ಪ್ರಾಣಿ ಸಂಕುಲದ ರಕ್ಷಣೆ ಮಾಡುವುದು ಕೇವಲ ದಯೆ ಅಥವಾ ದಾನದ ಕಾರ್ಯವಲ್ಲ, ಬದಲಿಗೆ ಅದು ನಮ್ಮ ಸಾಂವಿಧಾನಿಕ ನೈತಿಕತೆಯ ದೃಢೀಕರಣವಾಗಿದೆ ಎಂದು ಕರ್ನಾಟಕ ಹೈಕೋರ್ಟ್ ಕೇಳಿದೆ. ತನ್ನ ಮಾಲೀಕನ ವಶದಲ್ಲಿದ್ದಾಗ ಕ್ರೌರ್ಯಕ್ಕೆ ಒಳಗಾಗಿದ್ದ 9 ಸಾಕು ನಾಯಿಗಳನ್ನು ಆತನಿಗೆ ಮರಳಿಸುವ ಆದೇಶವನ್ನು ರದ್ದುಗೊಳಿಸಿದೆ. ನಾಯಿಗಳ ಸಲಹುವ ಹೊಣೆಯನ್ನು ಎನ್ಜಿಒಗಳಿಗೆ ಹಸ್ತಾಂತರಿಸಿದೆ.
ಬೆಂಗಳೂರಿನ ನಾಗಸಂದ್ರ ನಿವಾಸಿ ಕೆ.ಇ ರಮೇಶ್ ಎಂಬಾತ ತಾನು ಸಾಕಿದ್ದ ನಾಯಿಗಳ ಮೇಲೆ ನಿರಂತರವಾಗಿ ಕ್ರೌರ್ಯ ನಡೆಸುತ್ತಿದ್ದ. ಆತನ ಕ್ರೌರ್ಯವನ್ನು ಗಮನಿಸಿದ್ದ ನೆರೆಹೊರೆಯವರ ದೂರಿನ ಮೇರೆಗೆ ‘PETA ಇಂಡಿಯಾ’ ಸಂಘಟನೆಯು 2026ರ ಫೆಬ್ರವರಿಯಲ್ಲಿ ರಮೇಶ್ ವಿರುದ್ಧ ಪೀಣ್ಯ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿತ್ತು. ದೂರಿನಲ್ಲಿ, ರಮೇಶ್ ತನ್ನ ಮನೆಯಲ್ಲಿರುವ ನಾಯಿಗಳನ್ನು ಪದೇ-ಪದೇ ಹೊಡೆಯುವುದು, ಲೈಂಗಿಕ ಕಿರುಕುಳ ನೀಡುವುದು ಸೇರಿದಂತೆ ನಾನಾ ರೀತಿಯಲ್ಲಿ ಹಿಂಸಿಸುತ್ತಿದ್ದಾನೆ ಎಂದು ಆರೋಪಿಸಿತ್ತು. ಆರೋಪಗಳಿಗೆ ಪೂರಕವಾದ ವಿಡಿಯೋ ಮತ್ತು ಫೋಟೋಗಳನ್ನೂ ಒದಗಿಸಿತ್ತು.
PETA ಇಂಡಿಯಾ ನೀಡಿದ ದೂರಿನ ಆಧಾರದ ಮೇಲೆ ಪೊಲೀಸರು ಫೆಬ್ರವರಿ 18ರಂದು ಎಫ್ಐಆರ್ ದಾಖಲಿಸಿದ್ದರು. ನಾಯಿಗಳನ್ನು ರಮೇಶ್ ಮನೆಯಿಂದ ರಕ್ಷಿಸಿದ್ದರು. ಬಳಿಕ, PETA ಮತ್ತು Compassion Unlimited Plus Action (CUPA) ಸೇರಿದಂತೆ ಇತರ ಪ್ರಾಣಿ ಕಲ್ಯಾಣ ಸಂಘಟನೆಗಳು ನಾಯಿಗಳನ್ನು ತಮ್ಮ ವಶಕ್ಕೆ ತೆಗೆದುಕೊಂಡು ಅವುಗಳಿಗೆ ಸುರಕ್ಷಿತ ಪುನರ್ವಸತಿ ನೀಡಿದ್ದವು. ಮಾಲೀಕನು ಆರಂಭದಲ್ಲಿ ನಾಯಿಗಳನ್ನು ತ್ಯಜಿಸಿದ್ದರೂ, ನಂತರ ಮ್ಯಾಜಿಸ್ಟ್ರೇಟ್ ಕೋರ್ಟ್ನಲ್ಲಿ ತಾತ್ಕಾಲಿಕ ವಶಕ್ಕೆ ಅರ್ಜಿ ಸಲ್ಲಿಸಿದ್ದರು.
ಆತನ ಅರ್ಜಿಯನ್ನು ವಿಚಾರಣೆ ನಡೆಸಿದ್ದ ಬೆಂಗಳೂರಿನ ಮೆಟ್ರೋಪಾಲಿಟನ್ ಮ್ಯಾಜಿಸ್ಟ್ರೇಟ್ ಕೋರ್ಟ್, ನಾಯಿಗಳನ್ನು ಮಾಲೀಕರನ ಸುಪರ್ದಿಗೆ ಹಿಂದಿರುಗಿಸುವಂತೆ ಏಪ್ರಿಲ್ 25ರಂದು ಆದೇಶಿಸಿತ್ತು. ಈ ಆದೇಶವನ್ನು ಪ್ರಶ್ನಿಸಿ PETA ಸಂಘಟನೆಯು ಹೈಕೋರ್ಟ್ ಮೆಟ್ಟಿಲೇರಿತ್ತು. ಅರ್ಜಿಯ ವಿಚಾರಣೆ ನಡೆಸಿರುವ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರ ಏಕಸದಸ್ಯ ಪೀಠವು, ಮ್ಯಾಜಿಸ್ಟ್ರೇಟ್ ಆದೇಶವನ್ನು ಸಂಪೂರ್ಣವಾಗಿ ರದ್ದುಗೊಳಿಸಿದೆ.
“ಪ್ರಾಣಿಗಳನ್ನು ಕೇವಲ ಮಾನವರ ಆಸ್ತಿ ಎಂದು ಪರಿಗಣಿಸಬಾರದು. ಅವು ಸಂವೇದನಾಶೀಲ ಜೀವಿಗಳಾಗಿವೆ. ಅವುಗಳಿಗೆ ಘನತೆ, ಕರುಣೆ ಮತ್ತು ಕ್ರೌರ್ಯದಿಂದ ರಕ್ಷಣೆ ಪಡೆಯುವ ಹಕ್ಕಿದೆ. ನಾಗರಿಕ ಸಮಾಜವನ್ನು ಕೇವಲ ಮನುಷ್ಯ ತನ್ನ ಸಹ ಮಾನವರನ್ನು ಹೇಗೆ ನಡೆಸಿಕೊಳ್ಳುತ್ತಾರೆ ಎಂಬುದರಿಂದ ಮಾತ್ರವಲ್ಲ, ತನ್ನ ಪರಿಸರದಲ್ಲಿ ವಾಸಿಸುವ ಮಾತನಾಡಲಾಗದ ಜೀವಿಗಳಿಗೆ ಕರುಣೆ ಮತ್ತು ನ್ಯಾಯವನ್ನು ಹೇಗೆ ವಿಸ್ತರಿಸುತ್ತದೆ ಎಂಬುದರಿಂದಲೂ ನೋಡಲಾಗುತ್ತದೆ” ಎಂದು ನ್ಯಾಯಾಲಯ ಒತ್ತಿ ಹೇಳಿದೆ.
ಈ ಲೇಖನ ಓದಿದ್ದೀರಾ?: ವಿದ್ಯುತ್ ಖಾಸಗೀಕರಣ: ಉಚಿತ ಯೋಜನೆಗಳ ಅಂತ್ಯಕ್ಕೆ ನಾಂದಿ
“ಪ್ರಾಣಿಗಳ ಮೇಲಿನ ಪ್ರತಿಯೊಂದು ಕ್ರೌರ್ಯದ ಕೃತ್ಯವು ಕೇವಲ ಒಂದು ಸಂವೇದನಾಶೀಲ ಜೀವಿಗೆ ಗಾಯ ಮಾಡುವುದಲ್ಲ, ಬದಲಿಗೆ ಸಾಮೂಹಿಕ ಮಾನವ ಅಂತಃಕರಣಕ್ಕೆ ಕಳಂಕ ಉಂಟುಮಾಡುತ್ತದೆ. ಪ್ರಾಣಿಗಳು ಮಾನವರಂತೆ ಮಾತನಾಡಲು ಸಾಧ್ಯವಿಲ್ಲದಿದ್ದರೂ ಅವು ನೋವು ಮತ್ತು ಕಷ್ಟ ಅನುಭವಿಸುತ್ತವೆ. ಪ್ರಾಣಿ ಜೀವನದ ರಕ್ಷಣೆಯು ಕೇವಲ ದಯೆ ಅಥವಾ ದಾನದ ಕಾರ್ಯವಲ್ಲ. ಅದು ನಮ್ಮ ಸಾಂವಿಧಾನಿಕ ನೈತಿಕತೆಯೂ ಆಗಿದೆ” ಎಂದು ಕೋರ್ಟ್ ಹೇಳಿದೆ.
ಮ್ಯಾಜಿಸ್ಟ್ರೇಟ್ ಕೋರ್ಟ್ನ ಆದೇಶವನ್ನು ಅಸಂಬದ್ಧ ಮತ್ತು ಅತ್ಯಂತ ಆಶ್ಚರ್ಯಕರ ಎಂದು ವರ್ಣಿಸಿದ ಹೈಕೋರ್ಟ್, “ಲೈಂಗಿಕ ಕಿರುಕುಳದ ಆರೋಪದ ತನಿಖೆ ಇನ್ನೂ ನಡೆಯುತ್ತಿರುವಾಗ ನಾಯಿಗಳನ್ನು ಆರೋಪಿತನಿಗೆ ಹಿಂದಿರುಗಿಸುವುದು ಸಂಪೂರ್ಣವಾಗಿ ಅಸಾಧ್ಯ” ಎಂದು ಕೋರ್ಟ್ ಹೇಳಿದೆ.
