ಮಂಗಳೂರಿನ ಆರ್‌ಟಿಐ ಕಾರ್ಯಕರ್ತ ವಿನಾಯಕ ಬಾಳಿಗಾ ಅವರ ಬರ್ಬರ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಹತ್ವದ ಮಾಹಿತಿಯೊಂದು ಹೊರಬಿದ್ದಿದ್ದು, ಹತ್ಯೆ ನಡೆಯುವುದಕ್ಕೂ ಮುನ್ನ ಪ್ರಮುಖ ಆರೋಪಿ ನರೇಶ್ ಶೆಣೈ ದೇವಸ್ಥಾನದ ₹24 ಲಕ್ಷ ‘ರಥ ಕಾಣಿಕೆ’ ಹಣವನ್ನು ತಮ್ಮ ಮನೆಗೆ ಕೊಂಡೊಯ್ದಿದ್ದರು ಎಂಬ ಅಂಶ ನ್ಯಾಯಾಲಯದ ದಾಖಲೆಗಳಿಂದ ಬಹಿರಂಗವಾಗಿದೆ ಎಂದು ‘ಬಿಎಲ್‌ಆರ್ ಪೋಸ್ಟ್’ (blrpost.com) ವರದಿ ಮಾಡಿದೆ.
2016ರ ಫೆಬ್ರವರಿಯಲ್ಲಿ ಮಂಗಳೂರಿನ ರಥಬೀದಿಯ ಶ್ರೀ ವೆಂಕಟರಮಣ ದೇವಸ್ಥಾನದ ವಾರ್ಷಿಕ ರಥೋತ್ಸವದ ಸಂದರ್ಭದಲ್ಲಿ ಈ ಘಟನೆ ನಡೆದಿತ್ತು. ಕಾಶಿ ಮಠದ ಭಕ್ತರು ಮಠಾಧೀಶರಾದ ಶ್ರೀಮತ್ ಸಂಯಮೀಂದ್ರ ತೀರ್ಥ ಸ್ವಾಮೀಜಿಯವರಿಗೆ ಸಮರ್ಪಿಸಲು ನೀಡಿದ್ದ ‘ರಥ ಕಾಣಿಕೆ’ಯ ಒಟ್ಟು ₹24 ಲಕ್ಷ ಮೊತ್ತವನ್ನು ನರೇಶ್ ಶೆಣೈ ತಮ್ಮ ಬೆಂಬಲಿಗರೊಂದಿಗೆ ಇನ್ನೋವಾ ಕಾರಿನಲ್ಲಿ ನೇರವಾಗಿ ತಮ್ಮ ಮನೆಗೆ ತೆಗೆದುಕೊಂಡು ಹೋಗಿದ್ದರು ಎಂದು 2017ರ ಮಾರ್ಚ್ 21ರ ನ್ಯಾಯಾಲಯದ ದಾಖಲೆಗಳು ಉಲ್ಲೇಖಿಸಿವೆ.
ದೇವಸ್ಥಾನದ ಕಾಣಿಕೆ ಹಣವನ್ನು ಈ ರೀತಿ ನಿರ್ವಹಿಸಿದ್ದನ್ನು ವಿನಾಯಕ ಬಾಳಿಗಾ ತೀವ್ರವಾಗಿ ಆಕ್ಷೇಪಿಸಿದ್ದರು. ಹಣವು ಸ್ವಾಮೀಜಿಯವರಿಗೆ ಸೇರಬೇಕಾಗಿದ್ದರೂ ಸಹ, ಅದಕ್ಕೊಂದು ನಿರ್ದಿಷ್ಟ ಹಣಕಾಸು ನಿಯಮಾವಳಿ ಇದೆ ಎಂದು ಅವರು ವಾದಿಸಿದ್ದರು. ನಿಯಮದ ಪ್ರಕಾರ, ಸಂಗ್ರಹವಾದ ಮೊತ್ತವನ್ನು ಮೊದಲು ದೇವಸ್ಥಾನದ ಬ್ಯಾಂಕ್ ಖಾತೆಗೆ ಜಮೆ ಮಾಡಬೇಕು, ನಂತರ ಆ ಖಾತೆಯಿಂದಲೇ ಸ್ವಾಮೀಜಿಯವರಿಗೆ ಚೆಕ್ ರೂಪದಲ್ಲಿ ಹಣ ವರ್ಗಾಯಿಸಬೇಕು ಎಂದು ಬಾಳಿಗಾ ಕಟ್ಟುನಿಟ್ಟಾಗಿ ಆಗ್ರಹಿಸಿದ್ದರು.
ದೇವಸ್ಥಾನದ ಹಣಕಾಸು ವ್ಯವಹಾರದಲ್ಲಿ ಪಾರದರ್ಶಕತೆ ಕಾಯ್ದುಕೊಳ್ಳುವಂತೆ ಬಾಳಿಗಾ ಎತ್ತಿದ್ದ ಈ ವಿವಾದವೇ ಅವರ ಕೊಲೆಗೆ ಪ್ರಮುಖ ಕಾರಣಗಳಲ್ಲಿ (ಮೋಟಿವ್) ಒಂದಾಗಿದೆ ಎಂದು ನ್ಯಾಯಾಲಯದ ದಾಖಲೆಗಳಲ್ಲಿ ದಾಖಲಿಸಲಾಗಿದೆ. ಈ ಬೆಳವಣಿಗೆಯ ಬೆನ್ನಲ್ಲೇ, 2016ರ ಮಾರ್ಚ್ 21ರಂದು ಕೊಡಿಯಾಲಬೈಲ್‌ನಲ್ಲಿರುವ ತಮ್ಮ ನಿವಾಸದ ಮುಂಭಾಗದಲ್ಲೇ ಬಾಳಿಗಾ ಅವರನ್ನು ಬರ್ಬರವಾಗಿ ಹತ್ಯೆ ಮಾಡಲಾಗಿತ್ತು.
ಈ ರಥ ಕಾಣಿಕೆ ವಿವಾದಕ್ಕೂ ಮುನ್ನವೇ ಬಾಳಿಗಾ ಅವರು ದೇವಸ್ಥಾನದ ಆರ್ಥಿಕ ಲೆಕ್ಕಪತ್ರಗಳ ಮರು ಲೆಕ್ಕಪರಿಶೋಧನೆಗೆ (ರೀ-ಆಡಿಟ್) ಕೋರಿ ನ್ಯಾಯಾಲಯದ ಮೊರೆ ಹೋಗಿದ್ದರು. ನ್ಯಾಯಾಲಯವು ಮರು ಲೆಕ್ಕಪರಿಶೋಧನೆಗೆ ಆದೇಶಿಸಿ, 2016ರ ಏಪ್ರಿಲ್‌ನಲ್ಲಿ ಆಡಿಟ್ ನಡೆಸಲು ದಿನಾಂಕ ನಿಗದಿಪಡಿಸಲಾಗಿತ್ತು. ಆದರೆ, ನಿಗದಿತ ಲೆಕ್ಕಪರಿಶೋಧನೆ ಆರಂಭವಾಗಲು ಕೆಲವೇ ವಾರಗಳಿರುವಾಗ ಬಾಳಿಗಾ ಅವರ ಹತ್ಯೆ ನಡೆದಿತ್ತು.
ಈ ಹತ್ಯೆ ಪ್ರಕರಣದ ತನಿಖೆ ನಡೆಸಿದ್ದ ಪೊಲೀಸರು ಪ್ರಮುಖ ಆರೋಪಿಗಳಾದ ನರೇಶ್ ಶೆಣೈ, ಶ್ರೀಕಾಂತ್, ಶಿವಪ್ರಸಾದ್, ವಿನೀತ್ ಪೂಜಾರಿ, ನಿಶಿತ್ ದೇವಾಡಿಗ, ಶೈಲೇಶ್ ಮತ್ತು ಮಂಜುನಾಥ್ ಶೆಣೈ ಎಂಬ ಏಳು ಮಂದಿಯ ವಿರುದ್ಧ ನ್ಯಾಯಾಲಯಕ್ಕೆ ಆರೋಪಪಟ್ಟಿ (ಚಾರ್ಜ್‌ಶೀಟ್) ಸಲ್ಲಿಸಿದ್ದರು. ಸದ್ಯ ಪ್ರಕರಣದ ವಿಚಾರಣೆ ನ್ಯಾಯಾಲಯದಲ್ಲಿ ಮುಂದುವರಿದಿದ್ದು, ಎಲ್ಲಾ ಆರೋಪಿಗಳು ಜಾಮೀನಿನ ಮೇಲೆ ಹೊರಗಿದ್ದಾರೆ. ಪ್ರಸ್ತುತ ನಡೆಯುತ್ತಿರುವ ವಿಚಾರಣೆ ವೇಳೆ ಹೊರಬಂದಿರುವ ಈ ದಾಖಲೆಗಳು ಬಾಳಿಗಾ ಅವರು ದೇವಸ್ಥಾನದ ಆಡಳಿತದಲ್ಲಿ ಉತ್ತರದಾಯಿತ್ವ ತರಲು ನಡೆಸಿದ ಹೋರಾಟವನ್ನು ಎತ್ತಿಹಿಡಿದಿವೆ.
ಪ್ರಕರಣದ ಪ್ರಮುಖ ಆರೋಪಿ ನರೇಶ್ ಶೆಣೈಗೆ ಜಾಮೀನು ಸಿಕ್ಕಿ ಮಂಗಳೂರು ಜೈಲಿನಿಂದ ಹೊರಬಂದಾಗ, ಸಂಘ ಪರಿವಾರದ ಮುಖಂಡ ಚಕ್ರವರ್ತಿ ಸೂಲಿಬೆಲೆ ಆತನಿಗೆ ಹೂವಿನ ಹಾರ ಹಾಕಿ ಬರಮಾಡಿಕೊಂಡಿದ್ದರು. ಹಿಂದೂ ಕಾರ್ಯಕರ್ತನ ಕೊಲೆ ಪ್ರಕರಣದ ಆರೋಪಿಯೊಬ್ಬನಿಗೆ ಜೈಲಿನಿಂದ ಹೊರಬರುವಾಗ ಹಾರ ಹಾಕಿ, ಸನ್ಮಾನಿಸುವ ಮೂಲಕ ಸ್ವಾಗತಿಸಿದ ಈ ನಡೆಗೆ ಎಲ್ಲೆಡೆ ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು. ಹಂತಕನೊಬ್ಬನನ್ನು ಹೀಗೆ ವಿಜೃಂಭಿಸಿರುವುದು ಸಾರ್ವಜನಿಕ ವಲಯದಲ್ಲಿ ಭಾರೀ ಟೀಕೆಗೆ ಗುರಿಯಾಗಿತ್ತು.
ಬಾಳಿಗಾ ಅವರ ತಂದೆ -ತಾಯಿ ಮಗನ ಸಾವಿನ ನೋವಿನಲ್ಲಿಯೇ ಮೃತಪಟ್ಟಿದ್ದಾರೆ. ಇಬ್ಬರು ಸಹೋದರಿಯರು ಈಗಲೂ ಅಣ್ಣ ಕೊಲೆ ಆರೋಪಿಗಳಿಗೆ ಶಿಕ್ಷೆಯಾಗಬೇಕು ಎಂದು ಕಾನೂನು ಹೋರಾಟ ಮುನ್ನಡೆಸುತ್ತಿದ್ದಾರೆ. ಮಂಗಳೂರಿನ ಸಾಮಾಜಿಕ ಹೋರಾಟಗಾರರಾದ ನರೇಂದ್ರ ನಾಯಕ್‌, ಮುನೀರ್‌ ಕಾಟಿಪಳ್ಳ ಸಹಿತ ಅನೇಕ ಪ್ರಗತಿಪರರು ಪ್ರತಿ ವರ್ಷ ಬಾಳಿಗಾ ಅವರ ಕೊಲೆಯಾದ ದಿನದಂದು ಹಂತಕರಿಗೆ ಶಿಕ್ಷೆಯಾಗಬೇಕು, ಆ ಕುಟುಂಬಕ್ಕೆ ನ್ಯಾಯ ಸಿಗಬೇಕು ಎಂದು ಒತ್ತಾಯಿಸುವ ಮೂಲಕ ಪ್ರಕರಣವನ್ನು ಜನ ಮಾನಸದಲ್ಲಿ ಹಸಿರಾಗಿರುವಂತೆ ಮಾಡಿದ್ದಾರೆ.
