ದಿನಕ್ಕೊಂದರಂತೆ ಯುದ್ಧದ ಕತೆ ಹೇಳುವ ಟ್ರಂಪ್ ಈಗ ಹೊಸಕತೆ ಹೇಳಲು ಶುರು ಮಾಡಿದ್ದಾರೆ. ಇರಾನ್ ಮೇಲೆ ಆಕ್ರಮಣ ಮಾಡಲು ಕಾರಣಗಳೇನು ಎಂಬ ಪ್ರಶ್ನೆಗೆ ನಿತ್ಯವೂ ಹೊಸ ಉತ್ತರ ನೀಡುತ್ತಿದ್ದ ಟ್ರಂಪ್ ಹಾಗೂ ಅವರ ಆಪ್ತ ವಲಯ.
ಈಗ ಟ್ರಂಪ್ ಯುದ್ಧ ಮಾಡುವಂತೆ ಪ್ರೇರಣೆ ಮಾಡಿದ್ದು ತಮ್ಮ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗೆತ್ಸ್ ಎಂದು ಅವರ ಮೇಲೆ ಗಂಭೀರ ಆರೋಪ ಮಾಡಿದ್ದಾರೆ. ಇರಾನ್ ಅಣ್ವಸ್ತ್ರ ತಯಾರಿಕೆಯನ್ನು ತಡೆಯಬೇಕು ಹಾಗಾಗಿ ಇರಾನ್ ಮೇಲೆ ಯುದ್ಧ ಸಾರೋಣ ಎಂದು ಪೀಟ್ ಹೇಳಿದ್ದರು ಎಂದ ಟ್ರಂಪ್.
ಮಧ್ಯ ಪ್ರಾಚ್ಯ ಸಂಘರ್ಷ ತೀವ್ರಗೊಂಡ ಬೆನ್ನಲ್ಲೇ ಐದು ದಿನದ ಕದನ ವಿರಾಮ ಘೋಷಿಸಿಕೊಂಡ ಟ್ರಂಪ್ ಇರಾನಿನ ಜೊತೆ ಮಾತುಕತೆಗೆ ಮುಂದಾಗುವುದಾಗಿ ಹೇಳಿದರು. ಇದಾದ ಬಳಿಕ ದುಂಡು ಮೇಜಿನ ಸಭೆ ನಡೆಸಿದ ಟ್ರಂಪ್ ತಮ್ಮ ಪಕ್ಕದಲ್ಲಿಯೇ ಇದ್ದ ಪೀಟ್ ಹೆಗೆತ್ಸ್ ಕಡೆ ಬೆರಳು ಮಾಡಿ ಯುದ್ಧ ಮಾಡುವಂತೆ ಪ್ರೇರೇಪಿಸಿದ್ದು ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಎಂದು ಹೇಳಿಕೆ ನೀಡಿದ್ದಾರೆ.
ಅಮೆರಿಕದ ಟೆನ್ನೆಸ್ಸೀ ರಾಜ್ಯದ ಮೆಂಫಿಸ್ನಲ್ಲಿ ನಡೆದ ದುಂಡು ಮೇಜಿನ ಸಭೆಯಲ್ಲಿ ಮಾತನಾಡಿದ ಟ್ರಂಪ್ ಇರಾನ್ ಮೇಲಿನ ಯುದ್ಧ ಆರಂಭವಾದದ್ದು ಹೇಗೆ ಎಂಬುದರ ಕುರಿತಾಗಿ ಬೇರೆ ಕತೆ ಹೇಳಿದ್ದಾರೆ. ಮಧ್ಯ ಪ್ರಾಚ್ಯದ ಸಮಸ್ಯೆಯ ಕುರಿತು ನಾನು ಪೀಟ್ ಹಾಗೂ ಕೇನ್ ಜೊತೆಗೆ ಚರ್ಚಿಸುವಾಗ ಮಧ್ಯಪ್ರಾಚ್ಯದಲ್ಲಿ ಸೃಷ್ಟಿಯಾಗಿರುವ ಸಮಸ್ಯೆಯನ್ನು ಬಗೆಹರಿಸಲು ನಿರ್ಧರಿಸಿದೆವು ಎಂದಿದ್ದಾರೆ.
ಇರಾನ್ ಮೇಲೆ ದಾಳಿ ಮಾಡುವ ಕುರಿತು ಮೊದಲು ಸೂಚಿಸಿದ್ದೇ ಪೀಟ್ ಹಗೆತ್ಸ್, ಇರಾನ್ ಒಂದು ಭಯೋತ್ಪಾದಕ ದೇಶ ಅದು ಪರಮಾಣು ಶಕ್ತಿ ಪಡೆಯದಂತೆ ತಡೆಯಬೇಕು ಎಂದು ಪೀಟ್ ಸಲಹೆ ನೀಡಿದರು ಎಂದು ಟ್ರಂಪ್ ತಮ್ಮ ರಕ್ಷಣಾ ಕಾರ್ಯದರ್ಷಿಯ ಕಡೆಗೆ ಬೊಟ್ಟು ಮಾಡಿದ್ದಾರೆ.
ಇರಾನ್ ನಕಾರ: ಇನ್ನೂ ಟ್ರಂಪ್ ಜೊತೆಗೆ ಮಾತುಕತೆಯನ್ನು ಇರಾನ್ ನಿರಾಕರಿಸಿದೆ. ಅಮೆರಿಕ ಜೊತೆಗೆ ಯಾವ ಒಪ್ಪಂದವನ್ನು ಮಾಡಿಕೊಂಡಿಲ್ಲ. ನಾವು ಕದನ ವಿರಾಮ ಘೋಷಿಸಿಕೊಂಡಿಲ್ಲ, ಮೊಜ್ತಬಾ ಖಮೇನಿ ನೇತೃತ್ವದಲ್ಲಿ ಇಸ್ರೇಲ್ ಮೇಲಿನ ದಾಳಿಯನ್ನು ಮುಂದುವರೆಯುವುದು ಎಂದು ಹೇಳಿರುವ ಇರಾನ್ ಮಧ್ಯಪ್ರಾಚ್ಯದ ರಾಷ್ಟ್ರಗಳ ಮೇಲೆ ನಿರಂತರ ದಾಳಿ ನಡೆಸುತ್ತಿದೆ, ಇತ್ತ ಟ್ರಂಪ್ ಒಬ್ಬ ಪುಕ್ಕಲು ದೊರೆ ಎಂದು ಇರಾನಿನ ಮಾಧ್ಯಮಗಳು ಟೀಕಿಸುತ್ತಿವೆ.
