LGBTQIA+ ಪಾರಿಭಾಷಿಕ ಪದಕೋಶ ಮಾಡಲು ಮಾಸಾಂತ್ಯದಲ್ಲಿ LGBTQIA+ ಸಮುದಾಯಗಳ ಜೊತೆ ಸಮಾಲೋಚನಾ ಸಭೆ ನಡೆಸಲಾಗುವುದು ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಡಾ. ಪುರುಷೋತ್ತಮ ಬಿಳಿಮಲೆ ಹೇಳಿದರು.
ಈದಿನ ಯೂಟ್ಯೂಬ್ನಲ್ಲಿ ಹಿರಿಯ ಪತ್ರಕರ್ತರಾದ ಡಿ. ಉಮಾಪತಿ ಅವರೊಂದಿಗೆ ನಡೆದ ಸಂದರ್ಶನದಲ್ಲಿ ಮಾತನಾಡಿದ ಡಾ. ಪುರುಷೋತ್ತಮ ಬಿಳಿಮಲೆ, “ಕನ್ನಡದಲ್ಲಿ ಮೊದಲ ಬಾರಿಗೆ LGBTQIA+ ಪಾರಿಭಾಷಿಕ ಪದಕೋಶ ತರಲು ಪ್ರಯತ್ನ ಮಾಡಲಾಗುತ್ತಿದೆ” ಎಂದು ತಿಳಿಸಿದರು.
ಇದನ್ನು ಓದಿದ್ದೀರಾ? ಪ್ರೀಮಿಯಂ ಲೇಖನ |LGBTQA+ ಕೊಡುಗೆ ಅಗಾಧ: ನಾವು ಕಣ್ಣು ತೆರೆದು ನೋಡಬೇಕಷ್ಟೇ!
“LGBTQIA+ ಬಗ್ಗೆ ಪಾರಿಭಾಷಿಕ ಪದಕೋಶ ನಮ್ಮಲ್ಲಿಲ್ಲ. ಅದಕ್ಕಾಗಿ ಅಕ್ಕೈ ಪದ್ಮಶಾಲಿ ಅವರ ನೇತೃತ್ವದಲ್ಲಿ ರೂಮಿ ಹರೀಶ್, ದಾದಾಪೀರ್ ಜೈಮನ್, ವಸುದೇಂದ್ರ ಮೊದಲಾದವರನ್ನು ಕರೆದು ಸಭೆ ನಡೆಸಲಾಗಿದೆ. ಅವರ ಪ್ರಕಾರ ಕನ್ನಡದಲ್ಲಿ LGBTQIA+ ಸಂಬಂಧಿಸಿ 300 ಪದಗಳು ಸಿಗಬಹುದು. ಈ ಪದಗಳನ್ನು ಬಳಸುವ 32 ಗುಂಪುಗಳಿವೆ ಎಂದು ತಿಳಿಸಿದ್ದಾರೆ. ಆದ್ದರಿಂದ ಈ ತಿಂಗಳ ಕೊನೆಯಲ್ಲಿ ಈ 32 ಗುಂಪುಗಳನ್ನೂ ಕರೆದು ಒಂದು ಸಭೆ ನಡೆಸಲಾಗುವುದು” ಎಂದು ಹೇಳಿದರು.
“ಈ 32 ಗುಂಪುಗಳು ಬಳಸುವ ಪದಗಳನ್ನು ಸಂಗ್ರಹಿಸಿ, ಆ ಪದಗಳ ಬಗ್ಗೆ ವಿವರ ನೀಡುವ ಪ್ರಯತ್ನ ಮಾಡಲಾಗುವುದು. ಈ ಎಲ್ಲ ಕಾರ್ಯಗಳು ಮುಂದಿನ ಡಿಸೆಂಬರ್ ಹೊತ್ತಿಗೆ ಮುಗಿಸಲಾಗುವುದು. ಈ ನಿಟ್ಟಿನಲ್ಲಿ ಸಭೆಗಳಾಗಿವೆ. LGBTQIA+ ಗೆ ಕನ್ನಡದಲ್ಲಿ ಹೇಗೆ ಹೇಳುವುದು ಎಂಬುದನ್ನು ಮತ್ತೆ ಯೋಚಿಸೋಣ” ಎಂದರು.
ಇದನ್ನು ಓದಿದ್ದೀರಾ? ಲಿಂಗತ್ವ ಅಲ್ಪಸಂಖ್ಯಾತರ ಅಸ್ಮಿತೆಯನ್ನೇ ಅಳಿಸುವ ಮಸೂದೆ: ಆತ್ಮಗೌರವಕ್ಕೆ ಕೊಡಲಿಪೆಟ್ಟು
“ಅಂತಾರಾಷ್ಟ್ರೀಯವಾಗಿ ಜನಪ್ರಿಯವಾಗಿರುವ ಪದಗಳು ಇಂಗ್ಲೀಷ್ನಲ್ಲಿ ಸಿಗುತ್ತವೆ. ಆದರೆ ಸ್ಥಳೀಯವಾಗಿ ನಮ್ಮಲ್ಲಿ ಅನೇಕ ಪದಗಳಿವೆ. ಈ ಪದಗಳು ನಾವು ಬಳಸಿದಾಗ ಪ್ರಾದೇಶಿಕ ಸ್ಪರ್ಶ ಬರುತ್ತದೆ. ಆದ್ದರಿಂದ ಜೋಗಪ್ಪ, ಜೋಗಮ್ಮ ಎಲ್ಲ ಪದಗಳನ್ನು ಸೇರಿಸಿ ಒಂದು LGBTQIA+ ಪದಕೋಶವನ್ನು ತರಲಾಗುವುದು. ಕನ್ನಡದಲ್ಲಿ ಮೊದಲ ಬಾರಿಗೆ ಈ ಪ್ರಯತ್ನ ಮಾಡಲಾಗುತ್ತಿದೆ” ಎಂದು ತಿಳಿಸಿದರು.
ಹಲವು ದಶಕಗಳಿಂದ ಕನ್ನಡದಲ್ಲಿ LGBTQIA+ ಸಮುದಾಯವನ್ನು ಸೂಚಿಸಲು ಬಳಕೆಯಾಗುತ್ತಿರುವ ಪದಗಳು ಹೆಚ್ಚಾಗಿ ನಿಂದನಾತ್ಮಕ ಅಥವಾ ಅವಹೇಳನಕಾರಿಯಾಗಿವೆ. ಆದ್ದರಿಂದ ಕನ್ನಡದಲ್ಲಿ LGBTQIA+ ಪಾರಿಭಾಷಿಕ ಪದಕೋಶವೊಂದರ ಅನಿವಾರ್ಯತೆಯ ಬಗ್ಗೆ ಸಮುದಾಯದ ನಡುವೆ ಚರ್ಚೆ ನಡೆಯುತ್ತಲಿದೆ. ಇಂಗ್ಲಿಷ್ ತಿಳಿಯದ ಸಾಮಾನ್ಯ ಜನರಿಗೂ ಸಮುದಾಯದ ವೈವಿಧ್ಯತೆಯನ್ನು ಅರ್ಥೈಸಲು ಕನ್ನಡ ಪಾರಿಭಾಷಿಕ ಪದಕೋಶ ಸಹಾಯವಾಗುವ ನಿರೀಕ್ಷೆಯಿದೆ. ಇದು ತಪ್ಪು ಕಲ್ಪನೆಗಳನ್ನು ಮತ್ತು ಪೂರ್ವಾಗ್ರಹಗಳನ್ನು ದೂರ ಮಾಡಲು ಸಹಕಾರಿಯಾಗಲಿದೆ ಎಂಬ ಅಭಿಪ್ರಾಯ ಸಮುದಾಯದಲ್ಲಿದೆ.
