ವೈಟ್ ಹೌಸ್ ಕರೆಸ್ಪಾಂಡೆಂಟ್ಸ್ ಡಿನ್ನರ್ ವೇಳೆ ನಡೆದ ಗುಂಡಿನ ದಾಳಿಗೆ ಸಂಬಂಧಿಸಿದಂತೆ ಬಂದೂಕುಧಾರಿಯೊಬ್ಬ ಬರೆದಿದ್ದಾನೆ ಎನ್ನಲಾದ ‘ಘೋಷಣಾಪತ್ರ’ ಕುರಿತ ಪ್ರಶ್ನೆಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತೀವ್ರವಾಗಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸಂದರ್ಶನವೊಂದರಲ್ಲಿ ವರದಿಗಾರ್ತಿಯ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಅವರು, ತಮ್ಮ ಮೇಲಿನ ಆರೋಪಗಳನ್ನು ಬಲವಾಗಿ ತಳ್ಳಿಹಾಕಿದ್ದಾರೆ.
ಕಳೆದ ಶನಿವಾರ ರಾತ್ರಿ ವಾಷಿಂಗ್ಟನ್ನ ಹಿಲ್ಟನ್ ಹೋಟೆಲ್ನಲ್ಲಿ ನಡೆದ ಹೈ-ಪ್ರೊಫೈಲ್ ಕಾರ್ಯಕ್ರಮದ ಮೇಲೆ ಕ್ಯಾಲಿಫೋರ್ನಿಯಾ ಮೂಲದ ವ್ಯಕ್ತಿಯೊಬ್ಬ ಗುಂಡಿನ ದಾಳಿ ನಡೆಸಿದ್ದ. ಈ ದಾಳಿಕೋರ ಬರೆದಿದ್ದಾನೆ ಎನ್ನಲಾದ ಘೋಷಣಾಪತ್ರದಲ್ಲಿ “ಆಡಳಿತದ ಅಧಿಕಾರಿಗಳು” ತನ್ನ ಗುರಿ ಎಂದು ಉಲ್ಲೇಖಿಸಲಾಗಿತ್ತು. ಅಷ್ಟೇ ಅಲ್ಲದೆ, ಅದರಲ್ಲಿ “ಪೀಡೋಫೈಲ್ (ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ಎಸಗುವವ- ಶಿಶುಕಾಮಿ), ಅತ್ಯಾಚಾರಿ ಮತ್ತು ದ್ರೋಹಿ” ಎಂಬ ಪದಗಳನ್ನು ಬಳಸಲಾಗಿತ್ತು.
ಈ ಕುರಿತು ಪತ್ರಕರ್ತೆ ನೋರಾ ಓ’ಡೊನೆಲ್ ಅವರು ಸಂದರ್ಶನದಲ್ಲಿ ಘೋಷಣಾಪತ್ರದ ಸಾಲುಗಳನ್ನು ಓದಿದಾಗ ಟ್ರಂಪ್ ಕೆಂಡಾಮಂಡಲರಾದರು. “ನೀವಿದನ್ನು ಓದುತ್ತೀರಿ ಎಂದು ನನಗೆ ತಿಳಿದಿತ್ತು, ಏಕೆಂದರೆ ನೀವು ಕೆಟ್ಟ ಜನರು” ಎಂದು ಟ್ರಂಪ್ ಕಿಡಿಕಾರಿದರು. ಮುಂದುವರಿದು, “ನಾನು ಅತ್ಯಾಚಾರಿ ಅಲ್ಲ, ನಾನು ಯಾರನ್ನೂ ಅತ್ಯಾಚಾರ ಮಾಡಿಲ್ಲ. ನಾನು ಶಿಶುಕಾಮಿಯೂ ಕೂಡ ಅಲ್ಲ. ಯಾರೋ ಒಬ್ಬ ಮಾನಸಿಕ ರೋಗಿ ಬರೆದ ಕಸವನ್ನು ನೀವು ಓದುತ್ತಿದ್ದೀರಾ? ನಾನು ಎಲ್ಲಾ ಆರೋಪಗಳಿಂದ ಮುಕ್ತನಾಗಿದ್ದೇನೆ” ಎಂದು ಹರಿಹಾಯ್ದರು. ತನಿಖಾಧಿಕಾರಿಗಳು ಈ ಘೋಷಣಾಪತ್ರವನ್ನು ಪರಿಶೀಲಿಸುತ್ತಿದ್ದರೂ, ಮಾಧ್ಯಮಗಳು ಇದಕ್ಕೆ ಪ್ರಚಾರ ನೀಡಬಾರದು ಎಂದು ಅವರು ಆಗ್ರಹಿಸಿದರು.
ಇದನ್ನು ಓದಿದ್ದೀರಾ? ಕ್ಯಾಂಪಸ್ ರಾಜಕೀಯಕ್ಕೆ ಶಿಸ್ತಿನ ಕಡಿವಾಣ: ಲಿಂಗ್ಡೋ ಸಮಿತಿ ವರದಿಯ ಆಶಯ ಮತ್ತು ವಾಸ್ತವ
ಪ್ರಕರಣದ ತನಿಖೆ ನಡೆಯುತ್ತಿದ್ದು, ದಾಳಿಕೋರನನ್ನು ಕ್ಯಾಲಿಫೋರ್ನಿಯಾ ಮೂಲದ ವ್ಯಕ್ತಿ ಎಂದು ಗುರುತಿಸಲಾಗಿದೆ. ಈತ ಹಲವು ದಿನಗಳಿಂದ ಹೋಟೆಲ್ನಲ್ಲೇ ಉಳಿದು ಸಂಚು ರೂಪಿಸಿದ್ದ ಎಂಬ ವಿಚಾರ ತನಿಖೆಯಿಂದ ತಿಳಿದುಬಂದಿದೆ. ಹೋಟೆಲ್ನಲ್ಲಿ ಸಶಸ್ತ್ರ ಪಡೆಗಳ ಕೊರತೆ ಮತ್ತು ಕಣ್ಗಾವಲು ವ್ಯವಸ್ಥೆಯ ವೈಫಲ್ಯದ ಬಗ್ಗೆ ಆತ ತನ್ನ ಟಿಪ್ಪಣಿಯಲ್ಲಿ ಬರೆದಿದ್ದ ಎನ್ನಲಾಗಿದೆ. ಸರ್ಕಾರದ ಹಿರಿಯ ಅಧಿಕಾರಿಗಳನ್ನು ಗುರಿಯಾಗಿಸಿಕೊಂಡು ದೊಡ್ಡ ಮಟ್ಟದ ಹತ್ಯೆಗೆ ಆತ ಸಂಚು ರೂಪಿಸಿದ್ದ ಎಂದು ಅಧಿಕಾರಿಗಳು ಶಂಕಿಸಿದ್ದಾರೆ.
ಗುಂಡಿನ ದಾಳಿ ನಡೆದಾಗ ಸೀಕ್ರೆಟ್ ಸರ್ವಿಸ್ ಅಧಿಕಾರಿಗಳು ತಕ್ಷಣವೇ ಟ್ರಂಪ್ ಅವರನ್ನು ವೇದಿಕೆಯಿಂದ ಸುರಕ್ಷಿತವಾಗಿ ಕರೆದೊಯ್ದಿದ್ದರು. ಈ ಬಗ್ಗೆ ಮಾತನಾಡಿದ ಟ್ರಂಪ್, ತಮಗೇನೂ ಭಯವಾಗಲಿಲ್ಲ, ನಾವು ಹುಚ್ಚು ಜಗತ್ತಿನಲ್ಲಿ ಬದುಕುತ್ತಿದ್ದೇವೆ ಎಂದಿದ್ದಾರೆ. ಏನಾಗುತ್ತಿದೆ ಎಂದು ನೋಡುವ ಕುತೂಹಲದಿಂದ ವೇದಿಕೆ ಬಿಡಲು ತಾನು ಸ್ವಲ್ಪ ಹಿಂಜರಿದೆ, ಇದು ಭದ್ರತಾ ಸಿಬ್ಬಂದಿಗೆ ಸ್ವಲ್ಪ ತೊಂದರೆ ಉಂಟುಮಾಡಿರಬಹುದು ಎಂದು ಅವರು ಒಪ್ಪಿಕೊಂಡರು. ದಾಳಿಕೋರನನ್ನು ‘ಮಾನಸಿಕ ರೋಗಿ’ ಎಂದು ಕರೆದ ಟ್ರಂಪ್, ಇಂಟರ್ನೆಟ್ ಮೂಲಕ ಉಗ್ರಗಾಮಿ ಆಲೋಚನೆಗಳು ಹರಡುತ್ತಿರುವುದೇ ಇಂತಹ ಘಟನೆಗಳಿಗೆ ಕಾರಣ ಎಂದು ಅಭಿಪ್ರಾಯಪಟ್ಟರು. ಪ್ರಸ್ತುತ ಅಮೆರಿಕದ ತನಿಖಾ ಸಂಸ್ಥೆಗಳು ಈ ಪ್ರಕರಣದ ಎಲ್ಲಾ ಆಯಾಮಗಳನ್ನು ಪರಿಶೀಲಿಸುತ್ತಿದ್ದು, ಅಧ್ಯಕ್ಷರ ಭದ್ರತೆಯನ್ನು ಮತ್ತಷ್ಟು ಬಿಗಿಗೊಳಿಸಲಾಗಿದೆ.



