ವಿಜಯ್ ಅವರ ಅಂತಿಮ ಹೆಜ್ಜೆ ಅತ್ಯಂತ ನಿರ್ಣಾಯಕವಾಗಿದೆ. ಎಡಪಕ್ಷಗಳ ಬೆಂಬಲ ಪಡೆದು, ಕಾಂಗ್ರೆಸ್ ಷರತ್ತಿಗೆ ಒಪ್ಪಿ ಅವರು ದೆಹಲಿ ನಾಯಕರ ಹಸ್ತಕ್ಷೇಪದಿಂದ ಸ್ವತಂತ್ರವಾಗಿ ಉಳಿಯುತ್ತಾರೆಯೇ? ಅಥವಾ ರಾಜಕೀಯ ಅನಿವಾರ್ಯತೆಗಳಿಗೆ ಮಣಿದು ಎಐಎಡಿಎಂಕೆ ಮೂಲಕ ದೆಹಲಿಯ ಕಪಿಮುಷ್ಟಿಗೆ ಸಿಲುಕುತ್ತಾರೆಯೇ? ಎಂಬ ಪ್ರಶ್ನೆಗಳಿಗೆ ಮುಂಬರುವ ದಿನಗಳೇ ಉತ್ತರ ನೀಡಬೇಕಿದೆ
ತಮಿಳುನಾಡು ರಾಜಕೀಯ ಕಣದಲ್ಲಿ ಕ್ಷಣಕ್ಕೊಂದು ಹೊಸ ತಿರುವುಗಳು ಎದುರಾಗುತ್ತಿದ್ದು, ನಟ ಹಾಗೂ ರಾಜಕಾರಣಿ ಜೋಸೆಫ್ ವಿಜಯ್ ಅವರ ಟಿವಿಕೆ ಪಕ್ಷದ ಮುಂದಿನ ನಡೆ ತೀವ್ರ ಕುತೂಹಲ ಕೆರಳಿಸಿದೆ. ಇತ್ತೀಚಿನ ಮಹತ್ವದ ಬೆಳವಣಿಗೆಯಲ್ಲಿ, ಲೋಕಸಭಾ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ವಿಜಯ್ ಅವರೊಂದಿಗೆ ಮಾತುಕತೆ ನಡೆಸಿರುವುದು ರಾಜ್ಯ ರಾಜಕಾರಣದಲ್ಲಿ ಹೊಸ ಸಂಚಲನ ಮೂಡಿಸಿದೆ. ಚುನಾವಣಾ ಅಖಾಡದ ನಂತರದ ಈ ರಾಜಕೀಯ ಮೇಲಾಟಗಳು ದ್ರಾವಿಡ ನಾಡಿನಲ್ಲಿ ಹೊಸ ಸಮೀಕರಣಗಳಿಗೆ ಹಾಗೂ ಮೈತ್ರಿ ಲೆಕ್ಕಾಚಾರಗಳಿಗೆ ಮುನ್ನುಡಿ ಬರೆದಿವೆ.
ಈ ಕುತೂಹಲಕಾರಿ ವಿದ್ಯಮಾನಗಳ ನಡುವೆಯೇ, ವಿಜಯ್ ನೇತೃತ್ವದ ಪಕ್ಷಕ್ಕೆ ಅಖಿಲ ಭಾರತ ಅಣ್ಣಾ ದ್ರಾವಿಡ ಮುನ್ನೇತ್ರ ಕಳಗಂ (ಎಐಎಡಿಎಂಕೆ) ತನ್ನ ಬೆಂಬಲ ಹಸ್ತ ಚಾಚಿದೆ. ಮೇಲ್ನೋಟಕ್ಕೆ ಇದು ಕೇವಲ ಎರಡು ಪ್ರಾದೇಶಿಕ ಪಕ್ಷಗಳ ನಡುವಿನ ಹೊಂದಾಣಿಕೆಯಂತೆ ಕಂಡರೂ, ಇದರ ಹಿಂದಿರುವ ರಾಜಕೀಯ ಲೆಕ್ಕಾಚಾರಗಳೇ ಬೇರೆ. ರಾಜಕೀಯ ವಿಶ್ಲೇಷಕರ ಪ್ರಕಾರ, ಒಂದು ವೇಳೆ ವಿಜಯ್ ಅವರು ಎಐಎಡಿಎಂಕೆ ನೀಡುತ್ತಿರುವ ಈ ಬೆಂಬಲವನ್ನು ಸ್ವೀಕರಿಸಿದ್ದೇ ಆದಲ್ಲಿ, ಅವರು ಪರೋಕ್ಷವಾಗಿ ಬಿಜೆಪಿ ನಿಯಂತ್ರಣಕ್ಕೆ ಸಿಲುಕಿದಂತೆಯೇ ಲೆಕ್ಕ.
ಪ್ರಸ್ತುತ ನಿರ್ಮಾಣವಾಗಿರುವ ಈ ರಾಜಕೀಯ ಬಿಕ್ಕಟ್ಟು ವಿಜಯ್ ಪಾಲಿಗೆ ಅಕ್ಷರಶಃ ಅಗ್ನಿಪರೀಕ್ಷೆಯ ಸಮಯವಾಗಿದೆ. ತಮ್ಮ ರಾಜಕೀಯ ಪ್ರವೇಶದ ದಿನದಿಂದಲೂ ದೆಹಲಿ ನಾಯಕರ ಹಸ್ತಕ್ಷೇಪ ಹಾಗೂ ಕೇಂದ್ರದ ಆಡಳಿತ ವೈಖರಿಯನ್ನು ವಿಜಯ್ ತೀವ್ರವಾಗಿ ವಿರೋಧಿಸುತ್ತಲೇ ಬಂದಿದ್ದಾರೆ. ರಾಜ್ಯದ ಸ್ವಾಯತ್ತತೆಯ ಪರವಾಗಿ ಸದಾ ಧ್ವನಿಯೆತ್ತಿದ್ದ ಅವರ ಅಸಲಿಯತ್ತನ್ನು ಈಗ ಕಾಲವೇ ಪರೀಕ್ಷೆಗೆ ಒಡ್ಡಿದೆ. ಈ ಸಂದರ್ಭದಲ್ಲಿ ಅವರು ತೆಗೆದುಕೊಳ್ಳುವ ನಿರ್ಧಾರವು, ಅಧಿಕಾರಕ್ಕಾಗಿ ಅವರು ಎಷ್ಟರಮಟ್ಟಿಗೆ ರಾಜಿ ಮಾಡಿಕೊಳ್ಳುತ್ತಾರೆ ಅಥವಾ ತಮ್ಮ ಸೈದ್ಧಾಂತಿಕ ಬದ್ಧತೆಗೆ ಅಂಟಿಕೊಳ್ಳುತ್ತಾರೆ ಎಂಬುದನ್ನು ಒರೆಗೆ ಹಚ್ಚಲಿದೆ.
ಈ ಕ್ಲಿಷ್ಟಕರ ಪರಿಸ್ಥಿತಿಯಲ್ಲಿ ಕಾಂಗ್ರೆಸ್ ಪಕ್ಷವು ವಿಜಯ್ ಅವರಿಗೆ ಷರತ್ತುಬದ್ಧ ಬೆಂಬಲದ ವಾಗ್ದಾನವನ್ನು ಮುಂದಿಟ್ಟಿದೆ. “ಯಾವುದೇ ಕಾರಣಕ್ಕೂ ನೀವು ಬಿಜೆಪಿ ಅಥವಾ ಅದರ ಮಿತ್ರಪಕ್ಷಗಳ ಬೆಂಬಲವನ್ನು ಕೇಳಬಾರದು ಮತ್ತು ಪಡೆಯಬಾರದು” ಎಂಬ ಕಟ್ಟುನಿಟ್ಟಿನ ಷರತ್ತನ್ನು ಕಾಂಗ್ರೆಸ್ ವಿಧಿಸಿದೆ. ಈ ಮೂಲಕ ತಮಿಳುನಾಡಿನಲ್ಲಿ ಬಿಜೆಪಿಯ ಪರೋಕ್ಷ ಪ್ರಭಾವವನ್ನು ತಡೆಯುವ ಕಾರ್ಯತಂತ್ರವನ್ನು ಕಾಂಗ್ರೆಸ್ ಹೆಣೆದಿದ್ದು, ವಿಜಯ್ ಅವರನ್ನು ಜಾತ್ಯತೀತ ಪಾಳೆಯದಲ್ಲಿಯೇ ಭದ್ರವಾಗಿ ಉಳಿಸಿಕೊಳ್ಳುವ ಗಂಭೀರ ಪ್ರಯತ್ನ ನಡೆಸಿದೆ. ಟಿವಿಕೆಯು(108) ಕಾಂಗ್ರೆಸ್(5), ಎಡ ಪಕ್ಷಗಳು(4), ವಿಸಿಕೆ(2), ಮುಸ್ಲಿಂ ಲೀಗ್(2) ಪಕ್ಷಗಳ ಬೆಂಬಲ ಪಡೆದರೆ ಬಹುಮತದ ಸಂಖ್ಯೆ 118 ದಾಟಿ 121 ಮುಟ್ಟುತ್ತದೆ.
ಇದನ್ನು ಓದಿದ್ದೀರಾ? ಗಲ್ಲಾಪೆಟ್ಟಿಗೆಯಿಂದ ಮತಪೆಟ್ಟಿಗೆ; ಜೋಸೆಫ್ ವಿಜಯ್ ಎಂಬ ಹೀರೋವಿನ ಸೂಪರ್ ಡ್ಯೂಪರ್ ಹಿಟ್ ರಾಜಕೀಯ ಪ್ರವೇಶ!
ಮತ್ತೊಂದೆಡೆ, ಈ ಎಲ್ಲ ಷರತ್ತುಗಳು, ಆಮಿಷಗಳು ಮತ್ತು ಒತ್ತಡಗಳ ನಡುವೆ ವಿಜಯ್ ಅವರು ಪ್ರಸ್ತುತ ಎಡಪಕ್ಷಗಳ ಬೆಂಬಲವನ್ನು ಕೋರಿದ್ದಾರೆ. ತಮ್ಮ ಪಕ್ಷದ ಸೈದ್ಧಾಂತಿಕ ನೆಲೆಗಟ್ಟನ್ನು ಸ್ಪಷ್ಟಪಡಿಸಿಕೊಳ್ಳಲು ಮತ್ತು ಜನಪರ ನಿಲುವನ್ನು ಪ್ರದರ್ಶಿಸಲು ಕಮ್ಯುನಿಸ್ಟ್ ಪಕ್ಷಗಳ ಬೆಂಬಲ ಸೂಕ್ತ ಎಂಬುದನ್ನು ಅರಿತಿರುವ ಅವರು, ಎಡಪಕ್ಷಗಳ ನಾಯಕರೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದಾರೆ. ಸೈದ್ಧಾಂತಿಕವಾಗಿ ಬಿಜೆಪಿಯನ್ನು ವಿರೋಧಿಸುವ ನಿಟ್ಟಿನಲ್ಲಿ ಎಡಪಕ್ಷಗಳೊಂದಿಗಿನ ಒಡನಾಟ ಅವರಿಗೆ ಸುರಕ್ಷಿತ ಹೆಜ್ಜೆಯಾಗಿ ತೋರುತ್ತಿದೆ.
ಈ ನಡುವೆ, ವಿಜಯ್ ಅವರ ಆಪ್ತ ಸಹಾಯಕರು ಎಐಎಡಿಎಂಕೆ ನಾಯಕ ಎಡಪ್ಪಾಡಿ ಕೆ. ಪಳನಿಸ್ವಾಮಿ (ಇಪಿಎಸ್) ಅವರನ್ನು ಭೇಟಿಯಾಗಿರುವುದು ರಾಜಕೀಯ ವಲಯಗಳಲ್ಲಿ ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ. ಮೈತ್ರಿಯ ಕುರಿತು ಮಾತುಕತೆ ನಡೆದು ಟಿವಿಕೆ ಪಕ್ಷಕ್ಕೆ ಎಐಎಡಿಎಂಕೆ ಬೆಂಬಲ ನೀಡುವ ಸಾಧ್ಯತೆಗಳು ದಟ್ಟವಾಗಿವೆಯಾದರೂ, ಆ ಪಕ್ಷದೊಳಗಿನ ಕೆಲವು ನಾಯಕರಲ್ಲಿ ಇದು ಅಸಮಾಧಾನ ಮೂಡಿಸಿದೆ.
ಇವೆಲ್ಲ ಬೆಳವಣಿಗೆಗಳನ್ನು ಗಮನಿಸಿದರೆ ತಮಿಳುನಾಡು ರಾಜಕಾರಣದ ಈ ಬಿಕ್ಕಟ್ಟಿನಲ್ಲಿ ವಿಜಯ್ ಅವರ ಅಂತಿಮ ಹೆಜ್ಜೆ ಅತ್ಯಂತ ನಿರ್ಣಾಯಕವಾಗಿದೆ. ಎಡಪಕ್ಷಗಳ ಬೆಂಬಲ ಪಡೆದು, ಕಾಂಗ್ರೆಸ್ ಷರತ್ತಿಗೆ ಒಪ್ಪಿ ಅವರು ದೆಹಲಿ ನಾಯಕರ ಹಸ್ತಕ್ಷೇಪದಿಂದ ಸ್ವತಂತ್ರವಾಗಿ ಉಳಿಯುತ್ತಾರೆಯೇ? ಅಥವಾ ರಾಜಕೀಯ ಅನಿವಾರ್ಯತೆಗಳಿಗೆ ಮಣಿದು ಎಐಎಡಿಎಂಕೆ ಮೂಲಕ ದೆಹಲಿಯ ಕಪಿಮುಷ್ಟಿಗೆ ಸಿಲುಕುತ್ತಾರೆಯೇ? ಎಂಬ ಪ್ರಶ್ನೆಗಳಿಗೆ ಮುಂಬರುವ ದಿನಗಳೇ ಉತ್ತರ ನೀಡಬೇಕಿದೆ. ದ್ರಾವಿಡ ರಾಜಕಾರಣದ ಭವಿಷ್ಯ ಈಗ ವಿಜಯ್ ನಿರ್ಧಾರದ ಮೇಲಿದೆ.
