ಪೋಲಿಯೋ ಮುಕ್ತ ಸಮಾಜ ನಿರ್ಮಾಣದ ಸಂಕಲ್ಪದೊಂದಿಗೆ ರೋಟರಿ ಕ್ಲಬ್ ಬಾಗಲಕೋಟೆ ವತಿಯಿಂದ 190 ಕಿ.ಮೀ ಉದ್ದದ ಕಾರು ಜಾಗೃತಿ ರ್ಯಾಲಿ ಆಯೋಜಿಸಲಾಯಿತು.
ವಿಶ್ವ ಪೋಲಿಯೋ ಮುಕ್ತ ದಿನಾಚರಣೆಯ ಅಂಗವಾಗಿ ನಡೆದ ಈ ಅಭಿಯಾನವು ಮಕ್ಕಳ ಆರೋಗ್ಯದ ರಕ್ಷಣೆ ಮತ್ತು ಪೋಲಿಯೋ ನಿರ್ಮೂಲನೆಯ ಮಹತ್ವವನ್ನು ಜನರಿಗೆ ತಲುಪಿಸುವ ಉದ್ದೇಶ ಹೊಂದಿತ್ತು.
ಬಾಗಲಕೋಟೆಯಿಂದ ಆರಂಭಗೊಂಡ ರ್ಯಾಲಿಯು ಮುಧೋಳ, ಜಮಖಂಡಿ, ರಾಮತೀರ್ಥ ಮಾರ್ಗವಾಗಿ ವಿಜಯಪುರ ತಲುಪಿತು. ಸುಮಾರು 190 ಕಿ.ಮೀ ಸಂಚರಿಸಿದ ರ್ಯಾಲಿಯ ಮೂಲಕ ಪೋಲಿಯೋ ನಿರ್ಮೂಲನೆಗೆ ನಿರಂತರ ಜಾಗೃತಿ ಹಾಗೂ ಸಾರ್ವಜನಿಕರ ಸಹಭಾಗಿತ್ವದ ಅಗತ್ಯವನ್ನು ಸಾರಲಾಯಿತು.
ವಿದ್ಯಾರ್ಥಿಗಳಿಂದಲೂ ಜಾಗೃತಿ ಅಭಿಯಾನಕಾರು ರ್ಯಾಲಿಯ ಜೊತೆಗೆ ಬಾಗಲಕೋಟೆ ನಗರದಲ್ಲಿ ಪ್ರೌಢಶಾಲಾ ವಿದ್ಯಾರ್ಥಿಗಳ ಜಾಗೃತಿ ಜಾಥಾ ನಡೆಯಿತು. ವಿದ್ಯಾರ್ಥಿಗಳು, ಶಿಕ್ಷಕರು ಮತ್ತು ರೋಟರಿ ಸದಸ್ಯರು ಉತ್ಸಾಹದಿಂದ ಪಾಲ್ಗೊಂಡು ಮಕ್ಕಳ ಆರೋಗ್ಯ, ಪೋಲಿಯೋ ತಡೆಗಟ್ಟುವಿಕೆ ಹಾಗೂ ರೋಗ ನಿರ್ಮೂಲನೆಗೆ ಜನರ ಜವಾಬ್ದಾರಿಯ ಕುರಿತು ಜಾಗೃತಿ ಮೂಡಿಸಿದರು.
ಪೋಲಿಯೋ ನಿರ್ಮೂಲನೆಗಾಗಿ ಆರೋಗ್ಯ ಜಾಗೃತಿಯನ್ನು ಜನಸಾಮಾನ್ಯರ ಬದುಕಿನ ಭಾಗವಾಗಿಸಬೇಕು. ಮಕ್ಕಳಿಗೆ ಅಗತ್ಯವಿರುವ ಲಸಿಕೆಗಳನ್ನು ಕೊಡಿಸುವುದು ಹಾಗೂ ಆರೋಗ್ಯ ಇಲಾಖೆಯ ಕಾರ್ಯಕ್ರಮಗಳಿಗೆ ಸಹಕರಿಸುವುದು ಪ್ರತಿಯೊಬ್ಬರ ಜವಾಬ್ದಾರಿಯಾಗಿದೆ ಎಂಬ ಸಂದೇಶವನ್ನು ಕಾರ್ಯಕ್ರಮದ ಮೂಲಕ ಸಾರಲಾಯಿತು.
ರೋಟರಿ ಕ್ಲಬ್ ಬಾಗಲಕೋಟೆಯ ಅಧ್ಯಕ್ಷ ವಿಜಯಕುಮಾರ ಹೊಸೂರ, ಕಾರ್ಯದರ್ಶಿ ಡಾ. ಅವಿನಾಶ ಕಟ್ಟಿಮನಿ, ಖಜಾಂಚಿ ತುಕಾರಾಮ್ ಟಿ.ಎನ್. ಹಾಗೂ ಹಿರಿಯ ರೋಟರಿಯನ್ನರಾದ ಡಾ. ಗಿರೀಶ ಮಾಸೂರಕರ, ಚಂದ್ರಶೇಖರ ಕಟ್ಟೇಗೇರಿ, ಅಶೋಕ ಶಿರಬೂರ, ಶಿವಕುಮಾರ ನಂದಿಕೋಲಮಠ ಸೇರಿದಂತೆ ಕ್ಲಬ್‌ನ ಹಲವು ಸದಸ್ಯರು ಪಾಲ್ಗೊಂಡಿದ್ದರು.
