟುಡೇ ನೆಟ್‌ವರ್ಕ್ ಕೋರ್ಟ್‌ಗೆ ಸಲ್ಲಿಸಿದ ದೂರಿನಲ್ಲಿ ಆರೋಪಿಸಿದ್ದರು. ಈ ದೂರಿನ ಮೇರೆಗೆ ನ್ಯಾಯಾಲಯವು ಮಧ್ಯಂತರ ಆದೇಶ ನೀಡಿದೆ.
