ಗೌರಿ-ಗಣೇಶ ಹಬ್ಬದ ಸಂಭ್ರಮದ ನಡುವೆ ಬೆಂಗಳೂರು ದಕ್ಷಿಣ ತಾಲ್ಲೂಕಿನ ಕಗ್ಗಲೀಪುರದಲ್ಲಿ ಮುಸ್ಲಿಂ ದಂಪತಿಯೊಬ್ಬರು ನೂರಾರು ಮಹಿಳೆಯರಿಗೆ ಸಾಂಪ್ರದಾಯಿಕ ‘ಬಾಗಿನ’ ಹಾಗೂ ಪೂಜಾ ಸಾಮಗ್ರಿಗಳನ್ನು ವಿತರಿಸುವ ಮೂಲಕ ಹಿಂದೂ-ಮುಸ್ಲಿಂ ಭಾವೈಕ್ಯತೆಯ ವಿಶಿಷ್ಟ ಸಂದೇಶ ಸಾರಿದ್ದಾರೆ. ಜಬೀನಾ ತಾಜ್ ಹಾಗೂ ಕೆ.ಎಸ್. ಪರ್ವೀಜ್ ದಂಪತಿ ತಮ್ಮ ಈ ಅರ್ಥಪೂರ್ಣ ಕಾರ್ಯದ ಮೂಲಕ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಕಗ್ಗಲೀಪುರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಸೇವೆ ಸಲ್ಲಿಸುತ್ತಿರುವ ಅಂಗನವಾಡಿ ಶಿಕ್ಷಕಿಯರು, ಸಹಾಯಕಿಯರು ಹಾಗೂ ಆಶಾ ಕಾರ್ಯಕರ್ತೆಯರು ಸೇರಿದಂತೆ ನೂರಾರು ಮಹಿಳೆಯರನ್ನು ಹಬ್ಬದ ಪ್ರಯುಕ್ತ ವಿಶೇಷವಾಗಿ ಆಹ್ವಾನಿಸಿ ಸತ್ಕರಿಸಲಾಯಿತು. ಕಾರ್ಯಕ್ರಮದಲ್ಲಿ ಪಾಲ್ಗೊಂಡ ಪ್ರತಿಯೊಬ್ಬರಿಗೂ ಅರಿಶಿನ, ಕುಂಕುಮ, ಹೂವು, ಬಳೆ, ಕೊಬ್ಬರಿ, ಗಂಧದಕಡ್ಡಿ, ಕರ್ಪೂರ, ದಾರದ ಉಂಡೆ, ಸೀರೆ, ರವಿಕೆ ಕಣ, ಹಣ್ಣು ಹಾಗೂ ತಾಂಬೂಲ ಒಳಗೊಂಡ ಮಂಗಲಕರ ಬಾಗಿನವನ್ನು ನೀಡಿ ದಂಪತಿ ಶುಭಾಶಯ ಕೋರಿದರು.
ಬಾಗಿನ ಸ್ವೀಕರಿಸಿದ ಬಳಿಕ ಸ್ಥಳೀಯರಾದ ಲಕ್ಷ್ಮಿ, ನೇತ್ರಾವತಿ ಹಾಗೂ ಭಾರತಿ ಹರ್ಷ ವ್ಯಕ್ತಪಡಿಸಿದರು. “ಹಲವು ಹೆಣ್ಣುಮಕ್ಕಳಿಗೆ ಹಬ್ಬದ ಸಂದರ್ಭದಲ್ಲಿ ತವರು ಮನೆಯಿಂದ ಉಡುಗೊರೆ ಅಥವಾ ಸತ್ಕಾರ ಸಿಗುವ ಸೌಭಾಗ್ಯವಿರುವುದಿಲ್ಲ. ಅಂತಹ ಮಹಿಳೆಯರ ಪಾಲಿಗೆ ಈ ದಂಪತಿ ತವರಾಗಿ ನಿಂತು ಆ ಕೊರಗನ್ನು ನೀಗಿಸಿದ್ದಾರೆ. ಮಾನವೀಯತೆ ಹಾಗೂ ಸೌಹಾರ್ದತೆಯನ್ನು ಬೆಸೆಯುವ ಇವರ ಈ ಕಾರ್ಯ ಸಮಾಜಕ್ಕೆ ಅತ್ಯುತ್ತಮ ಮಾದರಿಯಾಗಿದೆ” ಎಂದು ಶ್ಲಾಘಿಸಿದರು.
ಈ ಸಾರ್ಥಕತೆಯ ಕುರಿತು ತಮ್ಮ ಅನಿಸಿಕೆ ಹಂಚಿಕೊಂಡ ಜಬೀನಾ ತಾಜ್, “ನಾವೆಲ್ಲರೂ ಮನುಷ್ಯರು; ಜಾತಿ, ಧರ್ಮಗಳನ್ನು ಮೀರಿ ಅಕ್ಕ-ತಂಗಿಯರಂತೆ ಬದುಕುತ್ತಿದ್ದೇವೆ. ಪ್ರತಿ ವರ್ಷವೂ ಗೌರಿ-ಗಣೇಶ ಹಬ್ಬದಂದು ಈ ರೀತಿ ಪೂಜಾ ಸಾಮಗ್ರಿ ಹಾಗೂ ಬಾಗಿನ ನೀಡುವುದು ನಮಗೆ ಅತೀವ ನೆಮ್ಮದಿ ಮತ್ತು ಧನ್ಯತಾಭಾವವನ್ನು ತರುತ್ತದೆ” ಎಂದರು.
ಹಬ್ಬಗಳ ಆಶಯದ ಬಗ್ಗೆ ಮಾತನಾಡಿದ ಕೆ.ಎಸ್. ಪರ್ವೀಜ್, “ಗೌರಿ-ಗಣೇಶ, ಯುಗಾದಿ, ರಂಜಾನ್ ಅಥವಾ ಬಕ್ರೀದ್ ಹೀಗೆ ಯಾವುದೇ ಹಬ್ಬವಿರಲಿ, ಅವೆಲ್ಲವೂ ಶಾಂತಿ ಮತ್ತು ಸೌಹಾರ್ದತೆಯನ್ನೇ ಸಾರುತ್ತವೆ. ಮೈತ್ರಿ ಬೆಳೆಸುವ ಇಂತಹ ಕಾರ್ಯಗಳ ಜೊತೆಗೆ, ಸ್ಥಳೀಯ ದೇವಸ್ಥಾನಗಳ ಜೀರ್ಣೋದ್ಧಾರ ಹಾಗೂ ನಿರ್ಮಾಣ ಕಾರ್ಯಗಳಲ್ಲೂ ಭಾಗಿಯಾದ ತೃಪ್ತಿ ನಮಗಿದೆ” ಎಂದು ತಮ್ಮ ಅನುಭವ ಹಂಚಿಕೊಂಡರು.
