ತನ್ನ ಲಿವ್-ಇನ್ ಸಂಬಂಧವನ್ನು ವಿರೋಧಿಸಿದರೆಂದು ಹೆತ್ತ ತಂದೆ-ತಾಯಿ ಮತ್ತು ಕಿರಿಯ ಸಹೋದರಿಯನ್ನು ಮಗಳೇ ತನ್ನ ಗೆಳೆಯನೊಂದಿಗೆ ಸೇರಿ ಬರ್ಬರವಾಗಿ ಹತ್ಯೆಗೈದಿರುವ ಘಟನೆ ಬೆಂಗಳೂರಿನ ಸೀಗೆಹಳ್ಳಿಯ ಡೊಮಿನಿಕ್ ಲೇಔಟ್‌ನಲ್ಲಿರುವ ‘ಸಾಯಿ ಗ್ರೀನ್ ಹೋಮ್ಸ್’ ಅಪಾರ್ಟ್‌ಮೆಂಟ್‌ನಲ್ಲಿ ನಡೆದಿದೆ.
ಸಾಫ್ಟ್‌ವೇರ್‌ ಉದ್ಯೋಗಿ ಸೋಮಸುಂದರ್ (52), ಪತ್ನಿ ಮುತ್ತುಲಕ್ಷ್ಮಿ (48) ಮತ್ತು ಕಿರಿಯ ಮಗಳು ಸುಪ್ರಿಯಾ (19) ಮೃತಪಟ್ಟವರು.
ಆರೋಪಿ ಶ್ವೇತಾ (24) ಮತ್ತು ಆಕೆಯ ಗೆಳೆಯ ಕೆನೆತ್ ಕಳೆದ ಎರಡು ತಿಂಗಳಿನಿಂದ ಸೀಗೆಹಳ್ಳಿಯ ಈ ಅಪಾರ್ಟ್‌ಮೆಂಟ್‌ನಲ್ಲಿ ‘ಲಿವ್-ಇನ್’ ಸಂಬಂಧದಲ್ಲಿದ್ದರು. ಶ್ವೇತಳ ಈ ಸಂಬಂಧಕ್ಕೆ ಆಕೆಯ ಪೋಷಕರು ತೀವ್ರ ವಿರೋಧ ವ್ಯಕ್ತಪಡಿಸಿದ್ದರು. ಈ ವಿಷಯವಾಗಿ ಮಾತುಕತೆ ನಡೆಸಲು ಶ್ವೇತಾಳ ಪೋಷಕರು ಮತ್ತು ತಂಗಿ ಶನಿವಾರ ಆಕೆಯ ಮನೆಗೆ ಬಂದಿದ್ದರು.
ಸೋಮವಾರ ಸಂಜೆ 7:30ರ ಸುಮಾರಿಗೆ ಶ್ವೇತಾ, ಆಕೆಯ ಗೆಳೆಯ ಕೆನೆತ್ ಮತ್ತು ಪೋಷಕರ ನಡುವೆ ತೀವ್ರ ವಾಗ್ವಾದ ನಡೆದಿದೆ. ಈ ಕಲಹ ವಿಕೋಪಕ್ಕೆ ತಿರುಗಿ, ಶ್ವೇತಾ ಮತ್ತು ಕೆನೆತ್ ಚಾಕುವಿನಂತಹ ಮಾರಕಾಸ್ತ್ರಗಳಿಂದ ಮೂವರ ಮೇಲೆ ದಾಳಿ ನಡೆಸಿದ್ದಾರೆ. ತೀವ್ರವಾಗಿ ಗಾಯಗೊಂಡಿದ್ದ ಮುತ್ತುಲಕ್ಷ್ಮಿ, ಸುಪ್ರಿಯಾ ಹಾಗೂ ಸೋಮಸುಂದರ್ ಪ್ರಾಣಕಳೆದುಕೊಂಡಿದ್ದಾರೆ.
ಅಪಾರ್ಟ್‌ಮೆಂಟ್‌ನ ಭದ್ರತಾ ಸಿಬ್ಬಂದಿ ವೀರ ಬಹದ್ದೂರ್ ಅವರ ಪ್ರಕಾರ, ಶ್ವೇತಾ ತನ್ನ ಪೋಷಕರನ್ನು ಶನಿವಾರ ಪ್ರೀತಿಯಿಂದಲೇ ಮನೆಗೆ ಕರೆದೊಯ್ದಿದ್ದಳು. ಬಳಿಕ ಸೋಮವಾರ ಸಂಜೆ ಶ್ವೇತಾ ವಾಕ್ ಮುಗಿಸಿ ಮನೆಗೆ ಬಂದ ನಂತರವೇ ಈ ಘಟನೆ ನಡೆದಿದೆ. ರಾತ್ರಿ 9 ಗಂಟೆ ಸುಮಾರಿಗೆ ವಿಷಯ ಬೆಳಕಿಗೆ ಬಂದಿದ್ದು, ಈ ಅಂತರದಲ್ಲಿ ಆರೋಪಿಗಳಿಬ್ಬರೂ ಸ್ಥಳದಿಂದ ಪರಾರಿಯಾಗಿದ್ದಾರೆ.
ಇದನ್ನೂ ಓದಿ: ಚುರುಕಾಗಲಿದೆ ಮುಂಗಾರು ಮಳೆ ಅಬ್ಬರ; ಕರ್ನಾಟಕದಲ್ಲಿ 4 ದಿನ ಭಾರೀ ಮಳೆ: ಹವಾಮಾನ ಇಲಾಖೆ
ವೈಟ್‌ಫೀಲ್ಡ್ ವಿಭಾಗದ ಡಿಸಿಪಿ ಸೈದುಲು ಅಡಾವತ್ ಮಾತನಾಡಿ, “ಆರೋಪಿಗಳು ಮತ್ತು ಮೃತರು ಮನೆಯಲ್ಲಿದ್ದಾಗ ವಾಗ್ವಾದ ನಡೆದು ಹಲ್ಲೆ ನಡೆದಿದೆ. ಮೃತರೆಲ್ಲರನ್ನೂ ಮಾರಕಾಸ್ತ್ರದಿಂದ ಇರಿದು ಕೊಲೆ ಮಾಡಲಾಗಿದೆ. ಆರೋಪಿಗಳ ಪತ್ತೆಗೆ ವಿಶೇಷ ಪೊಲೀಸ್ ತಂಡಗಳನ್ನು ರಚಿಸಲಾಗಿದೆ,” ಎಂದು ತಿಳಿಸಿದ್ದಾರೆ.
ಕೆ.ಆರ್. ಪುರಂ ಪೊಲೀಸ್ ಠಾಣೆಯಲ್ಲಿ ಕೊಲೆ ಪ್ರಕರಣ ದಾಖಲಾಗಿದ್ದು, ಆರೋಪಿಗಳು ಸಿಕ್ಕ ಬಳಿಕವಷ್ಟೇ ಕೊಲೆಗೆ ನಿಖರವಾದ ಕಾರಣ ಮತ್ತು ಘಟನೆಯ ಸಂಪೂರ್ಣ ವಿವರ ತಿಳಿಯಲಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
